Tamos nun d’esos periodos que nun son carne nin pescáu, un
pocu como esos productos veganos que sirven pa casi too. Nun aporta la seronda
y el branu nun acaba d’ise; nun hai vraneantes pero’l personal intenta caltener
les rutines del estivu, como refugándose a aceptar lo que vien, anque n’Asturies
el tiempu suel danos regalos estupendos; como la mañana de güei.
Suponse que tamos a la espera del esperáu lloviu, toma
redundancia, qu’aportará, dicen, a nun tardar y de la mano d’un ex-furacán;
porqu’agora, dempués del inventu de la cicloxénesis, pallabru que paez ideáu
para meter el mieu nel cuerpu al personal, dicen-y a dalgunes borrasques, de les
de siempres, exfuracán, supongo que tamién pa ennoblecer a lo que venga.
Pero les coses del entretiempu; dempués de una goterada
lixera de primer hora, salió’l sol y quedó una mañana de sablera de les de recordar.
Baxamar con espaciu pa dalgún partíu playeru, poca xente, foles pequeñes y
perfectes de malapenes un metru que namái un surfista paez tener visto d’interés.
El mozu nun paez tar en nivel básicu, tampoco ye un espertu;
diríase que nivel intermediu, pero tien unes foles regulares de bon recorríu n’esclusividá
que-y permiten elexila, alzase, correla y hasta xugar piernes hasta cerca la
playa. Dempués, aprovecha la posa ente secuencies de foles pa tornar a tomar
posición y repetir el exerciciu. Güei pa él va ser un gran día de surf y tendrá
aprovechao’l tiempu enantes de qu’aporte la seronda y les coses camuden.
Na política les coses paecen ser estremaes. Estos díes asistimos
al paripé anual de les bones pallabres por parte del presidente del Principáu y
a los reproches de los representantes de la oposición. Unos y otros, con más
responsabilidá de Barbón, por aquello del gobiernu, nun paecen enterase, o nun
quieren, del periodu d’entretiempu nel que mos atopamos, presaxu d’un inviernu
políticu pa toa Europa nel que se van acabar los créditos a fondu perdíu o baxu
interés y nel que los estremaos países van tener que pechar con situaciones perdificiles
no económico, y de rebote no social, que nun van dexar espaciu p’ayudar a los
billorios del campu européu, grupu nel que, desafortunadamente, mos alcontramos.
Asturies sigue a la morra en munches de les estadístiques
negatives del país, como l’avieyamientu o la tasa de natalidá, tamién la del
consumu d’antidepresivos y ansiolíticos, y ye duldoso que namái con bones pallabres,
o con sidra, vayamos a solucionar el futuru de la rexón.
Raúl Suevos
A 14 díes vencíos de septiembre de
2022
Torna en castellán en repdiv.blogspot.com
No comments:
Post a Comment