Garzón, el ministru tenue

 

Aínda lu recuerdo aportando al so primer conseyu de ministros, col so traxe nuevu y el so canesú; uff, non; perdón, cola so carterina de ministru, de cueru negru brillante recién salío de les manes del guarnicioneru, col nome del su flamante ministeriu escritu en lletres doraes baxo l’escudu d’España. La so cara reflexaba la satisfacción del que yá tien algamao too na vida. Y seguramente ye asina.

El mozu Garzón, secretariu xeneral d’Esquierda Xunía, y miembru del Partíu Comunista -que sí, ho, entá esiste, y tien les sos pretensiones; nunca dexó de teneles- facíase cargu del ministeriu de Consumu, un garitu recién creáu colo qu’enantes yera una direición xeneral pa cumplir colo acordao nel pactu ente Sánchez ya Iglesias, aquel que, supuestamente, nun-y diba dexar dormir, daqué que, anguaño, y dada l’ausencia de goyeres del presidente de nueso, nun paez qu’asocediere.

Dende esi ministeriu, el mozu Garzón tienmos conmocionao con intervenciones estravagantes y campañes, casi toe0s parcial o totalmente xustificaes pol fondu del asuntu que trataben, pero toes elles, tamién, absolutamente estemporánees y faltes de tactu na forma d’asoleyales. En xeneral consiguía el repunu casi xeneralizáu del personal, incluyendo los propios collacios de gobiernu, y, en dalgún casu, como’l de les macrogranxes castellanes, estrozaba la campaña electoral del so propiu grupu.

Estos días asistimos otra vegada a una campaña tocantes al consumu de les families. Nesti casu ye la vicepresidenta Díaz, comunista como él y supuesta xefa de files nes eleiciones vinientes con esi inventu que nun acaba de arrancar que’l so nome ye Sumar, la que se tien llanzao a promover una cesta básica de la compra coles grandes superficies par solliviar la dura esistencia de les families españoles. Dalgo a lo que paez que nun-y facen ascos dalguna de les grandes marques, y nun ye pa menos.

L’asuntu yá tien levantao una riña interna nel gobiernu, pues vien depués de la estrambótica  propuesta de topar los precios, aición, creo, que sedría ilegal nesa Europa a la que pertenecemos. Sicasí, a min que nun soi más qu’un veceru d’esos establecimientos, paezme que flacu favor mos fae al conxuntu de la nación, pos un de los daños colaterales sedría la desapaición de los yá escarsos fruteros, pescaderos o carniceros de barriu, yá reducíos na mayoría de ciudaes. Tampocu diba favorecer a los productores que n’orixe vedríen como, nel meyor de los casos, los precios siguiríen siendo antieconómicos pa ellos, o inclusive baxaríen pola presión que sobro ellos diben exercer los grandes distribuidores. Eso sí, col cuentu de la cesta básica compraríemos más terceros productos yá de pasu nes grandes superficies, ¿O non?

Y mientes Garzón desapaecíu.

Raúl Suevos

A 8 díes vencíos de setiembre de 2022

Torna en castellán en repdiv.blogspot.com