Aporté a vivir n’Italia cola mio moza familia na seronda del
96, y, anque los estereotipos italianos n’España mos dicen que somos bien
paecíos, la realidá enfrentómos a un choque cultural nidiu en tolos sentíos
que, xusto ye dicilo, superóse nunos meses pa llevanos a toos a abrazar la
cultura italiana.
Al entamu había dos asuntos que me chocaben particularmente.
L’abusu de términos ingleses, puesto que, faltos d’una Academia de la llingua,
nun incorporen por italianización sinon que caltienen el estranxerismu tal cualu;
lo que me dexaba plasmáu yá que, estudiante de la llíngua del Dante, paecíame
incomprensible que permitieran tala invasión. Coses d’Italia.
La otra cuestión yera la política, vivida directamente cuando
demientres dellos díes pasaba per delantre de casa la columna blindada que
tresportaba a Toto Riina al procesu pol atentáu de la Galería de los Uffizi.
Una política qu’a mim me sorprendía con ca noticia nueva o matiz que decataba
en parolaes colos collacios o na prensa cotidiana. Costábame entender que’l
líder del Partíu de la Sinistra, heriede tres Tanyentopoli de socialistes y
parcialmente comunistes, se paseara nel branu peles costes italianas nun veleru
de 15 metros de la so propiedá, o que’l dirixente de Refundazione Comunista,
heriede del Partíu Comunista, fuera elexíu tolos años como l’home más elegante
d’Italia, ensin necesidá d’usar los míticos xerseys de Marcelino Camacho. Coses
d’Italia.
El desencantu per un llau y el desapegu de la sociedá
italiana, presaxada yá por Pasolini, tán detrás de lo que vemos nos años
caberos. Un Berlusconi aportáu a la política pa escapar de los sos múltiples
procesos por corrupción, al que siguió un Liga Norte travestida en populismu
nacional pa dar pasu darréu a un cómicu antisistema cargáu d’estrelles y
tracamúndiu, mentes entemediu componendes estremaes de la esquierda clásica
mangoneaben los gobiernos italianos emsin ser a revertir la sienda d’escayencia
na que se bancia’l país estos decenios caberos.
Meloni, a la que la nomada prensa progresista trata
d’esgañizar estos díes caberos, y a la que nun paecen querer dar cuartel una
vegada ganaes les eleiciones, nun ye más que la espresión del deseyu de los italianos
de recuperar el puestu que-yos correspuende na cultura y la economía europea, y
nel so propiu país. Nun veo per dalu llau’l peligru sollertáu desgualdradamente
por munchos, ente ellos la propia Comisión Europea, nuna salida de tiestu
incomprensible pola so parte, puestu que los equilibrios inestables de la
propia coalición del gobiernu futuru nun lo va permitir.
Meloni, ultraderechista a los quince años, ye una señora que
yá foi ministra nun gobiernu Berlusconi, que supo llegar a los italianos dende
un populismu de dreches nidiu, que nun llama a ocupar les cais como facen los
progresistes d’esquierda, nin utiliza l’escrache como arma d’ataque personal,
nin bloquia conferenciantes universitarios. Ye una muyer que tien llevao güei a
una cayida de les bolses europees, sacantes una, la italiana, y a la que va haber
que dar un marxe de confianza depués de ganar con llimpieza total les
eleiciones d’una Italia fundadora de la Xunión Europea y de la Otan. Ye lo qu’hai.
Raúl Suevos
A 26 díes vencíos de septiembre de
2022
Torna en castellán en repdiv.blogspot.com
No comments:
Post a Comment