Anda Asturies pendiente de la declaración de la Cultura
sidrera como patrimoniu inmaterial de la humanidá, con esmolimientu pa dalgunos
énte l’anunciáu retrasu d’un añu na evaluación de la mesma pol númberu eleváu
de peticiones aportaes al l’organismu. Quién sabe per ú va salir el sol nesti
asuntu que, sicasí, yá vieno acompañáu d’una dosis importante de publicidá
gratuita.
Al redol d’esti asuntu, el de la sidra y el so reconocimientu
mundial, paez notase delles reacciones que, en dalgunos casos, nun paecen
contar col laude rexonal, como los intentos carballones por declarase capital
–tamién- de la sidra, dalgo que levanta angüeñes en Nava y Villaviciosa, pero
que nun tien porque ser apreciada en dala parte del Principáu, au, con mayor o
menor razón, toos mos sentimos capital de la sidra. Sicasí, dáme a min, l’asuntu
paez centrase esclusivamente nel doráu y apreciáu líquidu, y hai otros aspeutos
non menos importantes, creo.
La mañana del domingu, espléndida en Xixón, daba pa un paséu
y bañu en San Lorenzo, ya invitaba, darréu, a tomar una botella de sidra nuna
conocida y asentada sidrería xunto al Muru, mui cerca d’aquella cai que viera
autoinmolase va más de mediu sieglu al “fíu de la Perala”, con gran conmoción
de la entoncenes sele villa de xovellanos.
Na hora del vermú acomodense na so llarga barra unos cuantos
parroquianos. Nun estremu un atentu camareru atiende la historia del usuariu sobro
les dificultaees que supón la crianza de fios adolescentes, especialmente
cuando son alquiríos nun segundu matrimoniu, como yera’l so casu. A manzorga, l’otru
camareru remacha-y al so interlocutor un “ye lo qu’hai, tienes qu’entendelo” que
suena a diván de siquiatra. Más al fondu, varios veceros discuten acaloraos
sobro’l xuegu del Sporting, magar haber ganao fuera de casa, hasta que, l’anterior
camareru aprovecha l’himnu d’España que suena na televisión pa esixir silenciu,
y a mou de llarga cambiada, piellar el discutiniu enantes de que pueda llegar a
mayores. Too ello mientes escancia sidra maxistralmente a los diferentes
clientes.
Son toos varones los que s’acomoden a esta hora nesta barra enllena
de vida, quiciabes les respectives tean preparando la comida, o na sablera,
pero en munchos casos avezen a frecuentar la sidrería no horariu de tarde con
elles dando otru ambiente al local, no qu’agora llaman socializar y enantes
alternar. Tamos énte un fenómenu que, cola sidra de sofitu fondamental, va muncho más allá seguramente de lo que la UNESCO va llegar a talantar.
Raúl Suevos
A 6 díes vencíos de setiembre de 2022
Torna en castellán en repdiv.blogspot.com
No comments:
Post a Comment