Va yá tiempu que se xingó'l Perú

 

Torna estos díes el Perú a ocupar les cabeceres de los medios de comunicación; veníalo faciendo nos meses caberos poles tases de mortalidá tarrecibles del covid nesa nación pero agora, otra vegada, ye la deposición d’un presidente a manes del Congresu de diputaos la que da que falar al restu del mundu.

Conversación na catedral ye’l títulu d’una de les grandes noveles de Mario Vargas Llosa, nella l’autor fai entrugase al protagonista per ¿Cuándo se xingó’l Perú? que, al paecer, sedría nos años cincuenta, demientres la dictadura que tocó naquella dómina y que desataría de forma radical la corrupción nel país. Ye la opinión de Vargas Llosa, un gran intelectual y conocedor del so país como pocos.

Nesa dómina, por embargu, tamién taba vixente la doctrina de Victor Raúl Haya de La Torre, un ideólogu de calter antiimperialista, izquierdista y anticomunista que se considera como una de les grandes figures hispanoamericanes y que a lo llargo del tiempu dio amueses de tenacidá y llimpieza moral mientes sufría cárcel, exilios y robu d’eleiciones. Son décades nes que les lluces y les solombres diéronse con igual abondanza nel Perú.

Nos años caberos, per otru llau, asistimos a una destitución costante de presidentes, siempres por casos de corrupción, o aínda peor. Alán García, del APRA de Haya de la Torre, tres una primera presidencia naufragada, repitió na Casa de gobiernu peruana pa finar suicidándose va unos pocos años, el nacionalista Ollanta Humalá ta encarceláu por corrupción, l’incalificable Fujimori tamién, pero por mayores delitos, el cholo Toledo ta fuyíu, l’impecable Luzisnki depusiéronlu fa dos años polo mesmo. Un ensin vivir.

El sistema políticu peruanu ye francamente meyorable. El so sistema d’aforamientos esaxeráu fai que’l Congresu tea llenu de personaxes en gueta y captura. L’actual cuenta con 68 acusaos de dalgún tipu de corrupción ente 130 curules. Ye un congresu estraordinariu elexíu tres la disolución del anterior pol presidente Vizcarra, qu’ocupara’l puestu tres la cayida de Luzinski. Pa tremecer.

Vizcarra ye destituyíu, va una selmana, porque nun contaba con un partíu que lu sofitare –en Perú nun esiste un sistema de partíos definíu- y tres ser acusáu, anque nun encausáu, de corrupción nuna etapa anterior como gobernador. Esto asocede cuando n’abril toquen eleiciones presidenciales y ye sustituyíu pol presidente del congresu, Merino, que güei acaba d’arrenunciar tres díes de manifestaciones xenerales na cai y pal que nun atopaben sustituto hasta que dieron con presidente de la mesa d’edá. ¿Cabe más desatín?

Mientes crez el desgobiernu, el VRAEM, Valle de los Ríos Apurimac, Ene y Mantaro, acomodase como la rexón más floreciente ente les productores de cocaína del mundu; y a min dame por pensar que’l Perú entamó a xingase’l mesmu día que’l xeneral San Martín decidió colar pa París, tres entrevistase col caudillu Bolívar. Ellí se xingó’l Perú.

Raúl Suevos

En Xixón a 15 díes vencíos de payares de 2020

Torna en castellán en repdiv.blogspot.com

¿Qué va ser de la Defensa Europea ensin Trump?

 

Tamos metanes el periodu d’euforia tres la victoria de Biden; paez como si s’elixere al presidente d’Europa al tenor de les munches llectures que se lleven a cabo na prensa europea y nacional. Mídese la rapidez na felicitación de los líderes de cada país o, nel so casu, l’ausencia de reacción. Siempres pasa lo mesmo cola entronización del Cesar nuevu, a lo llargo y ancho del Imperiu esperense xestos, nun sentíu o notru.

Hai un aspeutu, creo yo, nel que los analistes entá nun entraron y que, me paez, esconde una importancia trascendental pal futuru d’Europa. Trátase de la Defensa, la Defensa Europea, con mayúscules, elementu subyacente dende l’entamu ana propia creación del suxetu políticu européu. Un integrador al que Donald Trump, indireutamente, dio’l mayor impulsu dende la nacencia de la propia Unión cola Comunidá Europea del Carbón y l’Aceru nel lloxanu 1952, preséu pensáu namái pal caltenimientu indefiníu de la paz nel continente y qu’acabó pariendo un xigante.

La política esterior de Trump foi rabiosamente aisllacionista, con amueses costantes de malquerencia haza los países europeos, individualmente y en conxuntu. Dalgunes de les sos salíes de tonu van quedar pa la historia de la diplomacia pero, en xeneral, sirvieron para meter el mieu nel cuerpu, lixeramente a lo que se ve, a los líderes europeos, que nos años caberos, coincidiendo cola so presidencia, llevaron a cabo un impulsu descomanáu na construcción d’esa  necesaria Defensa Europea, col Fondu de Defensa Européu, dientro de la Cooperación estructurada permanente, como mayor llogru ene otros tamién significativos.

Queda munchísimo por facer, especialmente nel campu de les operaciones esteriores, que ye au se pierden vides nacionales y con elles sofitos eleutorales na patria, pero la situación actual ye muncho meyor de la qu’había al rematar el mandatu Obama. Agora les espectatives son munches con l’aportar de Biden, pero yo nun tengo nidio que seya un futuru falagueru.

Cuesta creer que’l presidente nuevu vaya a camudar de guelpe la política aisllacionista esterior; la so preocupación va siguir siendo China, haza onde yá basculara Obama l’interés de los EEXX. Y Putin, magar les sos inquietudes bélica y política –acaba de algamar un altu’l fueu nel Altu Karabaj que’l so beneficiariu principal va ser Erdogán- nun van ser motivu abondo como pa camudar la retirada USA n’Europa. La Unión Europea va siguir sola colos sos demongrios.

El problema ye que la llectura superficial pue llevar a pensar a gran parte de los socios que con Biden equí yá nun merez la pena l’esfuerciu de siguir construyendo la Defensa Europea, y eso déxamos, cuando dala de les menacies desapaeció sinon al contrario, desnudos metanes un mundu en plenu fervor.

Raúl Suevos

En Xixón a 10 díes vencíos de payares de 2020

Torna en castellán en repdiv.blogspot.com

Torna Evo

 

Evo Morales fo un gran presidente pa Bolivia demientres la mayor parte de los sos mandatos; daqué estraordinario pal país dada la historia de corrupción ya incompetencia de munchos de los sos gobernantes. Morales aportó al poder  ganando unes eleiciones llimpies tres una de les periódiques crisis del país. Venía de una  carrera llarga como dirixente sindicalista de los productores de coca bolivianos, y los sos mandatos carauterizaronse por una mestura sabia d’esquierdismu batallosu nes declaraciones, aderezaes con grandes amueses de veneración haza Fidel Castro y Hugo Chávez, y un pragmatismu conducente na xestión económica del país qu’encamentó a un economista mozu del bancu de Bolivia, Luis Arce Catacora. El resultáu, cola ayuda de los precios de les materies primes demientres la mayor parte de los sos mandatos, fo’l mayor periodu d’esporpolle del país y de reducción de la probitú na so historia.

El percorríu aniciase en 2006, y, tres dos llexislatures, Evo promueve una constitución nueva que s’aprueba y permite-y presentase otra vegada, y ganar. Enantes de finalizar el periodu, al mou Chávez, llanza un referéndum que lu autorice a recandidase, pero ye refugáu. Va ser el tribunal supremu, controláu por él mesmu, el que lu va autorizar a presentase para ganar nunes eleiciones calificaes como amañaes y que van dar llugar a los disturbios que van acabar cola cayida del so gobiernu, y el so esiliu demientres l’añu caberu na Arxentina.

El gobiernu provisional, supuestamente golpista pal MAS, Movimientu al Socialismu, que sofita a Morales y la so xente, convocó eleiciones como prometiera al facese cargu del gobiernu, y estes foron ganaes por Luis Arce de forma contundente lo que lu convierte nel presidente actual de Bolivia tres una toma de posesión a la que tien asistío SM el Rei, protagonista involuntariu d’un recibimientu protocolariu grotescu nel aeropuerto d’El Alto, en La Paz, acompañáu por un Iglesias qu’aprovechó’l viaxe pa afondar nes sos maniobres bolivarianes.

A Luis Arce llantolu Evo como tiesta de llista guetando aselar la imaxe radical del MAS, anque-y punxo un can guardián na figura del que güei ye’l so vicepresidente, David Choquehuanca, d’orixe aimara y ministru d’esteriores na etapa de Morales. Vien agora’l momentu de definir el futuru del país haza una deriva bolivariana ya indixenista, como paez ser el deséu d’Evo Morales o, pol contrario, buscar un camín propiu y más pragmáticu, como podría señalar la trayectoria y formación téunica de Luis Arce.

Güei’l gobiernu recién nomáu paez indicar lo segundo, pero delles protestes na cai de grupos indíxenes recuerden la achaparrada solombra d’Evo, que nun va librar la plaza ensin engarradiella, y qu’ensin dulda va recordar l’ostracismu de  Correa a manes de Lenin Moreno n’Ecuador, o como Néstor Kirchner enterró al so mentor Duhalde n’Arxentina.  Námai Putin paez saber cómo controlar esti tipu de sucesión.

Raúl Suevos

En Xixón a 10 díes vencíos de payares de 2020

Torna en castellán en repdiv.blogspot.com

¿Qué va ser de Cuba ensin Trump?

 

Dicen que güei’l gobiernu chinu felicitó a Biden pola so victoria eleutoral, namái falta Putin a la cita de cortesía y, poques gracies, el propiu Trump, qu’entá se resiste a reconocer lo que paez un fechu irretrucable y que, cola so actitú enzancadora pue qu’algame a facer perder a los republicanos los dos y definitivos escaños senatoriales que se van elexir el xineru viniente.

Estos meses que queden hasta la llegada del equipu nuevu a la Casa Blanca van ser tiempos d’especulaciones sobro les polítiques nueves de los EEXX, tantu nel ámbitu internu como nel esternu; y ye nesti aspeutu caberu, el de los asuntos esteriores, au les mires son mayores depués del cuatrieniu trumpista. En Miami dicen que, mientes la negación de la evidencia eleutoral intenta resistise, los analistes, qu’ellí se llamen cubanólogos, facen cábales infinites sobro’l futuru viniente de la perla del Caribe.

En Cuba les coses tán difíciles, cada día cuesta más “resolvel”, esi accionar diariu que consiste n’acabar el día con un mínimu aporte proteínicu nel cuerpu. Nos tiempos caberos el son cubanu márcalu la economía venezuelana que, como ye sabío, nun ta pa munches fiestes, y Cuba necesita divises pa importar y pagar los alimentos que nun ye a producir. Nesa necesidá xustificase la recien reapertura al turismu tres la folada inicial del covid y que nel primer vuelu traxo diez rusos positivos. La necesidá apremia.

Trump tien tomao midies aparentes mientres el so mandatu, pa atrayer al votante cubanoamericanu asitiáu en Florida, como’l control de les remeses, los viaxes a la islla, o l’atracadura de los cruceros nella. Toes árees nes que la familia Trump nu tien intereses económicos, la Western Union, la industria de cruceros y les llínees aérees charter. En xeneral hai más de cosmética qu’otra cosa y el resultáu ye un refuerciu de la idea del bloquéu qu’ayuda al réxime cubanu a caltener la falsa idea de que tán en guerra col imperiu y, poro, toos deben sometese pol bien de la patria.

La realidá ye que poques cosas van camudar con Biden, quiciás les cosmétiques, que cuenten col sofitu de delles industries USA pero, el nuevu presidente formaba parte del equipu Obama, el mesmu que nos sos díes caberos de mandatu eliminó la Lléi d’axuste que permitía a los cubanos establecese nos USA ensin necesidá de visáu y que, teóricamente, afalaba’l fenómenu de los balseros, qu’anguaño siguen colando de la islla pero ensin l’amparu d’antañu. Ellí taba Biden.

Los cambeos na islla van aportar cola desapaición de Raúl Castro, apartáu de la escena pública últimamente y xenerando con ello tou tipu de rumores sobro la so salú; pues hasta que nun desapaeza ye difícil que naide mueva ficha ellí y tampocu ye plausible que los sos vieyos correlixionarios seyan a aguantar la presión que se va producir tres el decesu. A Díaz Canél, el presidente nominal actual, va-y quedar el dilema de lliderar una transición al mou Suarez o intentar perpetuase a la manera de Maduro, daqué, esto cabero, difícil de maxinar.   

Raúl Suevos

En Xixón a 13 díes vencíos de payares de 2020

Torna en castellán en repdiv.blogspot.com

La Granxa de trolls

 

Falamos d’una granxa na que nun hai nin pites nin gochos, nin dengun de los animales que se remontaron naquella que tan maxistralmente retrató George Orwell; pero sí que se rellaciona en cuanto que mos remite a un mundu, l’actual, nel que mos atopamos con munchos de los demongrios que’l xenial autor de “Homage to Catalonia”, ente otres obres, describiera.

Estes granxes aportaron a les primeres páxines de los periódicos con ocasión de la victoria sorpresiva de Donald Trump va cuatro años nes eleiciones presidenciales de los EEXX. Taben formaes por docenes d’especialistes de materies estremaes y, de xacíu, especialistes informáticos, que se dedicaben a preparar histories, falses; y memes cargaos de mala intención, pa ser diseminaos al traviés de les redes y dende falses cabeceres dixitales; too ello col oxetivu d’influyir nes perceiciones de los votantes norteamericanos.

La más importante, o conocida, allugabase en San Petersburgo, en Rusia, y depués llegaríenmos ecos d’operaciones sucesives, entamando pola del Brexit, y comentándose qu’interveníen de facto en práuticamente tolos procesos eleutorales europeos, incluyendo, poques gracies, los d’España. Taríemos falando, n’espresión militar, d’operaciones d’influyencia pente medies de la desinformación.

Paez una obviedá manifestar que los estaos tienen el drechu a defendese; non solo de les operaciones de guerra convencional, cada vegada menos emplegaes, sinon tamién de les nomaes encubiertes, como éstes acabantes de describir. ¿Entós por qué tantu plasmu ente lo que paez una obligación del gobiernu? Defender el país énte un posible ataque del tipu que seya.

Lleí la resolución nel BOE y concluyo que nu habría, aparente ya inicialmente, motivu pa rasgase les vestidures si hubiere salío d’un gobiernu seriu nun país formal pero, no sé si podemos aplicanos esi doble calificativu, enantes al contrario, los antecedentes de los años caberos n’España, y los del gobiernu anguaño son pa preocupase énte’l nuevu dispositivu/plan que la vicepresidenta Calvo mos presenta y que pretende, ente otros oxetivos, “examinar la llibertá y pluralismu de los medios de comunicación”, dexando de llau al poder xudicial que debía ser el competente nesos tarrenos.

Los estremaos órganos participantes paecen los naturales, que la direición recaiga na Moncloa chirría, échase en falta una supervisión xudicial de dalgún tipu, a lo último falamos de drechos fundamentales y, por exemplu, el CNI, un de los participantes, cuenta con un xuez residente. Tamién taría bien qu’incluyere como posible desinformación los programes eleutorales, siempres incumplíos; o dalguna referencia al usu de la nomada postverdá, simple ya interesada ferramienta ideolóxica; o’l control de los algoritmos qu’encaminen les nueses búsquedes n’internet na direición qu’interesa a nun se sabe mui bien quién.

Hai un campu a controlar nel mundu de la desinformación pero, sacalu asina, de sópitu, ensin discutiniu previu colos grupos de la oposición, o colos medios de comunicación, da muncho pa pensar, y non bien.

Raúl Suevos

En Xixón a 6 díes vencíos de payares de 2020

Torna en castellán en repdiv.blogspot.com