Tamos metanes el periodu d’euforia tres la victoria de Biden; paez como si s’elixere al presidente d’Europa al tenor de les munches llectures que se lleven a cabo na prensa europea y nacional. Mídese la rapidez na felicitación de los líderes de cada país o, nel so casu, l’ausencia de reacción. Siempres pasa lo mesmo cola entronización del Cesar nuevu, a lo llargo y ancho del Imperiu esperense xestos, nun sentíu o notru.
Hai un aspeutu, creo yo, nel que los analistes entá nun entraron y que, me paez, esconde una importancia trascendental pal futuru d’Europa. Trátase de la Defensa, la Defensa Europea, con mayúscules, elementu subyacente dende l’entamu ana propia creación del suxetu políticu européu. Un integrador al que Donald Trump, indireutamente, dio’l mayor impulsu dende la nacencia de la propia Unión cola Comunidá Europea del Carbón y l’Aceru nel lloxanu 1952, preséu pensáu namái pal caltenimientu indefiníu de la paz nel continente y qu’acabó pariendo un xigante.
La política esterior de Trump foi rabiosamente aisllacionista, con amueses costantes de malquerencia haza los países europeos, individualmente y en conxuntu. Dalgunes de les sos salíes de tonu van quedar pa la historia de la diplomacia pero, en xeneral, sirvieron para meter el mieu nel cuerpu, lixeramente a lo que se ve, a los líderes europeos, que nos años caberos, coincidiendo cola so presidencia, llevaron a cabo un impulsu descomanáu na construcción d’esa necesaria Defensa Europea, col Fondu de Defensa Européu, dientro de la Cooperación estructurada permanente, como mayor llogru ene otros tamién significativos.
Queda munchísimo por facer, especialmente nel campu de les operaciones esteriores, que ye au se pierden vides nacionales y con elles sofitos eleutorales na patria, pero la situación actual ye muncho meyor de la qu’había al rematar el mandatu Obama. Agora les espectatives son munches con l’aportar de Biden, pero yo nun tengo nidio que seya un futuru falagueru.
Cuesta creer que’l presidente nuevu vaya a camudar de guelpe la política aisllacionista esterior; la so preocupación va siguir siendo China, haza onde yá basculara Obama l’interés de los EEXX. Y Putin, magar les sos inquietudes bélica y política –acaba de algamar un altu’l fueu nel Altu Karabaj que’l so beneficiariu principal va ser Erdogán- nun van ser motivu abondo como pa camudar la retirada USA n’Europa. La Unión Europea va siguir sola colos sos demongrios.
El problema ye que la llectura superficial pue llevar a pensar a gran parte de los socios que con Biden equí yá nun merez la pena l’esfuerciu de siguir construyendo la Defensa Europea, y eso déxamos, cuando dala de les menacies desapaeció sinon al contrario, desnudos metanes un mundu en plenu fervor.
Raúl Suevos
En Xixón a 10 díes vencíos de payares de 2020
Torna en castellán en repdiv.blogspot.com
No comments:
Post a Comment