Nel añu 2000 nomaron a Xi Jinping secretariu xeneral del Partíu comunista chinu de la provincia de Zejhiang, que s’atopa na mariña del Mar de la China y llinda al norte cola de Shanghai, de la que sedría secretariu siete años más tarde, pa dend’ellí ser catapultáu al poder de toa China, au s’asitia agora y, aparentemente, cola idea de permanencia puesto que camudó la constitución pa poder perpetuarse al mandu del país.
L’añu 2000 ye importante porque mos lleva al chornosu recuentu de votos en Florida mientres la batalla ente Bush y Gore. Ganada en votos pol segundu, el particular sistema d’eleición de la presidencia nos EEXX llevó al poder al primeru tres la intervención nel recuentu del Tribunal Supremu. Daqué que mos lleva a la importancia del nomamientu lleváu a cabu va una selmana nel mesmu pola alministración Trump. Naquelles eleiciones entamó la victoria de güei de Xi Jinping.
Los EEXX, que lleven un sieglu dirixendo al mundu de forma direuta o indireuta, tienen dalgunes carauterístiques particulares que de cutiu mos sosprenden a los europeos; ello derívase de la so propia nacencia como nación de distancies inmaxinables entoncenes, y cola so vocación por un gobiernu democráticu y representativu. La imposibilidá d’un sufraxu direutu aconseyó la eleición por delegación de los estaos a un colexu eleutoral que, amás, encargaríase en casu necesariu de refugar a candidatos peligrosos, lléase populistes.
Los años foron pasando y en munchos estaos siguense calteniendo moos, normes y tradiciones eleutorales que, visto dende fuera, nun paecen meyorar la calidá del sistema eleutoral sinon al contrario, dan-y oscuridá y ponen en dulda la so fiabilidá. N’especial tocantes la desapaición del colexu na so función d’eliminar a los candidatos peligrosos, como’l casu Trump paez atestiguar.
La chambonada de Florida superóse gracies a la aceptación d’Al Gore, pero con un gran coste d’imaxe pal Imperiu, que depués veríase embarcáu n’años d’esgaste so la presidencia de Bush. La eleición de Trump, coles mesmas operaciones d’inxeniería eleutoral que depués s’emplegaron na británica campaña del Brexit, aceutóse tamién ensin problemes polos demócratas; lo primero yera’l país. Agora salimos de cuatro años de presidencia Trump.
Nestos veinte años China tien camudao pa convertise nun titán que fala de tú a los EEXX. Anguaño hai una llínea de confrontación nidia entrambos que, a diferencia de la qu’hebo cola URSS, nun tien calter ideolóxicu sinon puramente económicu. La política inintelixible de Trump namái paez conducir a la rocea de socios políticos y comerciales, y l’abandonu, cola consecuente anarquía, de zones d’influyencia qu’agora son otra vegada tableru del xuegu xeopolíticu.
El Mediterráneo fierve coles inxerencies turques, Oriente Mediu ta igual o peor, la engarradiella iranosaudí apinase, el yihadismu nun sólo se caltien nel Sahel sinon que llega a Mozambique, nel Cáucasu otra vegada guerra, Afganistán sigue nel mesmu sitiu, n’Iberoamérica nada se tien clarificao nel cuatrieniu, Europa desnortada. Paez nidio, güeyando l’espectáculu nos EEXX, que Xi Jinping ganó les eleiciones y, amás, ye l’único que sal más fuerte del covid.
Raúl Suevos
En Xixón a 4 díes vencíos de payares de 2020
Torna en castellán en repdiv.blogspot.com
No comments:
Post a Comment