AÑU 718, NACENCIA DEL REINU D’ASTURIES
L’oríxe d’Asturies, y poro d’España, naveguen ente’l mitu y la lleenda que más tardevan facese rellatu, rellatu que perdura anguaño. Les cróniques medievales, per partecristiana l’Albeldense y el Cronicón d’Alfonso III ente otres, y pel llau musulmán Ibn Hayyan, Ibn Jaldum o Ahmad al Razi como más conocios, encargáronse de dar cuentade lo acaecío naquellos tiempos escuros, col sesgu que de caún cabía esperar. En cualquier casu, dalgunos fechos y factores puen considerase como contrastaos, y asina ye qu’allá pol añu 718 cuenten los cronicones, y los estudios modernos confirmen, tuvo llugar en Cangues d’Onís, oriente de l’Asturies anguaño, daqué paecío a una asamblea o conceyu abiertu –una forma d’alministración llocal qu’aínda esiste nel norte d’España-na qu’unos xefes de clan, o simplemente notables y homes llibres de la zona,promovieron como cabezaleru políticu y militar a un d’ellos, un tal Pelagius, o Pelayo. El Princeps nuevu, que quiciabes esi fuere’l títulu, nunca’l de rei, toma como primera yfundamental decisión el refugu de los impuestos a pagar a los ocupantes musulmanes, que non árabes, pos la mayoría de los invasores veníos del otru llau del Estrechu yeren bereberes del Marruecos actual.
Esta decisión suponía una declaración d’independencia, pos el poder, dende siempres, correspuende-y a aquel que ye a imponer impuestos y recaldalos, y nesti casu yera’l poder cordobés pente medies el so gobernador Munuza, asitiáu na villa de Xíxón y que güei-y dedica una céntrica cai. Nel casu que mos ocupa y per delantre la Batalla de Cuadonga, de la que mos vamos ocupar llueu, considerase convencionalmente comol’aniciu d’Asturies, territoriu históricu por antonomasia, como entidá políticaindependiente, si bien precaria.
EL TERRITORIU Y EL SO POBLAMIENTU
La Tierra astur, l’espaciu au s’asitia’l Principáu, cuenta con unes carauterístiques que la faen particular con rellación al restu del país, incluyides les rexones del Cantábricu. Al norte, esti mar bravíu proyeutala haza’l restu del mundu celta y, pol sur, la Cordillera Cantábrica coles sos mayores altitudes aísllenla de los vientos templaos del sur. El resultáu ye un espaciu baxo la influyencia potente del clima atlánticu, quebráu hasta la galdidura, siempres n’estáu de semiaisllamientu coles tierres de la Meseta –entá güei- y con dificultaes graves pal desplazamientu internu lo que corrobora la esistencia na actualidá de tres variantes de la llingua tradicional del Principáu, l’Asturianu.
Clima duru, tarrén compartimentáu, condiciones típiques pa una economía de pastoréu, caza y recueya. Los asentamientos humanos documéntense dende’l Paleolíticu Inferior nes cueves y l’arte rupestre anguaño visitables, como la incomparable de Tito Bustillo en Ribesella, y tamién na del Sidrón, col mayor yacimientu mundial de restos de neandertales. Nun va ser hasta’l retiru de los xelos, ente’l X y V mileniu e.d.C. que se pue empecipiar a percibir el paisaxe asturianu de mou similar a lo que güei güeyamos.
Col Neolíticu amonta’l poblamientu como atestigüen los numberosos restos megalíticos y aperios, tamién s’anicia l’agricultura y los asentamientos en llugares dominantes –defensa- que sedríen yá na Edá del bronce la basa d’una cierta cultura urbana na que la minería y la fundición yá tienen el so espaciu. A lo cabero d’esta dómina albidrase que s’anicia la cultura castreña, entornos urbanos de calter defensivu nídiu que van tener el so apoxéu na Edá del Fierru, cuando yá por tola fachada atlántica, hasta Bretaña, puen alcontrase oxetos n’oru de claru raigáñu asturianu, yá entoncenes tráficu marítimumediante.
Nesta Edá del Fierru yá podemos falar d’Astures, a lo menos asina mos lo cuenten tanto Plinio como Estrabón. Estos ocupaben una fastera amplia qu’entepasaba la propia Asturies aportando pol sur hasta’l Dueru, esto ye, Lleón, Zamora, con partes de Portugal y d’Ourense. La so economía basábase na ganadería, una agricultura humildosa a cargu les muyeres, la minería del fierru, oru y cobre ya, importante, la guerra colos vecinos como elementu económicu claru. Ye la dómina dorada de los castros, colos sos muros de cinta y les sos foses o carcabes defensives y anque nun lo paeza tamién teníen tiempu p’adorar los sos dioses, múltiples, ente los que destaquen Belenos o Taranis d’estirpe céltica clara. Schulten fala de la práutica de la “covada” polos homes astures, una representación del allumamientu na que se guetaba una equiparación col superior estatus femenín nuna sociedad, la astur, matriarcal y que traxo la so impronta hasta anguaño.
Los romanos aportaran a Hispania allá pol 218 e.d.C. ; unos doscientos años más tarde namái queden llibres los Cántabros y los Astures. Va ser una llarga ya épica guerra que va tener el lideralgu, na so fase cabera, del propiu Augusto y que la so consecuencia va ser l’entamu la romanización d’estes tierres. Esta romanización, debío a la morfoloxía del tarrén va ser n’Asturies enforma superficial y vase centrar sobre too na esplotación aurífera yá qu’Augusto decretara la monetización n’oru y eso implicaba una gran demanda d’esti metal. La Vía Carisa o la de la Mesa, van ser les arteries que dendeLleón y Astúrica Augusta, Astorga, van caltener el fluxu del imperiu cola Tierra Astur y con Xixón, ciudá romana menor, con termes pero ensin foru, acordies col so rangu.
La romanización estiendese na zona, si bien superficialmente. El cambiu del patrón monetariu a la plata va llevar la pérdida d’importancia de la provincia que queda como proveedora de tropes auxiliares. El pasu de los Vándalos nun dexa fuelga y el posterior dominiu godu namái algama a estender la cristianización, controlar el territoriu y poner les semientes del feudalismu posterior. Podríemos falar d’astures someramente romanizaos y nada xermanizaos.
PELAYO, EL REFUXÁU
Pal 711, Musa ben Nusair, gobernador d’Ifriquiya, el Magreb, allega’l llamáu d’una facción visigoda –vieya hestoria- ya únvia a Tariq ben Ziyad al mandu d’unos 7000 moros que derroten al rei Rodrigo en Guadalete y abren la puerta a la conquista de tol territoriu hispanu, aición que va completar el so xefe Musa ente’l 712 y el 714, cuando lu llamen a rendir cuentes énte’l califa, en Damascu, por práutiques corruptes. Ye equí cuando yá podemos retomar el filo con Don Pelayo a quien se supón participante na batalla como espatariu –miembru de la guardia personal del rei- lo qu’implicaba un ciertu grau de nobleza y quien énte l’avance musulmán toma’l camín del norte haza Asturies en compañía la so hermana –datu perimportante pa lo que va venir dempués- au acordies coles cróniques contaba con dalguna posesión.
Ye de suponer que n’Asturies, una vegada tomada polos musulmanes y col gobernador Munuza en Xixón, la situación sedría similar a la del restu del país y los otros territorios yá conquistaos polos exércitos agarenos al Imperiu Bizantín, esto ye, los “dhimmis”, los cristianos o xente del llibru, tres dalgún tipu d’acuerdu –conforme a lo señalao nel Corán-, pagando los impuestos de bayura y de capitación, no que sedría pa dalgunos “un buen pasar”, y la historia d’España sedría bien estremada si nun llega a ser porque Munuza encaprichase d’Adosinda, la hermana de Pelayo, y equí les cróniques nin tampocu Sánchez d’Albornoz esclarien del too si con ánimu matrimonial o simplemente libidinosu anque la novela romántica y el teatru tienen sacao buen partíu d’esti detallede la historia
PELAYO, REBELDE Y CAUDIELLU
L’astutu Munuza, preparando’l tarrén pa la so ofensiva sobre Adosinda, únvia a Pelayo a Córdoba en calidá de rehén o invitáu con llibertá amenorgada y ellí, dicen les cróniques, trescaláu ésti énte l’atropellu qu’esperecen los cristianos y l’acabamientu al que s’alcuentra sometíu decide escapar y tornar p’Asturies, vamos, l“echase al monte” tantes vegaes repetíu na historia patria. Tamos na primavera del 717 y el destín d’esti home empobínalu pa Cuadonga.
Yá n’Asturies, tres descubrir lo asocedío cola so hermana y tres fuxida épica énte los esbirros del wali cordobés, Al Hurr, unviaos por él, encaminase haza l’oriente asturianu, seguramente menos controláu que la fastera central ya u debía tener dalgún tipu d’ascendiente sobre los astures d’aquellos valles angostos.
Pal branu del 718, dómina de collecha y andecha, o de la seronda, cuando se baxen los ganaos de les brañes d’altura a los valles, ye probable que tuviere llugar l’asamblea o aconceyamientu en Cangues d’Onís nel que Pelayo sedrá elexíu caudiellu d’unos homes que, mientres dellos sieglos, demostraren llevar mal el xugu impuestu y a los que tendría convencío pente medies conversaciones y apellaciones a la llibertá ya quiciabes tamién a la fe cristiana mientres los meses del 718 que las cróniques mos escuenden.
Esti caudiellu, ye elexíu por astures, non como continuador de la llegalidá goda, que tamién-yos yera ayena, si non como igual ent’ellos, como cabezaleru d’una llegalidá nueva que col actu asambleariu se cria, qu’aínda nun ye institución, namái ye rebelión pero que, si hai suerte, sedrá l’embrión de daqué dafechu nuevo, el reinu d’Asturies.Vaya lo anterior en rellación col nomáu neogoticísmu que va apaecer cuando dos centuries más tarde, al descender el reinu haza Lleón, s’intente camudar los eleutores de Cangues en nobles godos y a Pelayo en fiu d’un dux, Favila, imposible d’atopar nes rellaciones visigodes del Aula Regis.
LA BATALLA DE CUADONGA
L’entamu de la rebelión ye afortunáu. Al Hurr nun paez preocupase d’esos “burros xabaces” qu’asalten recaudadores d’impuestos y caltienen la pequeña guarnición musulmana nos sos cuarteles. Córdoba ta más interesada en progresar haza la Narbonense ya’l wali viniente, Al Samah, aportáu’l 719, preocupase d’organizar el territoriu del sur hispanu, más ricu, y avanzar haza la Galia onde va morrer en batalla énte’l duque d’Aquitania tres tomar Narbona nel 721. Va ser el primer revés seriu de lossarracenos.
El so sucesor, Anbasa, arriba n’agostu d’esi mesmu añu y, posiblemente pa’alzar la moral les sos tropes con una victoria cenciella enantes de retomar los asuntos galos, únvia al entamu la primavera viniente, nel 722, a un tal Al Qama al mandu d’unexércitu p’acabar colos rebalbos del norte. Esti exércitu tuvo d’entrar, como cuasi toos, pol Camín de la Mesa, sometiendo toos aquellos asentamientos que los informes de Munuza indicaron-y como rebeldes. Avanzando pol valle’l Piloña, debió progresar más tarde, dende Les Arriondes, Sella arriba, hasta Cangues d’Onís.
Pa entós Pelayo y los sos homes habíense recoyío haza la zona del monte Auseva y la Cueva Dominica (de la Señora), qu’asina se la conocía na dómina y que tá encolingada a 30 metros d’altor metanes un murallón rocosu. Ellí contaben cola fortaleza del tarrén pa la defensa y tamién, al traviés los Picos, con una vía d’escape haza Valdeón, una especie de valle santuariu metanes la cordillera y entoncenes d’imposible accesu pa una fuercia articulada como la sarracena. Ye mui probable que se vieren nes últimes.
Al Qama avanzó haza Cuadonga, yera’l 28 de mayu del 722 acordies Sánchez d’Albornoz, seguramente tranquil pos el valle ye escampláu en comparanza con otros llugares. Acompañábalu, dicen les cróniques, el llaín obispu Oppas, siguidor de Witiza y yá traidor a Rodrigo, pa llegáu’l casu parllamentar con Pelayo, como asina fo, anque paez nidio que con resultáu negativu.
A l’altor el monte Auseva’l valle, de secute, zárrase y camuda n’estrechamientu, nun hai espaciu pa variar l’espliegue del exércitu y hai que siguir en columna hasta que, al tornar una curva, atopense so la cueva na que Pelayo con 300 homes –la cifra, apurrida poles cróniques cristianes, recuerda muncho a Leónidas nes Termópiles pos lad’Alfonsu III cuantifica nunos perexaxeraos 187.000 a los atacantes - espera los mahometanos.
Las fleches y piedres d’arqueros y flonderos reboten escontra la muralla y, de sópito, el gruesu de los homes del caudiellu, emboscaos na espesura del monte valle abaxo, cayen metanes la columna enemiga, frayandola y provocando la llercia de mou que la retaguardia torna grupes y fuxe haza Cangues. Ye’l momentu qu’espera Pelayo p’allanciase sobro la vanguardia u s’atopen Al Qama y Oppas. Tamién equí cundel’alloriu y los más fuxen haza’l camín de los puertos –la actual carretera de los Llagos- dexando Al Qama muertu y al obispu presu.
Los fuxíos haza Cangues, diezmaos, pos ye sabío que les poblaciones per au pasen les tropes desbandaes suelen cebase nelles, aportaríen a Xixón coles anuncies nefastes, poniendo al escape a Munuza y la so guarnición que tamién diben ser copaos yaniquilaos cuando tentaben de ganar les altures del Camín de la Mesa dellos díes dempués.
El restu la vanguardia sarracena fo algamada polos homes de Pelayo nel tramu -de gran dificultá ciclista pa los aficionados a esti deporte que suben a Los Llagos- conocíu entá güei como la Güesera. Dempués, los sobrevivientes, vagaríen ente enormes dificultaes polos Picos pos nun cuntaben con guíes, pa llegar a Cosgaya, na Llébana, au delles cróniques llevenlos a perecer baxo un argayu venturiegu y otres, más lleenda que crónica, dicen que morrieron a les manes de Gaudosia, muyer de Pelayo, que s’alcontraría a resguardo naquellas partes coles muyeres y una guarnición pequeña.
Tres la victoria Pelayo yá nun ye caudiellu, vien aclamáu rei y asitia la so capital en Cangues d’Onís u va morrer tres 19 años de reináu.
LA RESILIENCIA ASTURIANA Y LA SO IMPORTANCIA PAL RESTU D’ESPAÑA
El fechu de que la capital asturiana se caltuviere en Cangues per munchu tiempu, hasta que Silo la mueve a Pravia más de cincuenta años dempués, da cuenta de la precariedá del reinu, espuestu a ser afaráu por un exércitu cordobés adecuáu; pero ellí, n’Al Andalus, les coses de palaciu diben torcíes y les guerres internes nun van dar tregua mientres un llargu periodu d’años qu’empecipien dempués de la espedición d’Anbasa a la Galia y que vacíen les guarniciones musulmanes de Galicia dexándola desguarnecida.
N’Asturies ye elexíu a la manera goda Favila, fiu de Pelayo, que va morrer a los dos años baxo les garres d’un osu y a quién asocede’l so cuñáu Alfonso. Otru golpe de fortuna pa la historia d’España pos yera ésti fíu del dux de Cantabria, lo qu’anoblecía la estirpe y, sobre too, yera home resueltu y de grandes lluces, contando amás col so hermanu Fruela, guerreru esceicional, como llugarteniente.
Alfonsu, que muerre nel 757, y el so hermanu, lleven a cabo una política d’ocupación de l’abandonada Galicia y, haza’l sur, anicien el vaciáu de la cuenca del Dueru, aportando hasta la Serranía central y hasta la cabecera del valle del Ebru. Entren en Tuy, Zamora, Astorga, Lleón, y esterminen a tou agarenu que s’alcuentren pero vacíen les ciudaes llevándose los sus pobladores, patrones y siervos, y repueblen con ellos los sos dominios norteños. Ye la dómina de les puebles, poles, etc. y asina van nacer Pola Gordón, Pola Llaviana, Pola Allande y otres. Con estos pobladores, munchos d’ellos de raigón godu, llega tamién el drechu xermánicu que s’incorpora xunto col romanu a les fontes llexislatives asturianes.
Está política tien un efeutu militar nidiu pos nel futuru los exércitos cordobeses nun van cuntar con loxística abondo p’acometer el reinu, centrándose más nel Llevante. Arriendes d’ello, la so simple esistencia y permanencia, supón un focu d’atención suficiente como pa que los musulmanes nun llantén los sos güeyos nos pequeños núcleos qu’aínda resisten nos valles pirenaicos más fonderos y que van dar nacencia posteriormente a los condaos de Sobrarbe y Ribagorza.
Hasta que Córdoba se recupera ya intenta retomar la iniciativa son tiempos que Asturiesaprovecha pa consolidase, repoblar el so territoriu como vimos y, darreu, escomenzar el repoblamientu del “desiertu” del Dueru mientres el reináu d’Ordoñu I. El so ésitu va ser la so perdición cuando Alfonso III el Magnu consolide la ocupación de tol territoriu y ala so muerte reparta’l reinu –práutica nefasta de los reyes de Lleón- ente los sos fios. Tres la tradicional llucha fratricida va ser Ordoño II el que nel 914 tresllade la capital dende Uviéu a Lleón y con ello otra vegada los astures van quedar separtaos del camínprincipal de la historia.
Enantes qu’esi fechu se produxere otra serie d’elementos de suma importancia pa la historia d’España tuvieron llugar nel solar astur. Na Llébana, el yá entós pernomáu Beato, reafita’l predique l’apóstol Santiago na Hispania romana, fechu del cualu nunca se tuviera noticia y del que la historiografía moderna tampocu alcontró rastru; yeren tiempos del reináu de Mauregato, al que tamién infundadamente se-y axudica l’oprobiosu impuestu de les cien doncelles y que llegara al tronu nel 783 tres deponer a Alfonso el Castu. Esti rei, qu’aporta al tronu unos años dempués, ye un gran monarca, completa’l repoblamientu’l Dueru, sufre dos acometies musulmanes na propia Uviéuque cuasi acaben col reinu, repuebla Oportu y toma Lisboa, y algama Sevilla nuna les sos incursiones pero, sobre too, ye demientres el so reináu que l’obispu Teodomiro, nel 814, da cuenta del afayu del sepulcru del Apóstol Santiago. Tres un tatexu inicial, Alfonso pelegrina a Compostela y alza una ilesia pequeña pa agospiar el sepulcru. Va ser l’entamu d’una tradición milenaria y güei universal, y pa la monarquía astur una grande y prestixosa operación de mercadotecnia política.
A MOU D’EPÍLOGU Y PIESLLE
Pa cuando Ordoño II s’instala en Lleón, aquellos astures, tres les sucesives campañes de vaciáu del Dueru y repoblamientu del reinu astur, ya nun son astures sinon más bien asturianos, y como los sos ancestros allá enriba, nel norte, con un accesu mui difícil, separtaos del avance haza’l sur van quedar pa los sieglos vinientes.
Tornen a apaecer los asturianos cuando l’anónimu autor del Cantar del Mío Cid pon en boca del Campeador na Xura de Santa Gadea aquello de que “villanos te maten, Alonso, villanos, que non fidalgos, de les Asturies d’Uviéu, que nun seyan castellanos”. Tamos allá pol 1200 y los asturianos, lloñe del prestixu de tener salvao España, yeren consideraos como lo peor d’aquella Castilla, y nun había motivos, sinon más bien alloñanza, desconocimientu, como en tiempos de los astures, d’aquelles tierres llonxanes del norte.
Unos años dempués, na Toma de Sevilla, va ser un capitán avilesín, Ruy Pérez, el comandante de la nave que rompa les cadenes que piesllen el riu y asina permita la cayída de la ciudá; l’escudu de la villa recuerda’l sucesu dende entoncenes. Dempués va siguir la murria, si bien los sos marinos siguen surcando mares a la caza les ballenes y a la espera de ser llamaos a la puerta la historia otra vegada. Va ser de la mano de Pedro Menéndez d’Avilés, azote de los corsarios nel Cantábricu, más tarde almirante de la Flota d’Indies y Adelantáu de la Florida, xesta, ésta cabera, pa la que cuenta y nutre la so espedición con marinos de los puertos asturianos.
Nun va ser hasta la Ilustración que vuelven a sonar los asturianos, de la mano de individualidaes como Campomanes, Xovellanos o Marcenado. La rexón vive nun atrasusecular como atestigüen los rellatos de viaxeros foriatos, y el propiu Xovino nos sos escritos. Cola guerra d’Independencia resurden los astures, de nuevo la so braveza, que sedrán los primeros dempués les xornaes del 2 de mayu en nomar un gobiernu, la Xunta Suprema del Principáu d’Asturies, qu’arma reximientos y resiste heroicamente a los exércitos napoleónicos mandaos pol Mariscal Ney.
La revolución d’Ochobre del 34, la Xesta del Cercu d’Uviéu o del Cuartel de Simancas de Xixón, la resistencia nos montes asturianos tres la Guerra Incivil suenen como rabotazos d’aquellos fieros astures que plantaron cara a los exércitos sarracenos en Cuadonga. Güei ye Asturies una tierra española como les demás, enfotada nel día a día, preocupada pola situación económica, la so secular falta de comunicaciones y losproblemes sociales qu’aforfuguen la ciudadanía, pero con una concencia clara y nidia del conceutu nacional nestos tiempos nos que la combinación de populismu y nacionalismu desendolca movimientos dixebradores nalgunes rexones que namái puen dar como resultáu l’acabamientu y debilidá de la figura d’España na redoladainternacional, si non daqué peor, precisamente cuando, na hora del mundu que mos atopamos, la Xunión Europea, de la que formamos parte, precisa más que nunca de la fortaleza de los sos estaos miembros.
Fai 1300 años, la convención histórica diz que nació’l reinu d’Asturies, territoriu históricu onde los haya, aniciu d’una pasión, entamu d’una epopeya que daría llugar a toa una cultura hispánica qu’anguaño comparten millones de persones más allá d’España y que tien entá per delantre muncha sienda a percorrer.
En Xixón a 5 de setiembre de 2018
Raúl Suevos, coronel de Infantería
Rellatu asoleyáu en castellán na Revista Ejército nº931 d’avientu de 2018
http://www.ejercito.mde.es/publicaciones/revistaejercito/index.html
repdiv.blogspot.com
abellugunelcamin.blogspot.com
BIBLIOGRAFIA
Álvarez Peña, Alberto. Celtas en Asturias. Picu Urriellu. Gijón, 2002.
Fugier, Andrés. La Junta Superior de Asturias y la Invasión francesa. Silverio Cañada editor. Gijón, 1989.
González, José Manuel. Antiguos pobladores de Asturias. Ayalga. Salinas/Asturias, 1976
Gracia Noriega, José I. Don Pelayo. Esfera de los libros. Madrid, 2006.
Hodgson, Marshal. The Venture of Islam. The University of Chicago Press, Vol I. Chicago 1974.
López García-Jove, Luciano. La Batalla de Covadonga y la historia del Santuario. Ed. FET. Oviedo, 1945.
Miguel Vigil, C. Pedro Menéndez de Avilés. Auseva. Gijón, 1987.
Musi, Vincent. Asturias. National Geografic. Barcelona, 2005.
Sánchez Albornoz, Claudio. Orígenes de la Nación Española. El reino de Asturias.Instituto de Estudios Asturianos. Oviedo, 1972.
Santos Yanguas, Narciso. El Imperio romano y el oro de los astures. Cajastur. Oviedo, 2004.
Schulten, Adolph, Cántabros y Astures y su guerra con Roma. Espasa Calpe. Barcelona,1962.
