Ceriñola

Güei, 28 d’abril, cúmplense quinientos y pico años de la batalla de Ceriñola y, posiblemente, de la entrada na historia militar universal de Gonzalo Fernández de Córdoba, el Gran Capitán, anque si se gueta la referencia nos grandes tratadistes anglosaxones poca alusión s’atopa; supongo que se debe a que la mayoría son unos fios de la Gran Bretaña y a qu’ellos lleven escribiendo la historia mientres los doscientos años caberos, quiciabes más.

Ceriñola representa un cambéu fulminante nel paradigma militar, el final de la caballería pesada y noble, del arte militar francés, pola humilde infantería de los tercios españoles. Esto duraría hasta Rocroi, cuando los franceses nos dieron pal pelo ciento cincuenta años más tarde. Pero esa ye otra historia.

Los franceses, que señoreaben la Campania y Nápoles, rompieran el pactu firmáu poles corones respeutives y el Gran Capitán, n’inferioridá, tuvo qu’espabilase y en rapidísimu movimientu ocupó la villa, de siguío fortificó’l tarrén con fosos, trincheres y estacaes que conduciríen y frenaríen al enemigu para batilos con los fueos de la infantería; a lo último’l choque d’infantes y xinetes acabaríen dando la victoria en menos de dos hores y con ella l’entamu de la retirada francesa de tierres italianes.

Na Academia Xeneral Militar, au na mio dómina se vivíen los primeros años de la vida militar de los oficiales, encuadrábemonos por seiciones de clas que formaben tamién les de la instrucción de combate. Yera cada añu una esperiencia de convivencia estrema que forma amistaes y entendimientos pa una vida. En tercer cursu, caberu enantes del ascensu a alférez, tocóme la Ceriñola.

Yera esta l’aula númberu 17, la cabera d’un llargu pasiellu nel que pola su ubicación yéramos agraciaos con un escasu númberu de visites per parte de los capitanes profesores mientres les tardes d’estudiu, lo que nun dexaba de ser una suerte. Nel interior, na pared llateral taba’l mosaicu d’azulexos, Ceriñola 1503, y baxo l’artículu de les Reales ordenances de Carlos III y que les de Xuan Carlos I dexaron tal cual, “el que tuviere orden de conservar el so puestu a toa costa, lo fará” ¡Cuantes discusiones xuveniles sobro la correuta ubicación de la coma¡, ¡detrás d’él tán Baler, Toledo, Santa María de la Cabeza y tantos otros¡

En primavera desplazamonos a la Sierra d’Albarracín pa los exercicios añales de guerrilles nes que a los del nuesu cursu tocabanos el papel d’enemigu pa que los de cuartu cursu nos solmenasen, razón pola que voi resalvar les belleces de la Sierra que por sí sola merez un llibru enteru. Al rematar la penuria de les dos selmanes concentramonos en Teruel y diósenos la tarde del domingu llibre enantes d’embarcar pa Zaragoza. El centru acabó siendo peligrosu pola presión de los profesores y un grupín, dirixíu por un líder xenial que se mos foi mui mozu, acabemos nel llocal del Partíu Comunista de Teruel. La rúbrica final, tres los cubatas y ente abrazos y xuramentos d’amistá eterna, foi’l cantu del Himnu d’Infantería –ellos sabíenlo- y la Internacional. Un vieyu militante, emocionáu, comentónos que nunca maxinare tal escena con unos futuros oficiales del Exércitu. Nós nun tábemos emocionaos, más bien perxudicaos, pero ye verdá que tábemos énte l’alborecer del Exércitu anguaño.

Felíz xornada de Ceriñola.

Raúl Suevos

A 28 díes vencíos d’abril de 2020

Torna en castellán en repdiv.blogspot.com

¿Cómo nos ven?

Algamar una idea de la imaxe de nueso ye siempres una xera de muncha dificultá. En xeneral somos demasiao duros o fadiosamente narcisistes colo que vemos nel espeyu, ye difícil xulganos con oxetividá; supongo que ye natural. Una solución ye guetar la imaxe que los “otros” tienen de nós y esto, cuando se consigue, hai que lleélo tamién con cuidao pues la so perceición va venir espayada pola mayor gracia o iñerizu haza nós. Una solución ye atopar el paecer de daquien alloñaú, daquien a quien se-y pueda suponer una bona dosis d'oxetividá.

En política asocede daqué paecío. En clave nacional ye poco menos qu’imposible alcontrar opiniones que nun tean someties a la tiranía de la ideoloxía. Nos tiempos d’afliximientu qu’esperecemos n’España esto puese reparar especialmente. Les eleiciones caberes dexáromos un panorama políticu terriblemente estazáu y polarizáu que dio como resultáu’l primer gobiernu sociocomunista dende los años de la Guerra Incivil; un gobiernu tensionáu a lo máximo dende lo interno y estorsionáu sistemáticamente polos separatistes.

Paecía dende’l entamu que la xestión del Executivu abocabase a una etapa de particular dificultá que daría como resultáu una vida curtia. Naide podía maxinar l’aportar d’una crisis mundial en forma de pandemia que ta poniendo a prueba a tolos países del mundu, cuasi ensin esceición, tocantes la xestión sanitaria de la mesma. Una crisis sanitaria que va abocar a un nuevu  y tarrecible afondamientu económicu cuando'l nuesu país entá nun terminara de salir del anterior.

A estos altores de la llista de muertos cuasi tol mundu tien formada la so opinión sobro’l gobiernu del país de so; nós tamién, y les opiniones individuales vienen marcaes pol siesgu personal col que caún de nós enfocamos la interpretación de la política del nuesu país. Pero puese guetar elementos esternos que mos ayuden a opinar, que habelos hai-los.

Nel campu la estadística internacional dos elementos mos dan idea de lo qu’equí, n’España, asocede. Campeón mundial de muertos por millón d’habitantes, les comparaciones estadístiques sobro les series de defunciones de los años caberos hacen pensar que la cuenta seya muncho mayor que la oficial, y peor país na xestión de la crisis ente ochenta estudiaos acordies un trabayu desendolcáu n’Australia. Elementos pa facenos pensar, pero que caún ye llibre d’interpretar.

Esta mañana llegóme la fotografía d’un recorte de periódicu. Una tribuna d’opinión que tres la obligada gueta n’interné fui a identificar como perteneciente a Ines Aizpun, subdirectora del Diario Libre, diariu escritu de Puerto Plata, segunda ciudá de Puerto Rico, “10 leiciones que va dexando’l coronavirus” yera’l títulu. Nella l’autora repasa una serie d’efeutos de la crisis sobro la vida del so país pero llamen la atención la primera y la cabera por ser de calter internacional.

Na primera da por fecho que vista la roxura del virus les cifres apurries por China tienen que ser forciosamente falses dalgo que, per otra parte, piensa la mayor parte del mundu, incluyíos munchos chinos. Na décima diz qeu “Podía ser peor, imaxinái  too esto y amás tener a Pedro Sánchez como presidente de gobiernu”. ¡Ensin comentarios¡ https://www.diariolibre.com/opinion/am/10-lecciones-que-va-dejando-el-coronavirus-ID18392785

Raúl Suevos

A 27 díes vencíos d’abril de 2020

Torna en castellán en repdiv.blogspot.com

Trata de bates blanques cubanes

Nos tiempos del preconfinamientu -la dómina cristiana yá ta anticuada- si un turista se ponía malu en L’Habana tenía a la so disposición la clínica Cira García; perteneciente al gobiernu, como too ellí, funcionaba en réxime d’estrictu pagu en metálicu o con tarxeta, si nun había seguridá de pagu nun había tratamientu. Yera una auténtica máquina de facer perres pero los sos sanitarios, mélicos y enfermeres, pertenecíen al sistema nacional y, poro, cobraben lo mesmo que’l restu los sos colegues en Cuba, esto ye, unos 18 dólares  mensuales nel 2011 y unos 30 güei. Dalgún ciruxanu conocí que completaba les necesidaes familiares trabayando’l turnu nocturnu de dalguna paladar, los restoranes privaos de tantu éxitú ellí.

La melecina cubana, xunto col enseñamientu, son les dos joyes de la revolución cubana pero dambes, dende’l 89 cuando cae’l Muru de Berlín, tán en escayencia. Los enseñantes va tiempu que mercadeen colos exámenes y los mélicos emtamaron va años a caminar pola senda revolucionaria de la cooperación con países en desarrollu al aniciu, y procuradores de divises dende va yá dellos años.

Nos bonos tiempos, cuando los soviéticos sofitaben la revolución, Cuba pagaba unviando los sos mozos a morrer nes “proxy wars” africanes, guerres por delegación, pero tamién mélicos cooperantes, como al Exiptu de Gamal Abdel Nasser, o la Arxelía de Bembella o Boumedian. Cuando Gorbachov punxo fin asprosamente a la fiesta de Fidel aportó’l Periodu especial y con él la necesidá de guetar les divises que ya nun llegaben de Moscú.

Hugo Chávez, dende mozu cultiváu polos cubanos, supunxo la resurrección económica pa la isla. Hasta 35000 sanitarios foron unviaos a Venezuela al preciu de desmantelar el sistema preventivu nacional,  munchos consultorios y ambulatorios quedaron ensin personal pero los bolivarianos pagaben unos 5000 dólares al mes de los que’l “cooperante” namái algamaba unos 200. Yera un bon negociu y amás, seleccionando bien, tamién yeren bonos informadores y una inigualable imaxe pal réxime.

Anguaño’l negociu les bates blanques acomodabase a los cambeos de gobiernu, como en Brasil, y la cayida del petróleu cortó les posibilidaes económiques de Maduro, pero’l mundu ta llenu d’oportunidaes. Con l’aportar del coronavirus una ocasión de negociu nueva se presenta pa Cuba, les sos brigaes méliques llancense al mundu, a bon preciu, anque en dalgunos llugares, como n’Andorra, y una vegada comprobáu el so nivel de conocimientos, namái consideren el so concursu en funciones de sofitu nos sos hospitales. Un informe recien de NNUU cifra en 30000 mélicos en 67 países l’estáu actual de la esplotación. https://spcommreports.ohchr.org/TMResultsBase/DownLoadPublicCommunicationFile?gId=24868   

Mientes, na islla, la población esfuerciase por salir alantre metanes la desolación revolucionaria; un nuevu periodu especial s’avera y sólo queden les remeses de los emigraos pos los EEXX derogada por Obama la llei d’Axuste cubanu, yá nun dan la tarxeta de residente y l’estrechu de la Florida quedóse ensin tráficu de balseros. Ye mui probable que les bates blanques cubanes, pesie a too, vayan a tener que siguir siendo un elementu de mercadéu pa la subsistencia de la revolución anque a dalgunos recuerda-yos a la Trata.

Raúl Suevos

A 26 díes vencíos d’abril de 2020

Torna en castellán en repdiv.blogspot.com

El señor Wolf

El señor Wolf yera un curtiu ya inolvidable personax qu’interpretaba Harvey Keitel na grandiosa Pulp Fictión. El so cometíu consistía n’iguar los estropicios, por nomalos de dalguna miente, que protagonizaben los sicarios mafiosos nel so devenir diariu. Na escena que mos ocupa son los personaxes de John Travolta y Samuel L. Jackson los que tán metíos nun fregáu, y cuando malpenes escomencipiara a resolvese la situación yá entamen a autofelicitase, lo que lleva al señor Wolf a pronunciar aquella frase llena de fonda filosofía y saber de xeneraciones de xente práutica, “dexemos de comenos la polla los unos a los otros y pongámonos a trabayar”. Cuantes vegaes a lo llargo del tiempu me tien venío a la memoria esa escena.

Güei foi un d’esos díes. Oyí, a ratos namái, necesitaba respirar de tanto en tanto, un programa radiofónicu dedicáu a cantar con tou tipu de loes y panexíricos la cobertura que hasta agora lleven fecha de la crisis del coronavirus. El que lo dirixía diba trayendo a les ondes a estremaes glories actuales y pasaes de la radiodifusión que de forma constante llevabame al recuerdu de mister Wolf. Un d’ellos, supongo que nun impulsu d’emoción achacable a la senectud, declaró que’l programa pasaría a la historia de la radio, lo que me dio que pensar.

Creía yo que sedríen los sanitarios los que pasaríen a la historia, máxime cuando cuenten con una montonada de lliberaos nos sindicatos que nun acudieron a los hospitales mientres la crisis y ye de suponer tarán trabayando pa poner en valir el trabayu de los sos colegas. Tamién podríen pasar a la historia los miembros de les Fuercies y Cuerpos de seguridá del estáu, magar qu’ellos tán obligaos a dalo too pola patria y conformase col prestu del deber cumplío. ¿Y por qué non los humildes? Esos que llimpien los hospitales o reponen nos supermercaos o simplemente mos traen a casa la telecompra por cuatro duros. Supongo que dalu d’ellos ye tan trascendente como’l trabayu periodísticu, sobretoo en tiempos d’afliximientu nel que toos tamos viendo esi fundamental trabayu d’investigación y denuncia. ¿Vémoslo?

El trabayu de la prensa ye fundamental, ensin él ye difícil maxinar el progresu les sociedaes llibres pero anguaño, a lo menos a min paezmelo, entama a crecer la preocupación sobro esa cacarexada llibertá. ¿Son llibres? O sonlo na midida de que nun salgan de les llínees sutiles que marquen los intereses de les plataformes económiques a les que pertenecen les sos cabeceres de televisión, radio o prensa escrita. Y qué dicir, sobro too nel formatu tertulies, d’esos periodistes activistes que namái paecen tener interés na arenga política. En fin y en pos, que nun veo yo munchos motivos pa pasar a la historia.

Güei SÓLO morrieron 367 persones, presentemoslo como una bona noticia, nin siquier como menos malo; esto ye, queda per delantre una llarga y penosa agonía coleutiva y un duelu entá por facer a milenta compatriotes y a superar polos sos allegaos; y hailos que yá tán poniéndose les medalles; quiciabes necesiten un mister Wolf que los invite a “dexar de comese la polla y ponese a trabayar”.

Raúl Suevos

A 24 diés vencíos d’abril de 2020

Torna en castellán en respdiv.blogspot.com

Bachaqueros

Na casa de cualquier espatriáu habaneru que se precie esiste un puestu de trabayu mui particular, el resolvedor. Suel ser un tipu con munchos contautos y habilidaes y ye’l meyor pagáu de la casa; él encargase de consiguir el combustible pa los autos y la planta eléctrica que salva los apagones a metá del preciu oficial, eses patates que nun lleguen a los mercaos oficiales, y en xeneral too aquello que se va cayendo de los circuitos oficiales, incluyios los tabacos cubanos o’l ron.

En Cuba dicen los naturales que l’estáu fai como que paga y ellos facen como que trabayen. Too se fue convirtiendo col pasu del tiempu nun descomanáu mercáu estraperlista. Toos mercadexen, ensin esceición. El peluqueru de mio tamién-y cortaba ‘l pelo al serviciu de seguridá de Fidel y per esa vía consiguía tomates cherry, los únicos de La Habana. Too se podía resolver “pela esquierda”, y polo que me cuenten asina siguen les coses; daqué más caru too porque la situación ta peor que va unos años.

En Venezuela, el bolivarianismu d’Hugo Chávez, tamién conocío como socialismu del sieglu XXI, entamó la so andadera col petróleu nos sos precios máximos históricos, yera’l país de Hauha, y el padrinazgu fidelista llevólu, de la mano de ministros ineptos y serviles, a aniciar un camín d’expropiaciones de fundos agrícoles, empreses d’alimentación y, a lo último, too aquello que por un motivu u otru se ponía na mira del comandante. El resultáu foi una espiral de malfuncionamientu del texíu productivu del país que finó cola dependencia total de la importación.

Mientres un tiempu, y magar la cayída de los precios petrolíferos, la producción de Petróleos de Venezuela dio pa sofitar el pesu de tol país; depués, con la hiperinflación, entamaron a topase los precios –afita-yos un preciu máximu de venta- y con esto apaeció una profesión nueva, el bachaqueru, el tipu que con contautos y sobornos yera a estrayer xéneros de los almacenes del gobiernu pa revendelos depués al públicu a precios escomanaos.

Los precios topaos, nun sistema de mercáu llibre, nun son aceutables, posiblemente nin llegales. El fabricante nun pue tar interesáu en fabricar a perdes, tampoco al farmaceuticu creo que-y convenga vender más barato que’l preciu de compra. Esta midida probablemente dé como resultáu la desapaición, otra vegada, de los necesarios productos sanitarios de les farmacies, poro cabe entrugase a qué especialistes consulta'l nuesu gobiernu enantes de tomar determinaciones que, como esta, puen tener consecuencies mui negatives en medio la crisis del coronavirus.

Tamos acabantes d’asistir al sainete de la salida de los neños de casa. Van venir otres órdenes y contraordenes que, dicen los militares, son l’aniciu del desorden, pero échase de menos que dalgún d’esos matemáticos, qu’estos díes mos sorprenden con tou tipu de cálculos sobro la evolución de la pandemia, mos dé una idea de cuántos muertos supón cauna de les equivocaciones, retardos na toma de decisiones o, simplemente, la desidia del gobiernu del doctor Sánchez.

Raúl Suevos

A 23 díes vencíos d’abril de 2020