Sí, yá lo sé, apellídase Calviño, pero’l so desempeñu actual
nesti gobiernu sociocomunista, col que mos tocó intentar superar estos tiempos
d’afliximientu, recuerdame descomanadamente al so antecesor nel cargu, aquel
Pedro Solbes que negara hasta la galdidura la llegada de l’anterior crisis a
España. El mesmu que nun debate eleutoral con Manuel Pizarro negó la evidencia
una y otra vegada, de forma tan convincente que munchos piensen que sirvió pa
da-y una segunda victoria a Zapatero.
Años depués Solbes asoleyaría un llibru de memories nel que
reconocía hasta qué puntu yera consciente de la situación económica que taba
per aportar a España. Un llibru nel que nun había soluciones pal sucesor de
Zapatero, el señor Rajoy, qu’usaría la vía más llarga y esperecida pa sacar al
país del atristamientu que s’atopó. Tan doliente camín que güei, cuando los más
negros nuberos s’averen, entá pechamos con tres millones de paraos.
Güei los medios de comunicación entamen a vendenos el productu
de la estabilización de la curva de arimaos, aquella que vien enantes de la
meyora, y col productu llega tamién la ofensiva del rellatu. Hai que camudar la
evidencia, y si ye preciso hasta los muertos van ser culpables; güei aniciase a
buscar responsables notres partes, el gobiernu sólo pasaba per ellí, y hasta lo
fai tan bien o inclusive meyor qu’otros países. Tamién s’avera la crisis
económica.
L’añu pasáu’l compromisu d’España taba nun 1,4% de déficit
pero güei conocimos que l’estragal sobrepasáu fo’l 2,7%, esto ye, col
supuestamente austeru presupuestu de Montoro, el doctor Sánchez fo capaz de facer
maraviyes contables. Unes cuentes que la señora Calviño vendió, una y otra
vegada, y basada nel so prestixu n’Europa, como correutes y axustaes, anque
güei ye posible que se dexare delles plumes del so prestixu nos foros
bruselenses.
Esta selmana fo la de la indignación del sur européu énte la
falta d’estilu del ministru d’economía holandés, un bocayón verdaderamente,
pero con un fondu innegable de verdá nes sos pallabres. Los sureños gasten más
de lo que tienen y nun amuesen propósitu d’enmienda, esta ye la verdá. Escaezámonos
de los eurobonos, nun mos los merecemos; quiciabes lo de nueso sea un rescate a
la griega para salir del fuexu económicu que mos espera; quiciabes vengan conxelaciones
y recortes de sueldos y pensiones, amás de los miles de despidos; quiciabes la
señora Calviño faría bien en dir pensado en dexar el gobiernu enantes de que la
historia-y faga un sitiu al llau de Pedro Solbes.
Dicen que la dieta de confinamientu y la falta d’exercicu ta
dando como dañu collateral grandes problemes d’estreñimientu, meguando asina’l
consumu d’esi descomanáu stock de papel hixénicu que cuasi toos atesoramos en
casa; quiciabes cuando’l gobiernu entame a contanos la realidá económica que
tenemos per delantre se mos afloxe l’ánimu, u otra cosa, y asina podamos da-y
salida a esi blancu y suave tesoru familiar.
Raúl Suevos
A 31 díes vencíos de marzu de 2020
Torna en castellán en repdiv.blogspot.com
No comments:
Post a Comment