El Pasu de Khyber ye la puerta ñatural haza les llanures del
subcontinente índiu cuando se vien de les mesetes y montañes d’Afganistán.
Pellí pasó Alexandru’l Grande camín de la India, anque yo nun lu vi; si que taba
cuando Sean Connery subió al llombu de la pluma de Rudyard Kipling como “l’home
que pudo reinar”, acompañáu por Michael Caine. Siempres lo qu’agora se llama
Pakistán tuvo nesi pasu la puerta del peligru.
El Pakistán anguaño, el país de los xustos nel so significáu,
vive nel peligru dende la so criación traumática tres la rotura de la India de
Nerhu y Ghandi. Siempres fo una nación en pie de guerra; cola so vecina y
hermana India pola cuestión de Cachemira y nes fronteres afganes poles siempres
savazes tribus qu’ellí viven dende va milenta años. Nel interior la so
democracia namái conoció la tranquilidá inicial del fundador Ali Jinnah, pero
dende entós tien conocío guerres civiles p’alumbrar a Bangla Desh, dictadures,
aforcadura de presidentes y nos años caberos la inestabilidá permanente que
produz Afganistán. Sólo cabe amestar al coctel la superpoblación, unos 200
millones d’habitantes y el radicalismu islámicu.
Pakistán ye probe, mui probe; y amás, daes les sos
circunstancies, caltien un presupuestu de defensa hipertrofiáu, con un poder
políticu de las Fuercies armaes que choca col conceutu de democracia. Güei
gobierna’l país, aparentemente, Imran Khan, un antiguu campeón mundial de
Criket, esi deporte tan inglés y tan incomprensible pa min pero al que sólo
gana en pasión nesi país el propiu Islam. Poro lu escoyeron.
Estos díes de coronavirus les cosas punxeronse series ellí.
Khan, que manexa y conoz les cuentes, nun quería confinar la población. La
probitú descomanada va facer que munchos escapen del virus pero otros munchos muerran
de fame pos l’estáu nun va ser a sofitar la so población, y Khan sábelo; conoz
que necesita caltener el país activu al preciu de les muertes que faiga falta
si quier evitar disturbios mayores. Pero l’Exércitu, más populista, púnxolu
firme y va haber confinamientu. Vedremos como acaba’l asuntu en Pakistán.
España ye estremada, y nun ye un slogan. El Nuesu gobiernu
sabe que nós tamién somos probes, que los viaxes low cost llevaromos a pensar
que somos pudientes anque la delda del país seya descomanada. El gobiernu conoz
que vivimos penriba de les posibilidaes de nueso pero qu’agora, col
coronavirus, too pue saltar pelos aires; y enantes de lo previsto ensin los
allampaos eurobonos, que por cierto, creo que nun mos merecemos.
Hai qu’atopar un puntu d’equilibriu ente los muertos, los
oficiales que tresmite la prensa “llibre”, non los reales que vamos descubrir
cuando too pase, y la necesidá de caltener
vivu’l texíu económicu. Si fuéremos ricos siguiríamos confinaos, pero
nun lo somos y hai que ponese a trabayar, anque les bolines coloraes, aquelles asintomátiques
pero que tresmiten el virus, tornen a viaxar en metru o n’autobús, vuelvan a la
cadena de montaxe o faigan subir otra vegada les cifres de contaxaos. El puntu
d’equilibriu, atopalu ye la gran decisión.
A lo menos espero que los sanitarios tengan bates y
mascarilles y, sicasí, que nun desmonten les UCI recién creaes nin devuelvan
los respiradores recién alquirios.
Raúl Suevos
A 11 díes vencíos d’abril de 2020
Torna en castellán en repdiv.blogspot.com
No comments:
Post a Comment