La gran evasión

En 1944 un grupu d’oficiales aliaos intentó escapar d’un campu de prisioneros del Exércitu alemán. Tuvieron  pocu ésitu puesto que la mayoría foron prindaos o fusilaos sobro la marcha pero la so aición fo la base pa una de les meyores películes de guerra de los años 60, la Gran evasión.

Una gran historia, un gran repartu y medios de producción afayadizos, con un protagonista sobresaliente, Steve Mcqueen, que mos da les meyores escenes nuna gran persecución en moto sobro una Triump inglesa amarutada de BMW de la Wermacht alemana. Daquel campu toos queríen fuxir, siempres ye una obligación pa los prisioneros de guerra pero, al sur del Sahara, hai un campu de prisioneros xigantescu del que millones de mozos lleven años intentando escapar y agora, cola pandemia, ye mui posible que les cifres se multipliquen.

N’África riolen nesti momentu los cuatro Xinetes del apocalipsis. La fame lleva yá munchos años, recordemos les campañes humanitaries puntuales que n’occidente se desendolcaron, pero güei, a la cuasi permanente seca xúntase una andada de llagosta nos países del este que supera a les que Xehová unvió sobro Exiptu. La guerra nun da tregua tampoco; tol Sahel fierve de yihadismu, algamando a Nixeria y na semana cabera tamién a Mozambicu; el Congo lleva años de guerra civil, y too eso al sur del Sahara porque al norte asistimos a la mayor carrera armamentística dende l’accesu a la independencia desos países. Sigue’l xinete de la muerte, siempres presente d’una u otra forma n’África, qu’agora acaballa nel coronavirus de forma asolapada pos ellí, al sur del gran desiertu, el texíu sanitariu ye mui feble o simplemente inesistente; y el xinete también va llevar l’ablayamientu na so grupa hasta toos esos países. Por último atopamos al caballeru de la victoria, pa unos, o de la esperanza pa munchos, esi tamién acaballa nel so caballu blancu colos otros, y n’África toos lu güeyen, sobre too los mozos.

En gran parte de los países africanos la economía informal ye la que da de comer a la mayor parte de la población. Hai países, como Benín, que viven cuasi puramente del estraperlu, y que, a midida que los gobiernos decreten midies de confinamientu, van ver multiplicase l’efeutu de la fame ente la so xente. Sedrá’l momentu del xinete de la esperanza que pa Mcqueen taba tres les alambraes de la frontera suiza y pa ellos al otru llau de Xibraltar o nes sableres de Pantelería y Malta.

Tombuctú, Gao, Tamanraset, Agadez, son finxos nel camín haza’l norte, haza esi mar de sable que traga munches más vides que’l Mediterráneu ca añu y al qu’aporten esos mozos al llombu’l xinete blancu, fuxendo de los otros tres. Llugares au aguarda’l xinete de la guerra yihadista al que nun detienen les operaciones internacionales qu’ellí se desarrollen, y nun va bastar con dici-yos qu’equí tamos mui mal tres el coronavirus, va siguir siendo la so esperanza. Ye lo que hai.

Raúl Suevos

A 2 díes vencíos d’abril de 2020

Torna en castellán en repdiv.blogspot.com