Fálase muncho d’Europa nestos díes d’afliximientu, como de
Santa Bárbara cuando trona. Los truenos son coronavirus y, en dellos llugares,
ente ellos y especialmente España, ésperase que la santa Europa mos defenda d’ellos
pente medies esos, yá de nomadía enantes de la so hipotética nacencia,
eurobonos.
N’España fomonos allonxando d’Europa col tapecer del Imperiu.
A min, por aquello de la vena militar, gústame datalo en Rocroi, en 1643,
cuando los franceses esfiltrayaron los nuesos Tercios y, aínda más importante,
ficieron que les táctiques militares de nueso quedaren caederes, anque cuando
aquello llegó’l nuesu paradigma económico-políticu fuera yá superáu. Dende entós
cuasi too foron penes y temores, y nun sé si entá tamos nello.
A la fin del S.XIX, col Krausismu, y depués cola Institución
llibre d’enseñanza primero y cola Xunta d’ampliación d’estudios yá nel sieglu
XX, paeciera que otra vegada güeyabemos a Europa ensin necesidá de que vinieren
unos illustraos a imponela. Va ser Ortega y Gasset un de los grandes campeones
desti abrise a Europa.
Ortega, que, al entamu, inclinabase haza la cultura francesa ,
acabó la so formación en Alemaña, primero en Leipzig y depués en Berlín. La so
“Europa y la idea de nación” bebe de les sos circunstancies europees; anque nun
pasó per Friburgo y con ello perdió la oportunidá de conocer a Max Weber, autor
d’una obra fundamental pa entender parte de lo qu’asocede estos díes con Santa
Bárbara, quiero dicir, con Europa. “Capitalismu y protestantismu” esplica munches
deses rocees ente’l septentrión protestante y el catolicismu meridional.
Los norteños, xeneralizo pa nun señalar col deu, lleven
enriba’l sellu de Lutero y con él la busca de la gloria de Dios, que hai que
trabayar nel día a día pente medies la disciplina ciudadana y, tamién, la
austeridá. Tómenlo tan a pechu qu’una de les sos ilesies, mui estendida nos
USA, ye la metodista que, como’l so nome indica, desendolcó un métodu p’algamar
la salvación. Equí abaxo ye bien estremao.
Nel sur nun necesitamos esforcianos tanto, con un bon
espíritu de contrición y tres padrenuestros podemos solucionar el problema;
hasta la próxima. Y claro, esti enfoque estremáu llévanos a ser menos fonderos,
o lo que ye lo mesmo, más superficiales. Dalgún diría que somos unos vivalavirxen,
descripción que pudiera paecer graciosa pero que nel norte nun produz nin media
sorrisa. Y siguen los truenos.
Nel casu español yá escomencipiaron les velaes, y non tanto,
recriminaciones a la egoísta Europa que, tiñazada pol vetu de los luteranos, y
menos mal que yá marcharón los anglicanos, busca soluciones que nun socialicen
la delda de los alegres sureños, o meyor sudistes nesti casu. A min, con un gobiernu
sociocomunista en casa, paezme arriesgao soltar caudales a lo llixero; fondos
que equivaldríen a subsidios y nacionalizaciones ensin control, pero que
podríen asitiar nueves polítiques a mediu plazu, poro creo qu’Europa, que daqué
tien de facer con sentíu de solidaridá, tien qu’atopar una solución que nun de
barra llibre a gobiernos poco rigorosos pero que, al mesmu tiempu, únvie una señal
nidia de que la idea d’Europa sofitase en verdaderes aiciones cuando lleguen los
tiempos d’afliximientu, de lo contrario taremos semando el tarrén pa que crezan
populismos y nacionalismos, y eso nun ye bono nin pa Europa nin pa nós.
No militar va tiempu que los europeos mos esforciamos por
hermananos y la Defensa europea intenta crecer y construyir más Europa pero nun
acaba de despegar. Los cayíos en misiones internacionales siguen acoyéndose como
nacionales, en cada país cola so particular idiosincrasia y ensin que la
bandera europea los cubra https://www.academia.edu/39721245/La_mutualizaci%C3%B3n_de_las_bajas_en_combate_un_pilar_a%C3%BAn_por_construir_en_La_Defensa_Europea . El coronavirus nun discrimina y
mata europeos ensin adscripción particular pero ye más que probable que los
supervivientes agradecieren el calor del abrazu européu. A ver qué asocede.
Raúl Suevos
A 13 díes vencíos d’abril de 2020
Torna en castellán en repdiv.blogspot.com
No comments:
Post a Comment