Bachaqueros

Na casa de cualquier espatriáu habaneru que se precie esiste un puestu de trabayu mui particular, el resolvedor. Suel ser un tipu con munchos contautos y habilidaes y ye’l meyor pagáu de la casa; él encargase de consiguir el combustible pa los autos y la planta eléctrica que salva los apagones a metá del preciu oficial, eses patates que nun lleguen a los mercaos oficiales, y en xeneral too aquello que se va cayendo de los circuitos oficiales, incluyios los tabacos cubanos o’l ron.

En Cuba dicen los naturales que l’estáu fai como que paga y ellos facen como que trabayen. Too se fue convirtiendo col pasu del tiempu nun descomanáu mercáu estraperlista. Toos mercadexen, ensin esceición. El peluqueru de mio tamién-y cortaba ‘l pelo al serviciu de seguridá de Fidel y per esa vía consiguía tomates cherry, los únicos de La Habana. Too se podía resolver “pela esquierda”, y polo que me cuenten asina siguen les coses; daqué más caru too porque la situación ta peor que va unos años.

En Venezuela, el bolivarianismu d’Hugo Chávez, tamién conocío como socialismu del sieglu XXI, entamó la so andadera col petróleu nos sos precios máximos históricos, yera’l país de Hauha, y el padrinazgu fidelista llevólu, de la mano de ministros ineptos y serviles, a aniciar un camín d’expropiaciones de fundos agrícoles, empreses d’alimentación y, a lo último, too aquello que por un motivu u otru se ponía na mira del comandante. El resultáu foi una espiral de malfuncionamientu del texíu productivu del país que finó cola dependencia total de la importación.

Mientres un tiempu, y magar la cayída de los precios petrolíferos, la producción de Petróleos de Venezuela dio pa sofitar el pesu de tol país; depués, con la hiperinflación, entamaron a topase los precios –afita-yos un preciu máximu de venta- y con esto apaeció una profesión nueva, el bachaqueru, el tipu que con contautos y sobornos yera a estrayer xéneros de los almacenes del gobiernu pa revendelos depués al públicu a precios escomanaos.

Los precios topaos, nun sistema de mercáu llibre, nun son aceutables, posiblemente nin llegales. El fabricante nun pue tar interesáu en fabricar a perdes, tampoco al farmaceuticu creo que-y convenga vender más barato que’l preciu de compra. Esta midida probablemente dé como resultáu la desapaición, otra vegada, de los necesarios productos sanitarios de les farmacies, poro cabe entrugase a qué especialistes consulta'l nuesu gobiernu enantes de tomar determinaciones que, como esta, puen tener consecuencies mui negatives en medio la crisis del coronavirus.

Tamos acabantes d’asistir al sainete de la salida de los neños de casa. Van venir otres órdenes y contraordenes que, dicen los militares, son l’aniciu del desorden, pero échase de menos que dalgún d’esos matemáticos, qu’estos díes mos sorprenden con tou tipu de cálculos sobro la evolución de la pandemia, mos dé una idea de cuántos muertos supón cauna de les equivocaciones, retardos na toma de decisiones o, simplemente, la desidia del gobiernu del doctor Sánchez.

Raúl Suevos

A 23 díes vencíos d’abril de 2020