Va de sentencies

VA DE SENTENCIES

Esta selmana la cosa foi de sentencies; unes emitíes pero entá recurribles, otres son namái’l paecer del xuráu y esperen la sentencia del xuez, y les más recien nin siquier aportaron al ámbitu xudicial, son asuntu de la Guardia Civil. Toes elles, cuando seyan firmes, nun van ser más que la espresión del sentir de la ciudadanía, pues la xudicatura nun fai otra qu’aplicar les lleis qu’enantes aprobaron les Cortes, eses u se sienten los  nuesos representantes, los que nos eleximos.

La primera de les sentencies sacó ronches en Zaragoza, escenariu de los fechos. El tipu, d’orixe xilenu y nacionalidá italiana, venía de Barcelona au dexara parapléxicu a un mozu d’escuadra nun desallogu d’okupes; foise de bareta, pola cara, y aínda dio l’asuntu pa un documental onde los mozos d’escuadra yeren peores que la división Das Reich de les SS. El grupu políticu que sofita a l’alcaldesa Colau nin que dicir tien que tamien sofitaba al individuu en cuestión.

Con esos antecedentes vienose pa Zaragoza sofitáu pol movimientu alternativu, esi caldu au, como la olla aranesa, cabe too si lleva la vitola ultraprogresista, por etiquetala de dalguna manera. Y too debía dir bien hasta qu’una nueche nun bar cruzóse con un home que llevaba tirantes cola bandera española. El desgraciáu alcuentru finó con un muertu, el de los tirantes, y, magar les pruebes evidentes d’asañamientu, el xuráu optó pola mínima. L’individuu ye probable que, teniendo en cuenta que yá lleva cuasi dos años en preventiva, salga en breve a la cai, hasta que zarapique con otru desgraciáu.

En Galicia ta a puntu de rematar, nel aspeutu xudicial, el drama de la neña de a Pobra do Caramiñal. Un casu que, pola complicada resolución al cargu de la Guardia Civil y la enrevesosa rellación familiar, ente otros motivos, foi primer páxina de la prensa mientes munchos meses. Col paecer del xuráu, emitíu güei precisamente, falta la sentencia que va ser comparativamente muncho más dura que la recibida pol encantador elementu que, llueu, va tornar a campar poles cais de Zaragoza.

Zaragoza y la Pobra son casos estremaos nos que l’únicu puntu en común, aparentemente, ye la importante participación del xuráu popular na resolución del casu xudicial; un xuráu que, dende una visión progresista, paez ser ún de los elementos fundamentales del sistema xudicial. Yo, que soi llegu nel asuntu, pensaba que la independencia de la xusticia y la so fayadiza dotación en medios 

materiales yera más importante, pero vese que la parte popular, ¿O será populista? Ye más importante

 entá.

El tercer casu traenoslu güei la prensa. Un vieyu de 93 años mata la so muyer de 86 años afeutada d’alzhéimer. El so tratamientu entra de llenu dende’l primer momentu no que se considera políticamente correutu, esto ye, la violencia de xéneru. Ye improbable que, anque dalgunos lo puedan pensar, entre dientro de lo que llamen delitu d’amor. Eso, el delitu d’amor, son pixaes lliteraries que nun tienen nin pueden tener reflexu nun sistema xudicial modernu, ye dicir, nun sistema progresista. Polo pronto’l vieyu ingresó en prisión y yá veremos cómo fina la historia.

Préstame dir escontra corriente. Anguaño lo imperante ye’l progresismu ensin más, esi que nun precisa esplicar nin tan siquier cuálu ye’l so significáu. El xuráu popular ye sinónimu de democracia xurisdiccional y nun se fale más. La violencia de xéneru ye unívoca, esto ye, del home escontra la muyer; lo de violencia intrafamiliar ye un subterfuxu de la derechona, y asina vamos. D’ehí al pensamientu únicu poco hai. D’ehí a la dictadura intelectual aínda menos. Y amás de too ello los nacionalismos pa arreglar la situación.

Tengo la impresión de que la sentencia de los tirantes, o la de la Pobra, tán mediatizaes, como lo va tar la del vieyu de güei si ye qu’aporta a un tribunal, pero nun tengo nidio qu’eso seya pal bien de los xusticiables, de la ciudadanía d’esti país, y la situación política anguaño nun me da elementos pa pensar que les coses vayan a meyorar. Pero esto ye lo qu’hai.

Raúl Suevos

A 30 de payares de 2019

Torna en castellán en repdiv.blogspot.com

Kcho na Plaza San Jaume

La instalación artística ye una forma d’arte que naz, dicen, entrada la década de los 60; consiste básicamente nel usu de materiales normales o cotidianos pa, nun espaciu específicu col cualu se rellaciona, transmitinos un mensax pente medies, precisamente, desa momada instalación.

Alexis Leiva ye un pintor y artista cubanu, mundialmente conocíu como Kcho, y que les sos instalaciones ficieron, amás de da-y sonadía, qu’esa forma d'espresión artística algame niveles superlativos. Yo tuve la fortuna d’atopame cola so obra mientes la mio vivencia cubana y tengo que reconocer que me fizo güeyar la instalación como una categoría artística muy respetable que yo anteriormente despreciaba. Les obres de Kcho informen, conmueven y tresporten. Ye mui difícil permanecer sele énte cualquier de les sos realizaciones.

Magar tolo anterior la realidá de la Plaza San Jaume de Barcelona demientres estos díes caberos nun tien un res que ver con Kcho. Ellí, un añu más, asina suel ser dende que la señora Colau gobierna esa ciudá, los medios de comunicación tuvieron que facese ecu de daqué que supuestamente pasa por ser un Belén navidiegu.

Esti añu hai división d’opiniones, aínda nun se fizo una encuesta pa poder tabular percentaxes, y yo soi de los que valoren el montaxe lleváu a cabu. Apréciolu en cuantu instalación artística. Creo, toi convencíu, algama los oxetivos que buscaba la so creadora la señora Paula Bosch; informa, conmueve y tresporta, con too y con ello, ye posible que quienes esperaren atopase con un belén tornen pa casa decepcionaos. Quiciabes ehí tea’l problema ¿Ye un belén o ye una instalación? La Navidá ta ehí, dientro deses caxes sacaes del trasteru con tolos elementos que davezu usamos p'ambientar la nuesa redolada físico familiar ¿Ye namái eso la Navidá? Un conxuntu d'elementos que sacamos ca añu pa ponemos en situación y que depués, pasáu Reyes, vamos volver a baxar al trasteru.

La Navidá yá nun ye lo que yera, y quiciabes esta instalación mos pon énte’l espeyu de la nuesa propia Navidá familiar. La familia, esi enxendru patriarcal, ta n’hores baxes, y hasta pue resultar peligrosu socialmente defendela con escesivu calor. Güei, y nestos tiempos de progresu, tamos más per otres coses, más anglosaxones, más de haloween, más de black friday, y cualquier día hasta vamos comer pavu pa celebrar el día d'acción de gracies, porque oiga usté, siempres ye bono dar les gracies, siempres ye bono celebrar, lo que seya, con tal de celebrar.

Asina que, desconociendo los oxetivos de la señora Bosch, y muncho menos los de la señora Colau que siempres dependen más de la direición del vientu, vientu políticu, na ciudá condal, a min nun me paez mal la instalación de la Plaza de San Jaume si se trata d’eso, d’una instalación.

Raúl Suevos

A 29 de payares de 2019

Torna en castellán en repdiv.blogspot.com

Muerte na estremadura europea

 

La pallabra estremadura vien de tiempos medievales. Yera la tierra qu’había más allá, la que taba fuera del control los castellanos, pero que tampocu rexíen los agarenos ;enantes, en tiempos del reinu d’Asturies yera’l desiertu del Dueru, dende la ciudá de Lleón al gran riu, baleráu por Alfonsu y Fruela como colchón defensivu y repobláu tiempu depués por Ordoñu cuando Asturies se fizo más fuerte.

Agora España yá nun tien estremadura, ye Europa quien la tien y, como entoncenes, nesa zona de fronteres intanxibles tamién se combate. Nun hai aceifes nin algaraes como en tiempos del Cid, pero sigue siendo un tarrén mui peligrosu. En Somalia, en Llibia, na República Centroafricana, en Níxer o en Mali, en toos estos países la Xunión Europea espliega les sos misiones, civiles, militares o mistes. Una mestura, según los casos, de construcción de país, fortalecimientu del estáu, formación o sofitu militar; en toes elles hai un peligru nidiu y el gotéu de baxes ye constante.

Amás deses operaciones, Francia, en cuantu antigua potencia colonial y entá con importantes intereses económicos nel área, caltien la operación Barkhane qu’algama tola inmensa zona conocida como Sahel, zona inclemente, semidesértica, na qu’operen estremaos grupos terroristes, como Ansar al din o Al Morabitun ente otros, toos ellos de raigañu salafista y franquiciaos d’Al Qaeda o del Estáu Islámicu. Francia nun ta sola, diversos países, ente ellos España, cooperen na operación porque’l peligru afeuta a toa Europa. Si se pierde’l control los fluxos de drogues, emigración ilegal y terror van tener vía llibre.  

Son tiempos cruciales pa la Defensa Europea, metanes un tirante xuegu de les grandes potencies, y con catalizadores como’l Brexit de un llau, o Donald Trump d’otru; tiempos de grandes decisiones pa Europa. Ayeri, mientres una operación de combate, dos helicópteros franceses en vuelu tácticu topetaron col resultáu de trece soldaos franceses, trece soldaos europeos, muertos. Ye’l tributu a pagar pola seguridá de los ciudadanos europeos, un tributu que va haber que siguir pagando tamién nel futuru.

Francia va despidilos nos próximos díes cola pompa y solemnidá que correspuende al casu, seguramente nel marcu incomparable del patiu d’armes del Hospital de Los Inválidos de París, col presidente Macron como maestru de ceremonia y el restu de grandes autoridaes del estáu acompañándolu. Ye lo que cumple en Francia, país con un gran sentíu del valir de les instituciones y lo que representen los sos actos públicos pero yo tamién quiero espresa-yos dende equí y cola mio pluma humildosa el mio agradecimientu y almiración pola so entrega hasta les consecuencies caberes, y el mio conduelu a los sos allegaos.

Que descansen en paz los soldados europeos de Francia.  

Raúl Suevos

A 26 de payares de 2019

Torna en castellán en repdiv.blogspot.com

Osama ben Laden y los españoles

Cuando Al Qaeda baltó les Torres xemeles en Nueva York, xunto con miles de inocentes dientro, la conmoción foi xeneral, mundial, y tamién algamó’l mundu islámicu; un mundu que nun contempla la muerte d’inocentes na guerra, sacantes casos mui específicos que señala’l Corán y los Fechos del profeta.

Hebo un saltu filosóficu/teolóxicu con tala masacre. Al Qaeda caltenía que la so guerra yera un Yihad defensivu puesto que’l gran Satán, los USA, sofitaba ensin ambages a Israel na so aniquilación del pueblu palestín, y amás, ocupaba’l sagráu suelu del Islam, Arabia Saudí, ente otros motivos. Esti Yihad defensivu, de la mesma que nel casu de Hiroshima, autorizaba a los combatientes santos, los muyahidines, a sacrificar inocentes que, y equí l’enfoque nuevu, al tratase d’una democracia, yeren responsables del gobiernu USA y poro, podíen ser combatios y masacraos anque fueren neños, vieyos o muyeres.

El yihad defensivu xustificalu l’Islam p’aquellos países que son atacaos pol infiel, Afganistán por casu, o pa reconquistar aquellos países o tierres que foron del Islam y anguaño lo son del infiel, como ye’l casu d’Al Ándalus, esto ye, España. Y equí, n’España, atopamonos con una situación que nun tien un res que ver col Yihad pero que recuerda’l conceutu de responsabilidá delegada, como ye’l casu del sufraxu pasivu, el votu que de cuando en cuando emitimos, o abstenemos, o efectuamos en blancu.

El PSC, Partíu socialista de Cataluña, sucursal independiente del PSOE, propón qu’España seya un estáu plurinacional, amás de plurillingüe que yá lo ye. Fáilo dende la campechana y bonachona –aparente- personalidá del so secretaríu xeneral, el señor Iceta, que lu envolubra nun celofán federalista pa facelo más dixerible, que non más xustificable.

A esta situación aportamos tres un llargu procesu de deterioru del nuesu sistema democráticu y de drechu –lo cabero pol creciente control de la xusticia a manes de los dos grandes partíos- sofitáu supuestamente nuna mayor participación de les bases de los partíos pente medies les primaries pa la eleición de secretarios xenerales o consultes internes pa la toma de decisiones importantes. El resultáu lleva a dirixentes profesionales dende’l so ingresu nes mocedaes de los partíos, ayenos dende cuasi la adolescencia a la realidá de la cai, que dirixen el país col teóricu respaldu d’unes bases qu’en realidá correspuende al 1% o menos del sofitu recibíu na contienda eleutoral; como va ser el casu del viniente gobiernu “progresista”, capaz, una vegada nel poder, d’abrir la vía pa la frayadura d’España, o lo que ye lo mesmo, la so desapaición.

Lo que ta en xuegu pal futuru próximu ye la esencia d’España. Una vegada que s’abra la veda pa Cataluña, el procesu va ser imparable. Reinos hispánicos, reinos de taifes, o cantones que caún escoya, pero yá non más España. Y va haber responsables; esi 1% pseguramente, pero aquellos que por vezu, dexadez, iñerizu a la drecha o a la persona que dirixe determináu partíu, nun prestaron atención abondo a lo qu’había detrás de la so papeleta, nesta oportunidá’l PSOE, ensin dase cuenta que votaben un partíu que ta dispuestu a disolver España nun caldu federalista como pasu previu a la so destrucción definitiva, tienen que ser conscientes, a lo menos nel so pensamientu intimu, que son y van ser responsables de a ónde mos lleve’l doctor Sánchez.

Ye lo que tien el sistema democráticu, toos somos responsables, hasta los que se queden en casa.

Raúl Suevos

A 25 de payares de 2019

Torna en castellán en repdiv.blogspot.com

El putch de Kapp y el guelpe d'Evo

La República de Weimar, constituyida n’Alemaña tres la Primera Guerra Mundial y conocida ésta nos países que la sufrieron como la Gran Guerra, pasó a la historia pola so inestabilidá política y social; yeren tiempos duros aquellos. Ún de los episodios más sonaos fo’l conocíu como’l Putch de Kapp.

Wolfgang Kapp yera un políticu nacionalista que se sofitó nel xeneral Luttwiz y el so exércitu pa dar un guelpe de los llamaos de llibru. Ocupación rápida de los muerganos de gobiernu na capital y fuyida del gobiernu llegal el cualu, como recursu caberu apella a la fuelga xeneral, la cuala va ser secundada polos sindicatos de manera radical dando como resultáu que, faltos de recursos lloxísticos y colos funcionarios tamién en fuelga namái-yos quedó, al cabu una selmana, el recursu de la fuyida. Guelpe fallíu.

En Bolivia va haber discutinios demientres dellos meses, quiciabes dellos años, sobro si se trató d’un guelpe o d’otra cosa la operación, gallaríu, tumultu, o lo que fuere, que dio como resultáu, nun tiempu relativamente curtiu, l’arrenunciu del presidente Evo Morales y la so salida posterior del país en dirección a México en calidá d’esiliáu políticu. Calificación aparte, paez nidio que’l resultáu caberu ye un gobiernu nuevu y un cambéu tamién radical na política del país andinu.  

Salta agora la noticia de que a Evo, allá nel so refuxu mexicanu, garráronlu dando instrucciones a los sos siguidores de los sindicatos cocaleros pa llevar a cabu un bloquéu de les comunicaciones del país, especialmente aquelles de calter terrestre que conducen a la capital, La Paz, lo que supondría daqué paecio a un sitiu de la mesma y quiciabes, quien sabe, una renuncia del nuevu gobiernu sobreveníu tres la renuncia del líder cocaleru.

Sedría interesante y hasta instructivu siguir les peripecies que se van desendolcar los díes vinientes nesi país desgraciáu, que’l so gobiernu yá presentó una quexa oficial énte’l del país azteca, si nun fuere porque mentanto sigue amontando la cuenta de muertos nes engarraes que s’asoceden ente manifestantes y fuercies policiales y militares en La Paz y otres ciudaes.

¿Habrá lleío Evo la “Tecnica de un colpo de stato” del afamáu Curzio Malaparte?

Raúl Suevos

A 23 de payares de 2019

Torna al castellán en repdiv.blogspot.com

Xixón y la Europa de la Defensa

​Paez que de curtiu General Dynamics va apurrir al Exércitu los dos prototipos primeros del VCR 8x8, Vehículu de combate a ruedes, que la so barcaza o cascu fabrícase en Trubia, esto ye, la parte más visible y avalumbada pero tamién la de menor valir agregu. Ye posible que nunos años los soldaos del Reximientu del Príncipe los utilicen en dalguna de les operaciones esteriores nes que participen davezu.

Estes son les úniques referencies qu’atopamos na tierra de nueso en rellación cola Defensa, precisamente de la qu’Europa paez lanzase con enfotu, énte la ambigüedá norteamericana, a la construcción d’una Defensa Europea, asina, con mayúscules. El Brexit ye otru catalizador qu’ayuda a acelerar eses polítiques, que lleven amecío un recorte nos presupuestos europeos y poro los sos fondos y aprovechamientu son cada día más importantes.

Va yá más de venti años que los USA crearon el so Network Centric Warfare Center, daqué asina como’l Centru de pensamientu y estudiu militar pa la guerra na rede; va yá más de venti años, sí. Y la so importancia yá la pudimos apreciar en múltiples ocasiones nos tiempos caberos, dende la guerra los drones, vehículos aéreos non tripulaos, hasta’l bloquéu de redes eléctriques u otres munches aiciones que nun trescendieron. Güei tamos entamando la revolución 4.0 tamién nel mundu de la Defensa.

Qu’Europa lo entendió vese nel aprobamientu, va yá más d’un añu, de la PESCO, Cooperación estructurada permanente en materia de Defensa, y darréu’l Fondu Européu de Defensa con más de 11.000M de € nun plazu cuatrienal, sobro’l que se aprobaron 34 proyeutos de calter tecnolóxicu con participación española en 17 dellos y lideralgu en 6. Equí ye u ta’l futuru de la Defensa europea con independencia del necesario avance na integración institucional.

En Xixón paez que tamién tamos preparaos; la Escuela politéunica, nel campu la formación, el Polu tecnolóxicu nel empresarial, son amueses nídies de que tenemos les célules madre necesaries, pero ensin dulda ye imprescindible que’l gobiernu del Principáu tea atentu y acuciosu pa prever, enriar, aguiyar y, si ye necesario, sofitar económicamente iniciatives qu’avancen na investigación  y desendolcu de les industriesy tecnoloxíes del futuru. Ensin esti calor institucional ye difícil, por nun dicir imposible, que se pueda avanzar nesi campu tan curiosu pa cualquier alministración.

Tamos escribiendo sobro puestos de trabayu d’alta cualificación; tamos escribiendo sobro’l  declín innegable d’una rexón que foi líder d’España va dos xeneraciones y anguaño llámbese les sos feríes mientes ve emigrar, güei a diferencia de va cien años, a los más preparaos de la so mocedá.

Raúl Suevos

A 18 de payares de 2019

Torna en castellán en repdiv.blogspot.com

Les manaes de Pablo Iglesias y el señor Llobu

LES MANAES DE PABLO IGLESIAS Y EL SEÑOR LLOBU

Púnxose de moda la espresión de la mano d’un lapsus linguae del líder podemita mientes el debate eleutoral pero’l señor Llobu, personax tarantinescu maxistralmente interpretáu por Harvey Keitel na película Pulp Fiction, daba-y un significáu muncho más trescendente y rellacionáu cola realidá de les coses.

Ta güei la prensa falada y escrita n’España que se desfai n’eloxos a la referencia que SM el rei fizo ayeri en La Habana a la democracia y a los drechos humanos mientes la cena d’estáu énte’l so anfitrión, el presidente cubanu. Qu’ésti aplaudiere como si tal cosa da cuenta d’hasta qué puntu la frase fuera negociada polos respectivos ministros d’esteriores; convendría sicasí nun perder de vista la realidá de les coses; los ciudadanos cubanos, recipiendarios últimos desos buenos deseos, malapenes fueron conscientes de la real visita puesto que’l diariu Granma informó someramente y en Mesa Redonda, el programa políticu de la TV cubana, nun se va tratar más que de pasada, ensin alusión, por supuestu, a eses frases. Cabría recordar que más potente paeeció’l mesax del Papa Juan Pablo II na so visita a Cuba, y yá se vio.

La ciudadanía cubana vive na total miseria informativa, los medios de comunicación pertenecen al estáu y la prensa dixital independiente malapenes tien algame ente la población con mui limitáu accesu a internet. El cubanu d’a pie fórmase ya informase pente medies el “paquete”, un CD de venta illegal y salida quincenal nel que se carguen informativos y series d’España y Miami; pehí-yos va llegar dentro de dellos díes daqué del ecu patriu de la visita real y deses pallabres que, a estes altures, Díaz Canel yá va tener escaecío.

Na cabera xornada habanera’l gobiernu tamién-y preparó al rei un alcuentru con 30 representantes de la sociedá civil cubana, llamativamente la mayoría yá s’alcontraron cola mesma brevedá col presidente en funciones cuando visitó la islla. Nel grupu tenemos al inevitable Perugorría, el de más nomadía de los actores cubanos, Leonardo Padura, l’esitosu escritor, o Enrique Núñez, l’amu la Guarida, la paladar más famosa de la ciudá que lleva venti años faciendo sonar nos sos salones el “ente dos augues” de Paco de Lucia.

Nun hebo tiempu nin llugar pa les Dames de blancu u otru representante de la minimalista oposición cubana, güérfana de figura potente dende la desapaición d’Oswaldo Payá nel intre d’una operación 

chambona llevada a cabu pol entoncenes xefe de la mocedá pepera madrileña, tiempos de doña Espe, y qu’anguaño ta  llantáu pol so collaciu d’ansies moces, agora no más alto de Xénova, con un momiu de 60K de la comunidá madrilana. Carromero se llama y aínda más altu lu vamos ver.

Nun consta que tampocu s’entrugare por José Daniel Ferrer, líder de la UNPACU, Unión patriótica cubana, miembru daquellos 75 de la primavera negra de Fidel Castro condergaos sumariamente a 20 años por ser opositores al réxime y que Zapatero y Moratinos, nuna operación que namái benefició al gobiernu cubanu, traxeron pa España au duraron lo que los escasos subsidios del gobiernu, depués la mayoría coló pa Miami, dalgunos inclusive tornaron pa Cuba. Unos pocos, Ferrer ente ellos, refugaron dexar la islla y dende entós sufre l’acosu del G2 cubanu con detenciones arbitraries constantes.

Yá va un mes llargu de la detención cabera, anque nun se sabe si la visita real tuvo daqué que ver, y en 100 y Aldabó –el centru de detención pa políticos- eso ye munchu tiempu, tantu que la so muyer na única visita permitida atopose cola solombra del so home en llugar del paisanu enteru que detuvieron. Nin que dicir tien que, como suel asoceder en Cuba, nun esiste comunicación sobro los cargos que-y imputen; da igual, cuando convenga yá lu soltarán, non enantes.

Hebo tamién alcuentru colos empresarios españoles en Cuba, siempres en precariu énte los baxones na liquidez gubernamental, como nestos díes asocede, y siempres atentos al estáu del bloquéu pues saben qu’ensin él la so ventaya competitiva desapaez y Cuba tolo va mercar nel so mercáu natural, los Estaos Xuníos como yá asocede anguaño colos productos agropecuarios que vienen d’ellí mayoritariamente; eso sí, previu pagu en metálicu que’l señor Trump nun da en fiau.

Sobro estes coses nun lleí nin oyí un res nos maraviosos medios de comunicación social españoles y ye poro que nun pude menos que recordar al señor Llobu cuando dicía a los personaxes de Travolta, Tarantino y Jackson “dexemos de comenos la…los unos a los otros y pongámonos a trabayar”. Pues eso.

Raúl Suevos

A 14 de payares de 2019

Torna en castellán en repdiv.blogspot.com