La Solheim n'España

 

Esti fin de selmana tevo llugar na provincia de Málaga la competición que se conoz como Copa Solheim, posiblemente’l segundu eventu n’importancia mundial nel deporte femenín, tres el campeonatu mundial de futbol; esi que tantu dolor de tiesta mos ta dando nos díes caberos.

La Solheim ye l’equivalente femenín de la Ryder, la competición del golf masculín; muncho más conocida equí por tener como capitanes a Severiano Ballesteros y José Maria Olazabal nel pasáu. Pero dambes tienen les mesmes característiques: contienda ente profesionales que nun cobren pola so participación; Estaos Xuníos y Europa como alversarios; cada añu nun continente, y, sobremanera, con una carga de pasión nacional difícil de ver notros deportes, por nun dicir imposible, y ye que, nel casu européu, nun se da en dala otra disciplina deportiva, y les sos integrantes manifiestense y comportense como auténticas y completes nacionales europees. Una fiesta d’emociones pa los que creen na ideya d’Europa.

La vencedora nesta ocasión foi Europa, col rei d’España como espectador, anque eso nun ye nesti casu lo más importante. Más de cien mil entraes vendíes, retrasmisión mundial, miles de voluntarios internacionales sofitando l’acontecimientu, un pelotazu de publicidá pa la Costa del Sol, p’Andalucía, y pa España. Con una equipación por parte europea cargada de simbolismu español, deferencia nidia al país anfitrión, dalgo que, xunto a los guardia civiles escoltando a les xugadores a lo llargo de los percorríos, va ser a bon seguru una imaxe pan un escaecer. Ensin dulda un ésitu pal deporte del golf, y tamién pa la organización española.

El golf ye’l cuartu deporte español por númberu de licencies, trescientes mil,  tres el futbol, el baloncestu y la caza. Mueve una cantidá de dinero descomanada, poro nun llama l’atención que, de los cien campos con que cuenta Andalucía, sesenta s’alluguen en Málaga. Y ello llévame a pensar que n’Asturies, y particularmente en Xixón, cuntamos con un potencial enorme nesi recursu turísticu, amás de deportivu, con una docena de campos na rexón, y cuatro na villa de Jovino. Una bayura que namái  ta esperando a qu’eses alministraciones, qu’últimamente se llenen la boca falando del gran futuru turísticu que’l cambéu climáticu ta a puntu de brindanos, se pongan manes a la obra, sofiten les instalaciones, y publiciten les nueses posibilidaes na materia. 

Independientemente, los campos municipales de nueso, y escueles infantiles, son y deben siguir siendo un motivu d’envidia pa otres rexones y d’arguyu pa nós, cola Llorea como primer na historia nacional.

Raúl Suevos

A 24 díes vencíos de setiembre de 2023

Torna en castellán en repdiv.blogspot.com

Da-y la vuelta a la tortiella

 

Dicen los vascos, qu’en gastronomía paez que lo tienen inventao too, que la tortiella nació nuna venta cuando Zumalacárregui, el carlistón, avanzaba haza Bilbao pa toma-yla a los isabelinos, esto ye, al gobiernu. Sicasí, lo que ta nidio ye que tamos énte un platu qu’en función del tamañu hai que pone-y güevos, y tamién amontar el diámetru de la sartén. Con ésta cabera, y el so crecimientu, agrándase tamién el problema de da-y la vuelta, a la tortiella.

Con la fama del platu tamién llegó’l so usu na llingua coloquial, y asina llegamos al “da-y la vuelta a la tortiella” que lleva implícitu nel so significáu la capacidá pa camudar el sentíu d’una situación, probablemente negativu, haza una salida, xeneralmente inesperada, de calter positivu, que, polo incamentable, apreciase como un ésitu atayante.

El presidente de nueso, en funciones, tien fama merecida de resiliente, y hasta-y tienen escrito un llibru dando cuenta de les sos habilidaes de superviviente políticu; de mou qu’agora, en plena voráxine poseleutoral y con un panorama ciertamente entrellizáu, tien a tol mundiu col alma en fierros énte lo que pueda ser a facer pa salise cola de so; que nun ye otra que continuar al frente del gobiernu.

La tortiella descomanada que ta por cocinar lleva un montón de güevos, de tamañu y cáscara estremaos, por proceder de gallines diversables. Dalgunos de Sumar, coloraos, pero tamién los de Podemos, con pintes escures, ensin escaecer aquellos grises de Compromís. Tamién paez cuntar colos azules del PNV, y del mesmu gallineru aporten los de la cáscara amarga de Bildu. De Cataluña enviaron-y los del sacristán Junqueras, a la espera de los que pueden llegar de Waterloo. Esto ye, munchos güevos, y al preciu que va l’aceite, ensin cuntar el del gas, too paez ponese cuesta arriba, porque, ye fácil decatase qu’un güevu puede rompese en cualquier momentu.

Ye equí, na dificultá d’entamar tamaña fazaña, y depués caltenela, anque seya a costa de la implosión de la propia cocina, el PSOE, que’l doctor Sánchez puede tar pensando en da-y la vuelta a la tortiella, nel sentíu del dichu coloquial; esto ye, en dexar a toos plasmaos, una vegada más, y convocar eleiciones, presentándose énte los eleutores como’l patriota que nun ta dispuestu a vender el país por unes docenes de güevos, nin tampocu a dexalo en manes d’una oposición que, según señalen los miembros del gobiernu, un día sí y otru tamién, representen la ultradrecha más recalcitrante y fascista d’Europa. Ye lo qu’hai.   

Raúl Suevos

A 17 díes vencíos de septiembre de 2023

Torna en castellán en repdiv.blogspot.com

El procesu de Madrid

 

Diz l’Academia qu’un procesu ye “el conxuntu de les fases sucesives d’un fenómenu natural, o d’una operación artificial”, y, nel casu que mos ocupa, qu’estos díes presenta un capítulu más cola espulsión de Nicolás Redondo del partíu qu’el so pá, xunto a otros, refundó en Suresnes, creo que tamos énte un exemplu qu’aúna les dos posibilidaes, la ñatural, frutu de la pérda d’ideoloxía política real, y l’artificial, xestada dende la máxima autoridá del grupu de poder, al estilu d’aquellos procesos que Stalin promovió en Moscú escontra los sos collacios de los tiempos primeros. Ye lo qu’hai.

Lo qu’anguaño queda de lo que fo un partíu políticu entamó la so descomposición col aportar al poder del mozu lleonés abanderáu del talante. Baxo esa bandera guetóse la consecución del mandar a toa costa, ensin importar los collacios de viaxe, y asina, nel País Vascu, los paladines de la tradición, como Rosa Díez y Nicolás Redondo, foron arrequexaos primero, y depués, pasu ente pasu, obligaos a dexar el partíu, voluntariamente, como ella, o pente medies el procesu de Madrid, como’l segundu. Güei queda Pachi López como representación bultable de lo que ye’l socialismu vascu.

Nesi camín foron cayendo figures estremaes, como Leguína o Gómez, pero, sobremanera, desapaecieron les corrientes d’opinión, recoyíes nos estatutos en tiempos de Felipe González, y depués les opiniones simples. Anguaño namás se repara una maquinaria de poder y sinecures, na que la sumisión al líder ye la garantía de progresión nel escalafón de la organización.

Molotov, aquel ministru d’esteriores soviéticu que robló’l pactu de non agresión col nazi Ribbentrop, fo l’únicu de la vieya guardia superviviente al estalinismu, a costa d’unviar a la muyer al Gulag siberianu, pero algamando morrer na cama, de vieyu. Esa figura ye, quiciabes, na que se miren los averaos al líder actual, maestru del ostracismu helénicu, de la qu’ensin dulda ya tomó nota Rafael Simancas, inventor de la resiliencia, y témome que, tres l’avisu que supón la espulsión de Redondo, namái la insistencia en les manifestaciones verbales de los disidentes socialistes, que los hai, retiraos y n’activu, anque’l presidente Barbón nun tea ent’ellos; namái ella, repito, puede llevar a un replantegamientu de la deriva de un partíu imprescindible pa la política xeneral de la nación.

Afortunadamente pa los purgaos, como Redondo, en Madrid yá nun hai cheques, de mou que nun tienen que temer qu’un revolver Nagant 1895 acabe colos sos sufrimientos, como yera’l casu de los sentenciaos en Moscú.  

Raúl Suevos

A 16 díes vencíos de septiembre de 2023

Torna en castellán en repdiv.blogspot.com

La concentración

 

A min esta pallabra siempres me lleva a Cuba, y al xeneral Valeriano Weyler, el meyor militar español de la so dómina ensin dal dulda, y el diáñu pa los cubanos que, dende la ocupación yanqui en 1898, tienen recibío l’adoctrinamiento minuciosu d’aquellos, y depués de les sos propies autoridaes.

La concentración de personal civil nes ciudaes, col abandonu del mediu rural pa asina dexar ensin suministros ya información a los insurxentes, púnxola en marcha Weyler pa poder llevar a cabu la so ofensiva victoriosa, namái detenida pola so destitución tres l’asesinatu de Cánovas y el consiguiente cambéu de gobiernu.

Militarmente fo un ésitu total, anque al coste de milenta muertos civiles énte la incapacidá de les autoridaes civiles para trepar cola loxística. Depués sedría emplegada polos imperios coloniales, como los norteamericanos en Filipines, o los británicos nel Sureste asiáticu o en Kenia. Inclusive Fidel Castro la emplegó p’acabar colos alzaos na Sierra d’Escambray. 

Güei la concentración yera d’otru tipu. Convocada en redes per nun se sabe quien, llamaba a manifestase escontra la amnistía que, al paecer, el doctor Sánchez negocia colos golpistes catalanes; llevando implícita la llamada’l refugu a la subasta que, quien dirixe lo que queda del partíu socialista, ta dispuesto a realizar a costa de la Constitución.

En Xixón l’espaciu yera mínimu pues había mercáu quincenal d’artesanos na plaza consistorial. Con ello, creo que yéremos más de trescientos, magar que los medios de comunicación dalu ecu dieran a la convocatoria. Ye lo qu’hai.

Notres ciudaes tampocu paez que l’asuntu interese o preocupe; y nel casu de Barcelona hasta foron acusaos de boicotear un minutu de silenciu que’l gran home d’estáu qu’anguaño preside la ciudá convocara la mesma mañana en solidaridá colos marroquíes. Dalgo aponderable pero que bien podía habelo fecho enantes, o depués.

Nel aconceyamientu xixonés llamaba l’atención l’ausencia de personal n’edá madura, o mozo. Toos, o casi toos, peinábemos canes, quitando les señores, perfectamente teñies. Y paez obligao pensar si ye que, de sopito, somos los mayores los únicos que tenemos accesu a redes, mediu de la convocatoria, o, lo que ye más probable, el asuntu importa-y un res al gruesu de la ciudadanía. Y yo témome lo segundo.

Da la impresión que la sociedá de nueso tea narcotizada, como si participaran d’un bakalao infinitu, muncho más llargu y fonderu d’aquellos de va 30 años. Pero ensecuti “el viaxe” va llegar a la so fin, y la resaca va ser tarrecible.    

Raúl Suevos

A 10 díes vencíos de septiembre de 2023

Torna en castellán en repdiv.blogspot.com

La homilía

 

El drechu consuetudinariu, creo recordar, yera una fonte del drechu que s’usaba cuando nun había, o nun yeren abondo, normes aplicables. Taba formáu polos usos y vezos que taben a valir dende munchos años, quiciabes dellos sieglos. Esto ye, nun yeren cosa de cuatro telediarios.

Anguaño, pa apareyar una tradición namái fai falta un par de trienios, inclusive menos. Y eso ye lo qu’asocede n’Asturias cola homilía que l’arzobispu del Principáu tien a bien pronunciar el Día de Cuadonga, día d’Asturies, na basílica del llugar, coles autoridades principales de la rexón sentaos en primer fila.

La tradición nun ye la homilía, una pieza oratoria que la Real Academia Española, sacándola del Diccionariu d’autoridaes de 1774, describe como “Nel so rigurosu sentíu ye la plática, oración o razonamientu que se tien en xunta y concurrencia de xentes aconceyaes, pa consultar y tratar dalguna cosa; pero yá s’entienden por Homilíes los Sermones, Oraciones y exhortaciones que se faen al Pueblu”, sinon el repasu que La So Eminencia da a la situación política y social del momentu, con compostura impasible de les autoridaes que, n’Asturies, son de tradición social/marxista, y qu’una vegada acabaos los actos espelleyen minuciosamente al señor arzobispu, con pallabres midíes por parte de los altos representantes, y ataques gafientos del picu de los gorriones. Ye lo qu’hai.

A min, perteneciente a la xeneración qu’estudió coles tres maries; ximnasia, relixón y política, suéname que los sermones de Xesús de Nazaret yeren eminentemente políticos, tanto que los comunistes de la mio quinta presumíen que si Xesús tornara sedría güei, entoncenes, de la so relixón política, de mou que nu puedo menos que estrañame cola incomprensión d’estos dirixentes énte un pastor, l’Arzobispu, que trata de conducir el so rebañu, los fieles, según el criteriu que’l xulga más conveniente conforme les enseñanzas de la Ilesia.

Que la nación pasa por momentos d’incertidume namái a los necios puede resulta-yos noticia. Tamos, quiciabes, nuna situación peor que la del 2017, puesto qu’agora’l gobiernu nacional ye más feble, tantu que ta en funciones y la formación d’un nuevu nun paez fácil, hasta’l puntu que les noticies que lleguen al ciudadanu dan pa preocupase énte la subasta de la integridá d’España, nun sólo llegal sinon tamién territorial, que s’atopa n’almoneda.

Pela tarde, n’Uviéu, el presidente del Principáu, na entrega de medalles d’Asturies, centró la so homilía na defensa del feminismu y la llibertá, como si nun fuera él quien gobierna, y como si Asturies nun tuviera otros problemes.

Raúl Suevos

A 9 díes vencíos de septiembre de 2023

Torna en castellán en repdiv.blogspot.com

El Rubi nun ye Robert Redford

 

En 1966, yá tien llovío, estrenóse un película terrible, con un repartu de nivel altu, Marlon Brando a la morra, y una direición atanante a cargu d’Arthur Penn. El papel que se llevó la emoción de quienes la güeyaron cumplía-y a un Robert Redford bien mozu, y el títulu de la cinta fo, n’España, el de La Xauría humana, anque l’orixinal yera La Caza.

La pieza yera’l mozín Redford, namái defendíu pol sheriff Brando. Un desgraciáu que ye acosáu y perseguíu por tou un pueblu, nuna caza que recuerda a los pogromos de xudíos y qu’amuesa hasta qué puntu la miseria de los baxos instintos humanos puede ser conducía per medios estremaos hasta anular el raciociniu de les persones. Nin que dicir tien que, a la fin, el mozu protagonista cae feríu de muerte nuna escena que recuerda a la eliminación de Oswald a manes de Jack Ruby, tres l’asesinatu de Kennedy.

Estos díes, cola ayuda imprescindible de los medios de comunicación, asistimos a la caza d’un home, llevada a cabu por una xauría descomanada, tan grande como un país casi enteru, na que la primer pieza baltada tien sío la presunción d’inocencia, esa que los partíos políticos esixen ca vegada qu’un de los de so cae n’algún asuntu delictivu, xeneralmente de corrupción.

L’observador atentu tendrá comprobao cómo, tres un parón inicial de más de veinticuatro hores dende’l besu pernomáu, el cambéu de vientu produzse cola intervención de les ministres podemites nel asuntu, dexando col culu al aire al restu del gobiernu en cuantu al so caché progresista/feminista, y obligándolu a reaccionar, magar que la pieza/Rubiales presumiera de la so filiación, y fuera amparáu nel pasáu. 

Les condergues vinientes, oportunistes, como les de Tebas y Casillas, vieyos alversarios electorales de Rubiales a la presidencia de la Federación, merecen axetivos de calter escatolóxicu que voi aforrar al llector. Depués siguió la cascada mediática, una vegada definida con claridá la pieza a cobrar, y, tres el aconceyamientu federativu, con aplausu unánime de los asistentes, y la consiguiente inhabilitación de Rubiales, siguieron los cambeos de chaqueta fulminantes y vergonzosos de los seleccionadores. Qué papelón.

Güei vemos como’l totalitarismu puede tomar formes diverses, tamién la democrática, anque lo cómodo, n’España, seya carga-ylo too al réxime del xeneral Franco. Porque esta caza a la qu’asistimos nun ye más que la espresión llaína de la ideoloxía woke/progresista ñueva, a la que naide se ve capaz de resistir, como la protagonista amuesa colos sos silencios iniciales y la selmana llarga que tien tardao en poner denuncia.   

Raúl Suevos

A 8 díes vencíos de septiembre de 2023

Torna en castellán en repdiv.blogspot.com

La trapería de El Llano

 

Tornen usos del pasáu, y presentenmoslos como gran novedá. Como esi nichu nuevu de negociu, según la noticia, que tien abierto tienda en Xixón, y que consiste en vender ropa usada al moderáu preciu d’un euru la pieza. Un negociu que, al paecer, de orixe vascuence, yá abrió unes cuantes tiendes nel territoriu nacional, y que ye bienvenío si ello potencia la reutilización d’unes prendes que, si non, taríen condergaes, en munchos casos, a la ignominia del vertederu.

Pero nun hai novedá nesta actividá mercantil, puesto que ye vieya como’l mundiu, y a lo llargo de les dómines tien conocío formes estremaes de presentación. Como les tiendes vintage, galicismu qu’escuende la venta de  pieces usaes, de característiques diverses, y, eso sí, a precios superiores al euru que la franquicia ñueva mos propón.

Tenemos tamién les tiendes que, rexentaes por voluntarios de dalguna organización caritativa, reciben donaciones testiles pa, tres el tratamiento adecuáu y selección, poneles a la venta a precios módicos pa con esos ingresos sofitar proyeutos de calter humanitariu. Dalgo que, últimamente, paez facese cotidianu, en contraposición a una sociedá que presume de rica en dalgunos aspeutos. Ye lo qu’hai.

Pero na ciudá de nueso tuvimos, quiciabes, un casu únicu. Un heriedu de las vieyes traperíes que, a finales de los sesenta y entraos los setenta del sieglu pasáu, supo reconvertise pa tomar la delantera a los predictores de la moda d’aquellos tiempos. Moda, por otra parte, abondo avanzada si tenemos en cuenta que, na d’anguaño, munchos detalles y estilismos tán tomaos d’aquella.

A la trapería del Llano llegaben, y nun m’entruguen pente medies qué procedimientu, pues iñorolo, unos paquetes de forma cúbica, d’un metru de llau aproximadamente, formaos por ropa prensada proveniente de los Estaos Xuníos, per aquel entoncenes lo más de lo más pa los adolescentes xixoneses. Yeren los tiempos de la guerra del Viet-Nam y d’Elvis Presley, por definir un espaciu temporal al llector.

Naquellos cofres del tesoru veníen texanos, camises de flores, y, ente toa mena de prendes, dalgunes militares, con especial premiu si salía una sahariana, o chaquetón, de les qu’usaben los militares yanquis nel sudeste d’Asia. Nun-yos cuento yá si venía con dalguna mancha escura, que daba pa lucubrar sobro una posible fería de guerra.

La engarrada posterior llegaba en casa, pues les madres yeren absolutamente alerxiques a que mos vistiéramos como si en casa nun hubiera perres pa ello. Pero la realidá yera que, nel nuesu tranquil provincianismu, la Trapería del Llano daba más de sí que la Pasarela Cibeles.   

Raúl Suevos

A 3 díes vencíos de septiembre de 2023

Torna en castellán en repdiv.blogspot.com