La muerte vien del norte

El norte, en munchos países de Centroamérica, ye la forma de referise a los Estaos Xuníos; lleven, d’una u d’otra miente, sintiendo la so presencia dende’l momentu que se pasó la resaca de la Independencia. Unos más qu’otros, foron el tarrén de xuegu pa capitales y aventureros yanquis, llegando l’asuntu al paroxismu cola creación d’un país nuevu, Panamá, a cuenta de Colombia.

La metá de les tierres de la rexón llegó a ser propiedá de la United Fruit Company y Nicaragua sufrió un presidente filibusteru, Willian Walker; yanqui que finaría colgáu d’una lluria. Yeren tiempos aturbolinaos na rexón; tiempos que Joseph Conrad retrató maxistralmente en Nostromo. Yera natural que, tres la violencia de los 70,  la xente se buscara la vida nos EEXX.

Guatemala, Hondures y, sobre too, el Salvador, sofrieron procesos de violencia xeneralizao que nel casu del caberu acabó nuna llarga guerra civil. Tres esti periodu prodúxose una emigración masiva al norte y en Los Ánxeles, énte l’acosu de yanquis y mexicanos, los mozos centroamericanos organizáronse en pandilles pa defendese, dando nacencia a les conocies Mares. Nos 80 los EEXX entamaron a deportar a los pandilleros a los países d’orixe. La suerte taba echada y los tres países, asolaos pola violencia organizada, pasaron a ser conocios como’l Triángulu del Norte, sinónimu de muerte violenta.

Los EEXX caltienen el liderazgu negativu col Coronavirus pero eso nun detuvo la espulsión d’emigrantes ilegales, son milenta y tolos díes aporten centenares a los centros de detención y espulsión. Ellí pasen un tiempu, con movimientos en autobús ente centros, ensin medíes de prevención y nun ambiente que favorez la infeición indiscriminao. Depués son embarcaos n’aviones que los devuelven a los sos países d’orixe.

Más de 300 vuelos charter con deportaos mientres la pandemia, con munchos infeutaos, de los cualos 250 al Triángulu del Norte cooperaron a qu’estos países s’alcuentren sofriendo bederremente los efeutos del virus, con un sistema asistencial mui deficitariu ya agafando, una vegada más, l’iñerizu haza tol que vien del norte, tamién haza los deportaos.

Fálase y escribese muncho nestos tiempos sobro la gobernanza mundial, especialmente cola medría, en tolos órdenes, de la China de Xi Jinping, que paez enfotase n’ocupar los espacios que les polítiques de Donald Trump van lliberando en partes estremaes del mundu, tamién nel patiu d’atrás que representa Centroamérica.

Escomencipiase perdiendo los corazones de los tos amigos y simpatizantes y, cuando te quies dar cuenta, acabes en solitú.   

Raúl Suevos

A 27 diés vencíos de xunu de 2020

Torna en castellán en repdiv.blogspot.com

Españoles en Cuba

El zapéu ye una actividá que prautica’l personal cuando nun-y convence lo que la pantalla-y ofrez. Ayeri llevóme a caer nun programa de la que va tiempu yera la única cadena televisiva de nueso. Españoles pol mundu se llama’l programa y ofrecía la vivencia cubana d’una serie de connacionales.

Impactaronme les imáxes en dos aspeutos, el personal y l’espaciu físicu. Nun dexaba de llamame l’atención que toos, ellos y elles, tuvieren felizmente casaos o emparexaos con naturales del país, notoriamente más mozos, y, poro, fueren residentes fixos nel mesmo; lo que pudiere tar detrás de la prudencia nes sos manifestaciones sobrp la situación política y social del país.

Siguiendo les sos esplicadures paeciera qu’en llugar de vivir en L’Habana s’atopasen esfrutando d’unes vacaciones continues na Islla; nun paecía esistir dalu tipu de dificultá pa desarrollase como persones llevando una esistencia plena. El marcu espacial diba dende unes sableres maravioses d’augues turqueses a los rincones urbanos más llamativos y guapos de la ciudá nos que toles cases amosaben delles fachades esplendides pintes de recien. Todo paecía allegre y curiosu, yera difícil nun sentir envidia güeyando la completa felicidá na que toos paecen desendolcase.

El reportaxe o documental nun debió alcontrar tiempu pa pasar per eses otres cais de L’Habana Vieya o Centru nes que nun se pinta una fachada dende qu’en 1959 aportara Fidel Castro a la ciudá, nim se lleva a cabu dengún caltenimientu; cais nes que ca vegada que se producen llovios torrenciales, frecuentes nel Caribe, los vecinos recen a la Caridá del Cobre católica o al Babalú santeru pa que nun seya la de so una de les cases esbarrumbaes nesa ocasión.

Tampoco hebo oportunidá de que mos amosaren neses cais non agraciaes polos trabayos de restauración d’Eusebio Leal, l’insigne Historiador de L’Habana, dalgún de los munchos “salideros”, asina llamen a los escapes d’augues fecales que hasta los ciegos reconocen pol picante y desagradable golor conl que t’asalten; y ye que la rede d’augues construyóla’l xeneral Albear nel S. XIX, y ehí sigue, la rede y la so estatua enfrente del Floridita. Nun debía de ser afayadizu pa un programa tan prestosu.

Falóse de cuentapropistes, equiparándolos a los nuesos autónomos, pero nun se contó como aquellos tienen que lluchar escontra las torgues llegales de tou tipu, que busquen que naide supere’l nivel de subsistencia pola medrana cerval que la dictadura tien a que dengún grupu algame una mínima independencia económica. Trátase de caltenelos a toos sumisos y dependientes.

Tampocu se faló de cómo los cubanos, magar qu’Obama na so semana cabera anuló la Llei d’Axuste cubanu que-yos permitía algamar la residencia de forma cuasi automática, siguen guetando tou tipu de sistemes pa abandonar la Islla en busca de una vida meyor, como facíen los alemanes del Berlín oriental, o dellos millones de venezolanos nos tiempos caberos. La vida en Cuba yera maraviosa nesti reportaxe.

Los años que viví na Islla sirvieronme pa conocer la realidá del so presente y pa estudiar el pasáo que lo construyó. Chocábame yá entoncenes, va ainda pocos años, la visión edulcorada que tresmitía la nuesa televisión estatal que, en ciertu mou, sirve pa que la mayoría de los españoles siga calteniendo una imaxe que ta mui lloñe de ser la real. Sigo ensin entendelo.

Raúl Suevos

A 24 díes vencíos de xunu de 2020

Torna en castellán en repdiv..blogspot.com

¿Qué pasó col cuartu poder?

Charles Louis de Secondat, barón de Montesquieu, pasa por ser el padre de la teoría del sistema de gobiernu modernu basáu na separación de poderes, qu’él identificaba col executivu, el lexislativu y el xudicial. Ente les sos munches obres ye l’Espíritu de les lleis, asoleyada nun tempranu 1748, la que meyor desarrolla el so pensamientu. Dende entós p’acá nun ficimos otra más que desendolcar les sos idees.

Dende muncho enantes de que’l nuesu home esplicara’l so pensamientu políticu taba nidio que’l poder auténticu asitiaba nel dineru. Na Roma antigua, mui documentada, desnde les eleiciones en tiempos republicanos al allistamientu de lexones, too pasaba pol financiamientu económicu; Augustu nu podiere enfrentase a Marcu Antoniu ensin l’heriedu del so pá adoptivu, Cesar, quien, a la so vegada, dilapidara fortunes pa sofitar la so carriera política y, yá nel poder, depredao les d’otros.

El xeniu napoleónicu, magar lo que pueda pensase tres Waterloo, foi vencíu, depués de derrotar a seis coaliciones, pola mayor capacidá financiera del Imperiu británicu, entoncenes, tres torar al español, en pleno apoxéu económicu. Ye esti, el poder económicu, en definitiva, el más importante de los conocios como poderes fácticos, xunto cola Ilesia y el Exércitu, anguaño completamente desapaecios en cuanto a la so capacidá d’influyir na aición de gobiernu. Pero hai otros.

Va ser tamién en Londres per esa dómina, finales del XVIII, cuando Edmund Burke identifica na tribuna superior del Parllamentu británicu, au s’asitiaba la prensa, al conocio dende entós como cuartu poder. La prensa informa a la ciudadanía y tamién-y da forma en cuanto que treslladaba a los llectores, depués a los oyentes y tamién televidentes, los puntos de vista o visión de la cabecera editorial a la que caún pertenecía. La so importancia ye tala que’l nuesu vixente vicepresidente llegó a afirmar que güei’l ciudadanu yá nun pertenez, ideolóxicamente, a un partíu políticu sinon que ye siguidor d’un mediu de comunicación; d’ehí la importancia que pa los políticos tien el so control que pasa a ser prioritaria pa llograr la victoria na contienda política.

Por embargu nun debemos engañamos, ye’l poder económicu, propietariu de los medios de comunicación, la mano que ximielga’l trubiecu de la información y quien marca les llínees de sofitu o de confrontación colos gobiernos de ca momentu, o cola información o’l tratamientu que se da a determinaes crisis, como la qu’anguaño vivimos.

Ayeri l’Eurobarometru, l’equivalente al CIS del Parllamentu européu, espublizaba que l’español ye’l gobierno más criticáu n’Europa polos sos propios ciudadanos, a gran distancia del segundu clasificáu en tan negativa perceición. ¿Cómo ye posible que nós, los españoles, nun mos  enteraremos y tenga que venir Europa a dicínoslo? ¿Pa quién trabaya’l cuartu poder?

Raúl Suevos

A 20 díes vencíos de xunu de 2020

Trump y la so política esterior

Nel campu de les relaciones esteriores reconocense dos doctrines principales, la realista y la idealista. La primera, definida mientres la Guerra fría por Hans Morgenthau, afirma que l’oxetivu tien de tar en caltener el statu quo, sobreentendiendo que se cuenta cola condición de líder mundial como yera’l casu de los EEXX. La segunda, en cambiu, declara que l’oxetivo debe ser la difusión de los valires de los EEXX, esto ye, la democracia y los drechos humanos, según ellos.

La realista aceuta l’usu de les nomaes proxy wars –guerres por delegación- y el sofitu a güelpes d’estáu si con ello se torguen males mayores, recordaivos del casu de Chile y Salvador Allende. El más famosu, y pa dalgunos odiáu, executor desa política foi Henry Kissinger que tuvo que delidiar con una URSS mui batallosa y una China non menos activa. El tiempu paez da-y razón nel cómputu global de los sos aciertos y erros.

La idealista tevo’l so principal paladín en Jimmy Carter y el so Secretariu d’estáu Cyrus Vance, y supunxo una sucesión de repliegues y metedures de pata que namái xeneraron pérdida de prestixu a los EEXX y de vides y llibertá a millones de persones allá au rexímenes comunistes triunfaron, como n’Etiopia, por exemplo. Anguaño Carter ye un gurú de los drechos humanos en determinaos foros pero la so presidencia nun paez que dexara bonos recuerdos nel so país.

Los EEXX cuenten con una posición xeográfica única. Defendenlos dos océanos y ellos construyeron una tupida red de bases navales y alcuerdos de defensa con aliaos –la gaditana Rota ye un exemplo- que-yos permiten una proyeición avanzada del so poder aeronaval, güei abondo reducíu con respeutu al de va unos años. Los sos Secretarios d’estáu calteníen una tradición de conocimientu fonderu del mundu y la so historia que sofitaba l’aición de los sos presidentes. Anguaño paez qu’eso s’acabo.

Va dellos díes llegabanos a los telediarios la imaxe temblorosa de Donald Trump mientres la so intervención énte los cadetes de West Point, los futuros oficiales del Exércitu USA. Nun se dixo un res del discursu; un discurso tarrecible, tremendamente nacionalista anque normal y lóxico dao los sos oyentes, con una larga relación de hipermodernos sistemes d’armes en producción que diba dirixida a los oyíos de los sos alversarios y,  lo más importante, una declaración implicita d’aislacionismu que nun fai sinon confirmar les sos aiciones caberes; retirada de 9500 militares d’Alemaña, abandonu de los sos aliaos en Siria, etc. too paez indicar que vien un periodu d’inaición norteamericana –política irrealista- que va dar ales a los sos oponentes, Rusia y, especialmente, China, con consecuencies penoses a mediu plazu pa tol mundu.

N’avientu hai eleiciones nos EEXX. La opción Trump ye pa tremar pero un Joe Biden de 78 años tampocu asela.  Va haber que tar atentos a los vicepresidentes.

Raúl Suevos

A 18 díes vencíos de xunu de 2020

Carta mexicana

Querida amiga

Alcuérdome que cuando nós apiancabemos pel estranxeru, especialmente nos años de Cuba, tábemos enfrascaos na vida del país y siguíemos con daqué de desapegu les coses d’España, como si la distancia punxera en sordina les vicisitues de la patria. Cuando los fechos algamaben mayor relevancia atopabemosnos con una cierta dificultá pa entender los cómos y los porqués, poro, entiendo perfeutamente que la tribuna del señor Ansón te sobresaltare. A min, na to situación, m’asocediere lo mesmo.

Nun concuerdo no fondero de lo que diz. Nun creyo que temos énte un procesu constituyente en cierna pa convertir el país nuna república. La Constitución de nueso ye de les nomaes “fuertes”, esto ye, el so cambéu, nos principios fundamentales, y esa modificación sedríalo, riquier d’una comunión de voluntaes terrible na ciudadanía qu’implica dilimientu de Cortes, eleiciones a constituyentes, ellaboración del proyeutu constitucional nuevu, referéndum y eleiciones xenerales nueves. Como ves, daque asina necesita d’un “ambiente” políticu mui particular que ta lloñe de dase nestos momentos n’España, asina que yo m’inclino a meter l’asuntu, desencadenáu por un -¿premeditáu?- comentariu del Ministru de xusticia, dientro del ruiu interesáu que la política produz davezu pa que los ciudadanos mos distraigamos y nun prestemos atención a lo importante; por exemplo ¿Por qué se ficieron les coses tan mal n’España? Especialmente nes residencies de vieyos.

Otra cosa distinta ye qu’esista una operación antimonárquica na esquierda; eso siempres tien esistío, ye consustancial con ella; cuanto más a la esquierda más antimonárquica. Cuando’l PSOE yera socialdemócrata eso nun taba na axenda, agora que se escoró a la esquierda, con un socio comunista nel so gobiernu, l’asuntu de les esencies reaparez y pela vía del rei Xuan Carlos busquen foliar el prestixu de la Corona. Ye lo que hai.

A min preocupame muncho más la situación política xeneral, n’España y nel mundu. Esto ta fecho un auténticu caraxal. Llevamos años viendo crecer el populismu por toes partes, tú tienes cerca a AMLO y a Trump, xente que dexa de llau los fundamentos del bon gobiernu pa sustituyilos pola xestión de les pasiones. Nel restu del mundu les coses son semeyantes, Putin, Duterte, Johnson, etc. Les organizaciones internacionales lloñe de potenciar la gobernanza mundial paecen ca día más febles, emtamando pola Xunión Europea au, na mayoría de los países, van apaeciendo movimientos populistes d’esquierda y drecha. Dende la cayida del Muru en 1989 nun hai un control nidiu nel mundu. Mal asuntu.

La globalización traxo más bayura pero tamién más interdependencia pa les economíes. El parón del mundu paraliza la maquina china que vende muncho menos, y compra menos coches alemanes y luxu francés, tampoco viaxen los turistes y países como’l nuesu tremecen; too ta interrellacionao y la crisis sanitaria provoca la crisis económica pero, equí vien lo peor, ésta pue xenerar la crisis institucional en munchos países como los españios de violencia nos EEXX amuesen, con repercusiones tamién en Europa anque equí, más civilizados ellos, cebense sobretoo nes estatues.

Pa la seronda falen de la posibilidá d’una recayida na pandemia. Soi optimista y creyo que nun va ser como la primera, amás, el negociu mil-millonariu de les vacunes va facer que ceo tengamos daqué. La cayida de la economía, más fondera que l’anterior, va dexar millones de persones nel paru y esi caldu de probritura y descontentu va xenerar una insatisfacción social descomanada que va dar llugar a fenómenos pacíficos nalgunos sitios, violentos notros. Podemos esiste güei gracies al movimientu de los indignaos pero nada mos asegura que lo que surda s’empobine pola vía institucional.

Esto ye lo que yo veo güei.

Raúl Suevos

A 16 díes vencíos de xunu de 2020

Torna al castellán en repdiv.blogspot.com