Como otres vegaes enantes un fechu puntual, la muerte d’un home
negru a manes de la policía nesti casu, desendolcó un pandemónium de disturbios
sociales en mediu mundu, especialmente nos EEXX, au too escomencipió. Les cifres
d’actuaciones policiales mortales naquel país sobro les estremaes minoríes que nél
se desenvuelven amuesen claramente que tienen un problema fonderu entá por
resolver; problema que, dende China, güeyen con prestu.
La Guerra de Secesión ente un sur agrícola y un norte
industrial xustificóse como una cuestión rellacionada cola esclavitú, anque
depués les rellaciones sociales malapenes camudaron. Na dómina de los hermanos
Kennedy, metanes la puxanza de la televisión, tornaron los problemes y disturbios
a la primera plana y, dende entós, asistimos a ciclos de represión sobro les
minoríes siguíos d’españíos de violencia nes cais; y nun mos engañemos, ye
difícil que, per agora, la espiral se detenga.
Nos tiempos caberos, amás de los tradicionales asaltos a comercios
de toa mena, tamién paez aportáu’l tiempu del valtamientu d’estatues. A Xunípero
Serra yá-y dieron lo de so en California; esta vegada van a por Colón, tamién
un racista y esclavista dicen. N’Inglaterra hasta a Winston Churchil tuvieron
que protexer. Naide que tea sobro un pedestal paez tar a salvo destos Comités
de salú pública nuevos.
Lo de les estatues impresiona porque queda mui dramáticu nos
telediarios pero peor ye l’acosu a enseñantes políticamente incorreutos pa
estos robespierres modernos, que pueden llegar a facer doblar el brazu a
prestixosos centros d’enseñamientu con cientos d’años d’esistencia. La libertá
de cátedra entama a tar n’entredichu a guelpe d’escrache estudiantil y les
rectoríes claudiquen énte’l puxu destos puritanos nuevos. Tarrezome que la
ilustración n’Occidente ta en peligru, asediada por minoríes radicales, y nun
veo actitú nin coraxe pa llevar a la foguera a estos Savonarolas de mediu pelo.
Colón nun foi más que un peón d’una Corona española que naquel
momentu construyía’l más avanzáu sistema de gobiernu de la dómina. La Reina Católica
creyó nel proyeutu y trescalólu d’espíritu evanxelizador; l’aición de la Ilesia
foi fundamental y a ello débese’l catolicismu n’América, pero tamién les 23
universidaes que fundó ellí España, más que tol restu de potencies xuntes. A
Isabel debense les Lleis d’Indies, protectores de los indíxenes como súbditos
de la Corona y prohibiendo la so esclavitú; el primer tratáu sobro drechos humanos
pa cualquier observador oxetivu. Lleis que sedríen refrendaes años más tarde,
en tiempos del Emperador, na Controversia de Valladolid, ensin dulda’l primer
congresu sobro drechos humanos celebráu nel mundu.
Los españoles, un garapiellu malpenes, namái pudieron
conquistar y construyir un imperiu dende la sabiduría pa llograr el sofitu de
milenta almes, les mesmes que taben apoderaes poles élites depredadores
azteques o inques. Colos españoles los impuestos en granu y trabayu personal yeren
menores y el Dios que trayíen yera más indulxente. Cola independencia de les
repúbliques nueves los pueblos indíxenes quedaron desprotexíos y dalgunos
llegaron a desapaecer, corriendo’l mesmu destín qu’aquellos que cayeron baxo’l
dominiu anglosaxón.
Que sigan valtiando estatues, nun con ello van resolver el
problema.
Raúl Suevos
A 14 díes vencíos de xunu de 2020
Torna en castellán en repdiv.blogspot.com
No comments:
Post a Comment