Aldous Huxley y la Obregón

 

Fo la noticia de la selmana, mui percima d’otros elementos del fragor políticu anguaño, en plena precampaña eleutoral. Y ye que la fía d’Ana Obregón, que pudiera paecer pastu pa prensa rosa, llueu, casi inmediatamente, saltó al ruedu políticu por aquello de la maternidá subrogada y la llei de reproducción humana asistida que rixe, ye un suponer, estos asuntos n’España dende’l 2006.

En munchos casos los esquisitos, porque nestos temas que toquen asuntos teóricamente fonderos siempre hay personal que se pon mui delicao, incidíen nel bienestar futuru de la neonata y dudaben del mesmu teniendo en cuenta la edá avanzada de la parturienta, perdón, de la madre llegal. Otros paecíen centrase no beneficiosa que diba ser la neña pa la estabilidá mental de la pernomada actriz, que recién tien perdío al so fiu.

L’asuntu pronto pasó a ser pelota pa xugar nel patiu de les Cortés y asina asistimos al posicionamientu de los partíos políticos principales, con dalgún movimientu sorpresivu sobro les declaraciones anteriores, y, alcordanza d’hemeroteca sobro les manifestaciones vieyes d’unos y otros, pues nesti tema tien habío dellos cambeos o evolución a lo llargo del tiempu; y lo que te rondaré…

Cabría añader qu’en toa l’amarraza, toos ensin exceición, dexaben nidia la so preocupación pol bienestar del bebé; el bien a protexer percima de tolo demás. Y miren ustedes, a min casi too me sonaba a un estudiáu exerciciu d’hipocresía, pues toos saben, políticos y comentaristes, qu’eso de la maternidá subrogada ye tarrén nel que namái dende una posición económica folgada -500 millones de dólares factura anualmente Florida- puese unu embarcar. Tamién que’l númberu de casos amonta ensin cesar, a la par que s’estanca o amenorga’l d’adopciones –el bienestar d’esos neños debe ser menos importante- y que, el tiempu valo confirmar, dientro de pocu, amás del vientre d’alquiler, va poder encargase la color de pelu y de los güeyos, amén d’escartar un bon númberu d’enfermedaes, como Aldous Huxley proféticamente describiera nel so peractual “Mundiu Feliz”. Ye lo qu’hai.

Sorprendentemente, en toa esta hestoria, unos y otros supieron eslizase ensin malapenes rozar, magar les llamaes al bienestar del neonatu, l’asuntu del abortu. Un tema nel que los derechos del nasciturus desapaecen énte la voluntá suprema de la muyer a disponer del so cuerpu; derechu superior a tolo demás nesti casu. Y qué quieren que-yos diga, a min como que me rincha too un pocoñín, sacantes que lo que verdaderamente prevaleza seya el nuesu afán por llegar a esi mundu que Huxley mos describía.     

Raúl Suevos

A 30 díes vencíos de marzu de 2023

Torna en castellán en repdiv.blogspot.com

Pedro, el pacificador

 

Acabóse la moción y yá son otros los aforfugos. Tres les imáxes del Congresu, periclitaes cola rapidez que los tiempos modernos devoren casi tolo noticiable, por mui importante que pudiera paecer, son les guayaberes dominicanes, de factura probe por cierto, les qu’ocupen les sesiones de los telediarios dende Santo Domingo, see de la Cume Iberoamérica.

Ellí aportó, procedente d’otra cume europea’l nuesu presidente de gobiernu. Ellí, en Bruseles, despachóse a gusto escontra’l líder de la oposición, a la par que lo facíen n’España los sos corifeos gubernamentales siguiendo les instrucciones de la Secretaria d’estáu de comunicación, supongo, y con un usu y abusu de frases tan idéntiques, como vien siendo avezao dende que l’argumentariu de Moncloa dirixe les sos letaníes, que consiguen que’l mensaxe se diluya na sobreactuación que lleven a cabu toos ellos. Deberíen facéselo mirar enantes de que seya demasiao tarde, salvo que quieran tresmitir la so pertenencia a la familia de les cacatúes, psitaciformes pa los lleíos; imaxe francamente nociva en periodu eleutoral.

Nesta campaña posterior a la moción tien llamao l’atención el bombu que-y dieron dende’l gobiernu a la visita que’l doctor Sánchez va cumplir a Pekín. Un empeñu nel que toos, siguiendo’l nomáu argumentariu, esfordigañaron el prestixu del amáu líder, el d’equí, non Xi Jinping, que nun ye sinon el reflexu del créditu y la influyencia qu’España tien nel ámbitu internacional. Nada menos.

Una visita de relevancia especial puestu que se realiza inmediato de la visita del líder chinu a Moscú, de la que nada tien trescendío más allá de la parafernalia de los actos oficiales, y na que foi posible sacar delles conclusiones tres el hieratismu de Xi y el rostru animáu d’un Putin otrora pétreu. Una deducción que mos lleva a pensar qu’ellí, en Moscú, roblóse’l acta de vasallaje de la Rusia de Putin respeutu a China. Una servidume radical nel planu comercial debío a les sanciones d’Occidente, y que yá veremos si va más allá, esto ye, nel planu político-militar.

Una cita, la española, que va servir, dicen, p’analizar la intencionalidá y estensión d’esi Plan de paz chinu, que güei nun ye más qu’un esbozu, y quédase mui lloñe de la radical retirada de fuercies, compensaciones y tribunales pa los crímenes de guerra que propón l’encarceláu Navalny. Muncho oxetivu pa lo que representamos.

La realidá ye que Pedro, el pacificador, va cubrir un buecu mínimu nel plan de rellaciones públiques del Ministeriu d’esteriores chinu, pero espera vendenos el productu como un “gran saltu alantre” tres el paseín con Biden. Ye lo qu’hai.

Raúl Suevos

A 26 díes vencíos de marzu de 2023

Torna en castellán en repdiv.blogspot.com

Partíu del sentíu común español

 

Paeciera que’l candidatu Tamames diba per llibre; que nun formaba parte de dengún de los partíos representaos na Cámara, y de fechu asina ye, anque la so propuesta presentárase pel partíu de Santiago Abascal. Tamames pertenez a otra dimensión, y non precisamente a la de la senilidá que de forma mayoritaria prensa y portavoces intentaron adscribilu.

Dende un tonu moderáu y breve, el candidatu dio amuesa de sabencia, compostura y mente arreguilada a la par que despexada. Y ello magar la su edá avanzada, dalgo que, nes sociedaes primitives, y al paecer más xuicioses, otorgaba un estatus especial na dirección de la colectividá, y poro atopamos, a lo llargo de la historia y a lo ancho del mundiu, exemplos estremaos de conseyos d’ancianos, y equí mesmo, n’España, entá contamos con un Conseyu d’Estáu que nun ye sinon una espresión d’esi conceutu. Y yá nun podemos dicir lo mesmo d’un Senáu que nació con esi espíritu constitucional pero que, posteriormente, desposexeron del requisitu de edá a favor, como casi siempres, de los intereses partidarios del momentu. Ye lo qu’hai.

Don Ramón, al que dende los primeros minutos solmenaron despiadadamente dende los micrófonos, y al que dempués espellaron articulistes y tertulianos, impartió una lleición de saber tar y de conocencia de la situación de la nación. Pocos temas dexó ensin tocar, too ello dende’l respeutu a la Cámara, dalgo que, en munchos casos, con especial reproche a quien anguaño caltien les esencies comunistes na sala de forma chulísima, aparcóse en rellación cola so persona. Ellos sabrán.

Él yera l’únicu que paeciera preocupáu pel devenir de la nación, el restu, ensin esceición, taben a marcar espaciu na yá entamada competencia eleutoral; aniciando pol presidente del gobiernu, que dexó nidia la so posición tocantes la llucha ensin cuartel que vamos ver nel espaciu a la so manzorga, y siguiendo pol propiu Abascal, o Feijoo na so midida y publicitada ausencia del hemiciclu, pa contentu y gociu de la portavoz popular, que tevo asina ocasión de llucise.

Don Ramón, parodiáu anuechi nel programa más vistu de la televisión nacional, amuesa físicamente’l pesu de la edá, pero con más espabilación mental que cualquier de los ellí aconceyaos –xenial la so alusión a Gasol y Cataluña- y, dende llueu, mui percima del portavoz socialista, un individuu que por méritos propios merez la damnatio memoriae a la que’l radicalismu d’esti gobiernu paece querer condergar a una gran parte d’España.  

Moción ganada pol Partíu del sentíu común español y el so presidente, Don Ramón. 

Raúl Suevos

A 22 diés vencíos de marzu de 2023

Torna en castellán en repdiv.blogspot.com

De montes comunales y mociones de censura

 

Aprobóse per unanimidá va dellos díes una proposición non de llei na Xunta Xeneral del Principáu d’Asturies pa entainar la devolución de los montes comunales a los sos llexítimos propietarios. Un asuntu que paeciera diseñáu pol gobiernu rexonal pa desesperar, enantes del fallecimiento ñatural, a los sos amos, pues nun fai más qu’enzancar los procedimientos p’angustia de los demandantes, ca vegada menos y más añosos. Ye lo qu’hai.

L’asuntu en sí nun paez tener muncha rellación cola moción de censura que propón esta selmana el tercer partíu de la oposición, pero quiciabes mos dea delles claves si tenemos en cuenta que la humildosa proposición asturiana fo presentada va malapenes un añu en términos práuticamente idénticos por esi mesmu partíu, anguaño oxetu de toa mena d’atacamientos na capital pola so atrevencia nel usu de mociones de censura. Pero naquella ocasión los montes comunales foron refugaos por tol arcu parllamentariu astur. Llamativo. O non.

Si se güeya la situación con una cierta distancia nun queda otra que recordar aquel aciar Pactu del tinell –del aparador- robláu en 2003 nel salón barcelonés del rei d’Aragón, Pedro’l ceremoniosu, au cuenten que los reis Católicos recibieron a Cristóbal Colón, y que nesa más recien oportunidá lo qu’aportaba a la historia yera l’oprobiu d’un pactu p’aisllar a toa costa a un partíu democráticu, el Partíu Popular.

Anguaño nun esiste, que se sepa, un pactu semeyante, per otra parte perfeutamente llegal y llexítimu, por mui mal que goliera. Podemos, por embargu, apreciar nel comportamientu haza’l tercer partíu de les Cortes una cierta actitú d’apartheid per parte del restu del arcu parllamentariu; too ello amparao nel so allugamientu nel estremu drechu d’esi mesmu espectru, y que s’etiqueta como fascista, daqué que, notru orde de coses, non asocede col otru estremu, au s’alluga’l partíu comunista, camufláu nel estandarte podemita, y qu’entamó la llexislatura lideráu por daquien de nidies manifestaciones estalinistes. Ehí nun pasa un res. Too seya pol gobiernu.

La moción de censura, llegal y llexítima, va da-y a esi partíu la posibilidá d’esplicase, dalgo que, de cutiu, se-y remacaria, tantu nel ámbitu parllamentariu como nel de la comunicación pública, au hasta l’enantes valedor pequeñu talibán, anguaño lu ataca inmisericorde. Y tamién los d’Abascal deben aceptalo, pues forma parte del nuesu sistema/xuegu democráticu. Paez obviu que tamos énte una operación de defensa del vieyu bipartidismu, que ve nel periodu electoral a puntu d’aniciase la oportunidá pa recuperar les posiciones perdíes nos años caberos.  

Raúl Suevos

A 20 díes vencíos de marzu de 2023

Torna en castellán en repdiv.blogspot.com

Entente de perdedores

 

N’avientu de 1998 aconceyaron en Saint Malo, un vieyu puertu de pirates y corsarios del norte de Francia, los presidentes Jacques Chirac, del estao francés, y Tony Blair, del gobiernu británicu. D’ellí coló una campanuda declaración d’intenciones tocantes la Defensa Europea que nun sirvió pa nada, más allá de les cites nos artículos de munchos pseudo-estudiosos sobro l’asuntu, y qu’anunciaba la creación d’una Fuecia de Reacción Europea de 60.000 elementos, los mesmos, yá que tal, qu’anuncia el “nuesu” Borrel na so Brúxula Estratéxica Europea, y que, posiblemente, va tener la mesma vitalidá y vixencia qu’aquella de Saint Malo, ye lo qu’hai.

Dende entós muncho tien llovío, y la qu’un tiempu fo Entente Cordiale pasa dende va tiempu per momentos complicaos. Especialmente dende qu’esi mozu garapoleru, Boris Johnson, s’empeñó no del Brexit, dalgo que vien dando grandes dolores de tiesta a la señora Von der Leyen, y desosiegu fonderu a la mayoría de la población de les Islles Britániques, o a lo menos a aquellos qu’entá caltienen una cierta dosis de sentíu común. Emmanuel y Rishi vanlo iguar, o eso dicen.

Esti finde axúntense en París, nel palaciu del Elíseu, que nun ye Versalles pero tien el so qué, y que seya ellí yá mos diz que’l morenu inglés ye’l más necesitáu. Aprieta-y casi too; lo del Ulster, lo de les pateres, que tamién hasta ellí aporten, y, sobremanera, el futuru negru que presaxal Brexit. Y nun basta con ser el más echáu p’alantre énte Vladimir; les güelgues son de casa y nun paren.

A Emmanuel, que vien de ganar la presidencia, pero non les Cámares, presentase-y una segunda y definitiva presidencia cuesta arriba. Sabe que Francia ta cayente, como Britania, y d’ehí’l so proyectou de reforma de les pensiones, les meyores d’Europa, pa un país ca vegada con menos márxenes. Yá hasta la Francofonía africana los refuga. Pero los franceses nun quieren perder los sos privilexos, anque’l restu del mundu lleve otra marcha.

A dambos tien-yos venío bien lo d’Ucrania, anque suene mal, tien-yos servío pa, en parte, llavar la cara col so sofitu decidíu, sobre too del británicu, a Zelensky, pero, sobremanera Macron, diéronse cuenta de que los dividendos van ser pa la OTAN, y, especialmente, pa una Alemaña que, si’l canciller Scholz caltien lo prometío, con un 2% del PIB n’inversión en defensa vase convertir, ensin dala dulda, nel nuevu campeón d’una Europa muncho más inclinada haza l’este, haza los Urales, haza Eurasia.   

Raúl Suevos

A 10 díes vencíos de marzu de 2023

Torna en castellán en repdiv.blogspot.com

La esfinxe y el coronel

 

Quiciabes daquien enantes que yo tuviera visto esi paecío particular. A min viénome la inspiración mientes lleía una información sobro esi túnel ocultu que les nueves tecnoloxíes permitieron columbrar nel interior de la Gran pirámide, la del faraón Keops. Un primer planu de la Esfinxe de Guiza que, de guelpe, superpúnxose cola mia alcordanza gráfica del coronel López de los Cobos.

Dambos tienen un semblante cuadrao, con un rictus que nun llega a sonrisa pero recuerda un pocu a la Ioconda. La Esfinxe siempres impasible, viendo pasar el tiempu, como la Puerta d’Alcalá, anque con dalgunos años más, tres mil quinientos llargos, casi nada. Non tanto’l coronel, anque tamién amuesa siempres un rostru impávidu, por más que tenga motivos pa conmovese.

Estos díes ye posible que quiciabes sonría al ver como los acontecimientos ponen n’evidencia’l so comportamientu y el de los “otros”, pos l’escándalu recien –apelativu piadosu- de los puteros socialistas, denominación d’orixe canaria, da pa pensar que, al contrario que nel so casu, daquien tien pasao información privilexada sobro l’avance de les investigaciones, de mou y manera que, nel grupu socialista del Congresu, pudieron acogotar rápidamente al pernomáu diputeru hasta algamar la so renuncia al escañu, consiguiendo asina apangar nalguna midida los efectos mediáticos de la sinvergonzería.

Al coronel De los Cobos esixeron-y información sobro les investigaciones de la Sección d’información de la Comandancia madrilana en rellación coles manifestaciones del 8M, añu del Covid, daqué a lo que se negó, pos, amás de desconocela, diba escontra la llei. Un xestu que-y costó’l puestu de manera inmediata por pérdida de confianza, y dempués l’ascensu a xeneral, magar ser calificáu como númberu unu demientres varios años. Güei sigue siendo oxetu del anoriciamientu del ministru del Interior, que cola so tiesta satisfizo tamién la rancura de los independentistes catalanes, odiadores del Guardia civil dende los tiempos de la independencia interrupta.

Anguaño, el ministru Marlaska, que cadía me recuerda más a Iznogud, el maléficu visir del califa de Bagdad creáu por René Goscinny, anque nun quiera ser califa en llugar del califa, debe tar contentu col so control de la información, que tamién dicen que tien dao pa avisar al inefable Revilla sobro la llegada de l’Axencia tributaria y la Policía nacional a la so Dirección xeneral de carreteres, au llevaba tiempu campando la corrupción con aroma a sobao pasiegu. Un ministeriu d’eficacia elevada.

Son tiempos difíciles los d’España, y quiciabes la Esfinxe nun seya un bon referente pa evitar problemes; quiciabes seya meyor ponese de perfil, a la exipcia.

Raúl Suevos

A 5 díes vencíos de marzu de 2023