La esfinxe y el coronel

 

Quiciabes daquien enantes que yo tuviera visto esi paecío particular. A min viénome la inspiración mientes lleía una información sobro esi túnel ocultu que les nueves tecnoloxíes permitieron columbrar nel interior de la Gran pirámide, la del faraón Keops. Un primer planu de la Esfinxe de Guiza que, de guelpe, superpúnxose cola mia alcordanza gráfica del coronel López de los Cobos.

Dambos tienen un semblante cuadrao, con un rictus que nun llega a sonrisa pero recuerda un pocu a la Ioconda. La Esfinxe siempres impasible, viendo pasar el tiempu, como la Puerta d’Alcalá, anque con dalgunos años más, tres mil quinientos llargos, casi nada. Non tanto’l coronel, anque tamién amuesa siempres un rostru impávidu, por más que tenga motivos pa conmovese.

Estos díes ye posible que quiciabes sonría al ver como los acontecimientos ponen n’evidencia’l so comportamientu y el de los “otros”, pos l’escándalu recien –apelativu piadosu- de los puteros socialistas, denominación d’orixe canaria, da pa pensar que, al contrario que nel so casu, daquien tien pasao información privilexada sobro l’avance de les investigaciones, de mou y manera que, nel grupu socialista del Congresu, pudieron acogotar rápidamente al pernomáu diputeru hasta algamar la so renuncia al escañu, consiguiendo asina apangar nalguna midida los efectos mediáticos de la sinvergonzería.

Al coronel De los Cobos esixeron-y información sobro les investigaciones de la Sección d’información de la Comandancia madrilana en rellación coles manifestaciones del 8M, añu del Covid, daqué a lo que se negó, pos, amás de desconocela, diba escontra la llei. Un xestu que-y costó’l puestu de manera inmediata por pérdida de confianza, y dempués l’ascensu a xeneral, magar ser calificáu como númberu unu demientres varios años. Güei sigue siendo oxetu del anoriciamientu del ministru del Interior, que cola so tiesta satisfizo tamién la rancura de los independentistes catalanes, odiadores del Guardia civil dende los tiempos de la independencia interrupta.

Anguaño, el ministru Marlaska, que cadía me recuerda más a Iznogud, el maléficu visir del califa de Bagdad creáu por René Goscinny, anque nun quiera ser califa en llugar del califa, debe tar contentu col so control de la información, que tamién dicen que tien dao pa avisar al inefable Revilla sobro la llegada de l’Axencia tributaria y la Policía nacional a la so Dirección xeneral de carreteres, au llevaba tiempu campando la corrupción con aroma a sobao pasiegu. Un ministeriu d’eficacia elevada.

Son tiempos difíciles los d’España, y quiciabes la Esfinxe nun seya un bon referente pa evitar problemes; quiciabes seya meyor ponese de perfil, a la exipcia.

Raúl Suevos

A 5 díes vencíos de marzu de 2023