Pasaxe pa Dubrovnik

 

Lleo na prensa de güey qu’una llínea española va abrir una ruta selmanal dende Barcelona a la xoya de la costa dálmata a partir de mayu y, según paez, tamién lo va facer otra yanqui dende Nueva York. Son señales de que la industria turística entama a ver llume a la fin d’esti llargu túnel pandémicu, y son bones noticies pa toos, nun sólo pa Dubrovnik, la vieya Ragusa y agora, pa munchos, Desembarcu del rei de Xuegu de Tronos.

Esta ciudá yera una de les conocies como repúbliques marinares, xunto con Xénova, Venecia, y la curiosa y recoyida Amalfi. A primeros de los noventa, demientres la guerra qu’esmembró a Yugoslavia, tevo a puntu de vencer baxo’l fueu serbiu que llanzó sobro ella más de 2000 granaes d’artillería pero, afortunadamente, l’ablucante ciudá medieval superó’l trance y llueu recuperó la so atracción de siempres enmarcada pol azul del Adriáticu y los cipreses de les sos costes arbolaes.

A finales del 95, esplegáu de misión en Bosnia coles nueses Tropes de montaña, aportó al mio fax un mensaxe enquivocáu nel qu’atopamos un remitente del exércitu croata encargáu de les rellaciones coles fuercies internacionales. Plantegada la oportunidá al mandu, decidióse que me desplazara a la ciudá, a varies hores del nuesu cuartel xeneral, pa ver qué podíemos sacar d’aquel personaxe.

Tres delles conversaciones telefóniques, y asegurame quel vieyu Nisan nun me diba dexar tiráu, ellí me moví, etamando’l viaxe col descubrimientu del magnificu paisaxe del sur de Dalmacia, hasta entós vedáu pa nós; entrando y cruciando pol norte la ciudá moderna, onde atraquen agora los cruceros de turistes, y recibiendo güeyaes de plasmu de los pasiantes, pocu avezaos a ver vehículos militares españoles per aquellos llugares; aína superamos pela carretera a media fastera les muralles de la ciudá vieya y, casi na contorna de la ciudá, aportamos al edificiu de piedra caliza que m’indicaren. 

Depués d’identificame na puerta ficieronme pasar a la oficina del Comandante Peta Mixa Mihoxevic, qu’asina se nomaba’l tipu, y la mio primera visión foi un Kalashnikov de cañón llargu y mira telescópica encontiáu na paré, “sedrá casualidá o pa amedraname”, pensé yo; darréu, como queriendo despeyar posibles duldes, l’home adelantóse sonriente y cola mano estendida. Alto, peináu con gomina haza atrás y bigotín estilu galán de Hollywood años 40, güeyos claros; un formosu exemplar croata consciente del so encantu y avezáu a usalu. 

Contóme que l’arma teníala asignada anque nun la emplegaba, vaya usté a saber, la llínea de confrontación colos serbios nun andaba lloñe. El casu ye que tomamos interesantes alcuerdos pal futuru que mos sirvieron pa cuando, pocu depués, la nuesa caballería esplegó en Trebinje, la vecina ciudá serbia al otru llau de les montañes que dominen Dubrovnik, y a min, no inmediatu, dióme les señes d’un criaderu y restaurante d’ostres en Mali Ston au, yá nel camín de vuelta haza Medjugore, trataronme como se merez el primer veceru en varios años.

Col tiempu pude saber que Peta yera’l vieyu direutor del festival de les artes de Dubrovnik, y que continuó siéndolo tres la guerra, na que s’alistara voluntariu col entamu de les hostilidaes y na qu’acabaría col grau de coronel, pa siguir depués cola so profesión de rellaciones públiques y home de teatru.

Buena señal ye que se vuelvan a entamar los vuelos a Dubrovnik, anque yá nun quede nengún Lanister.    

Raúl Suevos

A 25 de abril de 2021

Torna en castellán en repdiv.blogspot.com

Cuba, pendiente y dependiente de los militares

 

L’octavu congresu -en 60 años- del Partíu comunista cubanu finó ensin novedá y el mundiu, y sobre too los cubanos, deben siguir esperando a ver qué pasa colos sos militares y ye que, como cabía esperar, el xeneral d’exércitu Raúl Castro Ruz movió les pieces de mou y manera que too seya posible, en cualquier sentíu, pero siempres baxo’l so control.

Raúl Castro coló pa casa, na zona del Siboney, a la fin del Miramar habaneru, pa dende ellí siguir velando polos destinos de la islla; y ello magar el cáncer nuevu que-y axudiquen, uno más, de los que debíen enterralu va tiempu, pero los Castro tienen la piel dura, Ramón, l’hermanu mayor morrió con 92, y Fidel con 90; él nun quedrá ser menos.

El programa aprobáu nel congresu nun merez munchu estudiu, más de lo mesmo, un compendiu de bones intenciones pal futuru del país y ataques escontra’l feroz enemigu capitalista pero, sicasí, merez la pena reparar el capítulu de nomamientos, entamando pol presidente, Díaz Canel, confirmáu agora como secretariu xeneral del partíu, un apparátchik formáu nes files del Ministeriu de les fuercies armaes, MINFAR, y siguiendo polos 14 miembros del Buró político, el Politburó.

La militarización ye vultable. El xeneral Álvarez Casas, ministru del interior; el xeneral Ricardo Vega, secretariu del Conseyu de ministros; el xeneral Luis Alberto Rodríguez López-Callejas, presidente de GAESA –el conglomeráu económicu del MINFAR que controla’l 60% de la economía cubana- y xenru de Raúl Castro; y, finalmente, Álvaro López Miera, d’orixe playu y flamante nuevu ministru de defensa y primeru ente los fieles del xeneralísimo, y llamáu, si éste caberu lo decide, a tutelar y xestionar una posible transición política.

Esti cuadru complementase col xeneral Acosta Álvarez, secretariu del Conseyu d’estáu, que ye daqué asina como la Comisión permanente de l’Asambleya Nacional, que s’aconceya mui poques vegaes y caltien una gran dependencia de les “propuestes” que-y faz llegar esti dilixente militar.

La clave, creo, ta en López Miera, el paez destináu tres el so nomamiento, por posición y pasáu, a encabezar la institución más importante y decisiva del país, el MINFAR; pero nesta posible transición va ser Raúl Castro quien va tener la llave, bien porque asina l’ordene o bien porque esa famosa mala salú de fierro lu incapacite enantes de lo previsto.

Mentanto’l covid nun fizo otra qu’agafar el nivel de carecimientu de la ciudadanía que cuenta como ingresu nacional principal coles remeses de los expatriaos y asiste a un enfoscamientu de la represión sobre too lo que suene a disidencia.

Raúl Suevos

A 19 díes vencíos d’abril de 2021

Torna en castellán en repdiv.blogspot.com

La sublimidá del protocolu

 

Nun pude sustraeme a la curiosidá de güeyar en direuto na BBC el funeral del duque d’Edimburgo, home de la reina Isabel d’Inglaterra. La so figura cobró especial rellevancia estos años caberos de la mano del ésitu d’una serie televisiva mui llograda y tamién, induldablemente, pola so lonxeva trayeutoria vital, puestu que la parca algamolu a dellos meses de cumplir el sieglu d’esistencia; seguramente un disgustu grande pal llibru Guinness de los records.

La mio impresión de foriatu ye que si daqué hai nel Reinu Xuníu que suelde y caltenga la xunión d’esi reinu, que la so bandera ye la superposición de les de les partes componentes, ye la Corona; institución que lleva sobro los sos reales costazos dende va yá casi 70 años la reina Isabel II. La Corona, dicen, ye’l cementu qu’estructura les instituciones del estáu británicu y la reina, una y otra vegada, amuesase cola so actitú dispuesta a que seya asina hasta’l final de los sos díes. Güei tienlo demostrao una vegada más.

El diseñu del actu, hasta nos sos mínimos detalles, salió de la tiesta del fináu va yá abondo d'años, según dicen. Daqué que nun debe estrañar puestu qu’él vivió dientro d’un de los sistemes de protocolu más terríos demientres los munchos años de consorte real al llau, dos pasos per detrás, de la reina. El duque d’Edimburgo yera un espertu en protocolu, quiciabes el númberu un de la so xeneración.

El protocolu tien como finalidá definir les aiciones y posiciones d’aquellos que participen nun actu de forma que tol mundiu sepa lo que tien qué facer y de esa forma evitar sorpreses y situaciones inconvenientes. El protocolu va dende lo más básicu, incluyendo la vida animal como Rodríguez de la Fuente mos esplicaba en rellación colos llobos, hasta los niveles más altos, como pue ser l’actu de güey n’Inglaterra.

El protocolu ye comunicación, comunicación institucional nesti casu. Los asistentes, mayoritariamente telespectadores, reciben un mensaxe, o un conxuntu d’ellos. Nesta oportunidá la entereza y compostura de la vieya reina ye toa una declaración, qu’a min recuerdame’l “cumplí con mi deber” de Nelson a puntu de morir en Trafalgar, pallabres por ciertu inventaes pola comunicación institucional d’entoncenes. Toos tenemos una obligación que cumplir, caun al nuesu nivel, tamién nos díes de llutu.

Too foi un gritu de permanencia y trescendencia magar la presencia de la muerte. Ye la pervivencia d’Inglaterra, de les sos instituciones, güey representaes pola familia real, ensin la ciudadanía puestu que’l premier Johnson, inesplicablemente na mio opinión, arrenunció a asistir.

La sublimidá del protocolu.

Raúl Suevos

A 19 díes vencíos d’abril de 2021

Torna en castellán en repdiv.blogspot.com

Lance Armstrong en Zaragoza

 

Tán los bulevares de Zaragoza espléndidos estes mañanes de primavera. La fueya brotó con fuercia na arbolea, con esi verdor que namái se da los primeros díes de la estación y enantes de que la contaminación y el calor-y vayan estruciendo’l frescor que la savia del árbol-y aporta. Ye una delicia andar per ellos pos anque’l personal, lóxicamente, paez decatase de que son los meyores díes y qu’ellí’l covid tien menos posibilidaes, l’anchor de la calzada ye abondo como pa pasialos seliquino.

Esta mañana diba yo embaecíu pensando en si l’astrazeneca otorga más carga antivírica que la Pfizer, o si la Jansen va aguantar meyor na nevera que la Moderna, o si el nuesu envaloráu y sacrificáu gobiernu –ye ironía- va ser ilumináu pol Espíritu Santu, o a falta d’él pol Sentíu Común, pa tomar una decisión acertada al respeutu, una sola, cuando una solombra adelantándome pola mio drecha quitóme de sópitu la lluz del sol.

Yera una neña con figura de guitarra española, pasu viviegu y caderes animaes de vida propia. Nun pude nin siquier apreciar la so edá, o si yera moza o madura, pero’l golpetéu alternativu y elásticu de les sos ñalgues paecía anunciar unos veintitantos años y, per un intre, la mio líbido aformigada paeció ordename acelerar el pasu y siguir tres aquel rítmicu uno dos, estremáu pero muncho más curiosu que’l vieyu son de la instrucción militar. Foron malapenes unos segundos de tatexu pero dalgo vi que me distraxo.

La moza vestía una d’eses calces qu’agora llamen legguins coles qu’amosaba la forma de les sos piernes y, especialmente, la redondez del so fondoschiena –esi ye l’elegante nome  que n’Italia-y dan-; perriba una sudadera amplia cubríala hasta les caderes; pero ella, quiciabes recatada o simplemente pensando que tala contemplación namái debía ser dada a quien a ella-y petase, cada ocho pasos más o menos y en un xestu rápidu, malapenes perceptible, como aquel que recien descubrieron que Lance Armstrong llevaba a cabu sobro’l sillín de la so bicicleta y que facía que, milagrosamente, amontase la potencia de la so pedalada, llevaba la mano atrás y baxaba la sudadera que la cadencia de les sos ñalgues subiera. Esquierda, drecha, cada ocho pasos, mecánicamente, mientes s’alloñaba bulevar alantre. Y yo, como Amado Nervo, anque nun hubiere tules, nin tampocu madre, ensin zarrar los güeyos, nin tatexos, dexela dir.         

Raúl Suevos

A 16 díes vencíos d’abril de 2021

Autopista al infiernu

 

Va tiempu que s’estudien los efeutos de la música nes persones. Paez ser que lliberamos dopamina cola que mos gusta, una sustancia de la que tien de saber muncho’l mio collaciu Xurde Menéndez y que se rellaciona col placer, pero tamién va más allá y pue repercutir nel nuesu comportamientu, o na actividá motora, por exemplu.

Nos mios años d’internáu nel colexu Loyola d’Uviéu, de los pás escolapios magar el so nome, dormíame cola música sele de Neil Diamond y el so Xuan Sebastian Gaviota; tamién con otros clásicos. Pa espertanos lo avezao yera usar a Credence Clearwater Revival, o a los Rolling Stones, y funcionaben meraviosamente nos dos sentios. La escena de napalm y helicópteros de Staley Kubrick n’Apocalipsis Now nun sedría lo mesmo ensin el fondu de les Valquiries de Wagner. La música tien un poderiu que va más allá de lo  que podemos pensar.

Esta mañana diba yo embaecíu nel coche colos asocedíos que pasa la nuesa nación, mui semeyantes polo demás a los del restu de países, acosaos por esta pandemia que mos espón énte la nuesa propia debilidá como persones y como colectivu, cuando entamó a sonar Highway to hell, esa pieza que en 1979 empericotió a AC&DC como la banda de toa una dómina y que, cola so lletra, acordes y decibelios, algama a amontar el ritmu cardíacu anque nun se tea faciendo un res.

La lletra, nunca esplicada del too, fala d’esquiciadura, de vivir a tope, y caminar haza un final aciar. El so autor, Bon Scott, un de los miembros del grupu y vocalista, finaría’l so percorríu vital na parte d’atrás d’un sedán unos meses más tarde. Y a min, demientres la oyía,obligábame a pensar na nuesa propia autopista, la que de la mano de decisiones unes vegaes incomprensibles, otres non abondo esplicaes, n’ocasiones contradictories, tienmos a la mayor parte de la ciudadanía nun estáu d’afogón mental qu’a dalu bon puertu pue conducir.

¿Qué va a pasar coles vacunes? Los sos efeutos negativos cuantitativamente son absolutamente insignificantes en rellación colos beneficios qu’aporten y magar too eso descartense dos d’elles, precisamente les más barates y de más fácil tresporte y almacenamientu ¿casualidá? Nun voi ser yo, güérfanu d’información más allá de lo que la prensa aporta, el que se permita afirmar lo afayizo o non d’unes decisiones que al poder políticu competen pero paezme que ye llícitu facese entrugues, especialmente cuando, salú aparte, tán en xuegu cantidaes descomanaes de perres que podríen xustificar según qué operaciones de mercadotecnia, basaes en resaltar y arrobiñar informaciones negatives sobro la competencia.

Y demientres l’autopista al infiernu sigue conxestionada.

Raúl Suevos

A 15 díes vencíos d’abril de 2021

Torna en castellán en repdiv.blogspot.com