Va unos díes en Matanzas, Cuba, rendíen homenaxe al asturianu Xosé Ramón Fernández, “el Gallegu Fernández”, artifiz de la victoria cubana nel desembarcu de Bahía Cochinos que nel 1961 patrocinaron los norteamericanos pa valtiar a Fidel Castro; yera l’únicu oficial revolucionariu de carrera militar y purgarenlu y encarcelarenlu años enantes los de Batista poles sos actividaes escontra’l réxime. Na cárcel conoció a los Castro, supervivientes del ineptu asaltu al cuartel de Moncada en Santiago de Cuba, y allinióse col so movimientu, ocupando col’aportar de la victoria importantes cargos demientres la so llarga esistencia, 94 años, incluyendo la vicepresidencia del Conseyu de ministros. Cola so desapaición en 2019 paecía que’l pabellón del Principáu s’arriaba pa siempres en Cuba, pero non.
Ye un cubanu d’orixe xixonés el que paez llamáu a reemplazalu nesa inesistente y asturiana responsabilidá. Álvaro López Miera, anguaño xefe del Estáu Mayor de les Fuercies armaes cubanes ye, colos sos 77 años, uno de los “mozos” cuadros de la xerontocracia isleña llamaos a formar parte del renováu politburó del Partíu comunista cubanu tres el congresu qu’éste va desarrollar a mediaos d’esti mes d’abril y que pue significar l’entamu de daqué paecío a una transición. ¡Yá podía¡
El so pá foi Xulio López Rendueles, destacáu intelectual comunista xixonés que llegaría esiliáu a Cuba tres la guerra incivil pa acabar afincáu en Santiago au se convierte en profesor de, ente otros futuros revolucionarios, Vilma Espin, la que sedría esposa de Raúl Castro y clave pa la entrada na guerrilla, con namái 14 años, d’Álvaro López Miera, que se desempeñaría como alfabetizador na Comandancia del Segundu Frente, dirixíu por Raúl, ensin esplegar en combate y, poro, ensin ser responsable de la muerte de nengún cubanu; daqué mui importante pal futuru viniente del país.
Nel congresu del partíu comunista va producise’l retiru de la xeneración de los combatientes, entamando por Raúl. Díaz Canel, l’actual presidente paez destináu a siguir dirixendo’l país y per parte del exércitu, el so ministru, Leopoldo Cintra Frías, 79, combatiente na Sierra y, amás, cooperante necesariu pa l’acusación y fusilamientu del recordáu xeneral Arnaldo Ochoa, única figura nel 89 capaz de facer solombra a los Castro, paez invalidao pa liderar la transición, que tarde o temprano va llegar tamien, pel llau militar, güei la institución más importante del país.
Álvaro López Miera pue representar perfeutamente la figura española del Xeneral Gutiérrez Mellado nel gobiernu d’Adolfo Suarez pues reúne la lexitimidá de la revolución, el valir probáu nes guerres africanes au desempeñó importantes responsabilidaes y nun tien cuentes pendientes col pueblu cubanu, ensin dulda una apuesta segura para cumplir esa función. Nunos díes vamos comprobar si un xixonés d’orixe sigue na direición de los asuntos cubanos.
Raúl Suevos
A 5 díes vencíos d’abril de 2021
Torna en castellán en repdiv.blogspot.com
No comments:
Post a Comment