Talibanismu socialista

 

Esiste en Roma un barriu al que malapenes aporten dellos turistes, ye’l barriu del EUR, que fo xeneráu pa la Esposición Universal de Roma, d’ehí’l so nome, y que ye un monumentu a l’arquitectura y l’urbanismu fascista. Y naide lo tien tocao; como tantos otros exemplos de monumentos y espacios urbanos que s’atopen espardíos per Italia, y que son espresión d’una corriente racionalista rellacionada cola Bauhaus o del neoclasicismu totalitariu, que tamién, y que tamién y’espresión artística, y a naide se-y pasa pela tiesta facer un derribadoriu.

Nel añu 1972 viaxaba dende Xixón con mio pá haza Zaragoza pa incorporame a una academia pa preparar la oposición d’ingresu a l’Academia Xeneral. Al aportar a lo alto del Escudu comenté-y de forma irónica dalgo sobro’l rendimientu combativu de los soldaos italianos del Corpo de Volontari, colos que mio pá ficiiera parte de la campaña del año 37, cosa que supe munchos años más tarde, cuando él yá nun taba.

Sobro la marcha desvióse haza lo que guipé yera una modesta pero maxestosa pirámide au descansaben los restos d’un par de cientos de combatientes italianos. El llugar, col fondu del pantanu de Reinosa resulta impresionante, como la propia pirámide que, dende va yá dellos años, fo vaciada del so contenío como sacrariu militar. Y d’aquello quédame’l so comentariu tocantes los italianos de que “toos los combatientes son bonos, los malos tán siempres na retaguardia”.

Agora anden tres el so derribamientu. Dicen que los socialistes esixenlo en base a la memoria histórica. Supongo que también los sos collacios nel gobiernu, ensin escaecer a los heriedes de los gudarís, aquellos que se rindieron a los italianos ensin pegar un tiru, dexando col culu al aire a los sos compañeros d’armes republicanos. Somos un país modernu, non como Italia.

A min, que quieren que-yos diga, la historia, paezme d’una escualidez moral y social descomanada, casi tan xigantesca como la talla de los budas de Bamiyan que los talibanes valtaron a cañonazos va yá dellos años. Tan allumadora como les llames de los llibros que los nazis quemaben nes ciudaes alemañes mientres el so periodu críticu. Y supongo que, si los votantes nun lo remedien, va ser dalgo a lo que mos tendremos que dir avezando, pos el progresismu actual, que s’espresa pente medies lleis ideolóxiques importaes del pensamientu Woke que reina anguaño nel mundu anglosaxón, manda.

La pirámide ta, creo, en territoriu burgalés, y prestaríame pensar que los castellanos van a ser a da-y la proteición que torgue lo que güei paez inevitable.

Raúl Suevos

A 28 díes andaos de febreru de 2023

Torna en castellán en abellunelcamin.blogspot.com

El plan de paz d'Alexéi Navalny

 

La Brigada de Montaña aportó en Bosnia nel mes de setiembre del 95. Llueu escubrimos cuálu yera’l nuesu papel ellí, esto ye, el de comparses ensin malapenes capacidá de presionar, o muncho menos imponer. Les facciones diben al so aíre y nós, básicamente, tomábemos nota de lo qu’asocedía, en nome de Naciones Xuníes. Yera’l Global Suckling System, Sistema de Mamonéu global, n’espresión afortunada d’una d’aquelles xornaes.

Güei tenemos un campeón d’esi sistema de mamonéu global col gobiernu chinu. Recién asteníu na votación de conderga de la Invasión d’Ucrania en NNUU, descuelgase con un plan de paz qu’entama por nun distinguir ente víctima y victimariu, ente l’atacáu y l’atacante, ente invadío ya invasor. Una auténtica falcatrúa que namái los gustantes del apaciguamientu, al estilu de lo que ficieran los europeos con Hitler enantes de qu’invadiera Polonia, podríen aceutar como una base mínimamente razonable pa entamar unes negociaciones.  

Los chinos, compradores a baxu preciu de casi tola producción anguaño de Rusia, xunto a la India, qu’intenta caltener un perfil baxu, proponen entamar con un llevantamientu de sanciones, tamién el respeutu a les frontieres nacionales, anque nun esclaria cuales son estes. Too paez llendase a una operación cosmética pa tratar d’evitar que los Estaos Xuníos sigan apretando la soga de les sanciones al so país, daqué que paez tener yá decidío’l señor Biden.

En Rusia nun hai oposición política. Lo más paecío y conocío n’Occidente ye’l grupu de Alexei Navalny, sobrevivío a un intentu d’envelenamientu y darréu condergáu a 20 años nun xuiciu políticu. Dend’ellí consigue facer salir información sobro les condiciones penoses nes que lu caltienen, y tamién, como tien asocedío esta selmana, les sos propuestes polítiques.

Navalny propón la retirada de les Fuercies ruses a les sos frontieres reconocíes internacionalmente, señalando que Rusia tien yá más estensión de la que puede xestionar, y que namái plantegamientos imperialistes del sieglu XIX pueden xustificar. Manifiesta que Rusia debe pagar la reconstrucción d’Ucrania con un plan razonable basáu nos ingresos enerxéticos y mineros del país. Y remata, quiciabes lo más llamativo, col compromisu d’implementar la persecución y xuiciu por crímenes de guerra, anque nun cita al señor Putin.

Ye un plan absolutamente simple, fácil de pescanciar y también, llegao’l casu, d’aceutar; non tanto d’implementar, puestu qu’a día de güei, y mientes Putin exerza’l poder, el señor Navalny nun ye más qu’un prisioneru del réxime, sobro que la so integridá física, actual y futura, ye fácil caltener duldes descomanaes. Pero ye’l únicu plan de paz qu’Ucrania o la Comunidá internacional podría aceutar.

Raúl Suevos

A 24 díes vencíos de febreru de 2023

Torna en castellán en repdiv.blogspot.com

Entusiasmu putinescu a la cubana

 

El mio primer Primero de mayo habaneru fo nel 2011, y fo l’únicu que m’atopé con un ciertu nivel d’interés, quiciabes poro, porque yera’l primer. Amás suponíase que yera una gran ocasión pa pulsar la realidá del país y, tamién y non menos importante, rellacioname colos mio colegas.

El llugar que mos reservaben nun taba mal, en principio. Na tribuna principal, xusto debaxo del palcu superior, onde tres encabezar el desfile tomaría asientu’l propiu Raúl Castro. Anque enantes de media hora unu yá yera consciente qu’ellí, na Habana, lo del cara al sol, yera más un castigu qu’un privilexu. En tou casu les vistes yeren les meyores.

Lo del millón de participantes ye daqué de difícil comprobación, anque lo cierto ye que yeren munchos, munchísimos. Encabezaba l’asuntu Raúl, que darréu subía al so puestu pa presidir d’uniforme la primer parte, pa una vegada rematao’l pasu de militares, quitase la gorra militar y yantase un sombreru de paya de guaḥiru, muncho más prácticu escontra’l sol castigador que toos sufríemos.

Tres los milicos llegaben les organizaciones civiles, de mediu país, movilizando casi tola flota nacional d’autobuses. Con una organización espaciu temporal digna de almiración; tres la que s’atopaba un sistema de coacción, basáu nel temor a perder el trabayu, combinao col premiu en forma de bolsina con dalgún productu de los que siempres arralecen en Cuba, que daba como resultáu eses participaciones masives nel Primero de mayo. La prensa estatal encargábase del restu, ensin temor a les redes pos entós internet malapenes tenía cobertura na islla.

L’amu de Rusia, Putin, paez que tomó nota del sistema cubanu, anque como, pel momentu, tien más posibilidades económiques, él algama una especie d’amestura ente lo cubano y lo norcoreano. Lleva, azuzaos poles empreses estatales, tresportaos por flotes d’autobuses, y col premiu de tazones de té y perritos calientes, a doscientos mil –dicen- fervosos siguidores de les sos polítiques, que según cuenten dalgunes cróniques emtamaron a colar en cuantu que s’acabaron los perritos, al mayor estadiu moscovita, pa un conciertu de sofitu a les tropes ruses.

La parte norcoreana, nel so aspeutu coreográficu, anque ensin algamar el nivel de la muchachada de Kim Jong-Un, venía col flamexar de bandieres ruses a la simple incitación del rellator del eventu, dalgo qu’algamó el so altor de parosismu cola apaición –imprevista- del amáu líder. Universu orwellianu del sieglu XXI.

El casu ye que nun paez qu’haya un final claru. Los Castro ehí siguen, los cubanos emigren, y los rusos deberíen tomar nota.

Raúl Suevos

A 23 díes contaos de febreru de 2023

Torna en castellán en repdiv.blogspot.com

Ente Pablo Motos y Van Gogh

 

Y’el pueblu de Quinto, a  25 minutos de Zaragoza, un d’esos pocos llugares que, a tenor de les cifres de población, consigue a malapenes caltenese vivu. La so economía básase na agricultura, con una vega del Ebru bien rica y na zona alta de les planes unos tarrenos cerealísticos que, magar el pedregal que siempres los tien caracterizao, anguaño rinden más que nunca gracies a la mecanización y al riegu. Magar too eso, cuentennos que nun hai relevu xeneracional y que los mozos nun quieren güei falar de garrar el tractor.

Tamién coopera a la bayura de la villa la minería del alabastru, de tradición secular y a la que-y falta una industria tresformadora que torgue, a lo menos parcialmente, que’l gruesu de la producción se vaya a la esportación, y con ello les plusvalíes y los puestos de trabayu que podríen permanecer nel territoriu. Ye lo qu’hai.

Tornamos a visitar el pueblu de la mano d’un bon amigu, Pepe, y d’Antonio, agricultor ya investigador aficionáu de la historia, que, depués d’un almuerzu contundente, mos lleven a la ilesia, va tiempu desacralizada, de l’Asunción, au, mientres unos trabayos de consolidación y adecuación pa usos culturales escomencipiaron a apaecer enterramientos baxo’l suelu, en númberu de 900, y ente ellos, nuna zona específica de particulares condiciones xeológiques, un ciertu númberu de cadávres qu’experimentaran una momificación natural increíble; cola P61, de rostru ente Pablo Motos y Van Gogh, como estrella ente les espuestes. El resultáu de too ello ya anguaño un museu magníficu qu’atrae una gran cantidá de visitantes, contribuyendo asina a la dinamización económica del llugar. Merez la pena la so visita, ensin dulda.

Amás de les momies, el llugar amonta’l so interés por ser centru de la batalla de Quinto, a finales d’agostu del 37, con participación de les brigaes internacionales, especialmente la Lincoln, formada por norteamericanos y canadienses, que se batieron na zona del cementeriu y escontra esta ilesia, a la que consiguieron rendir y desaloxar pente medies intensu cañonéu y, finalmente, aplicándo-y el fueu a los defensores caberos. Pa la crónica negra queda’l fusilamientu de munchos defensores de la posición tres rendise.

Acabamos averándonos a la loma del Purburel, al este del pueblu y dominante sobro’l mesmu, onde los defensores aguantaron más de dos díes la fuerte embestida diseñada pol xeneral Rojo, echada a perder polos sos voluntariosos pero ineptos xenerales permitiendo a los nacionales recomponese y contraatacar, ensin que Zaragoza cayera, como taba previsto. Ellí, na potente loma, los Fondos de promoción de emplegu tienen permitío la recuperación de les vieyes trincheres y posiciones, dando la posibilidá de recrear lo asocedío naquellos díes malfadiaos; y unu pue facese idea de la dureza de los combates ente los defensores y los internacionalistas balcánicos del batallón Dimitrov, sofitaos por potentísimos bombardeos aéreos y fueu artilleru.

La visita combinada ye una maravieya que nun riquier de conocencia previa pa esfrutala, y unu pue maxinar la repercusión cultural y económica qu’un centru d’interpretación podría dar a esti pueblu cargáu d’historia.

Raúl Suevos

A 22 de febrero de 2023

Torna en castellán en repdiv.blogspot.com

El xestu de Biden

 

A principios del 96 les coses taben calientes en Mostar. El funcionariu alemán que facía les veces d’alministrador nel nome de la Xunión Europea, el señor Koschnick, filtrara la so decisión sobro’l repartu de los barrios de la ciudá, na que los serbios, los malos de la película, fueran completamente espulsaos, y croatas y bosníacos nun se poníen d’alcuerdu. Nel hotel see de l’alministración europea hubiera hasta tiros, y facía falta un xestu pa reconducir la situación que menaciaba con tornase de nuevu esplosiva.

Ellí se presentó Javier Solana, coles mesmes Secretariu Xeneral de la OTAN, acompañáu del Xeneral Joulwan, Comandante Supremu Aliáu n’Europa; y ficieronlo nel avión de les Fuercies aérees yanquis correspondiente al segundu. Vímoslu averase amodo haza la pista del aeropuertu de Mostar. Flanquexabenlu dos imponentes helicópteros Apache, en condiciones de regugar cualquier menacia que pudiera manifestase, y pel cielu un avión Awacs encargábase d’esaminar l’espaciu electromagnéticu. Yera’l nivel de seguridá correspondiente al de la visita.

Güei enterámonos que’l  presidente Biden tién aportao inexperadamente a Kiev, p’alegría del presidente Zelensky y los sos compatriotas, y anque les imáxes namái mos dan cuenta de lo imprescindible, ente otres les d’un paséu curtiu pela tristemente famosa plaza Maidan, podemos imaxinar qu’esti viaxe, cargáu de simbolismu, tendrá supuesto una operación de seguridá tremenda en redol del mandatariu norteamericanu. Ye lo qu’hai.

Nes sociedaes occidentales ye’l sistema representativu de gobiernu’l que prima sobro’l restu, y n’él les eleiciones representen l’elementu clave de tola construcción política, poro les campañes eleutorales tienen tanta importancia; la mesma razón que s’atopa detrás del permanente exerciciu de gueta del xestu de parte de los nuesos dirixentes.

El presidente Biden algamó la presidencia tres una pendencia reñida escontra un campeón de la xesticulación política, del histrionismu cabría dicir, como ye Donald Trump, y el so entamu nun pudo ser más penosu tres l’abandonu desastrosu d’Afganistán y les imáxes tarrecibles a les que tol mundiu pudo asistir. Paeciera, pa opinión de los más agoreros, que la so presidencia yá taba condergada pero, como otres vegaes a lo llargo de la historia, una guerra inesperada tien llegao a da-y un sofitu sorpresivu y sorprendente.

L’actitú de l’alministración Biden dende enantes de la invasión, coles sos alvertencies sobro les intenciones auténtiques de Putin, fo bárbara, siguiendo col sofitu midíu y costante al gobiernu ucranianu en forma de medios de combate, intelixencia, formación y sofitu políticu. Güei llega un xestu nuevu que va muncho más allá de lo aparente y que, creo, va da-y unos réditos induldables ente aliaos pa trepar cola situación mundial, y nel so país tocantes una posible reeleición.

Raúl Suevos

A 20 díes vencíos de febreru de 2023

Torna en castellán en repdiv.blogspot.com

Madres les d'enantes

 

Tíense liao un bon pifostiu colo de la madre vegana. Diba la cosa pa comentariu pintorescu en redes pero’l nuesu enredador mayor del reinu, l’académicu Pérez Reverte, entró al trapu como miura énte Lagartixu, o Padilla, que tamién val pa l’alegoría, y, como suel asoceder coles sos intervenciones, l’asuntu pasó a mayores, esto ye, a noticia de los telediarios, depués carnaza de programes de pseudo debate, como’l de Risto Meixide, siguíu de tou tipu de columnes y tribunes periodístiques, incluyendo la de Soto Ivars, que ye la que me tien animao a sacudi-y al tecláu.

A mí la inconveniente y “devastadora” intervención, por aprovechar les pallabres de la interesada, como que me la trae al pairu, quiciabes cola salvedá de que habiendo-y puesto a la so neña, la futura traumatizada pol famosu faramacu de pescador, el nome de Navia, entrúgome si la madre -responsable del actual quilombu, dicho esto cola segunda acepción de la RAE, y Dios me llibre de rellacionar a la señora cola primera- va tener daqué que ver cola maraviosa villa asturiana, abrigáu puertu onde amarra parte de lo poco que queda de la flota pesquera asturiana, pos si ye así, meyor que nun vaya a visitar a la familia nuna temporada. Ye lo qu’hai.

En tou casu la historia tráeme l’alcordanza qu’allá por 1995 tocóme dar-y esplicadures a una madre preocupada pola situación de fame y friu del so fiu. Tábemos esplegados en Bosnia, finales d’añu con temperaturas mui baxes y montañes de nieve, y a la sección del so fiu unvíaremosla a Saraxevo pa dar proteición al teniente xeneral inglés comandante d’UNPROFOR.

Entoncenes nun había redes pero si radio; y Luis del Olmo yera’l rei de les mañanes col so Protagonistas, y ellí yera au aquella madre llanzó la so quexa, dalgo que conmocionó al Estáu Mayor en Madrid y qu’acabó siendo pa min una ordre d’intervenir y dar esplicadures en directu al día siguiente. Qué agobiu.

Di-y la razón d’entrada a aquella madre, por preocupase pola situación del so fiu, y dempués espliqué-y lo que yera Saraxevo en cuestión de friu invernal y l’equipu estupendu que’l mozu, como integrante de la Brigada de Montaña, tenía pa defendese, col so uniforme d’hibiernu y les perfeutes botes kamet. Anque tuve que reconocer la situación penosa tocantes la comida pues, tando colos ingleses, la comida yera realmente deplorable, por nun dicir dalgo peor. A lo que del Olmo mostróse compresivu.

Nun yera cosa de disfraces.   

Raúl Suevos

A 14 díes vencíos de febreru de 2023

Torna en castellán en repdiv.blogspot.com

Dimitir, verbu inconxugable en castellán

 

Ente tanta noticia política faise difícil afondar n’alguna d’elles. A vegaes paeciera, pente medies teoría conspirativa, que se trata de acorvianos baxo la cascada inacuartable d’información, negativa mayormente, de mou y manera qu’algamemos un puntu, semeyante al del boxeador grogui tres una avalancha contundente de guelpes, nel que namái pensemos en que daquien tire la toalla y podamos sentanos, en paz, nel nuesu rincón.

Ayeri, ¿o fo va una selmana?, saltó la llebre informativa de la dimisión de la señora Sturgeon, primer ministra del gobiernu del vieyu reinu d’Escocia, anguaño parte integrante del Reinu Xuníu. Una dimisión ensin motivu aparente, más allá del esgaste natural tres años de gobiernu, y que nel añu caberu tevo que trepar, aparte del Covid como tol mundiu, cola negativa del Tribunal Supremu británicu a la convocatoria d’un referéndum d’independencia nuevu ensin l’avenencia del gobiernu de la so maxestá británica. Amás del supuestu esgaste por esti motivu, xúntase’l del refugu de Londres a la escocesa llei transxéneru, menos radical de la que se va aprobar n’España. Dambes cuestiones con posible repercusión eleutoral.

En Nueva Zelanda tamién se tien dío Jacinda Arden, qu’algamara sonadía internacional cola xestión de la Covid y tambén, oficialmente, cansada del exerciciu del poder. Dambes estadistes dexenmos con un puntu de plasmu, y nun porque nun lleguemos a pescanciar los sos motivos, sinon polo estrañu o anormal tocantes lo avezao nel nuesu país, nel que esforciando la nuesa memoria llegamos a la dimisión del presidente del gobiernu, don Adolfu Suárez, va yá cuarenta y dos años. Depués el vaciu, como si too fuera sobro ruedes nela nuesa España.

Si güeyamos nel esterior, y dexando de llau los asuntos londinenses, au dimitir a vegaes paez un deporte nacional, atopámonos con dimisiones en tolos los rincones del mundiu, dende Papúa Guinea hasta’l Vaticanu; por pérdides de confianza nel partíu propiu, eleiciones perdies, cuestiones rellacionaes cola corrupción, falsedá nel curriculum, too un elencu variáu de razones pa xustificar el abandonu voluntariu de les responsabilidaes nel gobiernu de pertenencia.

Son coses impensables n’España, au’l nuesu presidente de gobiernu barafusta impasible d’un doctoráu enllenu de solombres, dende la composición del tribunal que-y lu dio a la redacción de la tesina correspondiente. Tampocu paez factible que naide, vistu l’interés en caltener el gobiernu de coalición, asuma responsabilidaes poles excarcelaciones qu’una llei manifiestamente meyorable ta produciendo, pa temor y desconsuelu de les víctimes d’esos delincuentes.

Paeciera que n’España nun esiste’l verbu dimitir.

Raúl Suevos

A 16 díes vencíos de febreru de 2023

Traducción en castellán en repdiv.blogspot.com

El Vittoriale de los italianos

 

Lo de Fiume acabó d’aquelles maneres pa d’Annunzio, anque abondo peor pa los italianos qu’aínda quedaben ellí, y n’Istria, cuando aportaron los partisanos de Tito a la fin de la Segunda Guerra mundial. Cúmplense agora los ochenta años de la conocida como masacre delle Foibe, simes kárstiques onde foron aventaos, vivos o yá cadavre, munchos de los que nun salieron por piernes enantes de la so llegada; y que sedríen maltrataos pola madre patria en cuantu que supuestos fascistes. Toa Europa tien trapos sucios.

El nuesu personaxe tenía una finca con villa en Gardone Riviera, a orielles del Lagu de Garda, averadín a Saló, el pueblín au Hitler, depués de qu’Otto Skorzeny lu lliberará nos Apeninos, montó-y una republiqueta a Mussolini, onde aguantó hasta los díes caberos, p’acabar como acabó, colgáu pelos pies nuna plaza milanesa. Pero esa ye otra historia.

En Gardone, Gabriele d’Annunzio, yá decidíu a autoinmolase n’exiliu interior, escomencipió una obra de construcción d’una mansión y parque fuera de lo común, hasta qu’un ictus lu fulminó nel 36 sobro la mesa de trabayu, a la que llamó’l Vittoriale degli italiani. Una casa u, según pallabres del guía, l’escesu de lo superfluo conviertese n’arte y evocación, pos l’héroe va construyendo sales, dormitories, baños, comedores, despachos, sales de espera, de forma coordinada pa esllumar a los visitantes futuros, pos él, dende’l primer momentu, yá dispunxera dexar al patrimoniu italianu la so poética obra inmobiliaria.

Anque son casi 300.000 los visitantes añales, namái se pue apiancar en grupos pequeños guiaos pos lo heteroxenéu del mobiliariu y adornos faría peligrosu’l dexar campar llibremente a determinaos grupos. Yá dende la entrada, con dos sales d’espera diferenciaes pa invitaos, apreciaos o incómodos, el diseñador danos señal del so calter. Dempués va siguir un golpiar contínuu l’atención del visitante ente milenta llibros, estatues de tou tipu y condición, bayura de budes, tapices, alfombres, coxines, etc. y too ello con alegoríes significatives y mensaxes visuales del amu de la casa, nun ambiente que tantu eslluma como aforfuga.

Nel teatru interior con que cuenta la mansión sorprendemos colgáu del techu una reproducción del biplanu col que d’Annunzio algamaría gloria militar anque esta alcordanza al so pasáu, del que tamién mos agasaya con una sala dedicada a la so figura militar y deportiva,  va quedase nun reflexu pálidu cuando nel parque ablucante de la finca, toa ella sobro una fastera enfrentada al llagu de Garda y plagada de olivos sorprendente, descubrimos un pabellón, casi un templu, onde s’alluga en perfeutu estáu la patrullera/torpedera cola que, mientres la Gran Guerra, realizó delles infiltraciones atrevíes n’augues austríaques.

Aínda más chocante va ser atopanos col barcu emplegáu0 por d’Annunzio na so aventura fiumana. Desmontáu por completo y vueltu a montar na fastera de la finca con puente, mástiles y cañones, cola proa al Llagu. Ye una imaxe imponente que namái’l mausoléu que domina la finca, au descansa’l poeta con dalgún de los sos siguidores, llogra superar. Moría d’anunnziana.

Da non pérdere.     

Raúl Suevos

A 11 díes vencíos de febreru de 2023

Na carretera

 

Nos años primeros del nuesu sistema de gobiernu anguaño, nun había políticu, d’aquellos que vestíen pana, que nun tuviera nes manifestaciones del Paris del 68, tantos que pudiera pensase que yeren más los españoles que los franceses naquella ocasión particular. Lo de París yera como un mantra identificativu d’aquellos con un caché democráticu superior.

Nos tiempos caberos la pana, a lo menos hasta qu’Amancio Ortega nun la ponga de moda, yá nun se lleva como distintivu políticu pero, los progresiesos o pijoprogres qu’anguaño pululen pelos nuesos escenarios políticos y comunicacionales va tiempu que tienen adoptao otru mantra, el de Jack Kerouac y el so “on the road”, una llectura ensin la cuala unu nun pue llegar a pescanciar l'entramao sociolóxicu de los decenios caberos, dicen los que saben d'eses coses. Ye lo qu’hai.

A min, quinta del 54, nun me dio la vida pa lleer a Kerouac; téngolu na llista d'espera, pero sí que tevi la mio ración d’aventura carreteril pos con 16 añinos, y armáu con un petate mercáu nel rastru, llancéme n’autostop haza Madrid dend'Asturies, pa darréu recalar nuna Zaragoza en plenu españíu de cólera, que me diba dar un encoyimientu d’esfínteres que namái desapaeció cuando algamé la vacuna tres munches hores de cola. Dempués siguiría haza la Costa Brava au sobreviví dellos díes sirviendo copes nuna discoteca hasta que, fartu de la mio esistencia llamentable, torné pa Xixón pel mesmu métodu viaxeru y con unos cientos de pesetes que mio pá tevo a bien xirame a Llansá. Qué tiempos.

Vienenme toes estes alcordances porqu'esta mañana, mientes conducía, les ondes traxeronme esa intemporal “born to be wild” de Steppenwolf, qu’abre aquella vieya peli d'“Easy rider” y que daes les referencies de la so lletra considerase la seme del Heavy Metal por munchos entendíos, y a min dame pa pensar si ellos sí tendríen lleído a Kerouac.

Sigue siendo una canción perpotente, más agora que puedo siguir la lletra, y el so ritmu galopiante y contundente paez invitar al conductor a llanzase ruta alantre d’una forma muncho más convincente qu’esos reggaetones que, n’ocasiones, vemos como, dalgunos modernos, a baxa velocidá dende los sos coches, van radiando los sos decibelios pel centru de la ciudá, especialmente si ésta ye de playa y cuenta con paséu de copes. Socialización moderna.

Ye del 68 más o menos, cuando lo de París, y sigue siendo tan radical que, amás de ser multiversionada, sigue sintiéndose muy vibrante y fresca; non como Miguel Ríos, que menacia con tornar de xira. Corran.

Raúl Suevos

A 10 díes vencíos de febreru de 2023

Torna en castellán en repdiv.blogspot.com

Gabriele d'Annunzio

 

En Florencia, ciudá maraviosa, fai muncho calor nel branu, con un puntu d’humedá sofocante que-y da’l riu Arno que l’atraviesa, y el tar arrodiada de montañes o colines. Yera normal escapase al tapecer a Fiésole p’alendar, o, nel nuesu casu, a Settignano, menos conocíu y afayadizu pa cenar en familia.

Anguaño’l pueblu ye más conocíu porque a los sos pies atopase la instalación de la Squadra Nazionale Calcio, esto ye, el centru d’entrenamientu de los azzurri, pero nel pasáu fo au criaron nuna familia de picapedreros a un talu Miguel Ángel. Ellí entró-y el venenu de la escultura. Tamién los Medici decidieron construuir una de les so villes, anguaño visitable; y yá al entamu del sieglu XX un paisanu particular, ídolu de mases pa los estándares actuales, instalóse mientres dellos años cola so amante temporal, la actriz Eleonora Duse, nuna casa del llugar, la Capponcina. Yera Gabriele d’Annunzio.

Na nuesa dómina’l sitiu convirtierase nuna trattoria con terraza almirable, na que se podía allargar la sobremesa y que, nel mio casu, abrióme la puerta a la vida d’esta singular figura. Un home casi inabarcable, poeta de sonadía dende mui mozu, dramaturgu, novelista, provocador cultural, amáu de les masas, y de les muyeres. De Settignano colaría, agobiáu poles deldes, pa un autoesiliu francés de varios años.

Descubriría entoncenes la velocidá, rodada y aérea, lo que lu llevaría a participar y organizar dellos certames pero, sobremanera, a convertirse n’aviador, casi un as en esos años primeros, nos que, aportada la Primera Guerra mundial, participa como oficial d’Infantería y como valerosu pilotu, lo que lu lleva a perder un güeyu y casi la vida. Pa entós más qu’ídolu yera un héroe nacional.

Inconformista hasta la estravagancia, pa 1919 llánzase, acompañáu de 200 correlixionarios, a  los que diben siguir varios miles, a ocupar l’adriática Fiume, la Rijeka actual, una ciudá de población y llingua italiana, que quedaba en manes del recién formáu reinu de Yugoslavia y na que llegaría a promulgar una Constitución a la espera del sofitu del gobiernu italianu, dalgo que nunca llegaría, enantes al contrariu, impondría-y un bloquéu férreu en cumplimientu de los Trataos de Rapallo que llevaría al incomprendíu héroe a abandonar la ciudá en 1921 tres vese asediáu y combatíu pol propiu Exércitu italianu.

Diba escomencipiar entoncenes la parte final y, en ciertu mou dramática, de la vida de d’Annunzio pos, nun actu solime de protesta, pa él y los sos siguidores, decide autoesiliase de por vida na so villa de Gardone Riviera, nel caiquín del Lagu de Garda. 

Raúl Suevos

A 7 díes vencíos de febreru de 2023

Torna en castellán en repdiv.blogspot.com

Campaña eleutoral en Cuba

 

Fálase poco nos tiempos caberos de la Perla del Caribe. Supongo que ye lo natural daes les circunstancies del mundu anguaño, nel que mírese pa onde se mire unu atópase con mil hestorias pavoroses o simplemente fachendoses periodísticamente como pa prestar atención a esa prisión naval avarada ente mar y océanu. Y non, nun toi pensando na prisión de Guantánamo, que tamién, sinon na entera islla de Cuba, una de les cárceles mayores del mundu, qu’aínda les hai mas grandes.

Nel continente americanu hai una mina de noticies inescosable que nun dexa pasar nin un día ensin danos la nuesa ración de teletipos anque, como siempre tien sucedío, nun ye’l mundu hispanu’l que marca la importancia de la noticia diaria. Namái tenemos que ver el vodevil del globu, atmosféricu na mio opinión, llegáu, vientos mediante, a les tierres yanquis dende la tarrecible (¿) China. Una tensión ente potencies perpeligrosa pal mundu, dicen, anque nada tea nidio, quitanto’l cielu lluciu del oeste en Montana, como nes pelis. Ye lo qu’hai.

Que Costa Rica, enantes l’espeyu nel que se güeyaba toa Hispanoamérica, pase a lliderar en tiempu brevísimu les estadístiques d’asesinatos mundiales, convirtiendo al Salvador de Bukele en paradigma del control securitariu, malapenes interesa a los medios. Tampocu la negativa de los gobiernos “progresistes”, Brasil, México, Arxentina y Colombia a siguir el “conseyu” yanqui pa pasar material militar d’orixe rusu a Ucrania, a cambiu d’otru norteamericanu, tevo gran reflexu nos medios de comunicación. Al platu vendrás arbeyu.

Quiciabes les quemes chilenes, nesta ocasión ensin intervención de les organizaciones mapuches, seyan los más visualizaos, especialmente pa nós col únvio rápiu d’un continxente UME. Pero más allá d’esto poco vamos a atopar, y entá menos si de lo que se trata ye de la permanente emigración haza’l Norte dende Iberoamérica y, especialmente nos tiempos caberos, Cuba. Ye la hestoria de siempres, un asuntu cansosu.

Agora aporta’l periodu previu a les votaciones confirmatories pa l’Asambleya Nacional cubana. Nun se pue falar d’eleiciones nesi procesu, y muncho menos calificalu como democráticu, anque aínda queden progresistes de salón que se refieren a aquello como dalgo exemplar. Y yelo en ciertu mou, un exemplu de sistema dictatorial de llarga duración. Sesenta y cuatro años anguaño.

Patria y vida.

Raúl Suevos

A 6 díes vencíos de febreru de 2023

Torna en castellán en repdiv.blogspot.com

Formación del Espíritu Nacional

 

En tiempos de la “oprobiosa” esistíen aspeutos que m’atrevo a calificar d’exemplares. Un d’ellos yera la asignatura de bachiller que da títulu a esta tribuna, la “Política” que-y dicíamos los escolinos y que, en realidá, formaba parte del conxuntu denomáu “les tres Maríes”, esto ye, la política, la relixón y la ximnasia.

La relixón yera cosa d’un cura, xeneralmente paciente y comprensivu, que se llendaba, nos cursos caberos, a salir del pasu ensin que se xenerase dalguna engarriada; a les últimes yeren yá tiempos de “dictablanda”. Pa la ximnasia contábase con dalgún militar, que si había suerte sedría diplomáu de la Escuela Central d’Educación física, y si non, casu más xeneral, con dalgún falanxista encuadráu na Secretaría Xeneral del Movimientu, y que, muy posiblemente, encargábase tamién de la “Política”.

Nel Institutu Xovellanos de Xijón, los mayores, contábemos con un bon paisanu pa estos menesteres, García creo recordar, quién mos facía lleer pasaxes del llibru y daba dempués aprobao xeneral, cumpliendo con aquello de ser graciable no que pueda. Amás, en ximnasia, dedicábase al equipu de balonvolea, al que dirixía con éxitos nacionales, dexándomos al restu la infinidá del patiu, colos sos requexos pa fumadores.

Ye la dómina, nun recuerdo con exactitú’l cursu, que la “Política” tenía como sofitu físicu’l llibru “la Política Económica”, d’Enrique Fuentes Quintana y Juan Velarde Fuertes. Dos xigantes de los estudios económicos n’España. Al primer esfrutamoslu como facedor de los Pactos de la Moncloa nos primeros años de la nuesa democracia, y al segundu, asturianu de pro, tenemoslu visto na nuesa rexón, mientres dellos años, dirixir los Cursos de branu de La Granda.

Viénome too esto a la tiesta cola noticia del fallecimientu del vieyu profesor, a los 95 años pero cola cabeza perfeutamente áxil, en Madrid, au desendolcó la so estensa llabor y onde tevi ocasión d’asistir a varies de les sos conferencies maravioses nes que, profanos de la economía como yo, algamábemos a recibir perfeutamente’l mensaxe gracies a les sos esplicadures cencielles.

Conservo aínda los llibros de la denostada “Política” y, una vegada más, fui a repasar el llibro de Velarde y Fuentes, pa maraviame otra vegada de lo esplendorosa que yera aquella asignatura a la que nun prestábemos dala atención, magar contar con unos soportes, en forma de llibros, absolutamente espectaculares pa los estándares colos que se desendolquen los mozos de güei, ciudadanos del mañana, y pienso que con Juan Velarde vase tamién un tipu d’intelectual del que ca vegada échase más en falta la so presencia.

Raúl Suevos

A 4 díes vencíos de febrer de 2023u

Torna en castellán en repdiv.blogspot.com