Napoléon y la gran Pirámide

 

Napoleón, tres la conquista d’Exiptu en 1798, decidió pasar una nueche na cámara real de la pirámide de Keops p’amugase coles sensaciones que, suponíase, calteníense ellí dientro. A la so salida, maciu y apavoriáu, comentó-y a los sos intrigaos ayudantes, “anque vos lo contara nun me díbeis a creer”. Y asina quedó la historia d’aquella pernoctación sorprendente.

Enantes d’eso’l gran corsu embarcarase nuna aventura militar de calter estratéxicu pa soliviar la presión que’l bloquéu naval imponía a la primera República francesa. Con él llevárase un cientu de sabios, que inorantes del destín final de la espedición sedrien los responsables de trayer a Europa la cultura exipcia y l’orientalismu. Tamién tevo tiempu d’aniquilar 700 años de victories mameluques na batalla percélebre de les Pirámides, llibrada n’inferioridá de condiciones y vencida gracies al so xeniu militar. Poco dempués Horacio Nelson afondaría la flota francesa n’Abukir, dexando a los franceses aisllaos nel valle del Nilo au los estudiosos tendríen tiempu de facer descubrimientos sorprendentes, como’l de la piedra de Rosetta que permitiría  más tarde a Champollion descifrar el significáu de los xeroglíficos.

Pa entós Napoleón yá abandonara Exiptu, dexándo-y la tostada al so segundu al mandu, el xeneral Kleber, que nun lo fizo nada mal y tornó a vencer n’Heliopolis, hasta que lu asesinó un fanáticu exipciu, y que a la so memoria dedica Estrasburgu la más mundana y prestosa de les sos plazes. Entrín y non, en Francia, Napoleón daría’l guelpe de Brumario y faríase col poder que lu faría inmortal magar la derrota final nun Waterloo entoncenes desconociu nesta Cataluña qu’agora güeya pa Bélxica.

Too esto recordómelo’l señor Illa, mariscal del covid, que güei enteramonos qu’abandona la so tropa de sanidá pa dir a conquistar el febrero viniente, si la pandemia nun lo enzaca, la Xeneralidá catalana. Quiciabes seya un pocoñín gloriable comparalu, anque seya asolapamente, col pai del códigu civil de nueso, pues arriesgome a que’l gran doctor Sánchez, cobiciosu de gloria, reclame pa sí tamañu afalagamientu. Sicasí, convien nun escaecer que, magar les munches victories de la Grande Armée, a la fin foi’l créditu y la potencia del comerciu británicu les que se ficieron col triunfu definitivu gracies a les múltiples coaliciones qu’algamaron a armar. 

Nesta engarradiella política que se llibra na nuesa sufrida patria, en febreru toca la batalla de Cataluña, paez nidio’l papel de capitán araña, qu’a toos embarcaba y él se quedó n’España, pero pue ser entretenio axudicar papeles a los demás xenerales, como Iceta, el propiu Sánchez, o la señora Roldán, que güei mesmo pasóse a los ingleses. Toos paecen guetar la gloria, nesti casu política; convien que nun escaezan qu’ésta suel presentase a vegaes esquiva y siempres voluble; amás, en tiempos del covid, too ye cambiante.

Raúl Suevos

A 30 díes vencíos de nadal de 2020

Torna en castellán en repdiv.blogspot.com

O último rei do Brasil

 

Paeciera que Brasil, el xigante americanu, siempres fuera una república pero nada más lloñe de la realidá. Cola entrada de Napoleón na Península, al entamu del sieglu XIX, la familia real portuguesa, más lista que la española, embarcó a la so corte lisboeta y zarpó pal Brasil au esperó a quel nuberu pasare, dexando entós al meirazu real como rexente, daqué que nun debió presta-y puestu que se declaró independiente de Portugal col títulu d’emperador del Brasil, Pedro I.

Les turbulencies de la dómina llevaronlu a abdicar unos años más tarde dexando’l tronu al so fíu Pedro II, entá un neñu y que llegaría a reinar demientres 58 años con gran aciertu y dedicación. Dicen les cróniques que yera un home por completo dedicáu a los sos súbditos pa lo que se formara fonderamente a lo llargo de los años; tamién el so calter, tremendamente humanu y compasivu, facíenlu apreciáu pola xeneralidá de los brasileiros.

Un grupu pequeñu de militares nun yera d’esi paecer y promovió un guelpe que’l rei nun quiso abortar prefiriendo l’esiliu parisino onde viviría entá dellos años ente estrecheces económiques. El so funeral na capital francesa reunió más de 300 mil persones y foi lloráu per tol país brasileiru au se instaurara una república baxo’l lema d“Orden y Progreso”, daqué que, visto la historia posterior, amosaríase como un gran sarcasmu.

Na España anguaño tenemos un gran rei, una persona especialmente preparada pa representar la primera maxistratura de la nación. Daquien que, dende’l so accesu al tronu, tevo que lidiar con un periodu especialmente difícil no económicu y no social. Tamién él se vio “abandonáu” pol so augustu padre, como Pedro II, y, polo que podemos observar, paez qu’un grupu pequeñu de combatientes políticos, que como aquellos brasileiros namái representen a una parte mínima de la nación, tienen como principal oxetivu de la so aición política la desapaición de la monarquía n’España; y tamién como en Brasil, me temo, si nun se pon frenu a les sos acciones, podríen llevar a España a una situación tan dolorienta como la vivida pol Brasil a lo llargo del tiempu, ensin orde nin progresu.

Esta nueche SM recordónos la gran nación que somos y tamién la importancia de la Constitución y la Transición exemplar que supunxo; nun escaeció referise a la ética y la exemplaridá de les persones públiques. Too mui midío y too mui nidio pero que seguro que va xenerar refugu nalgunos, los de siempres. Quiciabes el problema seya que, como don Pedro II, tenemos demasiáu Rei pa lo que mos merecemos.

Raúl Suevos

A 25 díes vencíos de nadal de 2020

Torna en castellán en abellugunelcamin.blogspot.com

...Y Mambrú marchó a la guerra

 

El protagonista llamábase Marlborough y yera un duque inglés antepasáu de Winston Churchill que mandaba los exércitos de la so británica maxestá nuna de tantes guerres ente franceses ya ingleses. Diéronlu equivocadamente por muertu en campaña y los franceses ficieron-y un canciu que, nun se sabe cómo, llegó tamién a España anque, quiciabes pola nuesa perenal ineptitú pa los idiomes, equí camudóse-y el nome pol d’un soldáu desconocíu en cualquier guerra anónima, Mambrú.

Los más veteranos recordarán una dómina na que la play station, pa les neñes, consistía nuna simple tiza cola que se pintaba nel suelu’l cascayu, la rayuela o’l descansillu según la rexón, sobro’l que podíen pasase delles hores xugando en grupu mientes cantaben el vieyu canciu de “Mambrú marchó a la guerra, nun sé sa cuándo vendrá, do re mi, do re fa”. Yeren otros tiempos.

Güei, anque dicen que vivimos meyor, siguen esistiendo munchos Mambrús que se van a la guerra. Va non muncho allá marchó Aram Grigoryam, podría llamase asina, que naciera en Marsella, una ciudá de Francia au los franceses son minoritarios, y onde llegaron miles d’armenios tres el xenocidiu lleváu a cabu polos turcos a la fin de la primera guerra mundial, y au siguieron aportando a lo llargo del S. XX  como parte de esos ocho millones que formen la diáspora d’esa vieya y atristayada nación.

Aram, como otros, sintióse obligáu a acudir a defender el vieyu país cuando llegaron les noticies d’una nueva guerra col enemigu tradicional azerí. Paecía un trámite, contaben con un tratáu de defensa colos rusos y bonos armamentos; nun tenía por qué saber que’l gobiernu armeniu, confiáu, dexara de güeyar lo qu’asocedía nel país vecín, au s’invertía en tecnoloxíes nueves y abrazábase al vieyu enemigu turcu dexando de llau a l’antigua metrópoli rusa. Los equilibrios vieyos yá nun furrulaben.

Aram nun tevo tiempu nin de sosprendese. Los ensames de drones turcos ya israelíes llegaron metanes la oscuridá nocherniega ensin que los radares armenios los detectaran. Los misiles guiaos yeren casi infalibles y en poques selmanes too concluyó con un alcuerdu de paz, varios miles de muertos y munchos más desplazaos. Y nun paez que’l gobiernu armeniu, en casa, vaya díse de rosites depués del desastre.

Nun tengo mui nídio que nos países occidentales queden munchos Aram dispuestos a dexalo too pa defender al so país, pero si ye posible que dalgún gobiernu, como l’armeniu, dexe de llau’l so deber de vixilancia sobro lo qu’asocede na so redolada y s’atope cola sorpresa desagradable de qu’aquel vecín, sobro’l qu’históricamente  prevaleciera, seya agora un enemigu énte’l que nueves circustancies, aliances y tecnoloxíes lu lleven a claudicar. 

Raúl Suevos

A 20 díes vencíos de nadal de 2020

Torna en castellán en repdiv.blogspot.com

Democracia aristocrática

 

La democracia representativa, sistema políticu nel que se supón que la nuesa nación se desendolca dende va más de cuarenta años, entamó los sos pasos tatexantes pola historia nel nuesu solar patriu y magar que munchos piensen que foi n’Inglaterra au eso asocedió. Pa nada, foi en Llión, allá pol lloxanu 1188, baxo’l reináu d’Alfonsu IX, cuasi dos sieglos depués de que la corte del reinu d’Asturies se tresladara d’Uviéu a la ciudá castellana, camudando con ello’l nome del vieyu reinu.

Nel enquíz del asuntu taba la necesidá de fondos qu’apuraba al rei y que necesitaba ser recaldada nos burgos y ciudaes, daqué que, pa evitar engarradielles con nobles, burgueses y eclesiásticos, riquía una cierta negociación, pa lo que foron convocaos representantes de dalgunes poblaciones. Nacía’l conceutu de la representación y con él el principiu xeneral de no taxation without representation, “ensin representación nun hai impuestos”, riegla que tien llegao hasta los nuesos díes.

En Polonia, entamando d’esi principiu, les coses derivaron malamente. La nobleza foi apoderándose de tol sistema hasta llegar a escoyer al propiu monarca y dexar ensin voz nin votu a los otros estamentos. El so poder algamó hasta acopar la xusticia del reinu, lo que la convertía nuna suerte de sistema totalitariu. Pero tanto poder llevaba implícita la discordia.

Les diferencies ente les families de la nobleza, metanes esta tiranía democrática, llevó al esiliu a tol que podía dise, y el consiguiente probecimientu del país; dicíase daquella que “en Polonia los burgueses son nada y los campesinos menos que nada”; siguiríen guerres internes y el so corolariu natural, el saquéu del territoriu per parte de los vecinos a mediaos del S.XVIII, y la desapaición del país demientres cuasi dos sieglos.

Na España anguaño, yá nun tenemos clas nobiliaria; nin siquier tenemos una clas capitalista al mou norteamericanu; lo nueso ye más d’andar per casa, nós tenemos una clas política que funciona como aquella polaca que s’apoderó de tolos resortes del país. Tenemos grandes y pequeñes families nobiliaries en forma de partíos políticos que formen a los sos atoños nes Mocedaes de les sos organizaciones pensando nel futuru del so grupu más que nel de la nación. Controlen tolos poderes del estáu, como vemos estos díes na pendencia pa nomar un Conseyu del poder xudicial nuevu; al rei nun lo nomen, pero acosenlu o fácenlu de menos. Ye una situación que recuerda muncho a la d’aquella Polonia de democracia aristocrática y que finó devorada polos sos vecinos; ye una situación esmolecedora, muncho.

Raúl Suevos

A 16 díes vencíos de nadal de 2020

Torna en castellán en repdiv.blogspot.com

L'areupaxitica

 

John Milton foi un paisanu importante pa la ciencia política, vivió nos tiempos axitaos de la Inglaterra d’Oliver Cromwell, de quien foi ministru, anque pa la historia en xeneral dexó sobretoo una gran obra poética. Na creación de los Estaos Xuníos los sos trabayos foron mui estudiaos pero foi la so obra areupaxitica la que sentó los principios d’un de los pilares de la democracia representativa, la llibertá de prensa.

La prensa entoncenes, metanes el S. XVII, entendíase como la publicación de llibros y panfletos, y requería d’autorización previa rexa, daqué que Milton dexó de llau, obviamente. Él entendía como fundamental la capacidá de los ciudadanos pa criticar a los poderosos y el contrastar les estremaes idees; ensin esa llibertá nun podía dase’l progresu de la sociedá humana. Anque too tiene un peru, y na so mente, la d’un home perteneciente a la intransixente, radical y puritana Albión, nun cabía llugar pa los papistes, católicos a los qu’había que llevar a la foguera, xunto coles sos publicaciones. Quedémonos por embargu col conceutu de la llibertá de prensa, lo importante agora.

Na nuesa España anguaño la intolerancia pue algamar cotes semeyantes a la d’aquellos presbiterianos, calvinistes o luteranos, anque la ciudadanía, como la d'entós, nun llega a decatase de les implicaciones que lleva’l recorte, más o menos evidente, de la llibertá de prensa. El gobiernu de nueso, cola sida del estáu d’alarma énte la pandemia, pon en marcha un sistema de control de noticies falses que conlleva connotaciones peligroses, pero que podría entrar, anque lo dudo, nes sos atribuciones gubernamentales. Esisten, amás, otros medios menos evidentes pero que pueden resultar más contundentes a la llarga, y más efectivos pa los fines interventores de los poderosos, del gobiernu.

Nestos tiempos aciagos asistimos a un aplanamientu xeneral de les posiciones de la prensa xeneralista, que falta de capital y acosada poles formes de comunicación nueves tien que capear el temporal como pue y, nun cabe dulda, la rellación col gobiernu ye, nesta batalla pola supervivencia, un elementu de primordial importancia.

Ente los comunicadores actuales destaca ún que, pola so independencia y espíritu críticu, paez provocar el refugu y l’iñerizu del señor presidente que, emuláu pol restu de miembros del gobiernu, paez nun atopalu dignu de les sos entrevistes o quiciabes teme qu’éstes nun seyan abondo amables pal so personaxe.

Ye una situación indigna que nun se compadez colo qu’una sociedá con un sistema de gobiernu representativu se merez, non a lo menos que, no fondero, seyamos tan intransixentes ya intolerantes coles opiniones contraries como les que Milton describía en su areupaxitica, que nel so casu tendríemos que concluyir que mos merecemos lo que tenemos.

Raúl Suevos

A 13 díes vencíos de nadal de 2020

Torna en castellán en repdiv.blogspot.com