Va yá abondo tiempu que se conoz que los terremotos, al igual que les erupciones volcániques, vienen precedíos de dellos movimientos sísmicos de mayor o menor intensidá, d’ehí l’interés d’instalar sismógrafos nes zones d’historial con temblíos de tierra, primeramente, y anguaño cuasi a lo llargo y ancho del mundu.
La islla de Cuba, nun entra direutamente en denguna de les dos categoríes, nun l’atraviesa dala falla importante de la corteza terrestre, como ye’l casu na vecina Centroamérica y poro namái comparte colos sos vecinos l’azote de la temporada de furacanes que a tol Caribe maltrata. Por embargu paez que daqué se ta moviendo na corteza social.
Cuando la Revolución, de la mano de Fidel Castro y el Che Guevara, aportó a L’Habana, contaba col sofitu, cuasi unánime, de la intelectualidá y la cultura cubana. Veníen de la dictadura de Batista y la esplotación de la mafia de Meyer Lansky y Lucky Luciano, y ye comprensible que la cultura esperara daqué meyor de lo que teníen. Pero pocu-yos duró l’allegría.
Los Castro, especialmente un Raúl con afinidaes nídies en Moscú, traíen la lleición aprendida en cuantu al control de la cultura al mou soviéticu. Los creadores debíen trabayar pola Revolución, “dientro d’ella too, escontra ella nada”. Había que construyir l’“home nuevu” y la cultura debía cooperar de mou que, na primera división quedaron los afines o sumisos, como la “nova trova” de los Rodríguez o Milanés; hebo otros que nun lo aceutaron y el so pagu foi un esiliu que nun los perdonó nin tres la muerte, como Bebo Valdés, Celia Cruz o Cabrera Infante; atrás quedaron los más castigaos, los que foron silenciaos en vida, como Lezama Lima, y comenientemente recuperaos tres la so muerte pa mayor escarniu de los interesaos y gloria del réxime.
Esa foi la norma demientres más de sesenta años, pero agora, cuando “l’home nuevu” ya se fizo vieyu ensin conocer otra cosa que la miseria moral y económica de la Revolución, otres xeneraciones van remaneciendo, y, lo que ye peor pa la dirixencia, con un ciertu nivel d’accesu a la información y a lo qu’asocede nel mundu, lo que-yos da ganes de vivir llibremente, especialmente nel mundu de la cultura.
El Movimientu San Isidro, MSI, ye una organización d’artistes creada va un par d’años cola finalidá de lluchar, pacíficamente, polos drechos culturales y civiles de la sociedá cubana; cuenten con un local, nel barriu del mesmo nome, que foi asaltáu pola policía cubana pa detener a un raperu que darréu foi condergáu a ocho meses de prisión. Siguió un encierru con fuelga de fame y nuevu asaltu, lo que provocó, el pasáu vienres, una concentración d’artistes ya intelectuales cubanos énte’l ministeriu de cultura, que nun creció más pol pieslle de cais policial.
La novedá foi’l recibimientu d’una delegación de los concentraos pol viceministru de cultura, y tres unes hores de discusiones un alcuerdu sobro puntos estremaos rellativos a la llibertá d’espresión “cultural”, daqué que, asina d’entrada, paecía un llogru epocal, y hasta épicu. Pero efímeru.
Pocu-y faltó a Díaz Canel, el presidente delegáu, pa condergar poques hores depués a los concentraos como axentes del satánicu imperio norteamericanu y antirrevolucionarios, lo que mos avisa de varios movimientos telúricos. La vieya guardia, Raúl y la so xerontocracia, nun ta por el llabor d’una apertura nel réxime; la sociedá cubana, encabezada pola cultura, va tener que siguir aportunando y moyándose como estos díes caberos si quier dalgún cambéu y, d’últimes, Joe Biden nun va a atopase las coses feches en rellación col problema cubanu.
Ah, y el viceministru que vaya pensando en buscase un emplegu.
Raúl Suevos
A 2 díes vencíos de nadal de 2020
Torna en castellán en repdiv.blogspot.com
No comments:
Post a Comment