Esta selmana cúmplense veinticinco años de la robla de los Acuerdos de Dayton que poníen fin a la conocida como Guerra de Bosnia, y les Tropes de Montaña españoles llegaremos ellí un par de meses enantes cola nuesa flamante boina azul de Naciones Xuníes y una descomanada carga d’ilusión profesional. Cuando tornamos, na primavera del 96, yéremos otros.
Aterrizamos en Split con un rellatu bien aprendío según el cual los serbios yeren mui malos; los bosníacos, esto ye, los bosnios de confesión musulmana, los sufridores; y los croatas yeren católicos, y poro bonos. Anque poco tardamos en facenos otra imaxe y, magar qu’esos primeros meses malapenes tratamos colos serbios, la nuesa perceición yera qu’éstos yeren mui brutos, simples y manipulables; los bosníacos unos maestros nel arte del victimismu; y los croatas los perfeutos heriedes de los ustachas de Jasenovac.
Nos díes de la nuesa llegada llevóse a cabu nes “Krajines” la ofensiva croata que diba llimpiar de serbios aquelles tierres qu’ocupaben como Extremadura de Croacia dende los tiempos de la conquista balcánica polos otomanos, cuatro sieglos atrás más o menos. Too col silenciu de la prensa occidental que namái tenía güeyos pa Sbrenica; al final pagaría por toos el xeneral Ante Gotovina, apresáu tiempu depués en Tenerife.
Richard Holbrooke llevaba meses trabayando los alcuerdos por cuenta de Bill Clinton, y pal mes de payares algamó a llevar a los tres presidentes a la base de Dayton, nos Estaos Xuníos, au zarró a Milosevic, Tudjman y Itzebegovic hasta que firmaron unos alcuerdos que trayíen una paz asitiada sobro una federación, que dividía de fechu Bosnia en tres partes, con una constitución infumable que tien servío pa caltener el país nuna semi-envernía na que los nacionalismos escluyentes siguen imperando, y la falta de perspectives económiques lleven a la mocedá a la emigración masiva.
Pa nós supunxo’l abandonu de la boina azul de NNXX, de la que yá tábemos hasta la gorra, dicho seya de pasu, puesto que mos ataba con unas riegles d’enfrentamientu draconianes y mos sometía al zurramientu de les estremaes partes ensin poder reaccionar, y que yá mos costara un bon númberu de muertos y feríos dende la seronda del 92. Colos alcuerdos pasábemos a formar parte de una fuercia OTAN y a tener una gran capacidá pa imponer midides de tou tipu sobro les estremaes fuercies esplegaes sobro’l territoriu. Yera la IFOR, la Implementation Force, y significó la entrada con tolos honores na redolada internacional pa la Brigada de Montaña española, anguaño desapaecida.
No político, pa entoncenes yá daquien con sentíu del humor acuñara la espresión Global Suckling System, sistema de mamonéu global, dímonos cuenta, nós que cuando salimos de Huesca nun yéremos más que militares de pueblu, que too yera muncho más complexu de lo que paecía dende casa, y qu’Europa, en Bosnia, diba tener para munchos años un granu supurando pus. Y foi asina.
Raúl Suevos
En Xixón a 22 díes vencíos de payares de 2020
Torna en castellán en repdiv.blogspot.com
No comments:
Post a Comment