Esta selmana cabera güeyé nalguna tienda d’ultramarinos d’alta calidá, agora dicen-yos de delicatesen, la ufierta anual d’esti vinu francés, y nun pude evitar sentir una cierta envidia. Nun ye que’l vinu seya pa desatar sentimientos censurables en nós, teniendo la sidra que tenemos y nestos tiempos caberos el recuperáu vinu de Cangas que, ciertamente, ta mui perriba del que da nome a esta tribuna pero, les caxes apilaes esperando comprador traenme ciertos recuerdos.
El Beaujolais ye una rexón vitivinícola francesa con muncha producción y midida calidá, pero va yá dellos años foron rápidos en poner en marcha una operación de mercadotecnia para sacar gran cantidá de los sos escedentes en forma de vinu nuevu de la collecha anual. Yo tuve noticia d’ello tando d’operaciones en Bosnia, y porque’l mandu de la división francesa na que mos encuadrábemos los españoles organizó una fiesta pa dar la bienvenida al beaujolais nouveau, “el meyor vinu nuevu del mundu”, y ye que los franceses, amás de vinu d’estremaes calidaes, son los inventores del chovinismu, esto ye, el convencimientu de que lo propio ye superior a lo de los demás, en cualquier circunstancia y con descreitu de lo ayenu si ye necesario.
Lo de nueso ye lo contrario de la patriotería, llevamos sieglos de insistencia en flaxelanos colo negativo, tanto qu’inclusive pintamos de negro los sucesos lluminosos; debe ser cosa de la Lleenda negra, que nel casu d’Hispanoamérica aniciala De las Casas cola so obra cargada de dexaseraciones pa asina tratar de protexer a les poblaciones indíxenes. Dende entós sofisticamonos.
Vien esto a cuentu de la serie televisiva sobro la figura d’Inés Suarez, primera española n’aportar a Chile, na que los guionistes quedaronse a gustu presentando a Valdivia, y en xeneral a los españoles, como sicópates depravaos sexuales cegaos pol brillu del oru. La Ilesia, tampocu sal intactu del retratu, y la propia Inés conviertese nuna especie d’heroína progresista mui a lo que se lleva anguaño. Los mapuches, actores secundarios, entá güei rebeldes nel su país, malapenes queden esbozaos. Nun creo que los guionistes consultaren a Elvira Roca Barea.
Ye una más. Cola epopeya de la Conquista hai pa facer mil producciones televisives; nesta bastaba con lleer l’Araucana d’Ercilla p’averase; quiciabes tamién recordar les Lleis d’Indies, y les sos sucesives actualizaciones; y de paso ver qué foi de los pueblos indíxenes tres la salida d’España, diezmaos en munchos casos y nalgunos cenciellamente esterminaos.
Lo peor ye que, siendo TVE una de les productores, yo tamién punxi dineru.
Raúl Suevos
En Xixón a 29 de payares de 2020
Torna en castellán en repdiv.blogspot.com
No comments:
Post a Comment