Encendióse ayeri al tapecer en Xixón lo qu’enantes se conocía como llume navidiega y qu’a min, anguaño, dame un ciertu reparu siguir llamando d’esi mou. Decidióse adelantar la fecha por aquello del bichu que mos pandemiza estos díes, pa subir la moral dicen, y coincidiendo, por aquello de los decretos del Principáu, cola reapertura del pequeñu comerciu, tan maltratáu nes selmanes previes.
Esa llume va tiempu que s’asocia a la alegría que trae’l Nadal y les compres con ella rellacionaes; cada vegada menos s’amesta coles conmemoraciones de la Ilesia Católica y namái habría qu’echar una güeyada al aforu esmirriáu que s’allega a la Misa del Gallu tres la cena de Nuechebona, antaño cita obligada pa munches families y tres la cuala, nos pueblos y tamién nos barrios, a lo menos asina lo esperimenté en Cimavilla, los mozos nuevos allegabamonos a les cases de les muchaches en tropiella pa festexales y ser agraciaos con llibaciones xeneroses polos pais de les visitaes. Yeren otros tiempos y supongo qu’agora les flamíxeres redes sociales va encargase de reemplazar aquellos vezos güei tresnochaes.
Na observación de los adornos lluminosos llamóme l’atención l’ausencia, total polo que yo vi, de referencies a la tradición relixosa de les feches; motivos xeométricos, estrelles de nieve, llamparones de cristal, tulipes de llámpara xigante, etc. un Papá noel grandón en San Miguel, unos carbayos blancos curiosos nel Muru, que supongo pretenden ser chisgu a l’ascendencia céltica de la rexón, y pare usté de contar. Poca o nada de Navidiegu.
Nel muru del Campu Valdés, al altor de la ilesia de San Pedro, va yá díes qu’instalaren un cartel luminosu, tapáu pa caltener la curiosidá, pensé yo, anque convencíu de que sedría daqué paecío a “feliz 2021”, que nesta oportunidá falta fai, pero confieso que la mio sorpresa anueche foi mayúscula. La frase escoyía foi “todo saldrá bien” que nun dexa de ser un sarcasmu cuando nestes feches llevamos cuasi mil fallecíos direutos pol coronavirus, más los indireutos imputaos a otres causes pero que tienen detrás la saturación hospitalaria provocada pola pandemia. Non, nun too va salir bien. Nu foi una bona eleición el lema, nin tampocu l’allugamientu qu’induz duldes sobro quién ta detrás de tala afirmación.
Per otra parte convien nun dexase llevar, otra vegada, de la euforia que les feches y la meyora de les cifres de la pandemia provoca pues detrás d’elles podría tar agazupáu’l pantasma de la tercera fola.
Raúl Suevos
En Xixón a 28 díes vencíos del mes de payares de 2020
Versión en asturiano en repdiv.blogspot.com
No comments:
Post a Comment