Nel sieglu XIX l’acosu y persecución a los xudíos convirtierase nun vezu con repercusiones sangrines en munches partes d’Europa. Esta situación xunto cola señardá permanente de la patria perdida en Palestina llevó a una serie de figures hebrees prominentes a crear un movimientu p’algamar un territoriu pa los hebreos del mundu. Tres munches revueltes nel camín y dos guerres mundiales aportaríase en 1948 a la creación del estáu d’Israel, a costa de la espulsión de milenta palestinos, daqué, esto cabero, qu’entá nun tien acabao anguaño.
Cola creación del estáu nuevu’l sionismu pasó a ser la doctrina soxaciente d’ésti, qu’otorgaba la so nacionalidá a tou aquel que, con oríxenes xudíos, llegara a incorporase al estáu nuevu que, con una constitución laica, ta íntimamente trescaláu de la relixón hebrea. Israel nuna interpretación nueva del sionismu autoproclamase representante y llar de los xudíos del mundu.
En 1948, y énte un más que probable ataque de los vecinos musulmanes, Golda Meier foi unviada pol presidente David ben Gurion a los EEXX guetando’l sofitu económicu de los xudíos yanquis, que foi diez vegaes superior a lo esperao y que, dende entós, convirtióse en parte integrante de la política de tolos gobiernos israelíes; hasta güei, tiempu en que los apoyos se perfeccionen d’otres formes quiciás más direutes.
Nos EEXX los grupos de presión tienen una importancia fundamental na política nacional. Les grandes fortunes, colos sos sofitos económicos nes campañes eleutorales, y la gran industria armamentística en tou momentu, amuesense ente los más importantes, y ehí atopamos frecuentemente la presencia de capitales xudíos que siempre tán atentos a favorecer les polítiques del gobiernu israelí.
Los F-35, xoya cabera de l’aeronáutica norteamericana van llegar a los Emiratos, en decisión coincidente col reconocimientu del estáu israelí por esti país, como tamién los F-16 a Bahréin, otru país árabe con reconocimientu al estáu hebréu. Nel casu de Sudan la compensación/presión vien cola so salida de la lista d’estaos terroristes. Tamién güei mos enteramos qu’esos aviones ultramodernos van aterrizar en Marruecos, au yá cuenten con carros de combate Abrams y otres tecnoloxíes punteres de los EEXX, col reconocimientu casual del estáu d’Israel tamién como pagu indireutu nesti casu y reconocimientu norteamericanu a la ocupación marroquí del Sahara, dexando de llau a les NNXX y a España con cara de mazcaya.
Israel, un estáu en defensiva permanente, va a lo suyo, y naide va poder reprochá-ylo, inclusive que s’allinie con Turquía pa derrotar a Armenia, un pueblu casi tan vieyu y tan perseguíu como ellos, pero que nun cuenta con tan valiosos avaladores; y de los EEXX, con un más que complicáu fin de cuatrieniu presidencial, tampocu podemos esperar que tengan en cuenta los daños colaterales pero, pa nós, pue significar la pérdida de la ventaxa militar na nuesa vecindá, daqué peligrosu y preocupante.
España ye importante pa los EEXX, les bases de Rota y Morón asina lo amuesen pero, quiciabes, ellos yá nun se fíen nes circustancies actuales de la nuesa nación. Quién sabe.
Raúl Suevos
A 12 díes vencíos de nadal de 2020
Torna en castellán en repdiv.blogspot.com
No comments:
Post a Comment