La madre de Serrat yera de Belchite

 

Va yá abondo d’años, en Bosnia, participé nuna velada col cantante agora recién xubiláu. Ente otros cancios, gasayónos con un repertoriu espectacular de lo que se conoz como xotes de picadillu, y tamién mos contó que la madre yera de Belchite, la ciudá aragonesa escenariu d’una heroica, pa los defensores, batalla de la nuesa Guerra incivil.

La vicisitú personal de la madre de Serrat ye semeyante a la de munchos españoles de la so xeneración. Barcelona yera’l gran polu d’atracción pa mozos de toa España, non yá d’Aragón. Ellí había puestos de trabayu, munchos, de tou tipu, y Cataluña yera la locomotora económica d’España; dalgo asina como la Baviera del nuesu país; y lo que yera más importante, al igual qu’asocede n’Alemania, yera aceptáu por tol mundiu, como si fuera lo natural.

La historia tiénmela recordao un reportaxe periodísticu que da cuenta de la esplosión económica que s’está produciendo nel triangulu formáu per Barbastro, Monzón y Binefar, na provincia de Huesca, au les inversiones y la llegada d’empreses, especialmente dende Cataluña, y yá ensin l’impulsu que’l Procés significó nel 2017, ye descomanáu.

N’Aragón hai menos impuestos autonómicos que na rexón vecina, y los procedimientos alministrativos resulten más axilosos y rápidos, dalgo que favorez  l’emprendimientu a tolos niveles. En Zaragoza la plataforma loxística PLAZA crez de forma imparable y l’aeropuertu ye’l segundu en tráficu de mercancíes a nivel nacional. El so nivel de paru ye’l tercer menor tres País Vascu y Navarra, que cuenten con conciertos económicos particulares.

Son dos rexones vecines, semeyantes en munchos aspeutos, y con una historia conxunta riquísima, el reinu d’Aragón, que tienen tomao caminos distintos nes dómines caberes y que, si s’analiza someramente, too paez indicar que l’elementu diferenciador atópase nel virus nacionalista; un factor qu’alimenta l’egoísmu colectivu y distorsiona la capacidá d’análisis de los individuos.

Cataluña necesita dir al psicoanalista. Paecía que, según indicaben les encuestes, diba saliendo del bucle melancolicu, aquel que señalaba Juaristi, pero unos resultaos electorales non definitorios, tanto qu’un fugáu de la xusticia tiénse convertío en factor imprescindible pa sofitar al gobiernu anguaño, trocaron esti país nuna xaula de llocos que naide nestí momentu sabe haza ónde se dirixe.

El reclamu nacionalista, tres el que s’escuenden los intereses personales de parte d’una clas política indecente, alloñen a Cataluña d’esa recuperación. La so alma va siguir quebrada, y mentanto los sos vecinos, merecidamente, van siguir creciendo.

La madre de Serrat güei yá nun tendría qu’emigrar.

Raúl Suevos

A 28 de enero de 2024

Torna en castellán en repdiv.blogspot.com

Hispanos

 

Lleo na prensa que la selección nacional de balonmanu despidese del campeonatu européu cola actuación peor de la so hestoria. Una pena, aínda nun siendo siguidor d’esi deporte que tantos ésitos mos tien dao, si bien la mio atención céntrase nel nomatu d’hispanos que tantes bendiciones y consensu paez tener consiguío estos años, al tiempu que reconozo que ye ehí, nel ámbitu deportivu, u los mio conciudadanos paecen amosase unánimemente españolistes.

Lo llamativu del asuntu ye que l’axetivu y xentiliciu ta mal emplegáu nesti casu. Non asina nel de Máximo Decimo Meridio, el personax curiosu que Ridley Scott se saca de la manga pa construyir el so triunfador “Gladiator”, que mos informa que ye’l décimu de la so familia y que vien del sur meridional del Imperiu, de la Bética pa ser más exactos, y que, pa cuando se mos presenta nes arenes del Coliséu, tiénse camudao n’Hispanu.

Y ye qu’hispanos yeren los de la Hispania romana, esto ye, tola Península ibérica, les España y Portugal anguaño, a les que la Reconquista separtó, y el ralu breve y fructíferu de la Xunión de les Corones, ente 1580 y 1640, nun fo abondo pa calteneles xuníes. Dempués diben venir sieglos de dixebradura y guerres, con Portugal sofitándose na pérfida Albión y nós sufriendo les consecuencias amargoses del Pactu de familia con Francia. Güei too eso ye historia que malapenes apaez nos currículos de los nuesos estudiantes. Ye lo qu’hai.

Yá en tiempos modernos, y con más razón dende que dambos países somos miembros de la Xunión Europea, tiénse retomao por dalgunos la ideia d’Hispania, o Iberia si asina lo prefieren, con especial alcordanza pal nóbel Saramago que dende los so tiempos de direutor del Diariu de Noticies lisboeta siempres defendió esta causa, poco grata al nacionalismu portugués y ensin malapenes atención n’España.

El casu ye qu’Hispania, na so doble paternidá, enllaza histórica y culturalmente esti requexu meridional européu con un arcu xigantescu qu’engloba gran parte d’África y América, esto ye, más de 800 millones d’habitantes “hispanofalantes”, lo que mos daría un pesu políticu induldable a nivel mundial; y pa ello, pa poner en marcha esa teórica unión, cuntamos con dos alcuerdos fondamentales: La Estratexa común de desarrollu tresfronterizu, de 2020, y el nuevu Tratáu d’amistá y cooperación, de 2021, que hai que desendolcar.

El tiempu corre que ye una barbaridá, frase perpopular que mos alvierte énte la pérdida de tiempu n’actividaes inútiles, y qu’anguaño, énte la convulsión mundial actual, cobra importancia especial, anque, me temo, la situación particular del gobiernu de nueso nun da pa menudencies como la d’Hispania.

Raúl Suevos

A 17 díes vencíos de xineru de 2024

Torna en castellán en repdiv.blogspot.com

La ponte de Palladio

 

Esta mañana aportóme una semeya autorretratu del fiu mayor. Taba en Bassano del Grappa, un pueblín de les estribaciones alpines italianes, al pie del monte del mesmu nome, escenariu dramáticu de la Primer Guerra mundial, que ye pernomáu pola grappa escelente qu’ellí se produz, y tamién por una ponte en madera que yá esistía, que se sepa, nel sieglu XIII, en plena Edá media.

Supongo que la so apaición nesi llugar tan prestosu, dada la hora y el día, debíase a asuntos llaborales, pero maxinone, a falta de la so esplicadura, que quería recordar una xornada, va yá abondo d’años, na que viniendo del norte, creo que de Cortina, desviamonos hasta ellí porque la muyer, apasionada d’Andrea Palladio, quería ver la ponte pernomada, refecha por él nel sieglu XVI. Y ellí apaecimos al entamu del atapecer.

Veníemos mayaos, y los neños fartos de coche, puesto que, entoncenes, nun esistíen los arbíos qu’anguaño ayuden a los pas nesos trances, y, como tampocu contábemos con GPS o google maps, aparqué na parte alta del pueblu. Dende ellí guetando’l descensu y guiándomos pol rumor del riu llegamos a un paséu, lungofiume-y dicen ellí, perfeutamente empedrao y con un murín que protexía a los viandantes d’una cayida al riu.

Al pocu, topamos con un garrapiellu de güelos, media docena quiciabes, sentaos rebiciando de la brisa del atapecer. ¿Vamos bien pa la ponte de Palladio? Equí nun hai dala ponte de Palladio, retrucóme un. La muyer y yo güeyamonos, entrugándomos si nun enquivocaremos el llugar. L’única ponte ta ehí abaxo, la Ponte de los alpinos, il ponte degli alpini, remató otru de los güelos. Y siguimos el camín tres dar les gracies.

Y ellí taba. Yera la ponte de Palladio, la reproducida en milenta estampes y litografíes. Formosa, toa ella en madera, colos sos múltiples pilastros, coles sos barandes y techumbre en tola so estensión. Hasta los neños paecíen contentos d’atopalu tres los munchos kilómetros, y cruciamoslu andando, esfrutando los detalles, hasta la fin au paecía metese nun edificiu que na so dómina debió ser onde se cobraba’l portalgu, esto ye, el peaxe, el mesmu de les autopistes anguaño.

Güei, en llugar del portalgu venden una grappa escelente, de la que entós namái me llevé una botella, pa reconcomiu posterior, y au mos esplicaron que la vieya ponte bombardexada, nun sé si por aliaos o tedescos, na Segunda Guerra mundial, fuera reconstruyida polos Alpini tres la guerra,  lo que daba llugar al cómo yera conocío por casi tol mundiu anguaño.

Una ponte estraordinaria qu'axunta dos orielles.

Raúl Suevos

A 22 díes vencíos de xineru de 2024

Torna en castellán en repdiv.blogspot.com

El tapáu

 

Ye la polarización, pallabra que tien sío escoyida por FondéuRAE como la del añu, la carauterística más sobrosaliente de la política española anguaño, pa desgracia de toos nós, pues ello lleva a centrar l’esfuerciu nel acabamientu o inclusive destrucción del alversariu, en llugar de dedicar los enfotos a esi cacarexáu bien común que tanto aflora na boca de los nuesos próceres. Ye lo qu’hai.

El casu ye que, nel partíu del gobiernu, paez estendese’l sentimientu de que, tres estos años de reinao sanchista va haber que proceder a un ciertu refundamientu, o catarsis que diríen otros, puesto que l’actual sistema internu de promoción d’adeptos y defenestración de toos aquellos que s’atreven a manifestase, no yá escontra’l secretariu xeneral sinon n’oposición a dalgunes de les sos polítiques, o simplemente amosase tebios nel aplausu al líder, va acabar por dexar un partíu d’encefalograma planu y unos cuadros inservibles tres años d’obediencia bovina.

El problema, pa esta supuesta renovadura, ye que se fae necesariu un líder nuevu, dalgo que, teóricamente, resuelvese con esos procesos de primaries que tienen trayío a personaxes como’l propiu Sánchez, o’l yá desapaecíu Casado nel PP, esto ye, procesos que ponen a los partíos al borde del precipiciu, por más que nalgunos casos, puedan acabar en Moncloa.

El Partíu socialista anguaño, ente otros, amuesa’l rasgu de nun contar con dala figura rellevante tres el líder, al contrario que’l PP, nel que casi hai inflación. Page nun cuenta, por más qu’él quisiera. Y eso llevamos a guetar nicios que mos puedan sollertar de per ónde van, en casu de que yá tean en marcha, o van dir, si lo dexamos al albur de los futuribles, les posibles maniobres internes pa sacar al partíu del estancamientu au van acabar tres la pérda del gobiernu.

En díes recien tíense desarrollao en Madrid un actu coloquiu n’homenaxe a la Constitución y a Peces-Barba, al qu’asistió lo más granao de la vida política y económica del país, atrayíos ensin dulda por Felipe González, al qu’acompañaba nel escenariu un Eduardo Madina “retiráu” dende va unos años de la política, y dedicáu anguaño al mundiu empresarial como cuadru d’una de les grandes consultores del país.

Entrecomillo lo de retiráu porque, los políticos, como los toreros, entren y salen na situación d’actividá con facilidá estrema, y esta reaparición cuidada del señor Madina, que nun tien dexao de ser miembru del partíu socialista, suéname a min como un avisu a navegantes, patrocinao nada menos que por González.

Nun sé si yo, lector humildosu de periódicos, voi tar no cierto, pero paez un destape del tapáu.

Raúl Suevos

A 19 díes vencíos de xineru de 2024

Torna en castellán en repdiv.blogspot.com

Too me confunde

 

Hebo un tiempu, nun va muncho, qu’un cubanu empoderáu por Marujita Díaz, aquella folklórica otrora de fama nacional ya inclusive más, apoderóse de les páxines de la prensa rosa, y tamién de les pantalles de lo qu’anguaño nomen “late nigt”, la nueche canalla de siempres. El talu fulanu, de nome Dinio, na so espampanante desvergüenza, llegó a algamar una cierta simpatía per parte del públicu, especialmente cuando fuyía de les entrugues incómodes xustificando el so comportamientu con un “la nueche me confunde”. Güei somos munchos los confundíos, y ainda ensin salir de nueche.

A mín, ente otros asuntos, dexóme ablucáu estos díes la hestoria apaecida en prensa al rodiu les congoxes qu’una individua, enantes individuu, sufre na so vida llaboral a causa del so cambéu de xéneru, sancionáu énte’l xulgáu correspondiente acordies cola llei qu’anguaño se encarga de confirmar o ratificar los casos que se vienen produciendo.

Será la mio edá, que me vien robando la axilidá y flesibilidá necesaria pa blincar percima d’estos charcos sociales, que pa la xente mozo son fáciles de superar pol simple efeutu de nun se facer entrugues. Y ye que, el protagonista de la hestoria, ye un soldáu español, de casi dos metros d’estatura, padre d’una neña de diez, con más tatuaxes qu’un lexonariu de los de cuando Millan Astray mandaba’l Tercio, y que, pa más inri, declárase lesbianu al que-y gusten les muyeres, y, de xacíu, nun tien intención d’iguar química o quirúrxicamente’l so cuerpu. Faltaría más.

Podría ser simplemente’l pasar d’él la solución, pero’l so coronel creo que tien de tar tomando pastilles pa dormir, porque la tala señora esixe, amás, usar los vestuarios y servicios de muyeres, que nun tengo nidio cómo tienen reaccionao énte tala petición, anque intuyo que dalguna inquietú tendrán, y nun-y sirven los vestuarios d’oficiales, menos concurríos, ofrecíos pol coronel, porque según él, ella, nun correspuenden al so emplegu de tropa.

Al señor coronel queda-y la opción de promover la construcción de servicios y vestuarios pa un teóricu tercer xéneru, casu de nun ser discriminatoriu pa esta señora, pero colos procedimientos alministrativos anguaño puede ser cosa d’años, anque lo más probable ye que tea güeyando’l calendariu pa ver el tiempu que-y queda pa superar esti calvariu. Ye lo qu’hai.

Quiciabes temos énte una idea magnífica pa montar un sainete, esa pieza teatral tan española, con dosis grandes d’astracanada, pero, ello ye seguro, los festivales de Cádiz van tener en cuenta la situación que retrata, una vegada más, la España anguaño.  

Raúl Suevos

A 17 díes vencíos de xineru de 2024

Torna en castellán en abellugunelcamin.blogspot.com

El guaḥe de Bagdad

 

Güei les noticies veníen cargaes de ñeve. Muncha ñeve en Davos, au s’axuntaben los líderes de la política y la economía mundial, y tamién muncha nieve en Centroeuropa, onde ta cayendo una ñevada de dómina, inclusive p’aquellos llares. Pero pa nós casi tol interés suizu taba nes andances del nuesu doctor Sánchez qu’ellí diba con dos oxetivos nidios: amosar lo bien que fala inglés al auditoriu, el so espiche nun podía ser xulgáu pela fondura del so mensax, como l’aplausu tebiu que-y dieron a la fin paez atestiguar; y tamién aconceyase colos empresarios españoles pa sacase una fotografía y amosar asina lo bien que se lleva coles empreses del IBEX, dalgo al paecer mui importante según dalgún de los sos múltiples asesores en comunicación.

D’esta reunión malapenes tuvimos imáxes, a lo menos cuando esto escribo, pero nel video curtiu que los telediarios mos brindaron podía vese, nuna habitación estrecha y aforfugante, a unos empresarios, de los que naide faltó a la cita, serios, como apesadumbraos, como temerosos, como dicen que taben aquellos qu’esperaben nes celdes de les cheques que vinieran a nomar a los designaos pal paséu nocherniegu. Una escena que, a mín paezmelo, difícilmente puede ser emplegada como sofitu de dalu mensax subliminal, salvo para los adeptos radicales, pero vaya usted a saber.

Dalgunu de los convocaos, nun voi señalar por respetu, recordaben al neñu aquel británicu, fiu de rehenes, que lu punxeron al llau al dictador demoníacu pa amosar al mundiu’l so llau paternal y bonable. El guaḥe tenía una cara de llercia mayor que la que punxe yo cuando de neñu me llantaron al llau del príncipe Aliatar, embaxador de los Reis magos, cola so carona embetunada de negru, metanes l’escenariu del casinu del barriu La Calzada de Xixón. Aínda nun se me fue’l sustu, como aquel neñucu británicu en Bagdad supongo, como a los empresarios españoles  en Davos. Qué mieu.

A la fin el mensax que queda ye que la política moderna, non namái equí n’España, si non namái hai que ver la campaña de primaries del tarrecible Trump nos EEXX, básase nos guelpes d’efectu más que nes aiciones efectives. Ye lo qu’hai, y lo que ye peor, el cuerpu d’electores activos paez que, visto lo visto, ye tremendamente sensible a estos “númberos” el gobernante de nueso.

Sicasí, nun debemos preocupanos demasiao, esa imaxe, como too na política anguaño, va durar mui poco, el tiempu xustu pa fabricar otru pequeñu efectu pa la galería.

Raúl Suevos

A 17 díes vencíos de xineru de 2024

Torna en castellán en repdiv.blogspot.com

Yá lo dixera Fidel

 

Nel 2010 Fidel Castro yá dexara tolos so cargos na revolución, sacantes el de diputáu na Asamblea, práuticamente decorativu teniendo en cuenta’l sistema de gobiernu castrista.  Camudara en “soldáu de les idees”, según les so propies pallabres, y calteníase a bon recaudu sanitariu na so casa de la Zona cero, en Miramar, no que fuera’l campu de golf del Yacht club de la Habana, del que aínda güei queda en serviciu la zona de la sablera, les piscines y el magnífico edificiu neoclásicu. El restu ocupenlu les viviendes de los Castro.

Fidel entá caltenía una cierta incontinencia verbal, y eso reflexóse nuna entrevista que-y fizo la revista “The atlantic”, de esquierdes pa los estándares de Washington, y na que manifestó que “el modelu cubán yá nun furrula nin siquier pa nós”, lo que xeneró un aruelu de la virxen, que se iguó echando-y les culpes a la revista, que malinterpretara a Fidel. Anque nun yera asina.

El modelu cubán, o meyor, castrista, nun tien furrulao nunca. La revolución nun tien produxío un res d’utilidá o aprovechable nos sos 65 años d’esistencia. Too fue un trampantoxu sofitáu nel bloquéu, que nunca fue completu y tiénse basao nel pagu previu en metálicu de lo alquirío. Ni siquier la pernomada plaza de la Revolución de la Habana ye productu d’ellos, construyóla Fulgencio Batista. Ye lo qu’hai.

Estos díes fálase otra vegada de periodu especial na islla. Los déficit recurrentes nel presupuestu nacional fueronse cubriendo cola impresión de dineru, lo que tien llevao a la inflación, la real, non la que diz el gobiernu, a cerca de un 100%. Los campos petrolíferos de Varadero tán secos, y les unviades dende Venezuela son ca vegada más escasos, casi inesistentes. Les colleches, incluyendo la de zucre, amenorguense cada añu porque los guaḥiros nun quieren trabayar pa un estáu estractivu. El turismu crez, pero mui sele y ensin cubrir les inversiones hoteleres efectuades nos años caberos.

En Cuba namái furrula la policía, nutrida preferentemente en La Habana con personal trayío de les provincies orientales, a quienes se ofrez la oportunidá de vivir na capital, dalgo prohibido notru casu. Tamién funciona la emigración, que emburria a tol que puede, anque seya atravesando la peligrosa selva del Darién, a abandonar la islla, y que, dempués, conviertese na entrada fundamental de divises pal réxime.

Estos díes el gobiernu cubán tien amontao un 500% el preciu de la gasolina, y, detrás, tolo rellacionao. Vivir en Cuba, pa los que quedan, ye un exerciciu de supervivencia.

Raúl Suevos

12 díes vencíos de xineru de 2024

Torna en castellán en repdiv.blogspot.com

Güeyando "'pa" Cuenca

 

Son munches les xustificaciones sobro l’orixe d’esta espresión, ente lúdica y popular, que dalgunos remonten hasta les “conquistes” de Felipe’l formosu, el flamencu proxenitor del emperador Carlos. Pocu importa el so arranque puesto qu’a min, lo que me pide’l cuerpu nestos díes tan axitaos, tantu nel terruñu nacional como allende, ye’l mirar “pa” la Pampa. L’arxentina, la de Milei, como paradigma de la destrucción d’un país con toles posibilidaes énte sí, y qu’acabó na más absoluta depauperación.

La república Arxentina yera, allá per 1895, el país col productu interior brutu per cápita más altu del mundiu. Sí lleeron bien, númberu unu, y sí, el PIB per cápita ye un indicador que nun mos esplica cualu yera’l repartu de la bayura nacional, por, por ejemplu, percentiles d’ingresos na población del país. Pero ye un indicador macroeconómicu qu’aínda güei sigue siendo d’usu común polos economistes de tol mundiu pa danos idea de la situación d’una nación. Ye lo qu’hai.

Y sí, Arxentina yera lo máximo, más inclusive que Cuba. Dempués vinieron estremaes crisis económiques, a nivel mundial, que camudaron les corrientes económiques xenerales, como l’apertura del Canal de Panamá, que dexó a los arxentinos nun requexu de los fluxos mundiales. Pero, entá asina, el país continuó ente los veinte primeros del mundiu hasta la crisis del 29, qu’en casa coincidió col gobiernu caberu d’Hipólito Irigoyen, y, tres guelpe d’estáu, la Xunta militar primera, de la qu’un mozu Perón yá formó parte.

Dempués vieno’l carrusel peronista, con Juan Domingo a la tiesta, y Evita de relaciones públiques. Un festival de populismu esquierdista que tien continuao, con pequeños, dalgunos sangrientos, ya infructuosos parones, hasta la llegada de Milei. Una fiesta que se tien caracterizao polos déficit disparataos, la monetización de los mesmos dende la Casa de la moneda, los subsidios a les capes de población qu’ellos mesmos pauperizaron, y les quiebres sistemátiques del país, hasta llantar a Arxentina nel puestu 116º del PIB per cápita mundial, y facer viable la eleición d’una incógnita política como la que supón l’actual presidente del país.

N’Europa conocimos el casu, similar anque non idénticu, de Grecia. Tamién deficitaria al estremu, tamién endeudada hasta’l paroxismu, y, finalmente, rescatada pola Xunión Europea, demientres diez años perduros pa la población, sometíu’l país al escrutiniu y aprobadura de los inspectores europeos, y anguaño nuna sienda de virtuosismu qu’aínda nun algamó a devolver los estándares de vida que’l país tenía enantes de la crisis.

Y a nosotros, ¿vannos poner güeyando “pa” Cuenca?

Raúl Suevos

A 11 díes vencíos de xineru de 2024

Torna en castellán en repdiv.blogspot.com