¿...y por qué non el gobernín?

 

Esti martes caberu asistimos a una operación de mercadotecnia política nueva n’Uviéu; tratábase de conmemorar el 25 de mayu de 1808, día de la creación de la Xunta Suprema d’Asturies, sucesora o reemplazante de l’aneya Xunta Xeneral del Principáu, y que tendría l’honor de ser la primera nel país que se levantaba oficialmente escontra l’ocupante francés.

Hasta equí pocu hai qu’añader, en dalu sentíu; ye quiciabes cuando se güeyen les connotaciones o significaos que se-y quieren dar cuando mos asalten dalgunes duldes sobro les razones fonderes del actu que, acordies colo que manifiesten, paez llegar con intención de permanencia. Porque al asocedíu d’entós, entá con munchos clarescuros pendientes d’investigación, llevantamientu popular pa unos, autoguelpe de parte de la Xunta pa otros, agora quiérselo convertir en día de referencia en rellación cola bandera d’Asturies ¿Por qué non? Tamién en referencia histórica de la soberanía popular asturiana, tamién aceutable anque’l marqués de la Romana ceo-y cortara les ales. Pero llama l’atención la necesidá d’estes celebraciones cuando a nivel rexonal y nacional atopamosnos nuna llexislatura marcada pola presión del coronavirus d’un llau y la falta de realizaciones d’entrambos gobiernos. Chocante cuanto menos.

Quiciabes el 24 d’agostu fuere fecha más conveniente pues recorderíemos la proclamación del Conseyu soberanu d’Asturies y Lleón, en plena Campaña del norte en 1937, demientres la guerra incivil. Tamién pasaxeru, como la Xunta de 1808, podríemos usalo como reclamación del títulu de rexón histórica, como aquelles que, aprovechando la debilidá de la República algamaron delles cumes d’autogobiernu. Nós tamién lo tuvimos, anque’l presidente Azaña con socarronería lu calificara de “gobernín”, y anque los sos componentes, con Belarmino Tomas, el so presidente, a la tiesta, salieren per piernes, o meyor per vapor, vía’l puertu del Musel en cuantu los nacionales asomaron pela Villa tres la cayida del Mazucu. Too seya por guetar la celebración más provechosa.

 Quién sabe. A lo meyor too esto ye un trampantoxu que mos evite güeyar la realidá de la vida social y política de la rexón na que nada paez camudar dientro de la sele y melancólica decadencia na que mos desendolcamos, cola mayor letalidá rexonal del covid, debida ensin dulda a la nuesa altísima media d’edá; o cola mocedá, sobremanera la más preparada, abandonando en cuantu pue’l Principáu a la gueta de meyores horizontes. Un declive rexonal al que nun se-y ve un final; o meyor nun velo.

Poro faise necesario dalgún tipu de ceremonia de despiste, como’l caberu gran discustiniu sobro la cooficialidá que, cualquier que seya’l so resultáu, nada constructivu va aportar mientes que mos va caltener demientres un tiempu, ¿el de la llexislatura? Engarriaos en discutinios y discordies que namái a unos pocos interesen, por más que mos quieran convencer de lo contrario, poro ¿Por qué non el gobernín?

Raúl Suevos

A 26 díes vencíos de mayu de 2021

Torna en castellán en repdiv.blogspot.com

Alianza de confabulaciones

 

Samuel Huntington foi un estudiosu de la política de llarga trayeutoria y obres célebres, anque ye mundialmente conocíu por un artículu, depués ensayu espublizáu en forma de llibru, el Choque de les civilizaciones, nel cualu esponía cómo les estremaes civilizaciones o cultures interactuaben y se rellacionaben de manera natural, sacantes les llínees de contactu col Islam, au esistía un resfregón permanente con cauna d’elles. La parte final del trabayu dedicabase a sorayar la importancia d’amontar les aiciones de toa mena col fin d’apangar esa tensa rellación que podía dar llugar al choque de civilizaciones; daqué qu’interesaba evitar de toes toes.

La obra foi masacrada por articulistas y políticos d’esquierda, munchos de los cualos duldo que tuvieren lleído la obra, y too aquel que nuna conversación mundana s’allinea del llau del buenismu imperante ente la progresía de salón. Y ye que ye prácticu tener a mano dalgún conceutu pseudocientíficu pa poder dase pistu ya inclusive desarrollar toa una teoría política. Esi foi’l casu del nuesu inabarcable Zapatero y la so Alianza de civilizaciones, sacada de la manga pa poder, a costa de bonos caudales del estáu, que dicen que nun son de naide, ganar méritos demientres una temporada en compañía d’esi otru campeón de la democracia llamáu Recep Tayib Erdogán y compensar l’ostracismu internacional que’l so gobiernu sofría. Anguaño vexeta na inconsistencia consustancial al so propiu nacimientu anque proveyendo de un bon salariu a Miguel Ángel Moratinos mentanto.

Hai otru tipu d’aliances, más sutiles, más fonderes y duraderes que la del mediador de Maduro; ye la de les confabulaciones ocultes d’un ciertu tipu de gobernantes nas que güei vemos a Putin, Erdogán y Netanyahu como campeones d’esi cesarismu democráticu nuevu que se carauteriza por proceder d’estaos históricamente seculares, la Unión Soviética, el kemalismu turcu y l’Israel secular creáu por Ben Gurión, pa dende eses raíces históriques llevar a cabu una tresformación radical de los sos países sofitada nos tres casos nun lliberalismu económicu nidiu, con matices, y un retrocesu haza’l conservadurismu relixosu, ortodoxu nun, radical sunita notru, y xudaísmu ortodoxu nel caberu.

Los tres recurren a lo que faga falta pa caltener la tensión nos sos dominios respeutivos con guerres como n’Ucrania, autoguelpes en Turquía o machaque asimétricu nuna Gaza d’un Hamás creáu por ellos, y con ello algamen a reclutar un electoráu ente nacionalista y temerosu del porvenir pero que-yos sirve pa continuar nel poder y, de pasu, tresformar la sociedá dende un potente disfraz de democracia que, gracies a les tecnoloxíes de la información, cada día se paez más al gran hermanu que George Orwell describiera.

Sorpredentemente, na recien guerra d’Armenia los tres tenores taben presentes como proveedores d’armamentu a les partes y como ganadores del conflictu toos ellos. Ye lo que hai.

Raúl Suevos

A 23 díes vencíos de mayu de 2021

Torna en castellán en repdiv.blogspot.com

Mensax recibíu (de Marruecos)

 

Llevamos tres díes nun sinvivir; dalgunos yá ven les ciudaes africanes de nueso ocupaes pol moru Muza y, como ye lóxicu per otra parte, los medios de comunicación atopen un agostu inesperáu na crisis migratoria nueva, anque tampoco creo yo que l'axetivu migratoriu seya’l más afayadizu teniendo en cuenta que too se tien xestao dende’l palaciu de gobiernu rabatí. Quiciabes sedría más simple y axustao falar de crisis política, pura y simplemente política.

Les rellaciones internacionales ríxense, especialmente ente vecinos, pol principiu realista que señala que les debilidaes del otru hai qu’aprovechales y eso ye lo que siempres tien fecho Marruecos con nós. Fízolo nel conflictu d’Ifni, fízolo tamién nel Sahara y vienlo faciendo dende entós en toles oportunidaes que se-y presenten. La meyor de les ocasiones vien, de xacíu, de la mano d’un gobiernu feble, yéralo'l d’un Franco morrebundu qu’entregó de mala manera la soberanía del Sahara; nun lo yera’l d’Aznar cuando’l conflictu de Perexil –un erro de cálculu de un rei Mohamed mozu- ; y yelo, débil, el nuesu gobiernu anguaño, qu’amás escaez el principiu de realismu nes sos rellaciones colos alauites.

Les tensiones internes nel gobiernu, ente PSOE y UP, compliquen de forma tarrecible l’asuntu Polisariu; la llegada del líder d’éstos caberos al hospital de Logroño ye probable que nunca seya esplicada, anqu’ehí tengamos una de les claves d’esta crisis cabera que, creo, yá ta entamando a desenchise. España, y tamién Europa, recibieron el mensax, y ye posible que’l doctor Sánchez, visto’l so viaxe y declaraciones en Ceuta y Melilla, recibiera una ducha de realidá que-y sirva pa lo que queda de llexislatura.

El Rif, el norte de Marruecos, nunca quiso a la monarquía marroquí, y ésta caltien a la rexón nun estáu de postración permanente col que xuega la carta de la represión cuando se produz un españíu, como en 2018, o cola espita de la emigración repentina como la d’estos díes, que recuerda’l xuegu de los Castro en Cuba colos de so. Marruecos avanza ensin pausa na meyora de la so población, quitando nel norte, y asina  va siguir siendo porque-y convien a Mohamed, que ye, si cabe, más cativu que’l so pá Hassan.

Pasáu’l sustu van tornar a Marruecos la mayoría de los recién llegaos, como tamién va asoceder colos qu’entá permanecen en Canarias tres l’avisu de va unos meses, y que nin los nuesos políticos en Madrid nin el  nuesu CNI nel territoriu supieron lleer y calibrar, pero la vulnerabilidá va siguir tando ehí, pa nós y pa la Xunión Europea tamién; y más pronto que tarde lo que va venir va ser una avalancha pues al sur del Sahara la presión ye descomandada y creciente; y yá nun va ser el problema marroquí, nin tampoco’l d’España.   

Raúl Suevos

A 19 díes vencíos de mayu de 2021

Torna en castellán en repdiv.blogspot.com

Yá nun me molen los xudíos

 

Camudar d’opinión sobro la alliniación de la selección nacional de futbol, o sobro quién ye l’heriede de Curro Romero nel mundu del toreo ye daqué que se pue facer en mui pocu tiempu, n’ocasiones no que va ente’l primer y el segundu gin-tonic nuna quedada ente amigos. Tresformar l’enfoque en rellación con dalgo que, nalgunos aspeutos, afeuta a la historia del mundu suel ser un procesu muncho más lentu, a vegaes tan llargu como toa una vida. Ye, en ciertu mou, lo qu’asocede colos israelites, o col estáu d’Israel, o colos xudíos, o como ustedes prefieran nomalo.

Israel aportó a la mio concencia cola primera guerra, la del 67, la de los Seis díes, que me garró en plena adolescencia, un periodu vital con tendencia a las llectures romántiques, y qu’atopaba nel xeneral Moshé Dayán y na primera ministra Golda Meier auténticos héroes épicos lluchando escontra un enemigu múltiple y feroz dispuestu a arrefundir al pueblu d’Israel a lo más fonderu del mar Mediterráneu. Los árabes yeren el Goliat decidíu a acabar cola esistencia del mozu David.

A completar la imaxe aidaron nel 71 Larry Collins y Dominique Lapierre col so Oh Jerusalem, que lleímos con muncho de preste toa una xeneración, o a lo menos gran parte d’ella. El conocimientu del Holocaustu xudíu a manes de los nazis servía pa sofitar tola simpatía qu’Israel mos xeneraba, y les aiciones terroristes de Septiembre negru y Al Fatah namái contribuíen a reafirmar el nuesu puntu de vista gustante de lo israelí. Pero’l tiempu tolo folia.

La Nakba, la espulsión de los palestinos impuesta pola creación d’Israel nel 48, ye un conceutu malapenes conocíu pola mayoría pero supunxo la creación del primer programa para refuxiaos de les Naciones Xuníes, que entá perdura anguaño. La Autoridá Palestina, a falta d’un estáu palestín, foi, de la mano del desaparecíu Yaser Arafat, un vehículu, magar les sos poquedaes internes y corrupción, pa trayer la realidá palestina a les poblaciones d’occidente, pero foron quiciabes les conocíes como Intifades, ¿Tamos énte la tercera? les que más tiene cooperao a erosionar la imaxe daquel David d’entós hasta convertila en daqué mui pocu curiosu.

Israel, azotáu por una inestabilidá política permanente y de la mano nos años caberos del so premier Netanyahu, usa les represalies poles aiciones de la pro-iraní Hamás ¿provocaes? pa reforciar la so posición interna ensin importa-y la destrucción desproporcionada provocada en Gaza; too val pa caltener la so imaxe personal esgastada, ensin importar el númberu de muertes d’inocentes, particularmente la reciella.

Mentanto, pa toa una xeneración, la figura de los xudíos échase a perder a guelpe de imáxenes tresmitíes a les redes dende teléfonos intelixentes. Poco importa qu’un misil valte l’edificiu d’antenes y oficines de la prensa internacional en Gaza; la información de los guelpes desproporcionaos aplicaos pol exércitu israelita sobro la población palestina fai que cada día los xudíos me molen menos; entá menos cuando m’alcuerdo del cabo Soria muertu por una granda israelí nel Líbanu. 

Raúl Suevos

A 16 díes vencíos de mayu de 2021

Torna en castellán en repdiv.blogspot.com

Venti años ¿Pa qué?

 

Tráemos güei la prensa les imaxes de SM el rei Felipe recibiendo a los militares españoles caberos tornando d’Afganistán; imaxes de pieslle d’un ciclu de venti años nos que los soldaos de nueso apurrieron el so trabayu y sacrificiu personal, tamién les sos vides.

Aportamos a esi país de la mano de los atentaos del 11 de setiembre nos EEXX; atentaos que llevaron al presidente Bush a declarar la nomada guerra escontra’l terrorismu y, de pasu, a invocar l’artículu 5 del Tratáu del Atlánticu Norte, la OTAN, polo que nós ellí apaecimos como integrantes d’una amplia coalición internacional  que, pasáu’l tiempu, fizo que los nomes de la provincia de Bagdhis, o la población de Qala i Naw, se ficieren casi familiares pa gran parte de los españoles.

Ellí dexamos de curiar zones hortofrutícoles como n’Iraq, anque ente lechuga y tomate sufriéremos asedios sangrientos y unos cuantos de los nuesos se dejaren la piel enantes de salir del país de priesa y ensin tiempu pa dar esplicaciones tres incamentable decisión gubernamental, y pasemos a combatir oficialmente, específicamente tres la visita d’una ministra moza que pudo sentir el fueu enemigu nuna posición avanzada. Patrulles infinites en paisaxes del fin del mundiu, con emboscaes tres la revuelta del camín; batallones esplegando y combatiendo como nunca enantes na España contemporánea; némesis moderna en forma d’aviones esmanganiaos con tripulaciones esgotaes, o helicópteros ensin sofitamientu que sieguen la vida de los sos ocupantes; tamién la traxedia de los collaboradores qu’ellí queden a la espera de les represalies. Venti años d’historia del nuesu exércitu.

En toos estos años contaronmos histories de progresu, especialmente pa les muyeres, anque casi ceñíu a la capital Kabul. L’adormidera, la madre de la heroína, el vieyu caballu de los 70, siguió cultivándose n’Afganistán, inclusive con colleches crecientes demientres estos años. Los señores de la guerra, tamién se-yos pue dicir feudales, continuaron controlando los sos territorios, y anguaño, cola salida de los EEXX y l’avance talibán, refuercien les sos milicies col sofitu económicu de les estremaes potencies interesaes naquella encruciada xeopolítica. Tornamos atrás, a aquel mayu del 88 nel que los soviéticos abandonaron Afganistán.

Puedo maxinar cómo tendrán el cuerpu les muyeres afganes sabiendo lo que se-yos vien enriba. Otra vegada’l burka –que nunca marchó-, otra vegada’l pieslle d’escueles, otra vegada la sumisión; y vienme a la imaxinación un cuadru qu’esibe l’ayuntamientu de Huesca, la campana, nel que Casado de Alisal amuesa a Ramiro’l Monxe tres cortar la tiesta a los nobles levantiscos del reinu d’Aragón. Quiciabes la única solución p’Afganistán.  

Raúl Suevos

A 13 díes vencíos de mayu de 2021

Torna en castellán en repdiv.blogspot.com