Atópase España estos díes en plena fase de dixestión del atracón, en dalgunos aspeutos indixestu, que supunxeron les eleiciones del martes caberu en Madrid. Ye un procesu que va llevar dalgún tiempu, anque na mesma nueche eleutoral yá hebo dalguna repercusión, casi como un rutíu, a cargu de dalgún de los protagonistas principales. Y güei siguieron rebotando los resultaos escontra les paredes de la política nacional llevándose a dalgún más per delantre. Yá veremos en qué queden eses reaiciones cuando pasen dellos meses.
Nos medios de comunicación hai un interés nidiu por ver hasta qué puntu tamos énte l’entamu de daqué, en rellación con una posible remontada del partíu conservador a nivel nacional, o si tamos énte’l capítulu final del manual de resistencia sanchista. Sicasí, y magar tratase d’unes eleiciones autonómiques, de xuru lo qu’asocede en Madrid tien repercusiones nacionales, aniciando pol primer perxudicáu, el partíu naranxa, que, anque nun acusa recibu del mesaxe, ye induldable que tien por delantre un camín penitencial que yá veremos si lu lleva a dala parte. El viniente partíu perdedor, tantu que’l so líder, supuestamente inmarcesible, abandonó’l cargu la mesma nueche d’eleiciones, enfrentase a un futuru inciertu, magar formar parte del gobiernu, puesto que quedó de manifiestu que yá nun cuenta col resplandíu de pureza del so aparentemente espontáneu nacimientu, dende la indignación ciudadana. La so rápida tresformación en casta quiciabes nun los preparó pa la so nun menos rápida escayencia. Y ellos sabenlo.
Pero quiciabes el mayor derrotáu fo’l presidente del gobiernu, más inclusive que’l so partíu, nunca enantes tan reducíu na so representación madrilana. El decidió implicase personalmente, dándo-y con ello más protagonismu a la señora Ayuso, daqué qu’ésta supo aprovechar inmeyorablemente. Depués, a media campaña, retiróse Sánchez de la confrontación direuta, pero yá yera tarde, el mal, y con ello el so esgaste, taba fechu. Va a haber que ver cómo se xestiona esto agora, y pagalo colos soldaos nun ye de bonos xenerales.
Güei na radio podía oyese a la vicepresidenta Calvo amosando que la dixestión ta siendo tarrecible. Nun hai manera d’aceutalo según ella; puesto que too ye culpa de Ayuso, o inclusive peor, de los votantes que nun tán preparaos pa decatase del llabor sacrificao del gobiernu de la nación. Demientres ella falaba nuna cadena, notra onda, podía escuchase al líder del partíu ganador na esquierda, Mas Madrid, que, con un discursu empáticu col votante, y reconocimientu haza’l ganador, amosabase como una opción de futuru, muncho menos radical, y poro asumible pa más xente, que la representada anguaño por Podemos. Yera bultable’l prestu de la comunicadora, la mesma que va dellos díes rogaba a Pablo que nun abandonare l’estudiu. Oyendolu, falando d’ecoloxismu, de cambéu climáticu, tomando como referente a los verdes alemanes, yo nun podía por menos que pensar que quiciabes al PSOE-y tea saliendo, otra vegada pola so esquierda, un alversario muncho más temible que’l representáu pol repentinamente desapaecíu Iglesias; pensaba que quiciabes el peligrosu nun yera él, yera l’otru.
Raúl Suevos
A 6 de mayu de 2021
Torna en castellán en repdiv.blogspot.com
No comments:
Post a Comment