El Barça y España

 

Confieso d’entrada’l mio escasu interés pol deporte del futbol, anque al tiempu reconozo que yá va abondo tiempu qu’atalanté que la inorancia n’asuntu talu dexábame fuera de gran parte de les conversaciones desendolcaes por varones españoles. Agora, tiempu nel que la muyer también tien entrao nesi contuberniu, paez que les coses del país siguen más o menos igual; futbol y política, nun hai más.

Con eses premises sigo l’actualidá del futbol con ciertu distanciamientu que me permite escapar de les pasiones qu’ello suscita; y cola política intento, seguramente con menos ésitu, siguir la mesma conducta. D’ehí que les vicisitues del Barça m’interesen vivamente, y reparo que, dende la primer presidencia del señor Laporta, les cosaes van de mal en peor nesa casa, casi a la par que la política catalana, con presidentes encarcelaos o imputaos, intervenciones intempestives de los mozos d’escuadra, y, lóxicamente, una actuación ca vegada más deficiente del equipu de futbol no nacional y lo internacional.

Nesa política populista llevada a cabu pelos dirixentes d’esa casa, la contratación de Xavi, gran figura del futbol nacional y del club, como entrenador, guetaba repitir l’induldable ésito que supunxo la llegada de Guardiola al banquillu; pero que la situación seya similar nun asegura que, con persones estremaes, el resultáu tamién lo seya; y el probe Xavi, con llimitaciones nidies nel so desempeñu como entrenador, tien dío, tres una lliga abandonada nel camín polos sos contrincantes l’añu caberu, de mal en pior, hasta’l puntu de declarar va yá dellos meses, nun xestu inéditu, que dearía’l banquillu a la fin de temporada, pa plasmu del mundiu del futbol.

Tiempu dempués, y con más penalidaes que satisfacciones, ayeri sosprendió al país col anunciu de que va siguir al frente del banquillu barcelonista, sacrificando la so pallabra en beneficio y a petición de la dirixencia blaugrana; dalgo que, ye de suponer, va agradecer la so afición, y dicen que tamién la de los sos históricos contrincantes.

Como l’universu ye entrópicu, ayeri quisieron los hados que’l nuesu presidente, el doctor Sánchez, conocíu polos so xestos efectistas y rompedores, anunció que se toma cinco díes de meditación trescendental pa decidir qué fae cola so vida, y de pasu la de los españoles, dalgo que va tener a bien comunicanos el lunes viniente, pos nello entren ciertes insinuaciones dimisionaries. Una situación novedosa pa España, y tamién pa Europa, que mos va tener en vilu a toos hasta esi momentu.

Cola campaña catalana en marcha, y viendo a Xavi, a mí dáme que tamos, una vegada más, énte un histrionismu más del doctor Sánchez. Ye lo qu’hai. 

Raúl Suevos

A 25 díes vencíos d’abril de 2024

Torna en castellán en repdiv.blogspot.com

La memoria de caún

 

Lleo güei nun mediu nacional la vivencia d’una muyer de San Sebastián, 40 años, a la qu’ETA privó va treinta y cinco d’una infancia feliz al llau de los so proxenitores, a ella y a la so hermana, y a los pás de los so pás. Toos ellos, especialmente les neñas, marcaos pol señalamientu posterior de los terroristes que xustificaron l’asesinatu de los so padres a la salida d’un bar del cascu vieyu “por drogadictos y maleantes”.

Al so entierru, casi ocultu, malapenes asistió naide, y por parte de la clas política namái un Gregorio Ordoñez que sedría tamién asesináu dalgún tiempu dempués. Yera la llei de fierro de los terroristes vascos, primero la muerte física y dempués la muerte social de los asesinaos y de los sos allegaos.

Esta neña, anguaño muyer adulta, algamó a colar de la prisión social de les tierres vasques, siempres cola veroña de creer lo que los ruxerux y murmurios d’una población de cobardes trescalara na so mente de neña desamparada, y tres años de periplu humanu per España y otros países, tornó a San Sebastián, xusto a tiempu pa tener accesu al sumariu que l’Audiencia Nacional ponía a la so disposición como heriede de los so pás.

Ellí constaba como, tres el tiru na nuca al so pá, la so madre, receptora de tres disparos, aínda agonizó al llau de la so pareya demientres unos cuantos minutos. Y tamién que tres los preceptivos anális a los sos cadávres nun s’atopó dalu rastru de droga nos sos cuerpos, porque el so pá yera un simple carpinteru que s’afanaba en sacar la so familia alantre, anque el so amor al rock, como a la so muyer, lu llevara a dexar los cabellos llargos y gastar chupa de cueru. Quiciabes motivu abondo pa facelos oxetivu d’esos grandes gudaris vascos.

Güei esta muyer trata de tirar p’alantre na ciudá que la vio nacer, y supongo que tendrá saltao nel so asientu cuando’l candidatu de Bildu, los heriedes políticos d’ETA, calificaba nuna entrevista a los asesinos de los so pás como grupu armáu. Unos asesinos aínda güei ignotos, pues el casu forma parte d’esos 367 entá por resolver. Ye lo qu’hai.

El casu ye que’l tiempu pasa y lo que cuenta ye l’interés eleutoral, el d’unos y otros, ente ellos el del partíu del gobiernu, más interesáu n’algamar sofitos parllamentarios que notra cosa, y pal que la única memoria que cuenta ye la de va ochenta años, pues esa distrae l’atención de les coses actuales, como esos asesinatos entá por esclariar, anque dalgunos seyan socialistes.

Raúl Suevos

A 17 díes vencíos d’abril de 2024

Torna en castellán en repdiv.blogspot.com

Terapies de café

 

Suelo averame de cutiu a media mañana a un café allegáu a casa, de los d’enantes, d’esos con gran porcentaxe de parroquianos diarios, o clientes sistémicos; veceros los nomaríemos n’Asturies. D’esos que caltienen una confianza d’años, complicidá, col guardián de la barra, que suel ser l’amu.

Na mio rutina afáyome nuna esquina, au lleo un de los periódicos de la casa mientes revicio esi café aviáu con afalagu nuna máquina italiana vieya, d’eses ca vegada más difíciles de ver. Dend’ellí, malapenes concentráu na miseria de la política nacional, nun puedo evitar observar y escuchar el grupu de muyeres mayores qu’ocupen un par de meses en frente de la mio posición.

Preside una señora, abondo llendada na so capacidá visual, si ye que nun seya ciega total; acompáñenla dos o tres colegues dependiendo del día, dalguna cola so asistente correspondiente de orixe hispanu americanu; y, a vegaes. tamién s’ayuden d’una silla andadora pa les que tienen la so movilidá amenorgada.

Al llau de la señora presidente, n’ocasiones, siéntase un señor de fisonomía particular. Paez un moteru d’esos de peli yanqui. Chupa negra, texanos negros, botes negres, camiseta negra, pelu tisoriáu a lo marine, con sienes tresparentes, y cadena colgando d’un llateral del pantalón. A vegaes acompáñalu un preadolescente cola mesma pinta, y aire d’adorar a quien paez el so pá.

El tipu duru, que suel pedir a voces una cerveza, resulta ser el fiu de la señora de vista precaria, y tres esa fachada, que pertenez a un conductor de la recoyía de basures nochirniega, escóndese una persona d’una tenreza estrema tantu cola madre, como col fiu, o coles amigues de la primera. Un tipu con unes carauterístiques humanes ensin dulda de grau superior, pero que los prexuicios que casi siempres llevamos enriba, como si d’una mochila imposible de descargar se tratara, faen que, na mayoría de les oportunidaes nun algamemos a decatanos de la calidá personal d’estos individuos.

La simple llegada del paisanu suel ser motivu abondo pa que la tertulia femenina cobre un impulsu inusitaú, con mayor baturiciiu conversacional y nel que les rises suelen ser un elementu que nun falta, y, anque enfrascáu na lectura del mio periódicu nun algamo a enterarme de les importantes cuestiones qu’ellí traten, nun me cabe la menor dulda que l’aparente moteru, del qu’ignoro si tan siquier tien motu, ye un artista de la sociología femenina, a lo menos pa estes señores que tomen el so café mañaneru nel llocal del mio barriu. Ye lo qu’hai.

Raúl Suevos

A 1 día vencíu d’abril de 2024

Torna en castellán en repdiv.blogspot.com

Muyeres mexicanes

 

Nun sé ónde s’entamó l’usu de la espresión feminicidiu, pero nos años caberos tenémoslo sentío o lleío en rellación con México, particularmente con Tixuana, ciudá cargada d’ecos d’aquelles películes del oeste tan enllenes d’estereotipos y terxiversaciones históriques. Ye lo qu’hai.

Ellí, en Tixuana, demientres dellos años, tiénse llevao a cabu un procesu silenciosu d’asesinatos continuaos que dio pie al neoloxismu feminicidiu, tres años de tapecimientu polos poderes públicos y los medios de comunicación, anque anguaño, nun creo que felizmente seya l’alverbiu fayadizu, la ciudá descendió al tercer puestu mexicanu nesa estadística horrorosa.

El casu ye que les muyeres mexicanes tienen sío siempres, a lo menos dende la fundación de la nación moderna pol xeniu de Hernán Cortés, y cola ayuda imprescindible de doña Marina, la Malinche, la base del país. Nun segundu planu discretu y malapenes intuyíu énte la fuercia del machu mexicanu, pero con un llabor de sofitu ensin la cuala la nación, que tan bien canten los Tigres del Norte nos sos pernomaos Corridos, yá tendría sío absorbía pol so vecín norteñu. La esencia de México reside nes so muyeres.

En xunetu va haber eleiciones presidenciales, y si un disparu nun lo enzanca, en México ya Hispanoamérica nunca se sabe, va ser una d’eses muyeres la que va sostituyir al pintorescu, por da-y un axetivu compasivu, Manuel López Obrador, pues son dos, Claudia y Xóchitl. La primera, posible ganadora de les presidenciales según les encuestes, va por MORENA, el partíu del presidente, y la segunda pola coalición opositora.

Dambes tán na so sesta década vital, con munchos años de desempeñu profesional brillante enantes d’entrar en política, la una nel dominiu de la inxeniería y la enerxía, y la otra nes tecnoloxíes de la información, dambes muyeres que se tienen fecho a sí mesmes, y con grandes responsabilidaes polítiques nos años caberos. Dambes una espresión de la bayura del universu femenín mexicanu.

Claudia Sheinbaum, la postulante de MORENA, ye fía d’emigrantes xudíos, el padre askenazi y la madre sefardí, y tres una carrera universitaria perbrillante ya investigadora, acabó como gobernadora del Distritu Federal, arrasando en cuantes primaries internes se tien presentao. Agora son les encuestes les que la dan como ganadora segura en xunetu, y, anque dalgunos temen la influyencia del pernomáu López Obrador, que a la so solombra tien desendolcao la so carriera política, dizme l’instintu, o quiciabes los años, que, una vegada nel Palaciu Nacional de la plaza del Zócalu, antigua casa de Moctezuma Zocoyotzin, va ser el so personal instintu de muyer política lo que va prevalecer.

Que viva México, ¡caraxo¡…y les so muyeres.

Raúl Suevos

A 2 díes vencíos d’abril de 2024

Torna en castellán en repdiv.blogspot.com

Ardanza, que tas nos cielos

 

Duldo qu’haya un llugar au s’entierre meyor que n’España, ye una tradición que llegao’l suspiru caberu, si yes una figura pública, nun digamos yá política, too seyan eloxos y panexíricos, de tala forma que, pal personal perteneciente a les xeneraciones mozes, si presten atención a les noticies de les grandes plataformes, lo que nel momentu anguaño nun paez ser el casu, arriesgense a pensar que’l fináu yera una especie de delegáu del apóstol Santiagu, unviáu pol mesmu pa iguar los desafueros d’España.

Nel casu de les figures de les artes, la asuntu va con matices puestu que se fai necesario estremar si l’entierráu pertenecía a lo qu’enantes se nomaba “de la cáscara amarga”, es ye, d’esquierdes, anque nun sé por qué la RAE-y alxudica un “d’idees avanzaes” que nun dexa de chocame, que nel so casu la despedida pasa a alquirir connotaciones de duelu nacional, con tantu de ditirambos, laudatios y aponderemientos, como vimos nos tiempos caberos con dalguna figura que nun voi citar pa evitar dar carnaza a eso que nel spanglish que mos invade llamen haters. Dalgo que contrasta coles despedies de tonos apagaos que recibieron, por exemplu, Julián Marías, el meyor escritor de la so xeneración, y l’asturianísimu Arturo Fernández, dambos distinguíos por nun callase nin achantase.

Na política recuez el casu de Rubalcaba, aínda güei sacáu en procesión polos mandamases socialistes cuando-yos convien, magar que a él se deba la definición de gobiernu frankestein referíu al del doctor Sánchez. Nun importa, yá ta muertu, y puede servir pa tremolar otra vegada la so imaxe cuala bandiera y con ello distrayer l’atención d’asuntos más terrenales. El so funeral tevo una carga d’aponderamientos direutamente proporcional al odiu entrañable del so secretariu xeneral. Ye lo qu’hai, Y’España.

Con Ardanza quedéme un pocoñín güeyipláticu. Paeciera qu’él fuera’l factótum de la evolución pacífica del País Vascu. Un pergrande líder políticu dice toos los que lu conocieron, pero a min, vienme la imaxe del so patrón nel PNV, Arzallus, el que recoyía les nueces cayíes del árbol que los etarres movíen, col so secretariu Eguibar, troglodita salío d’una cueva guipuzcoana. Difícil que, con esos dos vixilando, Ardanza tuviera iniciativa política. Eso sí, reconozo-y les bones formes.

Foron años de chombu, con una disminución sele de los asesinatos d’ETA, que coincidieron col mandu del Xeneral Galindo n’Inchaurrondo, pero eso nun cuenta; yá se sabe que con ETA acabó Zapatero. Ye lo que sigue habiendo.

Raúl Suevos

A 9 díes vencíos d’abril de 2024

Torna en castellán en abellugunelcamin.blogspot.com

Franco, esi paisanu

 

Esi yera’l títulu d’una película documental que Xosé Luis Sáenz de Heredia realizó nel 1964 con ocasión de cumplise 25 años de la fin de la nuesa Guerra Incivil. El direutor, al paecer, un de los grandes d’aquel entoncenes, yá tenía realizao “Raza”, una película d’esaltación nacional que tenía como guionista al propiu Franco, y según investigaciones posteriores, contaba con dirixir, posteriormente, otru documental dando cuenta de los años caberos del xeneral Franco.

La que mos ocupa tevo como mentores al aparatu dirixente del Ministeriu d’Información, dirixíu por don Manuel Fraga, que, anque dalgunos-yos cueste creélo, aportara al puestu con fama d’aperturista, y que la so mano s’atopaba detrás del indulxente tratamientu que les dreches republicanes recibieron nel documental, dalgo que foi mui criticao polos cuadros más inmovilistes y tradicionales del réxime. Ye lo qu’hai.

 El casu ye que, como tolos mortales, el xeneral morrió, de vieyu, anque non pacetiblemente; y, anque anguaño tantu los sos siguidores del 36, como los sos antagonistes, tán toos desapaecíos, sigue siendo bandiera de dalgunos, anque non, como pudiera pensase, d’aquellos teóricamente más allegaos col so pensamientu. Si bien, siendo gallegu, ye difícil que naide lu conociera verdaderamente.

Lléis de Memoria hestórica enantes, y democrática dempués, y magar los votos algamaos nel Congresu, paecen más un actu de revanchismu que non un exerciciu cabal de llimpieza y compensación moral a los que, naquella dómina desdichada, sufrieron violencies, persecución o cualquiera otra aición negativa en razón de les sos idees polítiques; sobremanera porque namái se contempla un de los bandos implicaos.

Ye chocante, y paez dir pareyo cola esqualidez de la nuesa clas política, toa ella, que les andanaes sucesives amparaes neses lléis coincidan siempres con periodos eleutorales, y ye que, énte la falta d’una aición política correuta, con oxetivos que s’empobinen a meyorar la situación de la ciudadanía como individuos, y de la nación como ente internacional, siempres cae bien tener a mano unos güesos, anque pel momentu seyan anónimos, p’allevantar, una vegada más, esa bandiera del antifranquismu, aneya yá de más d’ochenta años, pero que sirve pa distrayer de la problemática cotidiana, y de los cientos d’asesinatos recientes nel País Vascu aínda por resolver, y au ye probable que ganen les eleiciones vinientes los heriedes de los victimarios d’ETA, blanquexaos pol nuesu gobiernu anguaño.

El paripé, nun merez otru nome, que’l nuesu presidente de gobiernu mos regaló’l xueves nel Valle de los Cayíos nun tien como oxetivu la dignidá de los muertos sinon la distracción de los votantes d’otres noticies más dañibles pa él y el so partíu.

Raúl Suevos

A 5 díes vencíos d’abril de 1954

Torna en castellán en repdiv.blogspot.com

Pollos yanquis y municiones cubanes

 

Paez que, por fin, y gracies a los bonos oficios del presidente checu, un vieyu xefe del Estáu Mayor del so país, la munición pa l’artillería ucraniana escomecipiará a aportar nos frentes de batalla, lo que va contribuir ensin dulda a camudar la situación anguaño, favoratible pa les armes ruses.

La operación, llevada en gran secretu poles implicaciones polítiques pa los posibles protagonistes, va meyor de lo esperao, y, en llugar del millón d’oxives previstu y pagáu pola Xunión Europea, dicen que va algamar el millón y mediu, gracies a la “cooperación” de dalgún supuestu aliáu de la Rusia de Putin. D’ehí’l secretismu en cuantu al orixe y allugamientu d’esos arsenales.

Nos mio díes caberos en L’Habana, nel branu del 2013, pude güeyar personalmente’l nerviosismu de los agregaos militares norcoreanos, dalgo que, confiésolo, nun me dio pa pensar nel so posible motivu, hasta que, yá tornao n’España, saltó la noticia del apresamientu d’un barcu cargáu de repuestos militares cubanos con destín a la industria militar de Kim Jong-un. Asina ye como funciona’l negociu del tráficu armamentísticu.

En rellación cola munición pa Ucrania contamos con dellos candidatos posibles ent’esos supuestos “amigos” de Putin dispuestos a traicionalu, anque unos son más improbables qu’otros, como la propia Corea del Norte, suministradora principal de Putin actualmente, si bien con munición de calidá deficiente según les noticies. Pero esisten otres posibilidaes ente aquellos más necesitaos, por razones polítiques o económiques, o dambes.

Nesti apartáu tenemos dos opciones posibles, países con tradición d’armamentu soviéticu, aisllaos políticamente y necesitaos de meyorar les so rellaciones colos Estaos Xuníos, que sedría’l patrocinador de los bonos oficios checos énte la paralís provocada en Washington polos republicanos dominantes nel Congresu. Venezuela y Cuba son les opciones de mio.

A min pídeme’l cuerpu que seya Cuba, que merca’l pollu a los yanquis per milenta tonelaes y necesita imperiosamente que Biden allevante la etiqueta que Trump-y llantó na semana cabera de presidencia como País patrocinador del terrorismu, dalgo qu’afeuta tarreciblemente a les rellaciones entrambos, particularmente al fluxu de turistes norteamericanos, güei desapaecíos de la islla.

La munición de 152 mm, d’orixe soviéticu y tan apreciada por Fidel, que vaya vusté a saber en qué estao de conservación tará, puede convertise agora nuna palanca pa desbloquexar les rellaciones cola alministración yanqui de forma que Raúl Castro pueda algamar el so oxetivu de morrer na cama, dalgo que l’hambruna del país puede echar a perder, como amuesen les manifestaciones caberes de Santiago de Cuba. Ye lo qu’hai.

Raúl Suevos

A 19 díes vencíos de marzu de 2024

Torna en castellán en repdiv.blogspot.com

La sablera d'Aboñu

 

Los vecinos de la Calzada de la mio quinta, cállola adrede, tendrán l’alcordanza d’aquellos domingos de branu nos que munches families garraben el tranvía del Musel pa dempués, tres travesar el túnel d’Aboñu, pasar el día naquella sablera tan guapa y familiar. Porque sí, yera tan particular qu’hasta los guaḥes teníemos la folixa asegurao cola caza d’anguiles, que naquel entoncenes yeren abondoses. San Lorenzo quedaba más a desmán pa los vecinos del barriu.

Con aquel tranvía tamién mos escapábemos a vegaes hasta l’arenal del Tocote, pasada la fábrica de la Casera, na que trabayé dellos branos yá mozucu, y del que mos tirábemos en marcha ensin pagar billete al reducir la velocidá na cuestina qu’ellí había. Yeren tiempos nos que los mesmos guaḥes iguábemos unos gomeros primorosos, d’alambrón forraos de filu de cobre, pa dir a aniquilar, que nun cazar, gaviotes, por simple placer infantil, pues nun sabíemos un res de plagues o naturaleza.

Foi per aquel entoncenes, creo recordar, cuando s’entamó’l rellenu, debaxo d’onde s’atopa l’hospital de Xove, de la ampliadura del Musel, y con ello’l tráficu inacabable de camiones per Cuatro caminos trayendo los escombros de too Xixón y contorna. Y, supongo, pues entós nada me preocupaben eses cuites, que la fartura de los vecinos pol ruiu, la esporquicia, y el trasiegu xeneral qu’ello suponía, tamién entamó.

Más tarde vendríen otres ampliadures nel Musel, y con ello más tráficu pela mesma ruta, con especial dedicación pa les producciones de la Uninsa, con salida d’acabaos y entrada de minerales dende esi puertu tan vital pa la economía de la ciudá y de la rexón. Con ellos, cuando soplaba y sopla el Gallegu, tamién aterrizaben sobro’l barriu les microparticules de los fornos y les fundiciones. Y asina hasta güei.

Anguaño ye otra vegada tiempu pa que los vecinos de la Calzada, y too Xixón con ellos, s’indignen énte’l retrasu nuevu del vial de Xove, que los dexa, una vegada más, espuestos, sine die, énte’l xaréu, el tráficu y la polución, como ciudadanos de segunda categoría, o tercera, quién sabe. Y unu nun puede dexar d’entrugase cómo ye posible qu’una rexón tan obediente col partíu del gobiernu, na que’l conceutu d’alternancia política nun tien práuticamente significáu, seya tan maltratada, de forma sistemática, pol ministeriu de tresportes.

Siguimos con un Ave-cilla pa viaxar a Madrid a precios Renfe por falta de competencia, y pagando dos peaxes p’aportar ellí per carretera, pero Barbón defiende al ministeriu, quiciabes por mieu a que-y solmené un de los so twittazos. Ye lo qu’hai.

Raúl Suevos

A 23 díes vencíos de marzu de 2024

Torna en castellán en repdiv.blogspot.com

...y nun son profesión de riesgu

 

Anque soi fiu del Cuerpu, esa ye la forma coloquial de referise a les persones que’l so proxenitor ye, o foi, miembru de la Guardia Civil, nunca tevi rellación cola Xefatura de tráficu, o con dalgún de los so componentes, pero constame que ye, ente les especialidaes estremaes nes que s’estructura la Benemérita, la que cuenta con más muertos n’actu de serviciu, nun digamos yá los accidentaos. Y pa llegar a esa conclusión namái ye necesario un repasu mental pequeñu a lo que la prensa mos aporta de forma cotidiana.

Vienme, casi tendría que dicir que me cute, la noticia del añu pasáu na qu’un motorista del Cuerpu s’interpunxo, conscientemente, n’Asturies, al coste de la so vida, énte la llegada d’un coche que podía llevase per delantre a un pelotón de mozos ciclistes aficionaos. Dámaso Guillén se nomaba. Unu más, un d’esos sobro los que Josu Ternera s’entrugaba nun programa televisivu ¿Nun son voluntarios?

Ye una constante la del sacrificiu y la esposición de los componentes del Cuerpu a lo llargo del tiempu. Tamién la del so abandonu con independencia de l’alministración del momentu.

Ehí tenemos les noticies sobro l’estáu de ruina de dalgunos cuarteles a lo llargo y ancho del territoriu. Les penuries escolares que sufren los fíos en dalgunas rexones pol sinsentíu que supón el sistema d’enseñamientu del que mos tenemos dotao. Y los agravios comparativos con otros cuerpos de seguridá del estáu. Ye lo qu’hai.

L’accidente d’esta nueche, con seis muertos, dos d’ellos guardies civiles, llega cuando aínda nun se tienen estenao los ecos de los asesinatos de Barbate, siguíos de noticies constantes sobro la impunidá cola qu’actúen los narcotraficantes naquellos llares, nos que los guardies civiles viven poco menos qu’atrincheraos nos sos cuarteles, espuestos al acosu constante de los delincuentes y quienes los sofiten.

Tampocu se tienen apagao los gritos de la manifestación del fin de semana pasáu en Madrid, na que se pidíen  pensiones dignes y el reconocimientu de profesión de riesgu, dalgo colo que cuenten les policías municipales y les autonómiquess, pero que, al paecer, nun merecen Guardia Civil, Policía Nacional y militares. ¿Ye un absurdu? ¿Un escarniu? ¿O simple desidia del Estáu? O lo que ye lo mesmo, de los so dirixentes.

¿Cuántos guardies civiles tienen que morrer pa que l’Estáu los tenga en cuenta? Resúltame vergonzosa, como ciudadán, la percepción de que, nun momentu nel que’l gobiernu fae gala, pente medies tou tipu de subsidios, d’una munificencia ablucante, nun tenga tiempo pa los so guardies civiles.

Raúl Suevos

A 19 díes vencíos de marzu de 2024

Torna en castellán en repdiv.blogspot.com

El Papa y l'apaciguamientu

 

Nun paez haber naide con títulu meyor pal buenismu que’l Papa. El so altísimu maxisteriu predispón a quien lu oye a pensar que les sos manifestaciones, amás de meditaes y sofitaes na meyor información, van empobinaes al llogru del mayor bien, la paz, pa la mayor cantidá de xente; l’orbe enteru si por el fuera.

Sicasí, a min, n’ocasiones, hazme pensar que los so asesores vaticanos nun son tan escelentes como cabría pensar d’una institución con tanta esperiencia nel llombu, y güei, trayíes a les arandines pola prensa, tornó a dejame ablucáu, por usar un axetivu moderáu por aquello de que les pallabres impreses queden pa siempres, si bien lo que me vien seyan unes cuantes espresiones muncho más grueses.

Vamos a ver, señor Bergoglio, val que lo de la paz siempres queda bien, y, sobre too, nun compromete; pero nesta ocasión tiense pasado vusté un montón de pueblos. ¿Nun tien oyío vusté falar de la política del apaciguamientu? Aquella actitú de los políticos europeos d’entreguerres que llevó a qu’Adolf Hitler s’engallara y depués viniera lo que vino. Fale vusté colos polacos, los del Papa Wojtyla, que se tán empeñando pa un par de xeneraciones a base de comprar armamentu, ¿Creye La So Santidá que lo faen por deporte o porque nun se fíen de Putin? Y del resto d’Europa, habría qu’amestar.

L’imperialismu rusu, del que Putin ye la morra pero qu’algama a la mayoría d’esa nación, incluyendo l’anguaño santificáu Navalny, tiene actualmente a Ucrania como lo que foron los Sudetes nel so momentu, anque nestos tiempos la mayoría del personal piense qu’eso ye un grupu de xente que se la suda too, y nin los que turisteen na rexón de Bohemia lo tengan nidio. Ucrania ye namái l’entamu, como ayeri lo foron los Sudetes.

Los ucranianos nun tán siendo derrotaos, magar la doliosa falta de municiones que tán sufriendo nesta fase de la guerra, tanto ye asina que’l presidente Zelensky va aprobar el regresu a casa d’aquellos que s’atopaben nel serviciu militar nel momentu de la invasión, y ello va ser a costa de la rebaxa de la edá  mínima pa los conscriptos nuevos de 27 a 25 años, porque Ucrania, señor Bergoglio, piensa nel futuru de la nación y nun quier nin puede laminar a una xeneración entera.

Ye Europa, magar los progresos induldables que se tienen fecho, la que s’arriesga a ser derrotada si Ucrania s’avien, como So Santidá propón, a negociar. Va ser namái l’aniciu. Va ser, como l’otru, un apaciguamientu falsu.   

Raúl Suevos

A 10 díes vencíos de marzu de 2024

Torna en castellán en repdiv.blogspot.com

Inés, la chilena

 

Va abondo tiempu que nun veo’l Telediariu de la Unu, va tiempu que me paez demasiao sectariu pa lo que yo toi dispuestu a dixerir, pero, tolos díes suelgo pasame al so canal pa güeyar el pronósticu del tiempu, lo que me da unos minutos d’intermediu col canal 24 hores que, en xeneral, acolumbro ensin malapenes presta-y atención.

Güei la cosa fo diferente. Tienme obsequiao con unos minutos de la rueda de prensa del doctor Sánchez, de xira per tierres americanes, y el presidente de Chile, Gabriel Boric, aportáu a l’alta maxistratura de la so nación tres curtia y axitada carriera como dirixente estudiantil, y que, no que lleva de presidencia, yá va por dos procesos constitucionales, dambos fallíos. Ye lo qu’hai.

El nuesu presidente –pídeme’l cuerpu anteponer un calificativu, pero namái me vien aciagu y temo que m’acusen de sectariu, poro pongo’l pensamientu ente guiones- allonxáu de los momentos axitaos que’l anguaño famosu Koldo supon pa la so presidencia personalísima, de partíu y gobiernu, tien aprovechao la coyuntura p’aventar unes cuantes soflames empobinaes, sobremanera, a echar baldones y basura sobro la oposición, daqué normal conociendo la so trayeutoria; lo que, per otra parte, tampocu debe estrañar al personal; pero tamién tien falao, en positivu, del día de la muyer, y del protagonismu que’l so partíu tevo nos progresos que se tienen fecho nel país de nueso en ares de la igualdá. Ehí lo dexo.

Al so llau, llegó-y el turnu al anfitrión, el presidente chilenu, que, con un par d’alusiones a la postura internacional del so gobiernu tocantes la crisis de Gaza, entró de lleno na cuestión feminista, dalgo lóxico tratándose d’un gobiernu, supuestamente, mui progresista, y con ello metióse a glosar los avanzos llevaos a cabu, y a enumerar una serie de figures femenines del país ente les qu’Inés Enríquez llamóme l’atención, pensando que se trataba d’aquella compañera, pareya de Pedro Valdivia, el conquistador de Chile, qu’enantes d’acabar el so llabor too tuviera perdío si non fuera por una Inés d’españoles ovarios, capaz de defender la capital énte los atacamientos mapuches mientes les tropes esploraben allende’l territoriu.

Pero non, aquella yera Inés Suárez, d’estirpe española, y poro refugable pa la esquierda ¿progresista? hispanoamericana, qu’asume ensin cuestiones la lleenda negra promovía polos anglosaxones, y nun ye a entrugase nin per un instante d’ónde vienen, cuálos son los so raigaños, especialmente cuando refuguen l’indixenismu, como nel casu mapuche en Chile.

Boric tien los so problemes, como’l doctor Sánchez, pero Inés Suarez fo la primer feminista del so país.

Raúl Suevos

A 8 díes vencíos de marzu de 2024

Torna en castellán en repdiv.blogspot.com

La mano d'Ábalos algamó La Habana

 

Nel mio segundu día de trabayu, en septiembre del 2010, en La Habana, sosprendióme la voz que los altavoces me trayíen dende fuera. Paecía Fidel pero pensé que yeren figuraciones míes; magar ello baxé a la cai u m’atopé con un ensame apreciable qu’escuchaba al Comandante no que fue el so discursu públicu caberu.

Yá la enfermedá lu tenía retirao, pero siguía siendo una figura internacional, anque nun rescamplaba tanto como nos tempranos años sesenta del sieglu pasáu. El Periodu Especial, esto ye, el penuriu que se produxo cuando los rusos se retiraron, y con ellos los sosidios que de Moscú aportaben, convirtiérase nuna mala alcordanza, si bien el futuru del país siguía siendo, especialmente no económico, tan foscu como les barbes qu’aquellos combatientes castristes lucíen cuando ocuparon La Habana nes Navidaes del 59.

Con España les rellaciones siguían siendo familiares, esto ye, entre riñes y abrazos; y según l’humor d’un Fidel que yo conocí yá decrépitu. Y eso siempres se tien apreciao colos representantes na islla, los embaxadores, que xeneralmente tien sío escoyíos con muchu procuru ente los especialistes meyores de la carriera y según la color del gobiernu de turnu, daqué lóxico teniendo en cuenta les implicaciones sociales que ente nós siguen teniendo los sucesos de la Perla del Caribe. Hasta agora.

L’embaxador anguaño supunxo una gran sorpresa. Un desconocíu llegao de la cooperación esterior española, con munchos años de trabayu discretu y desconocío en Colombia, au tendría coincidío col actual home de moda na política nacional, el diputao Ábalos, que tamién perellí anduvo a la gueta del peculiu demientres llargu tiempu, como consultor n’asuntos políticos y enantes d’entrar de lleno na política valenciana, dende onde saltaría a la fama como escuderu del doctor Sánchez.

Agora al señor Peccis, que asina se llama el pupilu d’Ábalos, quédase ensin trabayu, como la mayoría de los enantes protexíos, y que, esmazcaraos col asuntu de los mazcaros, van tener que buscase padrinos nuevos si nun quieren quedase abentestate. Ensin sinecures nin puestos d’asesor, ensin esperanza si los vientos camuden y se produz el relevu na maxistratura nacional, lo que va llevar a un barrío nes covachueles del poder.

Too lo rellacionao col antaño poderosu ministru de Tresportes fiede a podrío y naide na alta alministración quier que lu asocien, y ye quiciabes poro que’l ministru Albares, tal vez preventivamente, tien nomao al embaxador en Turquía anguaño, Javier Hergueta, vieyu conseyeru de cultura en La Habana, pa sustituyir al sorprendente señor Peccis. Ye lo qu’hai.  

Raúl Suevos

A 2 díes vencíos de marzu de 2024

Torna en castellán en repdiv.blogspot.com

Tornaron a facelo

 

La entradilla puede llevar a pensar que me refiero a los redundantes independentistes catalanes, los del insoportable “Procés”, pero non. Quienes lo tornaron a facer son los mozos del coronel Corbí, el primer condergáu del mandatu del inefable xuez Marlaska, los guaḥes de la UCO, la Unidá Central Operativa de la Guardia Civil. Y ye que, magar les alvertencies que nos años caberos-yos teníen llegao, con reforma orgánica del ministru Zoilo nel so momentu; defenestración posterior del so xefe a manes del citáu Marlaska, y, sobremanera, la menacia a tol Cuerpu que supunxo, supón, el periplu humanu y profesional del coronel Pérez de los Cobos, sometíu a una persecución política que namái personal de temple estraordinariu puede soportar; magar too ello, siguieron cumpliendo colos mandatos  de la vieya Cartilla del guardia civil; aquella que’l Duque d’Ahumada-yos diera como guía y farol de la so actuación profesional.

Nesta ocasión tienen sío dalgunes de les munches operaciones que a la calor de la congoxa qu’a toos mos provocó’l Covid, tamién a les autoridaes, se llevaron a cabu de forma poco nidia, por usar una espresión piadosa, y que, como podemos observar na prensa d’estos díes, escondíen operaciones marcaes pol signu de la corrupción.

Too paez desendolcase na redolada del ministeriu de tresportes, del so ministru d’entoncenes, y del so home de confianza, anque tampocu tengo mui nidio cuála ye la denominación que correspuende a esti paisanu, muñidor, al paecer, de les operaciones qu’anguaño, tres los atestaos de la Guardia Civil, instruyen na Audiencia Nacional.

Son varios los ministerios salpicaos, o implicaos, y, una vegada más, namái la unidá del Cuerpu arreyada nes investigaciones y el xuez instructor taben al tanti de lo que s’investigaba, y ello demientres más de dos años, con paciencia y esfotu, con métodu y profesionalidá, p’aportar nestos díes, cuando los implicaos tienen sío llamaos a declarar en xulgao, nuna de les crisis mayores de los años caberos, a lo menos no que toca a la credibilidá política del partíu de los empapelaos.

A min, una vegada más, tranquilizame’l comprobar que aínda mos queda, a la ciudadanía, la esperanza de que xueces y Guardia Civil siguen ehí, discretos pero dispuestos, y que, mientes nun camuden les coses, en cuantu a la independencia del poder xudicial, o la pérda del calter militar de la Benemérita, podemos siguir con les vides de nueso, despreocupaes nestos aspeutos de la estructura del estao, sabiendo qu’ellos, los guardies civiles, van tornar a facelo, cuantes vegaes faiga falta.

Raúl Suevos

A 29 díes vencíos de febreru de 2024

Torna en castellán en repdiv.blogspot.com

Nel solar zaragozanu...

Oyía va dellos díes nuna entrevista radiofónica a Kiko Arregui, eminencia de les terapies reparadores en conxelaciones, manifestase sobro Zaragoza como’l llugar u más fríu pasara, pa pasmu de la entrevistadora puestu que, nel so pasáu, figuren espediciones al Polu Norte y al Everest como miembru del Grupu Militar de Montaña.

Dicía Arreguí qu’al Polu váse preparáu con un equipamientu especial, mientes qu’en Zaragoza salse relaxáu y, a media mañana, el Moncayu, esi vientu qu’enantes de llegar al monte neváu llámase Cierzu, ataca de sopito dexando al piatón despreveníu a mercé de los mordiscos del alientu xélidu del Norte. Ye lo qu’hai.

Güei soplaba el Moncayu en Zaragoza; mañana dicen que más. Nun había pasiantes pelos bulevares, namái caminantes apresuraos, a les arandines unos, y otros encorvaos escontra l’emburrión soplador, según la direición. Y a min vienome la imaxe de la Princesa d’Asturies; quién sabe si d’instrucción pelos campos al abertal de San Gregorio.

Y ye que, n’Academia Xeneral, prima’l programa, tantu que, a vegaes, tengo pensao que nella s’inspiró’l desapaecío Xulio Anguita p’aquella lletanía de so de “programa y programa”. Y ye qu’ehí, na Xeneral, la más principal fazaña, cuando sopla’l Moncayu, nun ye obedecer, sinon sobrevivir, porque nesi campu, espresión de lo que se conoz como estepes aragoneses, nun hai abellugu pal cadete, flaxeláu pol vientu n’hibiernu, y azotáu pola sede nel branu. Una redolada que complementa’l programa pa forxar el calter de los futuros oficiales, y que, ensin dal dulda, va dexar buelga indeleble na personalidá de la heriede, como yá lo ficiera col pa y el güelu.

En díes como’l de güei, col Moncayu nevao añediendo un plus de fríu a esi vientu yá de por sí xeláu, les práctiques conviertense nun supliciu au nin siquier ye posible comer caliente, pues nun hai fornillu qu’aguante los embates d’Eolo, y, una vegada preparáu’l condumiu, una ráfaga inoportuna vien a sazonátelu col polvu del Castellar. Capacidá de sufrimientu.

Labordeta, en tiempos crepusculares del réxime vieyu, fizo canciu de los sos secanos, espropiados pa beneficiu de la defensa d’España, y agora tamién d’Europa, y los que perellí pasamos, ente’l xelu y el güelpe de calor, salimos con un temple estremáu, como marca l’himnu de la Casa, con un calter cinceláu a güelpe de ráfaga de Moncayu, y, con toa seguridá, la Princesa d’Asturies, va salir forxada en forma positiva d’estes esperiencias del solar zaragozanu.

Raúl Suevos

A 27 díes vencíos de febreru de 2024

Winter is coming

 

La serie de más ésitu nos años caberos, Xuegu de tronos, tenía como tema principal el mesmu que da títulu a esta tribuna, “Avérase l’hibiernu”, o allégase, o aporta, o como vustedes quieran; el casu ye que se presiente, como daqué imposible d’enzancar, como un cataclismu énte’l que nada se pudiera facer, anque na serie, ente los dragones y el concursu de John Nieve, a la fin, los caminantes blancos son deteníos, y la vida puede siguir haza alantre.

N’Occidente andamos estos díes, dalgunos, abondo acoyonaos colo que se mos puede venir enriba si, como s’anuncia, el pallares viniente se produz un cambéu na dirixencia de los Estaos Xuníos, nel imperiu, en Desembarcu del rei. Un cambéu que trae’l nome de Donald Trump, y la esperiencia del so primer mandatu. Pa echase a tremar.

Nun hai que ser un eruditu, nin lleese la Decadencia d’Occidente de Oswald Spengler, pa decatase qu’Europa lleva un tiempu cuesta abaxo, ainda cola maraviosa creación, magar lo que dalgunos digan, de la Xunión Europea. Casi too adquier una color desvaído, cuando non tenebroso. La política, otrora fonte de solución pa los problemes y temores del paisanaxe, paez que se tien camudao nun mecanismu simple al que’l pasu del tiempu tien cargao de ferrunu ensin que naide se preocupara d’engrasar, o anovar les pieces estropeaes.

La Xunión ye la mayor y meyor espresión de cooperación internacional que tienen conocío los sieglos. Dende la Comunidá Europea del carbón y del aceru, 1951, colos sos escarsos seis miembros, al xigante que ye anguaño, tienen pasao 73 años, d’ésitu podría añadese, pero agora son munchos los peligros que paecen acesmar nel camín. Y niún ye menor.

El pernomáu Pivote xeográficu de la historia paez que se tien desplazao haza’l Pacíficu llonxanu, lo que mos dexa arrequexaos, y l’osu moscovita, incapaz de facer frente a esa mesma deriva, decidió, va dos años, clavar les so garres n’Ucrania, un país qu'espresara con clarencia los so deseyos d’incorporase a esí, pa ellos, prometedor Occidente. Una aición, la de los rusos, que mos devolvía a la situación anterior al Congresu de Viena de 1814 y los so alcuerdos, namái rotos poles aiciones de Hitler y Stalin nel sieglu XX.

Trump, y dalgunos n’Europa, menacien con abandonar a Ucrania, un país que, magar l’heroísmu de la so xente, por si solu nun puede facer frente a Putin. Si Europa nun ye a sofitar l’esfuerciu de Zelensky, y el so pueblu, vamos tar énte la entrada d’esi hibiernu representao polos caminantes blancos. Ye lo qu’hai.

Raúl Suevos

A 25 díes vencíos de febreru de 2024

Torna en castellán en repdiv.blogspot.com

De los montes de Toledo a los Galaicos

 

Son dambos macizos, o sistemes montañosos, de menor importancia. Nada que ver col Pirinéu, o la Penibética, nin siquier colos aragoneses Montes Universales, nin que dicir tien colos esuberosos Picos d’Europa. Pero, magar la so humildá son a marcar el calter de les tierres a les que dan pasu, o piesllen, según les circunstancies.

Los Montes de Toledo, familiares pa min dende’l pasu pela Academia d’Infantería, que los tenía como tarrén habitual d’exercicios y maniobres, son malapenes un bárabu na inmensidá de les planicies de Castiella, un escalón caberu enantes d’entrar na cervantina Mancha, y ye posible, na mio opinión, que seyan abondo pa imprimir el sellu personal a les so xentes, dures y sufríes como la xara qu’alfombra esos montes, llar de monterías memorables.

Los Montes Galaícos tienen otru sentir. Más pausaos, vienen como continuación de los Ancares, broche qu’aúna les tierres asturianes, lleoneses y gallegues. Montes vieyos, graníticos, pero suavizaos pel pasu del tiempu, nada que ver coles xóvenes calices del Urriellu y los so hermanos astures. Son humildosos y soberbios a la vegada, como personaxes a la vuelta de too, como los propios gallegos.

Tamos en plena dixestión de los resultaos de les eleiciones gallegues, y, enantes de qu’aporte l’estudiu pormenorizao de los sociólogos, a los analistes de lo político faltó-yos tiempu p’atopar esplicadures a lo asocedío, con especial atención a la llombada tremendosa sufría pol partíu del doctor Sánchez; dalgo que, na so mayoría, achaquen al esgaste promovíu pol proyeutu d’amnistía, y a los meritos de los nacionalistes, con escarsa atención al trabayu del gobiernu gallegu n’exerciciu, pa la mayoría.

A min, que nun me presiona nin la ideoloxía nin la nómina, quédame tiempu pa guetar otres explicadures a esta victoria popular, dalgo mayor de lo que les encuestes agoraben, y atopo la motivación principal nos Montes de Toledo, tomando a estos como referente xeográficu de lo qu’anguaño ye Castiella-La Mancha, personificada nel so presidente García Page, nidiamente distanciáu de les polítiques del so secretariu xeneral, y quien, nes eleiciones caberes, torgó que pellí apaecira, tantu si lo facía en coche como en falcón. Una decisión, que visto los resultaos, paez que foi acertada.

En Galicia, los socialistes tolo apostaron a la política nacional, con intervenciones múltiples del presidente del gobiernu, y dalgunes más del ínclitu Zapatero, el del talante, el de l’Alianza de civilizaciones, el de Maduro. Una combinación que los gallegos nun tienen apreciao, y que dexa tremeciendo a les organizaciones territoriales socialistes pal futuru vienente. Ye lo qu’hai.  

Raúl Suevos

A 19 díes vencíos de febreru de 2024

Traducción en castellán en repdiv.blogspot.com

Opositor a Putin, cadavre efectivu

 

Tocantes la nuestra Guerra incivil hasta los más doctrinarios, ente los que tienen estudiao’l fenómenu bélicu, paecen tar d’alcuerdu en que, dexando de llau’l casu honrosu del xeneral Rojo, la ciencia y la téunica militar taba del bandu llideráu pol xeneral Franco. Ello vióse, ente otros aspeutos, na xestión de los recursos humanos, tantu a nivel de mases como nos puestos más escarsos, como podían ser los oficiales llamaos a dirixir les unidaees pequeñes. Y alguien inventó l’Alférez provisional.

Yera ésti un emplegu d’oficial subalternu, capacitao pa mandar una sección, esto ye, ente 30 y 45 homes según la tipoloxía. Pa cubrilos, tres un periodu de formación percurtiu, llamóse a los mozos col bachiller superior acabáu, y, sobremanera, universitarios. Llegaron a ser casi 30.000 y el diez por cientu d’ellos cayó en combate, con munchos más feríos o mutilaos. Dicíase que duraben nel frente al rodiu de los 43 díes. Una mortandá que llevó a dicir aquello de “alférez provisional, cadavre efectivu”.

En Rusia nun tienen alféreces, tienen opositores, pocos, y ca vegada menos. Ellí, tou aquel que se declara opositor a Vladimir Putin, seya nel campu de la prensa, como Anna Politkovskaya; el de los servicios internos, como Alexander Litvinenko; el de la oposición política, como Boris Nemtsov; o’l empresariao, como Boris Berezowsky, acaben asesinaos en circunstancies que nunca lleguen a ser conocíes nos sos detalles caberos, pero que conducen al Kremlin. Sálvense, temporalmente, los que tomen les de Villadiego, anguaño conocío com’Occidente, como’l casu del Garri Kasparov. Ellí un opositor a Putin ye un cadavre efectivu.

Ye una satrapía, la de Rusia, más feroz que la tan criticada Xunión Soviética, que tres la desapaición del monstruosu Stalin tomó una sienda más humana y poro asistimos a casos de lliberación de disidentes como foron Alexander Soltzhenitsyn que mos traxo’l conocimientu de lo qu’asocedía en Siberia col so Archipiélagu Gulag, o’l físicu Adreij Sajarov, que da nome al premiu del Parllamentu Européu. Yera una Xunión Soviética decadente nos sos principios marxistas que yá nun tienen nada que ver, en cuantu a drechos humanos, colo que güei asocede na Federación rusa.

La democracia illiberal, o cesarismu democráticu qu’encarna Putin en Moscú nun son más que denominaciones rellativamente amables pa mascarar lo que ye simplemente una autocracia despótica que lleva un camín del que la historia del sieglu XX mos tien dao exemplos palmarios, con Hitler en primer llugar.

Güei’l muertu, en circunstancies desconocíes nuna prisión llonxana de Siberia, ye Aleksei Navalny, unos meses dempués de qu’al mercenariu Prigozhin españase-y l’avión. Van siguir otros ente los que nun aceuten el xugu de Putin. Ye lo qu’hai.

Raúl Suevos

A 16 díes de febreru de 2024.

Torna en castellán en repdiv.blogspot.com

Si Goya allevantara la tiesta

 

Pasa don Francisco por ser el nuesu artista más grande y universal. El solu conxuru del so nome sirve p’acontiar cualquier actividá que se plantegue, especialmente si ésta ta rellacionada col arte, como asocede cola conocida como Gala de los Goya, o Fiesta del cine pa otros. Una fiesta salida del inxeniu de González-Sinde, el pá d’aquella ministra de cultura efímera, y entoncenes, 1986, presidente de l’Academia española del cine. Una gran ideia.

D’entós p’acá, esa supuesta fiesta tien ido perdiendo llustre, casi n’igual midía que diba ganando carga política. Y ye que, nun se sabe mui bien por qué, o sábese demasiao, los nuesos actores, na so mayoría, fóronse esplegándo como promotores d’un determináu sentir políticu, y ello fuése manifestando añalmente con tou tipu de mensaxes nesa gala añal que, nesta ocasión, acaba de tener llugar en Valladolid.  

Podrá pensase que n’España tol mundiu ye llibre d’espresar les so opiniones, y nun paez haber dulda al respeutu, pero también van convenir comigo que los adultos deben meditar sobro les consecuencias de los so actos, y si un grupu social se dedica a manifestase nun sentíu determináu corre’l riesgu de ganase l’animaversión d’aquelles persones, que magar nun espresar públicamente la so opinión más que n’eleiciones, tienen un sentimientu diferente u opuestu al qu’ellos suelen publicitar na so gala añal. Ye lo qu’hai.

El cine español pierde espectadores, magar lo que diga Almodovar. Ye una constante a la que namái sirve como analxesicu l’apaición de les plataformes televisives como productores de películes y series, de lo que la gran vencedora d’esti añu ye un exemplu, y yo nun sé si ello se debe al refugu ideolóxicu del públicu, a lo pocu curiosu de les propuestes, de les que namái paecen salvase les del xéneru comedia, o simplemente a la comodidá del salón de casa, pero deberíen facéselo mirar.

Esti añu foron 190 los millones d’euros recibíos en sovenciones direutes, y namái la metá lo recaudao, con Campeonex y Ocho apellidos marroquís a la tiesta. Y munchos faen cuentes sobro lo que diba costar implementar la llei aparcada nel Congresu pa l’atención a los enfermos d’ELA, unos 300 millones, porque les comparances son odioses, pero forzoses cuando una de les partes, el cine, s’empeña en danos la barrila añalmente, ca vegada con menos gracia y más aburrición.

Nun algamaron a dos millones y medio los telespectadores. Creo que la peor audiencia de la serie, o cerca. Mui lloñe de lo que diariamente llogra’l programa del denostáu, por dalgunos, Motos. Esmoleciente.    

Raúl Suevos

A 12 díes vencíos de febreru de 2024

Torna en castellán en repdiv.blogspot.com

Nun puede cesalu

 

Dicía Clausewitz que la guerra ye la prolongación de la política por otros medios, y, si asumimos esti asioma, podemos deducir que la política ye una forma de guerriar menos cruenta que la mesma guerra, como podemos apreciar estos díes n’Ucrania, au’l presidente tien desendolcao una anovación radical de la cúpula militar que, acordies tolos observadores, vieno marcada poles necesidaes polítiques del gobiernu, tanto tocantes al interior, la so ciudadanía, como al esterior, los países aliaos, con especial atención a los Estados Xuníos, y en xeneral a los miembros de la OTAN. Ye la guerra.

Equí, n’España, atopámonos metanes una esfriega grave, de calter tácticu ésta si consideramos l’ámbitu operacional como’l qu’atañe al nivel nacional. Y ye que tamos d’eleiciones en Galicia, onde la política gallega paez pintar bien pocu, anque si nun gana’l PP sedría’l BNG el llamáu a gobernar, con un programa qu’invita a tentase la ropa, si bien esa parte ye la futurible que va ser aclariada’l domingu venturu.

Yá metíos na fariña de la semana cabera, moviéndose dientro del área, sofitándonos nel futbol pa dexar de llau los símiles bélicos, alcontramonos con un par de regates en cortiu, el primer vien del llau peperu cola referencia inoportuna del señor Feijoo al siempres estrellizáu asuntu del indultu a Puigdemont. Asuntu sobro’l que arrefundiaron los socialistas como buitres lleonaos nel comederu de la Sierra de Guara. Normal, Ye la guerra.

L’otru tema vien regáu col sangre de los dos beneméritos guardias civiles asesinaos en Barbate, una masacre que, una vegada más, tien llevao a la petición de dimisión d’un ministru, Marlaska, yá mui amburao pero que paez ignifugu énte cualquier quema que-y pueda cercar. Nun hai, o nun paez habelo, desastre que pueda facer dimitir al nuesu ministru del Interior.

Esta ocasión paez más afogadiza qu’otres anteriores. Hasta la viuda d’un de los asesinaos, zarrándo-y el pasu al ministru cuando s’empobinaba a condecorar al home difuntu, añedió un plus de dramatismu a la yá de por si tráxica historia. Toos se llanzaron a pidir la so dimisión, hasta Podemos, y, de xacíu, el PP, secundaos poles asociaciones del Cuerpu. Nun van algamar l’oxetivu.

Na fase del partíu que mos atopamos, clave gallega, el presidente del gobiernu, que se tien distinguío siempres pola so frialdá a la hora de dexar colaboradores pel camín, nun puede cesa-lu, sedría reconocer el mal desempeñu del so ministru cinco díes enantes de les eleiciones. Ye lo qu’hai.

Raúl Suevos

A 12 díes vencíos de febreru de 2024

Torna en castellán en repdiv.blogspot.com

¿Morrer por un res?

 

La selmana pasada, sollertáu por daquien mui averao, tevi reviciando d’una serie documental sobro’l cursu y la escuela au se formen los especialistes de montaña de la Guardia Civil, los integrantes de los GREIM, Grupos de rescate ya intervención en montaña. El productu televisivu ye tan curiosu que los diez episodios foron dixeríos en namái tres nueches. Una combinación de les actividaes amosaes y el magnetismu de toos y caún de los individuos que’l realizador mos diba presentando facia difícil dise a la cama cola incógnita de lo que mos esperaba tres la cume, cova o barrancu vinientes. Una maraviella de documental.

Per detrás de les imáxes, o per delantre, según se mire, taba siempres presente la calidá humana de los personaxes, y sobro toos ellos la constante del serviciu a los demás, la entrega absoluta con conciencia permanente del peligru vital que supón l’actividá de rescate en montaña. Tamién la profesionalidá tremenda de los integrantes d’esti Cuerpu beneméritu, de los qu’estos alumnos de la Guardia Civil nun son más qu’un exemplu equiparable a otres especialidaes, y, en xeneral, a tolos miembros del Institutu.

Escribo esto cuando me llega la noticia del tercer muertu nel asesinatu perpetráu en Barbate pente medies l’abordaxe d’una narcolancha sobro una muncho más pequeña zodiak de los guardias civiles. Too ello baxo la güeyada atenta y ánimos de los actores secundarios de l’actividá contrabandista dende la oriella. Y too ello al zarrar el mesmu día nel que’l ministru d’Interior tuviera n’Alxeciras prometiendo ayudes y midíes, una vegada más. Una vegada más pa que, tres dalgún tiempu, les coses sigan igual o peor. El narcotráficu requier midíes urxentes y drástiques nel Campu de Xibraltar pues el futuru de la zona, toa ella, ta condergáu si nun se fae nada, y la vida de los guardias civiles, como se ve, nun val un comín.

Ye una traxedia ver como una y otra vegada estos servidores lleales del estáu son dexaos na cuneta. Ye casi una constante la cadena de noticies dando cuenta de cómo n’algunes rexones, amparándose nos sos estatutos d’autonomía, recórtase la presencia del Institutu, tamién el rosariu de noticies luctuoses tocantes a accidentes en los qu’ellos se ven envueltos, con riesgu de les sos vides y poniendo a salvu la de los ciudadanos. Nun hai riada o nevada na que la Guardia Civil nun mos dé amuesa de la so entrega total haza nós. Tampocu m’escaezo de les grandes operaciones de tou tipu, con especial atención a la corrupción política, nes que los sumarios xudiciales se sofiten nes pesquises de los especialistes de la Benemérita. ¿Y qué reciben a cambiu?

Non, dende llueu, un sueldu razonable. Quiciabes la rempuesta mos la dio’l despreciable Ternera cuando retóricamente s’entrugaba ¿Nun son voluntarios? Pues eso, son xente dispuesta a dalo “Too pola patria”. Intentemos nun defraudalos a lo menos.

Raúl Suevos

A 10 díes vencíos de febreru de 2024

Torna en castellán en repdiv.blogspot.com

Solidaridá a la catalana

 

Fo’l de 1832 un añu importante pa Cataluña. Inglaterra decidiera abrir les so frontieres a la esportación de máquines de vapor y de mano d’obra especializada, lo que dio pie p’allugar les industries testiles primeres nes cuences del Ter y del Llobregat; una industria que, hasta entoncenes, dedicarase a la estampación de pieces importaes. Fo una revolución, en munchos sentíos.

Aquella industria necesitaba de capitales que-y dieran sofitu, y ellí taben, aportaos de los beneficios de la trata d’esclavos con Cuba y de la venta de brandy a los países del norte européu. Yera un panorama casi perfeutu, y, cuando’l carbón importáu resultó caru, nun resultó difícil pasar al sistema hidroeléctricu pa mover la maquinaria, ca vegada más moderna y potente.

Por embargu, los testiles ingleses seguíen siendo meyores y más baratos; tamién los texíos de lino qu’una asentadísima industria gallega producía. Y ehí entró en xuegu l’arancel, el pernomáu arancel que yá dende 1820 grababa los productos testiles estranxeros y que nel 42 tornó a actualizase, p’agraviu de los británicos y ruina de los gallegos, que de rexón con puxu pasó a ser productora d’emigración, especialmente a América, pero tamién a Cataluña, que necesitaba brazos pa la so industria.

Anguaño yá nun hai aranceles, sacantes los europeos, y los países y les sos rexones desenvuelvense a cara de perru. Unos con colmillos más afilaos qu’otros, y, nesta oportunidá, el can catalán desgasta los de so col güesu del independentismu, perdiendo de vista’l progresu y meyora de vida de los so ciudadano. Ye una constante el llovíu, non aquella que llega del cielu, sinon la de datos negativos en tolos órdenes, los sociales y los económicos preferentemente.  

Esi nacionalismu escluyente ye’l que taba detrás de Pascual Maragall cuando se negó a realizar un trasvase d’augua al País valencianu; los so votantes, debió pensar, nun yelo perdonaríen. Ye’l mesmu nacionalismu que detrae caudales pa embaxaes en llugar de construyir les desaladores previstes va ya dellos años, y güei tan necesaries; ye’l mesmu que nun quiso compartir candidatura olímpica col so vecín Aragón. Ye insolidariu fondamentalmente.

Agora’l cambéu climáticu, esi que dalgunos, posibles terraplanistes, aínda refuguen, pero qu’avanza inesorable y con especial virulencia nel noreste español, manda. Ellí nun llueve dende va muncho, munchísimo, y eses cuenques del Ter y Llobregat, enantes capaces d’alimentar aquella industria testil, anguaño nin siquier pueden asegurar l’augua de boca a la gran metrópoli, menos entá a los millones de turistes qu’anualmente aporten a la zona, nin a les milenta de granxes  porcines, o al campu catalán.

Agora esperen solidaridá.      

Raúl Suevos

A 8 de febreru de 2024

Torna en castellán en repdiv.blogspot.com

Zorreando

 

Ye doberoso reconocer que, dempués d’años de desorientación nidia, Televisión Española paez tener atopao’l camín pa escoyer la propuesta anual pal certamen d’Eurovisión. Lo del Benidorm Fest, según declaren les audiencies televisives dende que la fórmula se punxo en marcha, ye un esitazu d’espectadores, o un tubazu, en términos modernos, si vustedes lo prefieren. Otra cosa son les perceiciones particulares.

Esti añu, como nos anteriores, dediqué la nueche del sábadu a catar les propuestes musicales de la ocasión, y, en xeneral, paecieronme festivaleres d’oportunidá, o fuera de les coordenaes, como la señora Pelae, que magar el so induldable nivel artísticu y la so perceptible calidá vocal, llega con una propuesta aflamencada que yá en otres ocasiones tien amosao los so escarsos resultaos énte les sintoníes eurovisives.

La opción ganadora, trayía por una pareya valenciana, de llargu y discretu percorríu musical él, entra no que se puede encuadrar como tecno-pop, esto ye, lo que vusté quiera con sofitu más o menos discu, una escena rompedora con dos bailarines…impactantes como pocu, y un desempeñu vocal que quiciabes nun yera lo meyor de l’actuación; anque too esto queda ciertamente opacao énte la fuercia del mensaxe de Zorra, qu’asina se llama’l canciu. Deseo-yos lo meyor.

Enantes de rematar ye obligao citar a lo que pa min foi lo meyor del festival, el boleru clásicu presentáu por un mozu canariu, San Pedro, creo que ye’l so nome de guerra, una aportación sacada casi del baúl de les alcordances, que sirve pa recordar que non toa la música moderna lléndase al reggaetón y semeyantes, y que’l vocalista interpretó maxistralmente, con una voz enllena de matices ya intimismu, y que, na mio opinión, yera lo meyor de tol elencu presentáu.

Ye posible que nel fondu quede’l recuerdu d’aquel Chiquilicuatre, u otres eleiciones d’alcordanza patética, y que poro se gueten anguaño opciones más “festivaleres”, como puede ser esta Zorra, qu’al so ritmu más o menos facilón, carauterística importante falando d’Eurovisión, amesta-y una lletra que “supuestamente” llama al empoderamientu femenín, dalgo que yá d’entrada va añader un plus al so desenvolvimientu a la hora de la verdá ellí en Suecia. Ye lo qu’hai.

El resultáu final, con independencia de si ésti nun ye ganador, ye l’escaecimientu casi inmediatu, o tres unos pocos meses, como la allabanciadísima Chanel mos tien amosao cola so casi desapaición de los circuitos comerciales, dalgo que tamién tien algamao a la vencedora del añu pasáu. Y ye que’l negociu de la industria musical ye intrínsecamente descarnáu y feroz.

Suerte pa la Zorra.

Raúl Suevos

A 5 díes vencíos de febreru de 2024.

Torna en castellán en repdiv.blogspot.com