La paideia que mos vien

 

Daquien va pensar al lleer el títulu que se trata d’un erru, que quise escribir pandemia; pero non, falo de la Paideia, esto ye, el procesu metanes el cualu los vieyos griegos trataben de tresmitir a los neños y mozos el conxuntu de valires y conocimientos necesarios pa llegar a convertise nun ciudadanu válidu pa la ciudá, la polis. Con esta paideia buscabase conformar el ciudadanu al que Pericles paga tributu nel pernomáu discursu fúnebre que lleva’l so nome y que munchos estudiosos de la ciencia política consideren como compendiu de los valires democráticos. Ye d’esa paideia de la que tratamos nesta tribuna.

Paideia ye tamién el títulu d’una obra grandiosa asoleyada por un de los grandes historiadores alemanes, en 1933, Werner Jaëger, na que l’eruditu trata d’esplicanos el fondu y evolución del pensamientu helénicu como basa ineludible de lo que va ser el pensamientu européu a lo llargo de los sieglos, hasta llegar al incomprensible desenllaz de les Guerres mundiales; anque esto daría pa otra tribuna. Ye un llibru que, creo, espublizó ‘l Fondu de cultura económica d’España en 2010 por vez cabera  y que, visto como s’anuncia’l futuru, nun paez que lleeran los nuesos rectores políticos.

La llei Celaa yá mos avanzó per au diben dir les coses, especialmente no tocantes a la cultura del esfuercio col pase de cursu ensin necesidá d’aprobar; amás, desapaecía la mayor parte del currículu d’humanidaes con especial asañamientu pal llatín y la filosofía. Supongo qu’ello xustificabase en que la preadolescencia ye pa reviciala y nun hai qu’aforfugar a la rapacería de nueso.

Agora, col asuntu del amueblamientu de les neurones de los nuesos mozos repartíu ente Iceta y Castells, apotanos un puxu nuevu na mesma dirección, la del vaciao cultural y moral -lo de la España vaciada va per otru camín anque tamién paez acabar nun precipiciu- y faenlo de la mano de decretos nuevos que van facer que se pueda pasar a la selectividá con asinatures pendientes, por suspendies; esto ye, otra patada al espíritu del méritu; anque, como esto podría ser daqué esperao depués de lo de Celaa, agora dase una patada a la construcción d’una idea nacional pente medies la asinatura nueva d’historia que va ser impartida con especial “respetu a les identidaes múltiples” en rellación col sentimientu nacional. Vamos bien.

El resultáu de too esto namái pue ser una ciudadanía más sele, más donda, más fácil de conducir per eses víes pecuaries, anguaño práuticamente abandonaes y que notres dómines foron cañaes reales.

¡País¡

Raúl Suevos

En Xixón a 31 díes vencíos d’ochobre de 2021

Torna en castellán en abellugunelcamin.blogspot.com

La voz nueva de Leonor

 

Son quiciás los Premios Princesa d’Asturies la meyor obra de comunicación institucional desarrollada n’España na tapa hestórica actual que vivimos, y ye, lóxicamente, Asturies la beneficiada principal de la repercusión publicitaria que conlleva a nivel, en munches ocasiones, mundial.

Nestos tiempos caberos, los del covid, la bona xestión de la epidemia llevada a cabu nel Principáu tienmos reportao artículos y reportaxes en medios de comunicación de tol orbe pero, aportao ochobre, y tres la entrega de premios a mediu gas del añu caberu, otra vegada’l Teatru Campoamor foi, xunto al hotel Reconquista, l’escenariu y marcu tradicional del mayor eventu anual de la rexón de nueso.

A min préstame siguir los Premios por televisión yá que, como col ciclismu y la mayoría de los acontecimientos deportivos, ye muncho más cómodu, y si la realización televisiva ye profesional puedes atalantar detalles que d’otra miente, nin siquier pa los invitaos a la platea, s’algamen a decatar.

Esti añu l’atención de los medios y, de xacíu, los televidentes, taba na Princesa d’Asturies, Leonor, desapaecida por razones escolares de les noticies dende’l tempranu entamu del cursu en Gales y suxetu de gran interés, lóxicamente, pa la mayor parte de la ciudadanía. Ella y la so hermana, la Infanta Sofía, despierten la curiosidá del personal en cuantu que la primera ta llamada a ocupar la xefatura del estao llegao’l momentu, y la segunda desempeñase como la so leal y natural escudera. Dambes baxo’l constante escrutiníu de la so má, daqué que, nesta fase adolescente, pue llegar a ser un flaxelu.

Leonor llegó con voz nueva, non sólo con un discursu nuevu, que tamién, puestu que los sos dos parlamentos, n’Uviéu y nel Puertu, sonaronme a afirmación personal del so estatus d’adolescente dispuesta a comese’l mundiu, nel so casu como promesa de sucesión a la Corona, la so proyeición natural, nada menos. Pero tamién faló cola so voz nueva, en plenu cambéu del timbre aniñáu al xuvenil, y tengo de confesar que me tien paecío una voz atayante y nidia, daqué que, pa daquien destináu a pronunciar milenta discursos a lo llargo de la so trayectoria vital nun ye cosa de poca importancia.

Son dos cursos escolares los que va estudiar en Gales, y vanmosla devolver más fecha, más formada y preparada p’afrontar el so pasu poles Academies militares, dalgo que a dalgunos parecerá-yos insignificante ya innecesario pero que forma parte de la tradición de la Corona española y que, en tiempos del inclusivismu radical feminista, faría la so desapaición difícil d’entender. 

Raúl Suevos

En Xixón a 24 d’ochobre de 2021

Torna en castellán en repdiv.blogspot.com

Peu de vaca

 

En tiempu de setes, na seronda, davezu, nos pastos de montaña topase ún con unes boles cardines de testura más o menos mórbido. Son les setes conocíes como peullobu na mayoría les rexones, anque en Cataluña, más rumbosos ellos, nomenles bufa de bou, esto ye, peu de güe. Non porque seyan más grandes nes fasteres del Pirinéu catalán, ye qu’ellos son asina, mui de so.

Cuando’l peullobu ta tienru ye comestible, anque de pocu valir culinariu, y cuando se pasa y ta en fase de descomposición, al pisalu, suelta per un furacu pequeñín na parte superior daqué paecío a un chorru de polvu escuru que recuerda a les imáxes qu’estos díes mos lleguen de La Palma, anque muncho más inofensivu. D’ehí qu’en toa España se-y aplique la denomación de ventosidá, con independencia de la especie animal rexonal.

Esti martes, aprovechando l’ausencia de turistas y la promesa de bon tiempu, averéme al altu la Tornería. Un pasu que traviesa la sierra de Cuera al altor de Llanes pa cayer haza’l valle del Cares, pasando pel pueblín del Mazucu; una casi insignificante aldea que dio nome mientres la Guerra incivil a la mayor batalla de montaña desendolcada durante esi periodu pa escaecer.

Tenía pendiente la visita pues va tiempu que tengo escrito un artículu sobro la batalla que, pel momentu, nun alcuentra a naide interesáu n’asoleyalu, y nel altu diéronse los combates más cruentos de la mesma. Anguaño la carreterina de montaña ye escenariu de delles pruebes d’automovilismu y a ún, mientes sube despacio poniendo tola atención na conducción y sonando’l claxon nes munches curves ciegues que m’alcuentro, encuruxase-y el corazón pensando nos combates qu’ellí tuvieron llugar en septiembre del 37.

Na Tenería taben les posiciones defensives más fuertes pues si cayíen taba nidio que’l Mazucu y la carretera haza’l sur tamién sedríen tomaos. Combatióse mientres munchos díes con grandes pérdides per parte de los nacionales, mui superiores en númberu y potencia de fueu, pero que, a la fin y a la postre, teníen que finalizar a pechu descubiertu peles fasteres percostudes de la Tenería au los esperaben los bien atrincheraos y aportunantes defensores del “gobernín” asturianu. Una carnicería.

Llegaos arriba, xusto nel altu, hai una esplanada pequeña dende la que se repara’l villoriu del Mazucu y ellí mos detuvimos para tirar un par de fotografíes. De sópitu una especie de truenu, llargu, sordu y fonderu, fízonos pegar un saltu; una de las vaques qu’ellí al llau pacíen soltó un peu terrible, con gran espulsión de metanu, ye un suponer, y yo quedéme pensando, enantes d’entrar nel coche pa siguir la ruta, si estos pedos sedríen motivu abondo p’acabar col ganáu asturiano, como al paecer quier el ministro Garzón.   

Raúl Suevos

En Xixón a 20 díes vencíos de ochobre de 2021

Torna en castellán en repdiv.blogspot.com

Lucus Augusti

 

Nel mio universu infantil queden les nueches na casa familiar en Marentes, Ibias, n’Asturies, peraverada a la raya con Lugo. Tierra de transición ente dos  llingües vieyes, anque nun tan potentes como’l castellán. Daquelles partes falen en “fala”, lo que los llingüistes  nomen astur-galaicu y al que los políticos asturianos denomen agora eonaviegu, nun xestu defensivu qu’evite les connotaciones gallegues, anque pol mesmu preciu pudieren nomalo interflumen, por aquello de los raigaños romanos, y quedaren meyor.

Naquelles nueches, al llume de los candiles, pues nun había otra lluz posible, oyía contar hestories de tierres vieyes, de tierres escaecides y dures pal campesín. Contaben cómo les neñes de la familia madrugaben cada selmana pa, poles siendes y caminos de la montaña, llevar baxo la lluz de les estreles los sos productos modestos al mercáu de Fonsagrada, entoncenes una villa humildosa anguaño más conocida por ser fin d’etapa del Camín primitivu y dende va bien de tiempu por preparar el meyor pulpu a feira de Galicia.

Naquelles nueches Lugo quedaba mui lloñe, sonaba como si fuere una gran y distante capital, y, al contrario que Fonsagrada, nunca tevi ocasión de visitala. Hasta esti sábado cabeeru qu’una reunión de compañeros me llevó hasta les ses muralles pa recordar tiempos pasaos y comer el pulpu con cachelos. Una gran oportunidá pa un gran descubrimientu.

Los amigos taben más vieyos, como yo, pero igual d’animosos que va 40 años, cuando nos aniciamos en Zaragoza; el pulpu, ente hestories y cancios, impecable, pero’l primáu sigue siendo pal de la Fonsagrada; pero Lugo foi un afayu sorprendente. Les sos muralles romanes, impecables y completes colos sos dos milenios al llombu, per onde revicien los amantes de la carrera continua, esos qu’agora se faen nomar runners;  son estes muralles l’engarcie pa una ciudá coqueta llena de places recoletes, cais estreches y bien empedraes con un texíu comercial vivaz nel que les terraces de los sos bares y cafeteríes paecen primar sobro’l restu d’actividaes.

Llama l’atención el gran númberu y calidá de les tiendes de confección y calzáu que se reflexa na elegancia de la so xente. Tamién les sos tiendes d’ultramarinos d’onde me traigo un botelo fabulosu pa degustar nel abrigu de Xixón,  anque la mayor xoya ensin dulda ye la catedral, estremada de casi toles que visitara enantes, que son abondes. Casi toes pímpanes, diseñaes pa recordar al creyente la so consolancia énte’l poder de Dios, siempres me parecieron un pocoñín fríes, seguramente debío a los sos impresionantes volúmenes. Nun ye’l casu en Lugo.

La Catedral, de factura románica na so mayor parte, ye diferente. Les sos dimensiones son más humanes, y el fechu de tener el coru metanes la nave central fai que too vaya ofreciéndose como en capítulos. Son munchos los detalles artísticos que ún va zarapicando, pero ye quiciás la capiya y Virxen de los güeyos grandes la que más impacta. Ensin dulda una obra maestra de la imaxinería española pero, amás, absolutamente distinta a tolo que conocía. Una exhibición d’imaxinación y ocupación del espaciu de la so capiya col so allugamientu nel centru de la mesma y los sos elaboraos brazos aéreos sofitaos nos pilares de la mesma.

Nun ye d’estrañar pues, que magar nun ser horariu de cultu, la Catedral tuviere con gran númberu de fieles nel so interior yá que, con independencia de la so función relixosa, trátase d’un espaciu francamente atopadizu en tolos sentíos. Tien Lugo motivos pa otra visita que complete la d’esta xornada, vamos tener que guetar la oportunidá.

Raúl Suevos

En Xixón a 17 díes vencíos d’ochobre de 2021

 Torna en castellán en repdiv.blogspot.com

Nun voi dir a la manifestación

 

Va dellos díes, otra vegada, volví a sentir vergoñaa por culpa de la llingua asturiana. Nun por ella, válgame Dios, una llingua a la qu’amo y valoro como’l segundu valir de la nuesa tierra, tres el paisaxe; sinon pola propuesta llevada al Congresu por unos diputaos valencianos, creo, pa que se reconoza la especialidá docente de llingua asturiana a los 300 profesores, más o menos, que la imparten anguaño. Los Nuesos diputaos asturianos, toos, con independencia de la so color político, nun paecen sentise afectaos por esi problema.

La llei d’Usu y promoción del asturianu data de 1998. Unos 23 años llargos yá de la so promulgación con mui pocos resultaos hasta’l momentu; daqué que da pie a los defensores de la llingua a guetar el saltu ensin rede de la cooficialidá. Un saltu que sirve a dalgunos pa, ensin conocimientu, espotrexar escontra la llingua. Que si ye una llingua inventada; falso ¿Qué ye, que los nuesos mayores falaben nel castellán de Valladoliddd, o el de Madrizzz? Que si v’acabar colos estremaos bables de los valles; falso, la normalización nun acaba coles variantes, namái adopta’l asturiano central como referente; que si ye inventao; falso, dái-vos una vuelta pol diccionariu etimolóxicu de García Arias y váis ver. En fin, ye lo qu’hai.

Dicho esto, toi escontra la cooficialidá pola cenciella razón de que, una vegada abierta esa puerta, entramos nun mundiu que nun se sabe a ónde conduz. Nun me sirve que los bien pensantes digan qu’hai qu’esperar al desendolcu de les lleis posteriores porque eso, cola cooficialidá nel Estatutu, déxanos al azar de lo qu’a cada gobiernu, faltu d’otres aportaciones más conducentes, se-y ocurra, y nel sentíu que quiera, como yá asocede en dalgunes de les rexones españoles con llingua cooficial. A falta de polítiques reales entretengamos al ciudadanu con discutinios ociosos sobro qué llingua ye más interesante. Ye un riesgu que güei, na España y na Asturies de 2021 nun me resulta asumible.

Voi siguir defendiendo l’asturianu au faiga falta, arriesgándome a que me  partan la cara unos y otros. Unos por falta de llealtá llingüística col asturianu y otros por traidor al español, mientes quienes durante estos 23 años de Llei d’Usu nada o poco ficieron por desarrollala descansen sabiendo que’l personal va tar enguizáu en discutinios estériles mientres un tiempu, a la espera de qu’aporte dalgún globu nuevu enllenu d’aire de colorines pa vende-yos. Ye lo qu’hai, pero yo nun voi dir a la manifestación pola cooficialidá.

Raúl Suevos

En Xixón a 14 díes vencíos d’ochobre de 2021

Torna en castellán en repdiv.blogspot.com