Tengo’l vezu, desde va yá dellos años, de nun perdeme’l desfile madrilanu del 12 d’ochobre. El coñazu de siempres, en pallabres d’un presidente de gobiernu de imperecedera fama pola so hiperactividá incontenible, anque a min, dende mozu y como antiguu participante, siempres m’atrae. Estos tiempos caberos, amás, siempres vien acompañáu d’elementos colaterales que dan el so sabor añedío; cuando nun ye un paracaidista que s’estampa escontra una farola, ye un xefe de la oposición que, inorante del valir y algame de los xestos, mos alluga, como país, ente los sospechosos habituales del Imperiu.
Notros tiempos, cuando yéremos felices, inconscientes na nuesa inorancia, la sustanza taba nos nomaos “corros” que se producíen mientres el vinu oficial posterior que se desendolcaba nel Palaciu d’Oriente y de que los sos xuxurios desprendíense xugoses bilorderíes pa periodistes y analistes políticos, suponiendo que seyan coses estremaes. Güei, ensin la Princesa d’Asturies presente por imperativu escolar, les mires descansaben nel recibimientu que’l públicu diba dar al nuesu gobernante anguaño. Y nun defraudaron, la pitada y los glayíos foron pa recordar anque l’usu de mazcara dexónos ensin los xestos incontenibles que delaten al inquilín de la Moncloa neste tipu d’ocasiones.
A min, depués del desfile, ocurrióseme salir a reviciar de la formosa mañana serondiega, qu’en Xixón tiense amosao rescamplante. Un Muru de San Lorenzo plagao de xente, playos y foriatos, facía pensar que tábamos n’agostu, si nun fuera porque na sablera la población perruna de la villa de Xovino yera ama y señora de tola so superficie. Una fiesta, anque l’entá mayoritariu usu de la mazcara recuerda que la xente nun acaba de fiase de les cifres oficiales; y meyor que seya asina.
Nel muelle llamóme l’atención el rellumu de la renovada enseña nacional nel mástil del espigón de la vieya rula. Vese que’l comandante de marina preocupóse, y esta bandera y l’engalane de la Comandancia na vecina cai de Claudio Alvargonzalez resultaben ser los únicos signos de que güei, día festivu, celebrabase n’España’l día de la fiesta nacional. Daqué, esta falta de daqués, pa facer cavilgar.
Ye posible que’l cuadonguísmu, esa supuesta teoría política según la cuala Asturies ye’l bierzu d’España, tea más que tresnocháu, especialmente nun estáu autonómicu como’l de nueso pero, siempres hai peros, ye difícil que nun mundiu global, como l’anguaño, lleguemos a ser dalgo, si les partes componentes de la entidá España nun s’esfuercien por resaltar los elementos distintivos de la mesma, la enseña nacional, l’himnu, l’escudu y, de xacíu, la fiesta nacional.
Raúl Suevos
En Xixón a 12 díes vencíos d’ochobre de 2021
Torna en castellán en repdiv.blogspot.com
No comments:
Post a Comment