Charles Louis de Secondat, barón de Montesquieu pasa por ser el pá del sistema de gobiernu modernu, aquel que devasaba’l vieyu absolutismu monárquicu, pola gracia de Dios, y sostitoyíalu por un artiluxu políticu nuevu nel qu’imperaba la división de poderes. Dexaríalo bien establecío na so obra magna “l’Esprit des lois”, l’espíritu de les lleis. La so inspiración venía-y de la so vivencia n’Inglaterra y de los escritos de John Locke, particularmente los sos Trataos sobro’l gobiernu civil. Dambos diben servir de referente pa los famosos “checks and balances”, controles y equilibrios, qu’empapen la constitución de los Estaos Xuníos. Anguaño nun se concibe un gobiernu democráticu nel que nun impere la división de poderes y debemos-ylo, en gran parte, a Montesquieu.
Estos díes caberos tuvimos conocimientu n’España de dos aiciones que reflexen hasta qué puntu la de nueso ye una democracia precaria, o enferma. El más importante foi la sentencia del Tribunal constitucional según la cuala’l confinamientu decretáu pol Gobiernu foi illegal en cuantu sustrayía al Congresu de diputaos la su capacidá fondamental de controlar al gobiernu; control qu’exercita como depositariu de la soberanía popular, anque’l fechu de que los sos miembros, los diputaos, s’escoyan como integrantes d’una llista zarrada dictada pol secretariu xeneral del so partíu dexa la so representatividá un tantu miserable, pero esa ye otra hestoria.
Tamién trescendió que l’abogacía del estáu tien trabayao en Bruxeles pa caltener, aparentemente, la ordre europea de detención de Puigdemont n’estáu ivernáu tratando, al paecer, d’enzancar l’aición del xuez Llarena que, con pacencia infinita, trata de trayer al fugáu pa España. Son les dos aiciones inxerencias nídies del poder executivu nes árees de responsabilidá de los otros dos, el llexislativu y el xudicial, daqué que, nuna democracia saludable, debiera ser inconcebible y provocón de la indignación xeneral de la ciudadanía y les organizaciones de toa mena que-y dan voz. Equí un res, nada de nada, o quiciabes una noticia más, una de tantes nun ambiente políticu tóxicu y de calidá moral bien baxa. Ye lo qu’hai.
Güei los coneyos nuevos sacaos de la chistera, en forma de decretos futuros sobro la llimitación d’alquileres, subsidios pa la emancipación de los mozos u otros pal consumu en cultura d’adolescentes, van servir pa soterrar baxo’l lapilli informativu lo más importante, el fechu de qu’adulces, demientres enterramos a Monstesquieu, convertimonos en súbditos d’un poder executivo omnisciente y omnicompresivu que va acabar por anulanos completamente como ciudadanos. Ye lo qu’hai.
Raúl Suevos
En Xixón a 6 díes vencíos d’ochobre de 2021
Torna en castellán en repdiv.blogspot.com
No comments:
Post a Comment