Revisitando'l covarón

 

El mitu del covarón ye una de les alegoríes más conocíes de Platón. Esplícalo en La República, una de les sos obres más renomaes, y consiste n’encadenar a unos homes, dende la so nacencia, tres un muru dientro d’un covarón; dend’ellí namái atalanten les solombres que proyeuta’l fueu encendíu por otros homes tres el muru; cuando ún d’ellos ye a escapar, al salir al esterior queda cegáu, temporalmente, pola lluz de fuera; ye, acordies Platón, l’efeutu del conocimientu. Cuando algama a axeitase a la lluz decide tornar a rescatar a los sos collacios, que al ver el so tatexu, al tratar d’adaptase otra vegada a la clarixa del covarón; piensen que l’esterior ye dañible y nun quieren oyer falar d’escapase, prefieren siguir tres el muru, encadenaos y güeyándo’l movimientu de les solombres.

N’España paezme que nestos tiempos caberos vivimos encadenaos tamién tres el muru del covarón. Como ciudadanos tenemos un accesu llindáu a la información, a la realidá del mundu que mos arrodia. Son les solombres que mos apurren los medios de comunicación social; seique poro podamos pensar que tamos recluyíos en covarones estremaos, dependiendo de los homes, medios, qu’aticen el fueu qu’hai tres los muros, pero, en fin y en pos, namái algamamos a ver solombres distorsionaes de la realidá de la sociedá de nueso. Nin siquier cuando, cada cuatro años, somos llamaos a espresanos, los homes del muru mos dexen salir al esterior, al conocimientu. Tolo facemos prisioneros tres el muru, nel interior del covarón.

Estos meses caberos ofrecenmos una gran oportunidá de ver hasta qué puntu tamos encadenaos. La gran traxedia del coronavirus, que les sos cifres autentiques, conocimientu, paecen aportar con clarencia a otros países, ofrecensemos a nós en forma de datos contradictorios, o a destiempu, o parciales, o interesadamente sesgaos, too contribuye a qu’esti gran diañu biolóxicu seya utilizáu polos homes del esterior, el poder, acordies el so interés y col  sofitu imprescindible de los controladores del fueu, responsables de les solombres que se proyeuten sobro’l muru.

Asistimos a una llucha política agafada ente gobiernu nacional y autonómicos, dependiendo de los partíos políticos que nutren a ún y a otros. La ciudadanía güeya estupefacta, los que s’asomen a la boca del covarón, como lo único que paez importar ye’l rellatu de lo acontecío, non la realidá, non el sufrimientu actual nin siquier el futuru que mos espera cuando aporte la pandemia económica. Yá s’encenderán otros fueos que produzan nueves solombres. Y ellí vamos siguir, encadenaos tres el muru, en lo más fondero del covarón.

Raúl Suevos

En Xixón a 27 díes vencíos de setiembre de 2020

Torna en castellán en repdiv.blogspot.com

La democracia n'América

 

Con esti títulu asoleyaba en 1835 Alexis de Tocqueville la so obra más conocida. Yera él un noble francés que pasaría a la historia como xurista eminente y políticu, que entrara en política cola revolución de 1830 y la cayida de los lexitimistes del antiguu réxime. El Nuesu home realizó un viaxe de dellos meses a la entós moza nación americana pa conocer el nuevu sistema políticu que proponíen.

El llibru sigue siendo anguaño la meyor forma d’averase al conocimientu del sistema políticu de los Estaos Xuníos d’América. Magar el tiempu trescurrío, la so descripción del sentir d’aquellos ciudadanos d’un mundu nuevu y de les instituciones democrátiques que desarrollaran pa gobernase a sí mesmos continúa dafechu operativa, anque p’afondar seya necesario tener en cuenta dalgunes riegles non escrites que completen y perfeccionen el sistema.

La Constitución de los EEXX pasa por ser una de les más acabaes, y dende la so entrada en valir, va yá más de 200 años, namái foron aprobaes 27 enmiendes a la mesma, lo que mos da idea de la so fortaleza y eficacia; si bien planiando perriba d’ella, mientes estos dos sieglos y picu, tuvieron vixentes, y ensin haber sío plasmaes sobro’l papel, dos normes fundamentales que sirven pa sofitar la calidá democrática de les sos instituciones principales.

La tolerancia mutua y la contención institucional son eses riegles non escrites pero d’obligáu cumplimientu mientes munchu tiempu y que paez qu’anguaño entamen a ser puestes en cuestión. La primera d’elles ye cenciella d’esplicar pues consiste simplemente n’aceutar la esistencia de los opositores o contrarios como daqué natural, como simples alversarios políticos que nun futuru puen ser los responsables de conducir les instituciones de la nación, y non como enemigos a muerte a los que hai que combatir con tolos medios al algame hasta llograr la so destrucción completa. Dalgo que ye fácil de ver na política norteamericana, y na española tamién, témome.

La contención institucional implica l’usu restrinxíu de los poderes del estáu per parte de quien detenta’l poder, daqué asina como una autolimitación. Nos EEXX, por exemplu, esiste la gracia presidencial, l’indultu, dalgo que Trump usa especialmente pa lliberar a condergaos rellacionaos cola so propia aición política previa a la llegada al gobiernu, y qu’inclusive menacia con aplicase a sí mesmu llegáu’l casu.

Otra oportunidá pa la contención dala’l nomamientu de xueces del Tribunal Supremu, ellí con calter vitaliciu y que propón el presidente, y qu’esta selmana, a menos de dos meses de les eleiciones, cobra actualidá pola recien muerte de una xueza de filiación demócrata. L’antecedente señala que en situación paecida al presidente Obama, un Senáu de mayoría republicana, refugó-y tala pretensión, faciendo usu d’esa contención institucional, pero nel casu actual esos mesmos republicanos preparense p’aprobrar la nominada pol presidente Trump.

Yá van décades que’l Conseyu eleutoral, una institución que campaba nes convenciones eleutorales de los partíos pa torgar l’accesu a la nominación de candidatos de duldosa lexitimidá democrática, foi elimináu pa facilitar una eleición más direuta per parte de los ciudadanos lo que, magar el so aparente incrementu de lexitimidá, amonta la posibilidá de qu’aporten candidatos que les sos credenciales namái son la popularidá y el populismu. 

 

El resultáu de toa esta evolución nos usos y vezos internos del sistema norteamericanu conduz a una perda de prestixu y calidá democrática de la nación que, dende la fin de la Primera Guerra Mundial, paecía guiar, direuta o indirectamente, los asuntos del mundu; y too ello cuando un nuevu xigante, paez querer desafiar el so primáu.

Raúl Suevos

En Xixón a 23 díes vencíos de setiembre de 2020

Torna en castellán en repdiv.blogspot.com

Les barbes remoyaes d'Italia

 

Ayeri y güei tuvieron votando los italianos; dalgunos facíenlo p’anovar les asamblees rexonales, y toos nel referéndum sobro’l retayu de puestos nes dos cámares nacionales, de 630 a 400 nel casu de los diputaos y de 315 a 200 tocantes al Senáu. Cifres que pueden tener llectures estremaes según como se quiera enfocar l’asuntu, daqué que, per otra parte, afeuta esclusivamente a los italianos pero sobro’l que me voi a atrever a facer una llectura personal.

La segunda xornada de votación remataba a les 14.00h de güei y el votu afirmativu  llogró casi un 70% de sofitos con un 54% de participación, anque nun yera necesario’l quórum nesta votación. Puese dicir que fo un ésitu completu pa los promotores de la votación, esto ye, pal movimientu Cinque Stelle, un de los partíos que sofita al gobiernu anguaño y tamién un de los grandes animadores del sistema políticu italianu de los años caberos.

Esti movimientu naz a la fin del añu 2009 de la mano del cómicu Beppe Grillo, proponiéndose dende l’entamu como un purgante del sistema al que buscaba rexenerar, tanto ye asina que nes eleiciones de 2013, nes qu’algama representación, refuga los 42 millones d’euros que-y correspondíen en función de los escaños llograos; tamién refugaben parte del sueldu de los sos representantes. La llucha escontra la corrupción, l’ecoloxismu y, al aniciu, l’europeísmu, taben nel so creu. Nos tiempos caberos, col accesu al poder, paez que’l brillu de los primeros tiempos escomencipia a apagase. Y ye que’l poder, dicen, tolo malva.

N’España’l movimientu conocíu como los Indignaos, anguaño Podemos, paeció inspirase nos 5Stelle italianos, anque la so puxanza y cayida  amuesa un desendolcu muncho más acandilante.  Na actualidá’l rexeneracionismu que proponía y prometía observase y constatase nos comportamientos políticos y personales de los sos dirixentes, y nel deterioru constante de los sos resultaos electorales. Too muncho más rápido que n’Italia, como cola segunda ola del coronavirus.

A min, confiésolo, sorprendióme’l pocu seguimientu informativu que’l referéndum italianu tuvo equí. Con independencia de los resultaos de les urnes, y del efeutu que va tener nel trabayu futuru de les cámares italianes, que nun algamo a ver si será positivu o non, la mio llectura ye que los italianos dieron-y un avisu seriu a la clas política en xeneral; dixeron-yos que tán fartos de cómo’l país va perdiendo fuelle mientes ellos xueguen a facer como que faen, y ficieronlo cola primera oportunidá que-yos ofrecieron, col referéndum. Equí, creo, les coses del común, la res-pública, lleven un camín semeyante haza la escayencia y los nuesos políticos faríen bien poniendo les sos barbes a remoyar.

Raúl Suevos

En Xixón a 21 díes vencíos de setiembre de 2020

Torna en casstellán en repdiv.blogspot.com

Asturias conectada col virus

 

La conectividá ye una pallabra que trae a los asturianos pola cai de l’amargura dende va munchu tiempu, gracies a ella, o meyor, a la so ausencia, la nuesa tierra foi siempres la cabera en relación coles invasiones qu’afararon la Península. Los romanos, que mos dieron nome, tardaron n’entrar y malpenes mos dexaron unos baños nel Campu Valdés enantes de que l’oru dexara d’interesa-yos; los suevos nin se baxaron del caballu camín de Galicia; los visigodos namái veníen pa recaldar y, pa fortuna d’España, Pelayo derrotó a Al Qama aprovechando les dificultaes que’l tarrén ofrecía a la caballería bereber.

 La conectividá dio un pasu xigantescu cola apertura de la Rampa de Payares nel 1884, colos sos 63 túneles y les sos rimades cuasi pa trenes cremallera. Foi un finxu de la inxeniería y tamién una revolución social pues abriómos al restu d’España a la que, hasta entós, yera más difícil viaxar qu’a Buenos Aires o L’Habana. Pero asina se quedó y asina sigue, hasta que la historia interminable del AVE mos devuelva al mundu d’anguaño. Per carretera les coses corrieron pareyes y güei entá son necesarios dos  peaxes p’aportar a la capital d’España.

Pero esiste otru tipu de conectividá, el de les tecnoloxíes de la información, el d’Internet, el de la inmediatez, el que construye l’aldea global, el que permite, en munches actividaes, teletrabayar, esto ye, desempeñar una actividá económicollaboral a distancia, y ehí Asturies atopase, otra vegada, esperando la construcción d’una Rampa de conectividá informática que dexe, sobremanera al mundu rural, competir nel mundu d’anguaño.

En febreru pasáu anunciaba’l Direutor d’Innovación del Principáu la so intención de coneutar con 30 megues a toles zones de solombra de la rexón pa enantes de fin d’añu y la señora Van der Leyen, Presidenta de la Comisión, vien a socorrelu, pues anunció que de los 140 mil millones d’euros de los fondos europeos, aprobaos pa superar la crisis del covid, 28.000 tienen que dedicase precisamente a impulsar la dixitalización y, dientro d’esti oxetivu xeneral, defínse un área prioritaria nel espliegue de la Banda Ancha Rápida, con especial atención a aquelles zones au la so baxa densidá demográfica failes poco curioses a la iniciativa privada.

Lleguen noticies estos díes de forma menuda y continua, como orbayu qu’empapa amodo, noticies de centros rurales educativos qu’amonten el númberu d’escolinos; de segundes viviendes que, gracies al teletrabayu pasen a tar ocupaes de forma permanente. Y son precisamente los núcleos rurales, hasta antieri escaecíos, los que son oxetu del interés d’estos urbanites emburriaos pol covid.

Tamos énte la meyor oportunidá pa una rexón que, col pieslle les mines y la gran industria, lleva años nuna tendencia depresiva qu’agora pue entamar a revertir, irónicamente gracies al coronavirus.

Raúl Suevos

En Xixón a 18 díes vencíos de setiembre de 2020

Torna en castellán en repdiv.blogspot.com

Italia 5, España 0

 

Merez estudiu la preocupación descomanada que’l futbol xenera nel ánimu de los españoles. El culebrón Messi práuticamente anuló la información sobro’l coronavirus mientres unos díes, quitando en casa de quien lo padecía na so espresión aguda, qu’ellí nun había tiempu nin ganes pa otres histories. Futbol, futbol, futbol; dicen que tocantes esta pasión namái los italianos mos superen; los tifosi, aparentemente, son más y de coraes más calientes.

El casu ye que col “bichu” tamién la nuesa rellación ye especialmente estrecha. Fo pellí, per Italia, per au entró n’Europa procedente de Wuhan, la tristemente célebre ciudá china, d’onde venía un vuelu directu diariu y cola que tenían un trezu especial puesto que d’ellí, del norte de China, procede gran parte de la emigración sino-italiana que s’alluga al 50% nel norte del país.   

Esi norte italianu ye’l motor económicu de la patria de los Agnelli, o los Ferrari, o del mesmísimu Giovanni Rana, l’home que fo a producir tortellini de forma industrial per primera vegada. Pero tamién ye la zona au s’asitien les meyores universidades y centros d’investigación del país. Dende ellí, dend’esi norte industrial y aballador salíen diariamente haza España, dende Linate, Malpensa, Bergamo y Venecia, más de treinta vuelos con toa mena de pasayeros, dende Erasmus hasta xente de negocios, ensin escaecer a les lexones de turistes de vuelu baratu.

El mio amigu Arturo, que ye home xagaz anque namái se movió d’Asturies pa dir de lluna de miel a Mallorca va yá más de 40 años, avisómelo daquella, cuando mos aportaben noticies de la matadera en Codogno y Casalpustarlengo, los dos pueblos qu’entamaron la saga de los confinamientos y que de los sos hospitales llegabenmos imáxenes dantesques. “Eso tenemoslo equí en quince díes”, y nun s’enquivocó, anque nel nivel au se tomen les decisiones, al paecer, nun teníen televisión.

Ellí, n’Italia, nun dexaron d’emitir imáxenes crudes d’UCI y les declaraciones polítiques competían en dramatismu. Con retardu, pero aparentemente con eficacia, el gobiernu foi sacando decretos sucesivos disciplinando la vida de los italianos que, visto la reacción, paez qu“acoyonaron” a la mayoría de la población. Güei’l bichu sigue caminando, pero’l so avance, pol momentu, caltiense no almisible.

N’España nun fo asina. El gobiernu cantó la derrota del virus y animónos a salir y vivir porque la economía nun podía parase, a lo que los españoles respondimos de forma unánime llanzándomos a sableres, chiringuitos, terraces, festeyos familiares y botellones. Ayeri, al fiu d’Arturo, que vive n’Italia, nun-y dexaron garrar un vuelu de Bari a Milán porque facia menos de 14 díes que tuviere n’España. Güei Italia gánamos por cinco a ceru, por goliada.

Raúl Suevos

En Xixón a 18 díes vencíos de setiembre de 2020

 Torna en castellán en repdiv.blogspot.com