Pésame

 

Diz la Real Academia de la Llingua que llamentar ye “sentir pena o contrariedá por dalguna cosa”, y, respeutu a la pena, tornamos a atopala cuando “se fai sentir a daquien el sentimientu que se tien de la so pena”, esto ye, cuando se-y da’l pésame, o la condolencia, que ye “la participación nel pesar ayén”. Ye esti, en definitiva, el mensax que’l nuesu presidente de gobiernu, el doctor Sánchez, unvió ayeri al partíu Bildu en rellación col suicidiu en prisión d’un terrorista etarra, un de los miembros del grupu etarra que llevó a cabu l’asesinatu de Miguel Ángel Blanco.

Nun quería entrar nesti asuntu tan obscenu, eso ye lo que me paez, puesto que taba seguru de qu’habría munchos y meyores que lo faríen a lo llargo de les hores vinientes a tan desafortunada espresión de sentimientu nel Congresu de Diputaos. Ellí, nada menos, produxose l’escarniu; porque namái como una “burla con propósitu d’afrentar” se pue calificar tamañu comentariu cuando entá queden unos cientos de crímenes etarras ensin esclariar y cuando’l que lo fai encabeza’l poder executivu de la nación. Ehí tamos, ehí lleguemos depués de más de mil asesinatos. 

 

El xuegu políticu ye, a vegaes, de desatamañáu entueyu. Llega’l paroxismu cuando’l gobiernu nun cuenta con abondo mayoría y tien que sofitase en costosos y rinchantes apoyos de fuercies estremaes, y ello dende una coalición gubernamental tensionada hasta la enritación dende la so propia nacencia y con resfregones internos crecientes a midida que la situación política nacional se deteriora. Esi ye’l panorama qu’anguaño se contempla na Carrera de San Jerónimo.

Pero tolo anterior nun xustifica según qué afirmaciones cuando ye’l xefe de gobiernu quien les fai. Cuando fala’l doctor Sánchez en sede parllamentaria failo por y pa los españoles y tien la obligación de tener presente non sólo’l soceder de güei sinon tamién el del pasáu; y dende ellí, dende’l nuesu pasáu recien, güeyenlu les neñes asesinaes nel cuartel de la Guardia Civil de Zaragoza, por poner un exemplu que cuasi toos recordamos. Por elles, por toles víctimes, tamién polos guardia civiles o policíes que tolos años se suiciden y de los que naide fala nin escribe, por toos ellos, tien la obligación moral de falar con contención dende l’astráu y respetar la memoria de los asesinaos. Por mui importante y necesario que-y seya’l sofitu parlamentariu de Bildu.

Per otra parte suicidase ye quitase la vida voluntariamente, daqué que nun pudieron facer niún de los asesinaos por ETA. 

Raúl Suevos

En Xixón a 10 díes vencíos de septiembre de 2020

Torna en castellán en repdiv.blogspot.com