Nestos tiempos, nos que les necesaries polítiques de xéneru paecen querer algamar a casi tolos requexos de la sociedá, esisten dellos detalles, o persones, que me trescalen especialmente. Nel aspeutu negativu nun cabe dulda que les promociones a guelpe de bragueta que se producen en dalgunes formaciones polítiques atenten gravemente escontra los principios d’esa reivindicación d’igualitarismu qu’ellos mesmos proclamen, con ferocidá n’ocasiones. Tán ehí.
Nel otru llau atópome con auténtiques Agustines d’Aragón, muyeres que pa nada necesiten sofitase en cuotes de xéneru o similares. Son elles mesmes, col so calter, fuerte, de xaciu; cola so personalidá, de perfil acusáu; y con un, aparentemente, enclín natural a lluchar incansablemente poles sos idees anque tengan que facelo escontra, non solo de los alversarios políticos, sinon tamién de los sos propios correlixonarios.
Ana tienmos apurrío nos tiempos caberos, nos que la retorica parllamentaria algama pozos fonderos de vaciedá, inolvidables intervenciones d’incontestable firmeza y claridá nes que ponía de relieve, col so acentu canariu, les contradicciones, o simplemente la mala praxis, del gobiernu. El so compromisu llogró’l so nivel máximu cuando votó, tres esplicalo dende l’estráu, escontra les directrices del so propiu partíu en rellación cola investidura del doctor Sánchez.
Rosa algamó la notoriedá nacional cuando siendo conseyera del gobiernu vascu promovió una campaña turística, “Euskadi, ven y cuéntalo”, que-y procuró l’escoyone del país, anque poro nun s’amedranó. Supimos d’ella otra vegada cuando se presentó a la secretaría xeneral del PSOE, ensin éxitu, y depués sufrió, xunto a Nicolás Redondo, un llargu y penosu acosu internu hasta qu’ésti foi sustituyíu en murnies circunstancies por esi gran políticu vascu que ye Pachi López. Depués creó un partíu de corte tresversal pero qu’una operación de mayor fustaxe llevó a la so consolancia, y a l’actual del sucesor. El so balcón caberu taba na emisora episcopal pero col so rumbu nuevu –la entrevista del so comunicador estrella a Zapatero yera’l clarín de lo que venía- la voz de Rosa facíase demasiao inconveniente. ¿Por qué sedrá?
A Cayetana, vocera parllamentaria del partíu de la oposición mientres un tiempu, apostraronla a responsabilidaes más prosaiques; el so verbu afiláu y certeru nun convenía a los carreros nuevos de la so formación. Yá pasara per esi trance, tar nel sitiu enquivocáu ensin tenese movío, son coses de la política pero nuna actividá tan cambiante como ye esa tampoco sedría estrañu que llueu la echen de menos los sos cofrades.
Son tres muyeres de convicciones de fierro, con idees sofitaes en principios básicos sobro los cuales nun tán dispuestes a transixir, pero que la so redolada, inconstante y camudable, espónles al desamparu políticu. Son almirables, sonores, como un repique de campana.
Raúl Suevos
En Xijón a 12 díes vencíos de setiembre de 2020
Torna en castellán en repdiv.blogspot.com
No comments:
Post a Comment