Lleven abondo d’años buscando la tumba del fundador del gran imperiu mongol pero diz la lleenda que’l gran guerreru dispuso les coses de tala miente que, magar los sieglos pasaos, foi imposible, hasta agora, dar col so allugamientu. Sía que non, ye mui probable que’l so espíritu s’atope estos díes embargáu d’una fondera enritación puesto que’l so heriede, Xi Jinping, puestu que’l so nietu Kubilai, fundó la dinastía Yuan al mandu del imperiu chinu en tiempos de Marco Polo, decidió eliminar la llingua mongola de gran parte del currículu que s’enseña na rexón autónoma de Mongolia interior.
La Unesco tien definida una clasificación de llingues acordies cola so situación y vitalidá y asina, les desaniciaes son aquelles que yá nun tienen falantes, y son munches. Tán depués les minoritaries, esto ye, les que cuenten con pocos falantes y que, en dellos casos, amás atopense minorizaes, o lo que ye lo mesmo, que sufren la presión, direuta o non, llegal o non, violenta o non, d’otra llingua de mayor prevalencia. Sedría, por exemplu, el casu de la llingua asturiana, llingua tradicional d’Asturies, anguaño nidiamente minoritaria y minorizada pol mayor puxu del castellán, que non poles lleis de la nación que-y ofrecen proteición abondo si los asturianos tán pola so defensa.
Sabe Xi Jinping que la llingua ye’l preséu principal nos procesos d’’aculturamientu que ye lo que’l Partíu Comunista chinu lleva faciendo dende va 70 años nel Tibet cola progresiva inmigración interna de chinos Han que va acabar col imparable dilimientu de los tibetanos. Tamién lo saben los uigures, d’etnia turca y relixón islámica, del Sinkiang, la mayor rexón china, allugada al suroeste de la de Mongolia interior, a los que Pekín arrequexa con una constante y pacífica invasión de chinos han y con unos non tan pacíficos campos de reeducación pa munchos naturales del país, fálase de millones, y más baxo vixilancia dixital coles más modernes téuniques de control de población emplegaes nel mundu.
Anguaño paez qu’entama’l turnu de los mongoles, hasta agora escaecios. Los sucesivos imperios chinos siempres buscaron crear una zona colchón que protexiere’l coral Han del Imperiu del Mediu y estes tres rexones cumplen con esa función y poro deben cayer al 100% baxo’l control de Pekín y, ensin dulda, la llingua ye’l gran preséu que facilita esa política interior que sofite lo que nel esterior pueda asoceder nestos años vinientes.
Mentanto, n’Asturies y magar la Llei d’Usu del Asturianu, el Principáu sigue ensin impulsar la llingua na TPA, lo que sedría perfeutamente compatible cola llucha escontra’l covid 19, coartada pa too.
Raúl Suevos
En Xixón a 5 díes vencíos de setiembre de 2020
No comments:
Post a Comment