Mensaxes

 

Llevo tola mio vida, a lo menos tanto como m’alrcuerdo, pasando la Nuechebona con una mesma liturxa. El ritu entámase col discursu del Xefe del estáu, y uso esta espresión porque na mio infancia, la d’una casa humildosa asturiana, entá yera’l Caudillu quien entraba nel nuesu llar. Al entamu facíalo pente medies la radio, depués nuna televisión en blancu y negru que costara probabelmente un sueldu, o quiciabes más, de mio padre. Siempres yera igual, nun mos sentábemos a la mesa hasta’l remate del discursu, dalgo que, al mio hermanu y a min, esmolecianos, pues malapenes prestábemos atención a Franco y sí a mio madre qu’aquella nueche procurábase especialmente.

Depués vinieron los discursos del rei Xuan Carlos, y nestos años caberos los del so fíu, el rei Felipe. Podría presumir, pues, de ser un espertu en discursos navidiegos, y dalgo de cierto hai nello. Los de Franco, anque yo los oyere como en sorda, pola edá, ye probable que salíeren de la so propia voluntá, puestu que’l so réxime daba-y esa prerrogativa. Los discursos reales, en cambiu, como actu de la real persona, deben ser refrendaos pol gobiernu, esto ye, que nada se diz ensin l’aprobamientu del inquilinu de la Moncloa.

Dientro d’esa concordia ente palacios, cabe maxinar que, nos primeros años, el xoven monarca d’un llau y un Suarez ensi tiempu pa rascase del otru, funcionaben con una cierta lasitú nesti menester discursivu pero, col pasu del tiempu, quedó nidio que los gobiernos amarraben con procuru los discursos del rei en xeneral y el navidiegu en particular. Quiciabes con mayor control per parte de los “progresistes”, pol so teóricu republicanismu, y una aparente llibertá del llau conservador, respetuosos de la institución monárquica, según dicen dalgunos.

Poro, va dellos años que pongo más atención a la redolada, na que maxino mensaxes, qu’a les pallabres, qu’albidro someties al xugu de la egrexa autocensura, y que, esti añu, tienenme paecío marcadamentemente gubernamentales por contraposición a la decoración, na que me paeció ver críptiques declaraciones.

Nun ye país pa vieyos España, emulando aquella premiada película. Una imaxe de la Sagrada familia al entamu, que yá nun tornó a apaecer fo l’únicu destellu de les vieyes tradiciones, depués, en cuantu a la Navidá, el permanente árbol y les flores de pascua, vezos trayíos del mundu anglosaxón y que, como casi too na cultura “nueva”, paecen apoderase del entornu, que nesti casu algamaba tamién al marcu pictóricu, mui modernu, ensin llugar pa lo clásico.

Les fotografíes, el mayor mensaxe añal, trayenmos el futuru de la mano de la princesa d’Asturies. Detrás del rei, una imaxe de la real familia y, per un momentu, creí ver, como nuna esquina, na fotografía trasera, al rei Xuan Carlos; pero non, yera una ilusión; el padre de la España anguaño sigue proscritu, hasta nos mensaxes. La España de güei, yá nun perdona los pecaos de bragueta, ficimonos tan hipócrites como si fuéremos protestantes, yá nun funciona l’actu de contrición y la penitencia, anque tengas 84 años. Una pena.

Raúl Suevos

A 25 díes vencíos d’avientu de 2021

Torna en castellán en repdiv.blogpot.com

Escaeciendo la lotería

 

Colé güei de los telediarios, quiciabes los más fadios del añu. Pa la mayoría del personal representen la constatación del fracasu nel sortéu de la lotería, tantu si xuega por convencimientu como si lo fai como prevención del empachu de gulisma, y, si te señala la fortuna, ye improbable que te pille énte la pantalla.

Una pequeña noticia sobro la renta per cápita europea animóme a emplegar esi tiempu en visitar Eurostat, la Oficina europea d’estadística, que la so páxina web ofrez tou tipu de datos sobro les más estremaes facetes de la vida europea. Ellí, coles sigles GDP per cápita, de Gross domestic product, o lo que ye lo mesmo, renta per cápita, pude aportar a los datos de los cuatro años caberos pa los países de la Xunión, y tamién los d’aquellos que s’atopen en dalgún puntu del procesu pal so ingresu na mesma, como ye’l casu de Turquía, o Montenegro.

Ye una estadística na qu’España nun relluma, pela cueta, escurezse, y failo a niveles preocupantes, puestu que ye la peor de toos nel año caberu, 2020, nel que cae de 91 puntos a 84, teniendo a 100 como nivel promediu del conxuntu de países. Igualanos Islandia, pero ella cae a 121, esto ye, muévese notra división, o tamién los Estaos Xuníos, que lo facen a 145. Lo de nueso ye pa llorar, puestu que nunca llegamos a 100, y dalguno querrá consolase echando-y les culpes al Covid, pero ye qu’esi bichu ataca a toos, naide se salva, y nós presumimos de campeones de la vacunación. ¿Entós?

Entoncenes quiciás seya que vivimos nun suañu continuu, al que mos lleven y mos caltienen los nuesos políticos; como aquel Zapatero que va dellos años poníase miu brétigu por superar a Italia en renta per cápita y disponía a blincar percima de Francia. Güei Italia avanza con pasu firme, dirixida por un convincente Mario Draghi, haza un futuru más seguru pa los sos habitantes mientes nós discutimos sobro construcciones ideolóxiqueas de nuevu cuñu que namái a unos pocos interesen, y beneficien.

España foi la más rápida en pedir y algamar los Fondos europeos de recuperación, de los qu’una primera partida de 10.000 millones d’euros podríen llegar ceo, daqué que, dende’l gobiernu, celebróse como una amuesa del nuesu gran nivel y conducencia nestos asuntos, dexando de llau que nun ye ello más que la espresión de la nuesa dependencia aguda, esto ye, de la nuesa probetería, en tolos sentíos.

Va haber qu’escaecer el Gordu y emtamar a pensar nel Neñu.

Raúl Suevos

A 22 díes vencíos d’avientu de 2021

Torna en castellán en repdiv.blogspot.com

Xesús na basura

 

Va dellos díes, mientes cumplía cola mio cuota d’altruismu en forma de reciclaxe voluntariu, atopéme con una imaxe verdaderamente insólita. Un vieyu belén de plásticu xacía al llau d’un de los contenedores, semiespuestu fuera d’una bolsa de plásticu, como si daquien lu llantara intencionadamente esperando que, seique, dalguna persona s’apiadara del probre belén y lu recuperara pa la so casa.

Nun se trataba de una gran pieza, puedo afirmalo porque en casa fuimos, siguimos siéndolo, abondo belenistes. Yera un conxuntu d’esos que se pueden comprar nun chinu, un portal con tolos sos protagonistas dientro, estruyaos nun espaciu pequeñu, como esos oKupas, de tráxicu percorriu, qu’a vegaes mos traen los telediarios a la tranquilidá llariega de nueso. Y ye que la Sagrada familia, anque namái fuere per esa nueche, aunque sólo fuere un establu, una tená, una cuadra, tamién yera okupa.

Quiciabes tea demodé lo del belén, y el vieyu dueñu del que mos ocupa quisiera simplemente cortar con tradiciones que cada vegada tienen menos espaciu na nuesa sociedá. Y ye que nun sólo hai que fixase un pocoñín na redolada físico y tamién na de los medios de comunicación. Nel primer alcuentru una engalanadura de les ciudaes, sobremanera no relativo a les lluces, cada añu más aséptica, más anodina, con más xeometrismos, casi totalmente esenta de referencies cristianes. Hasta la estrella de Belén brilla pola so ausencia. Y cuando mos paramos nos mesaxes que lanza la publicidá, en cualquier tipu de soporte, tamién mos alcontramos güérfanos de Navidá. La Natividá del Señor ye una entelequia que a casi naide paez interesar. D’ehí, quiciabes, la orfandá d’esi belén humildosu.

Dalgún va pensar que son los tiempos los que marquen esa deriva, y quiciás nu se decaten de qu’abandonando al Neñu Xesús tamién dexamos de llau los referentes de la nuesa civilización; y nun sedría importante si lo ficiéremos p’abrazar estrelles guía nueves nel camín de nueso, pero l’atrocidá d’esta dómina ye que mos tán dexando desnudos de creencies en medio del páramu, ensin danos a cambiu daqué nuevo con qué abriganos.

La Natividá contien un poder muncho más potente y fonderu que los vellocinos nuevos, y debería preocupanos que mos la quieran robar, como esa comisaria europea que pretendía felicitar les “fiestes d’hibiernu”, pues ensin ella, y el mensaxe fonderu que representa, vamos quedar más indefensos metanes la batalla que representa lo cotidiano, máxime cuando bregamos con una pandemia pa la que los nuesos gobernantes nun paecen tener solución.

Ellí quedó’l belén, esperando a daquien, y yo te deseo una serena Navidá.   

Raúl Suevos

A 17 díes vencíos d’avientu de 2021

Torna en castellán en repdiv.blogspot.com

El valle políglota

 

Va un sacu d’años que lu visité per primer vegada. Yera abondo ceo y nel túnel perllargu, qu’actuaba como custodiu del so aisllamientu d’España, un camión con una plataforma precedíanos; dend’ella un par d’operarios encargábase de tirar abaxo los descomanaos carámbanos que colgaben del techu pa torgar males mayores. Yera’l vieyu túnel d’entrada, entamáu pol gobiernu de Primo de Rivera y acabáu na posguerra.

Enantes detuvieramonos per un momentu por un argayu na carretera y oyí a un pasayery nomalu argayu, pallabra que, tres el mio plasmu como asturianu, esplicóme que yera aranesa. Y ye qu’aquel viaxe llevábame al valle d’Arán, espresión que nun ye más qu’una reiteración pues valle n’aranés dizse arán. Un valle español abiertu haza Francia, perteneciente a Aragón na Edá Media y más tarde, pente medies d’un pactu, a la xurisdicción de la Xeneralidá, y que se rixe anguaño por un réxime especial dientro de Cataluña.

Téngolu visitáu munches vegaes depués; y güeyelu tamién dende estremaos llugares del Pirinéu; Colomers, Besiberris, l’Anetu. En toles estaciones, y siempres devuelve una imaxe de tranquilidá y aselu que choca col xaréu de la temporada invernal na que s’enllena de visitantes. Paez, desnde l’altor de los picos que lu arrodien, como si se detuviere nos tiempos que la familia Portolá ponía al su vástagu principal de gobernador en California.

El valle, cabecera del francés riu Garona, enllaza pola Artiga de Lin col aragonés valle de Benasque, y pol puertu de la Bonaigua col catalán Pallars Sobirá. Ye dende va tiempu una de les metes turístiques del país de nueso, tantu n’inviernu como nel branu, paraísu de los deportes de montaña, aprovecha la so soberanía alministrativa pa desendolcar un sistema educativu que tien como principal divisa’l multilingüismu. Dende los primero años enseñense los tres idiomas oficiales, el  tradicional aranés –una variante del vieyu gascón occitanu-, l’español y el catalán, siendo esta la llingua materna menos falada. Más tarde los escolinos van tener d’estudiar obligatoriamente dos llingües estranxeres. Y va-yos bien, mui bien.

Los resultaos paecen amosar que’l sistema ye más conducente que l’imperante notres partes d’España, especialmente na vecina Cataluña, au’l modelu d’inmersión en catalán, aparte de les tensiones llegales y sociales que produz, nun paece algamar bonos resultaos en castellán, y nin siquier en catalán, que’l so usu y dominiu decrez.

Nel valle paecen tener nidio que les llingües son una bayura cultural, y de la so mano tamién económica. Son conscientes de que la so economía nun va venir de los subsidios sinon del trabayu de los sos habitantes y l’apreciu de los sos visitantes. Argullosos de la so hestoria promueven l’aranés a la par que les otres llingües sabiendo que eso va desarrollar la axilidá mental de la reciella y valos protexer, según señalen munchos estudios, d’enfermedaes neurodexeneratives cuando adultos, y, sobretoo, valos preparar pa facer frente a un futuru siempres inciertu.

Ye’l valle d’Arán, quiciabes, pol so remangu llingüisticu, un enclave único na cosmopolita Europa, y un exemplu.

Raúl Suevos

A 13 díes vencíos d’avientu de 2021

Torna en castellán en repdiv.blogspot.com

El pogromu

 

Vien la pallabra Pogromu del rusu, porqu’ellí, mientres dellos sieglos, desendolcábase esi movimientu de mases, a vegaes espontáneu, otres inducíu por intereses ocultos, que daba como resultáu la matanza de xudíos y, xeneralmente, la rapiña inmediata de les sos propiedaes muebles y la posterior compra, a preciu de saldu, de les inmuebles. 

El conceutu ye d’aplicadura a situaciones multiples, tanto de llugares como de sociedaes. Nós llibramonos d’esa vergoña hestórica –tenemos otres- porque va yá cinco sieglos procedióse a espulsar en masa a los xudíos, lo que mos convierte, d’esi mou, en campeones del pogromu a nivel mundial, y ello depués de que mientres el sieglu XIV mos significaremos con delles matances d’hebreos nes estremaes xuderíes del país.

Sicasí, ye fácil alcontrar un denominador común en toes estes situaciones, l’ataque indiscrimináu de la masa escontra una minoría, con independencia de la llingua que falen o la creencia que prautiquen. Siempres atopamos una sociedá envilecida detrás d’eses manifestaciones, xeneralmente col puxu interesáu de les autoridaes polítiques y/o relixoses.

Son sociedaes cobardes puesto que se componen d’una parte d’animales embrutecíos, que son los qu’acometen, y otra parte, non menos importante, que se dedica a güeyar pa otru llau. Son sociedaes modernes, pues, si prestamos un pocu d’atención, vamos ver tantos signos ya indicadores en nós mesmos que podríemos deducir que seguimos siendo “mataxudíos”, un apellíu d’usu entá, o’l nome d’un pueblu nun va muncho elimináu metanes votación popular.

Ye la sociedá que vimos mientes asesinaben a compatriotes, en toa España pero especialmente nel País Vascu, mientes unos aplaudíen y otros callaben, y los cures bendecíen. La mesma sociedá qu’anguaño se regodea cola bonanza económica que patrocina un conciertu inxustu y lesivu pal restu, demientres acoye a los asesinos, con alegría unos, tapándose les ñarres otros, toos como si nada asocediere. Una sociedá envilecida na so comodidá.

Agora asistimos a un pogromu nuevu. Más rastreru aínda, yá que l’oxetivu ye una familia, un únicu neñu, una criatura de cinco añinos pal que los sos pás quieren que se cumpla la llei, nun estáu que, nominalmente, dizse de derechu. Un pogromu nel qu’unos callen mientes la mayoría se siente ultraxada por esta familia heroica. Un neñu que, difícilmente, va salir incólume d’esta situación bochornosa pa Cataluña –les sos instituciones, toes- y pa España.

Que’l motivu de too esto seya la imposición del catalán acaba siendo secundariu, lo penoso ye l’envilecimientu d’una sociedá, y la catalana tamién ye la española.

Raúl Suevos

A 10 díes vencíos d’avientu de 2021

Torna en castellán en abellugunelcamin.blogspot.com

Cruciando Bilbao

 

Desconozse la situación de drechos de la semeya

Primero los estudios y depués el trabayu obligaronme a colar d’Asturies. Son yá casi cincuenta años entrando y saliendo de la rexón, n’ocasiones haza Madrid y les más de les vegaees haza Navarra primero, depués camín de Cataluña, y finalmente con destín n’Aragón. Siempres cruciando Bilbao.

Mientres dellos años el viaxe per carretera yera un pequeñu supliciu. Per aquel entós la carretera nacional discurría non sólo pel centru de la capital vasca, sinon tamién per una serie de poblaciones pequeñes que nun yeren a asumir aquel tráficu tremendu cola única ayuda d’unos cuantos semáforos. La impaciencia de los neños nel asientu d’atrás, ensin el consuelu de les modernes consoles de xuegu, podíen convertir la esperiencia nuna tortura medieval. Yeren otros tiempos.

Pasaos dellos años la travesía de la gran ciudá fízose más llevadera gracies a l’autovía que l’atravesaba, anque el tráficu descomanáu facia que los atascos fueren numberosos y tamién los accidentes. La propia ciudá atopábase metanes un tremendu procesu de tresformación urbana que, de la mano del Guggenheim, diba convertila, xunto a San Sebastián, nuna meta turística a nivel mundial.

El siguiente pasu na meyora del viaxe vino de la mano d’una simple medida de tráficu; lo que nomen pacificación, esto ye, la llendera de velocidá a 80 km/h, daqué que siempres tien dao mui bonos resultaos en toles ciudaes au se impunxo. P’aquel tiempu el viaxe recortarase en casi un 40%; nun cabía pidir más.

Va quiciabes cuatro años atopamonos con unos magníficos túneles qu’eliminaben el pasu per Bilbao. Unos túneles impresionantes, puede que tan llargos como’l Negrón, con tres carriles y estupenda iluminación, y un preciu muncho más asequible que la nuesa salida a la Meseta; 1.39 euros. Unos túneles casi siempres vacios, magar que la señalización se modificara pa que los ayenos al vecindariu vayan, inalvertidamente, haza ellos. Una obra y un gastu que, visto’l so usu, no paez tener muncho sentíu.

Vien too esto a cuentu porque güei lleo que l’alcuerdu de financiación autonómica nuevu sofitaráse pal calculu fondamentalmente na población, daque que nun va favorecer a la España vaciada y tampocu a Asturies, que pretendía que se tuvieren en cuenta tamién parámetros como la vieyura, la dispersión y, por qué non, la compartimentación orográfica. Va ser la población, les grandes capitales.

Esto quiciabes reafirme a los que valoren les llengues tradicionales, nel casu de nueso la llingua, como un factor d’apalancamientu frente al gobiernu del estáu, anque se engañen nel casu vascu. Ye’l Conciertu, el Cupu, o meyor, el so axuste periódicu col gobiernu d’España, como nel casu navarru, el verdaderu preséu políticu que construye túneles innecesarios, la mesma ferramienta que va siguir siendo usada pa que dambes rexones cuenten con más y meyores servicios que’l restu d’España, especialmente si los sos votos son necesarios en Madrid. Ye lo que hay.

Raúl Suevos

A 4 díes vencíos d’avientu de 2021

Torna en castellán en repdiv.blogspot.com

Coalición a l'Alemana

 

Imaxe garrada d'internet, desconozse si cuenta con derechos

Hai quien namái ve problemes na coalición de gobiernu qu’anguaño s’encarga de dirixir los asuntos del país pero, con independencia de la color del cristal con qué se güeye, ye preciso reconocer que supunxo un esordiu tocantes esta clas de gobiernu, y eso siempres debe tener un reconocimientu por cuantu de incertidume tien too aquello que s’entama per primer vegada. Y si non, namái hai recordar los tatexos y temores qu’antecedieron a l’aplicadura del renomáu artículu 155 por parte del señor Rajoy.

Una coalición nun debiera ser daqué tan traumáticu como aquella ocasión en Cataluña pero, nel nuesu casu, tamién atopamos dalgunos aspeutos que mos averen al drama, pal xuiciu de dalgunos, o al sainete, pa la opinión d’otros. El casu ye qu’equí vivimos publiques y repeties manifestaciones sobro la imposibilidá de tala coalición, puestu que, acordies el doctor Sánchez, supondría-y nun poder dormir, y anque yo esto lo ignoro, imaxino que’l presidente de nueso conocería’l tarrecible fin del heroicu xeneral Álvarez de Castro a cuenta de tala falta. Morruda situación.

Tres les eleiciones caberes la necesidá convirtióse en virtú y, pa plasmu de munchos, de casi toos, el primer gobiernu de coalición firmóse ente abrazos y promeses d’amor y fidelidá. Anguaño transitamos per un camín llenu de baches y piedres que mos lleven, a los plasmaos ciudadanos, de sustu en sobresaltu a cuenta de los desencuentros continuos, non yá cola oposición, daqué natural, sinon ente los dos socios de gobiernu; situación a la que la esperiencia alemana nun mos acostumbrara.

N’Alemania hai yá una rica esperiencia de coaliciones ente los conservadores de la CDU y los socialistes del SPD, la cabera, con direición de Merkel, dende 2013, hasta les eleiciones del septiembre caberu qu’abrieron la puerta a una novedá a tres bandes, socialistes-esquierda, verdes-centroesquierda y lliberales-centrodrecha, quienes, tres casi dos meses de trabayu, un plazo mui curtiu pa los usos alemanes, promovieron un documentu de 177 páxines, qu’entá debe ser aprobáu n’asamblea polos respeutivos partíos, nel que se dexa “casi” too atao y bien atao.

Repartense los ministerios, 17, cinco menos que n’España; marquense oxetivos específicos como’l nuevu salariu mínimu que va subir un 13%; otros oxetivos apuntense como “ideales”, como la descarbonización pa 2030; xunto con un 80% de renovables y el pieslle nuclear. Una perimportante voluntá d’evolucionar “haza un estáu federal européu”, daqué nunca enantes promulgao por dalu gobiernu européu; un reforzamientu del Parllamentu y la Corte de Xusticia europea; una más asertiva política esterior europea, con declaración pro-OTAN más que, desgraciadamente, de Defensa europea. Y asina hasta 177 páxines.

Va ser una llexislatura, magar el gobiernu tripartitu, ensin sobresaltos, pues la mayor parte de la aición de gobiernu ta pre-discutida nesti documentu, lo que va torgar gastadures innecesaries y va permitir centrase nes causes sobrevenies, que les va haber; siempres les hai.

Coalición a l’alemana.

Raúl Suevos

A 2 díes vencíos d’avientu de 2021

Torna en castellán en repdiv.blogspot.com

Josephine y Almudena

 

Fo’l d’ayeri un día pa recordar a muyeres especiales y tamién, a caballu de los actos o xestos que les homenaxeaben, p’apreciar les diferencies qu’esisten ente llugares, persones ya instituciones. Fo ayeri un día nel que los franceses llevaron a Josephine Baker al Panteón, el mayor honor póstumu que la República otorga a dalgunos de los sos ciudadanos; y en Madrid, alxudicaron una cai y una medalla a la recién desapaecida Almudena Grandes.

El actu parisín, retresmitíu en directo pola cadena nacional francesa, contó con tola solemnidá y parafernalia qu’ellí-y dan a esti tipu d’acontecimientos. Col presidente la República como rellator; nel centru l’edificiu, baxo la magnífica cúpula, l’ataúd de Josephine, entráu al llombu d’un piquete d’honor, amosábase como protagonista baxo la bandiera y les sos medalles, y Macron, mui entonáu, fo rellatando les vicisitues y múltiples peripecies de la vida de la gran figura qu’acoyía la institución. A la fin, tres los vivas a la República y a Francia del presidente, un coru militar entonó la Marsellesa. Magníficu actu d’esaltación nacional a partir de la figura de una bailarina negra de perhumildosa extracción llegada, metanes los “locos” 20, d’unos Estaos Xuníos au entá imperaba una segregación racial feroz.

En Madrid, ayeri, tres el soterramientu del cadávere de Grandes, utilizo esa espresión pol calter civil que la finada quiso pal so fin, hebo alcuerdos institucionales, non unánimes, pa otorga-y una cai, nel casu de Madrid, que, por embargu, nun la va nomar fia predilecta, y, por parte del gobiernu, la medalla d’oru al méritu en Belles artes. Llegaba esto depués de les imáxes emotives del cementeriu de l’Almudena, a onde acudieron un bon númberu de llectores muníos d’apropiáu llibru de l’autora, y tamién del desfile de figures del mundiu de les artes y la política qu’acudieron al tanatoriu un día enantes y qu’a min, debo confesalo, recordaronme al llistáu d’aquellos otros, de va dellos años, conocíos como “los de la ceya”; personaxes que güei tamién se deben d’emocionar cada vegada que Zapatero acude a repartir talante a Venezuela.

Güei lleo dalgun ataque en prensa escontra los representantes conservadores, a los que namái falta tachar de fascistes pola so sele respuesta énte la desapaición de Grandes, y, poro, nun me resisto a la comparación ensin entrar na parte lliteraria yá que nunca lleí a esta señora, anque la equiparación de dalgún con Don Benito paezme un pocoñín esaxerada y supongo que pasaos dellos años vamos saber el so algame verdaderu como autora.

Nel casu francés nun me cabe dulda que Baker representaba valires fondamentales, non yá de la República, sinon de la humanidá, anque ensin dulda’l so abrazar de la nacionalidá francesa y la so implicación personal a riesgu de vida mientres la Ocupación facíenla ser un referente nacional percima de clas, raza o relixón. Nel nuesu más mundanu terruñu madrilanu atopamosnos con una autora militante, asina lo dicen los sos almiradores y asina se clasificaba ella mesma. Pero esta militancia yéralo dende la negación de la concordia que representaba la Transición y en pos d’una memoria hestórica de calter políticu nidiu, con delles manifestaciones personales, cuando menos doloroses pa una parte del espectru social. Poro, llegada la hora final, ye razonable que la reacción nun seya unánime, nin muncho menos, pues la so postura revivía’l rellatu de les dos Españes machadianes, atacando ensin desmayu la conservadora, enzancando de pasu, la emerxencia de la Tercera España, la moderada que creo sigue subsistiendo, intentando que nun l’algamen, a lo menos, los garrotazos goyescos. Descanse en paz.

Raúl Suevos

A 1 día vencíu d’avientu de 2021

Torna en castellán en repdiv.blogspot.com

Frantalia

 

Asina, de sópito, esti pallabru nuevu paez sonar a munches coses y a dala, too al mesmu tiempu. Puede recordar la pallabra Frantic que da nome a un álbum de Metallica; pallabra de frenéticu significáu. Y puede que daqué de frenesí atopemos detrás del acrónimu nuevu pues fai referencia al azotáu tratáu billateral que güei roblen Macrón y Draghi en Roma, y que, acordies dellos analistes, supón realineamientu nuevu y perimportante de fuercies n’Europa. Francia ya Italia otra vegada caminen xuntes. Veremos.

Dende que Cesar arrasó l’oppidum d’Alessia –nun confundir con Alexa- y acabó colos galos de Vercinxétorix, los sos caminos tienense cruzao o xunío en munches ocasiones. Pa la historia queda la frase del Emperador Carlos de qu’él y el so primu Francisco I namái se poníen d’alcuerdu nuna cosa, dambos queríen Milán. Tres el dominiu español de la bota italiana llegaría la ocupación bonapartista, y con ella la seme del Risoryimientu. Yá con Napoleón III, Italia naz gracies al xeniu de Camillo Cavour y l’ayuda de los exércitos franceses en Maxenta y Solferino; ayuda que se paga cola Saboya y Niza.

Esa bona sintonía díbase romper cola apaición de la gran Prusia/Alemania de Bismarck y la robla de la Entente Cordiale ente Francia y la Gran Bretaña en 1904, un alcuerdu que, nel so fondu, duró hasta que Boris Johnson apaeció col Brexit baxo’l brazu y esbarató la cacharrería europea cualo elefante roxu. Agora, con Merkel retirándose, Putín más griesqueru que nunca, Erdogán desatáu, la Francofonía africana azotada pol yihadismu, too son dolores pa un Macron que’l año vieniente afronta eleiciones. Y movió ficha.

Frantalia, si funciona, puede ser un gran puxu, en tolos órdenes, pa la Europa del sur. Un tren al qu’España debería intentar subise anque seya en marcha –nós nunca tamos na estación de salida, xugamos notra división, desgraciadamente- puesto que l’apuesta en xuegu va muncho más allá de los hipersobaos fondos europeos qu’entá tán per venir. 

Macron y Draghi. Un formáu na Escuela Nacional de l’Alministración, trubiecu de la mayor parte de la élite política y empresarial francesa; l’otru, educáu como economista na universidá de la Sapienza, cuenta con una biografia apolmonante, en cargos y n’objetivos algamaos. Son dos exemplos de dirección política, opinables, por supuestu, pero que s’alloñen descomanadamente de la tipoloxía qu’adoptamos n’España, la del dirixente profesional, recriáu dende mozu nos muerganos del partíu.

Frantalia funcionará, o non, pero, sicasí, toi seguru de que a los ciudadanos de dambos países tranquilizalos comprobar que los sos líderes esfuerciense por caltener a les sos naciones en primer llínea.

Raúl Suevos

En Xixón a 26 díes vencíos de payares de 2021

Torna en castellán en repdiv.blogspot.com

Una brúxula estratéxica pa nun salir de casa

 

Fálase muncho estos díes de la Defensa Europea, y ello ye debío a una tribuna asoleyada pol señor Borrell, en poques pallabres ministru de Defensa y Asuntos Esteriores de la Xunión Europea, na que da cuenta del estáu del documentu políticu conocíu como Brúxula Estratéxica. Documentu llamáu a ser la cruz y señal de l’aición esterior europea nos años vinientes.

El documentu foi encargáu pol Conseyu Européu en 2020, demientres la presidencia alemana, y va ser estudiáu y mui probablemente aprobáu en 2022, mientres la presidencia francesa, esto ye, vien col padrinalgu de los dos xefecinos de la Xunión y, poro, nun debería tener problemes pa salir alantre.

Nél fálase d’asociaciones de seguridá, NNXX, OTAN, OSCE, etc; tamién de desarrollu de capacidaes, au s’acolumbra el desendolcu d’importantes fondos pa potenciar la industria ya investigación en defensa; de resiliencia, esto ye, y pa que mos entendamos, la capacidá de resistencia énte l’alversidá; y, finalmente, la xestión de crisis, o lo que ye lo mesmo, la intervención esterior, de la que la recien crisis d’Afganistán ye detonante de los munchos discutinios d’estos tiempos caberos.

Na tribuna del señor Borrell casi tol personal se quedó cola copla de la Fuercia d’intervención rápida de 5000 combatientes que, supuestamente, taría a disposición de la Comisión pa poder intervenir en plazos abondo curtios como pa poder torgar el espectáculu vergoñosu al qu’asistimos en Kabul; en parte debío a la falta d’información previa aportada pol nuesu sociu y “protector” principal, los EEXX.

Nel aspeutu conceptual nada qu’oxetar a la “Brúxula”, sobremanera si tenemos en cuenta que dende Xavier Solana p’acá, esceptuando a la zorra que los británicos metieron pa vixilar el gallineru, la baronesa Ashtom, tolos Altos representantes desarrollen un conceutu estratéxicu nuevu. Borrell nun tenía por qué ser menos y el so “paper” tampocu tien por qué ser más.

En fuercies de reacción tenemos yá percorriu. Del acuerdu de Saint Malo ente  Jacques Chirac y Tony Blair nel 98 salió una de 60000 militares, nada menos ¿viéronla? Depués, en 2003, notru “papelín” del Conseyu crearonse los Battle Groups, de 1500 combatientes y que, anque foron desarrollaos y puestos a disposición poles naciones, nunca hasta güei foron emplegados. Agora vien esta nueva fuercia de 5000 elementos, más complexa y con más capacidaes y, témome, igual de rápida que les anteriores.

Mientres la XE nun se desarrolle a sí mesma en cuantu a capacidaes polítiques en rellación cola defensa nun va haber un res que facer. La decisión final d’emplegu, colos so tiempos y procedimientos, nel casu de nueso na Llei orgánica 5/2005 de Defensa Nacional, y ye de suponer que nel restu de les naciones europees sedrá similar, descansa nes propies naciones.

Si Joseph Borrell quier tener una fuercia d’intervención real que seya emplegada col único requisitu del so aprobamientu pol Parllamentu Européu va tener que creala él mesmu, al mou y manera como se tien fecho en tiempos brevísimos cola Axencia de fronteres, Frontex, too lo demás, como esta brúxula, namái sirve pa nun salir de casa.

Raúl Suevos

En Xixón a 22 díes vencíos de payares de 2021

Torna en castellán en repdiv.blogspot.com

La inesistente política militar española

 

Si la política de defensa ye aquella parte de la política xeneral que defín los oxetivos na materia por parte d’un gobiernu y los medios p’algamar esos oxetivos, la política militar sedría la que desendolca’l ministeriu de defensa pa poner a les Fuercies armaes en situación de responder a lo que d’elles espera la política de defensa. Paez cenciello d’entender y, al mesmo tiempu, ye fácil pescanciar que non siempres ye simple llograr lo segundo, especialmente cuando nun se tien nidio lo primero.

A min, por razón d’edá, tienme tocao convivir, y n’ocasiones sufrir, dellos planes de reorganización de los exércitos; siempres col oxetivu declaráu de facelos más pequeños y, al tiempu, más operativos, daqué a lo que naide podría poner torgues d’entrada, pero, güeyando los resultaos y los sucesivos cambeos, planes aparentemente ineficaces.

La opinión pública, que nun tien por qué saber de los asuntos militares, vive tranquil cola imaxe d’eficiencia que col espliegue de les fuercies de nueso en misiones internacionales-y tresmiten los medios de comunicación, y tamién col magníficu desempeñu de la UME en cuantes catástrofes se ponen per delantre. Quiciás nun baste.

Agora, tal vez espoleao pola apaición de fuercies polítiques que respueden al llamáu de la España vaciada, tamién se-y pide al Exércitu qu’acuda a repoblar el Desiertu del Dueru; aquel qu’Alfonsu I y el so hermanu Fruela vaciaron pa enzancar la loxística de les huestes cordobeses, creando asina el conceutu d’Estremadura, y qu’Ordoño I, sieglos más tarde, tornó a repoblar con xente d’Asturies.

Col aportar del exército profesional zarrarónse milenta unidaes y acuartelamientos. Imperaba’l conceutu de la bolsa de recursos humanos, ellí onde había mozos –paru- dispuestos a enrolase podía haber unidaes, por exemplu Asturies; ellí u la población yera escasa, casu de Huesca, piesllabénse unidaes de forma que los cazadores de montaña abandonaron el Pre-pirinéu pa apaecer en plenu Pedralbes barcelonés. Política de recursos humanos.

Agora los intereses políticos, que non los militares, son otros, y el gobiernu tien decidío llevar dos unidaes a Monte la Reina, Toro, ensin dala esplicadura nin xustificación, aparte, probablemente, del interés de facer frente a esa España vaciada que paez amenaciar nel futuru electoral viniente.

Siguimos sufriendo una política militar que se supedita a los intereses oportunistas del partíu de turnu y ello, notros tiempos, acasu importara pocu al personal, pero, con independencia de les tensiones que s’observen a nivel mundial, China/USA; na redolada europea, tensiones y guerra híbrida nes fronteres con Rusia; tenemos la nuesa vecindá, Arxelia/Marruecos, armándose hasta los dientes. Daqué pa preocupar y pa tomase la política militar con más seriedá.

Raúl Suevos

En Xixón a 16 díes vencíos de payares de 2021

Torna en castellán en repdiv.blogspot.com

Actualidá cubana

 

Cuando’l turista sal per primer vegada a paseyar pela Habana Vieya, davezu peles cais que’l gobiernu de la ciudá foi recuperando y afechando pal refalfiamientu, y engañu, habría qu’añader, de esos visitantes foriatos, puesto qu’en munchos casos la cai qu’escurre paralela ye una autentica imaxe d’ablayamientu; el “yuma” percibe n’algunes de les esquines un vieyín aveyuscáu que-y ofrez a la venta el númberu caberu del Gramma, el muerganu de difusión y adoctrinamientu del Partíu comunista cubanu. Vende-ylu al preciu que marca’l periodiquín, malapenes una fueya parroquial d’ocho páxines, cola salvedá de qu’él compralo en pesos cubanos y vendelo en pesos convertibles al turista, esto ye, una ganancia de 24 vegaes que ye/yera’l cambéu ente les dos monedes. El vieyín  va comer bien esi día y el turista marcha contentu col Gramma pal so país. Dellos númberos vieyos y señalaos mequense nel mercáu del llibru vieyu de la Plaza d’Armes por un bon garapiellu de dólares.

El Gramma respuende a lo qu’ún espera de semeyante artiluxu nun país totalitariu, de dictadura feroz, al que namái defenden anguaño cuatro comunistes tresnochaos, o interesaos, como los españoles qu’allegaron la semana cabera a validar les eleiciones d’Ortega en Nicaragua ¡Qué vergoña¡ Güei, víspora de la gran manifestación cívica convocada en Cuba pola disidencia, y prohibida pol réxime, nun pude resistir la tentación d’echa-y un güeyu y atopome con que la primer páxina dedicase a prohibir, desde la glosa a los “versos cenciellos” de Martí, la venta y eshibición de roses y sabanes blanques. Exactamente los símbolos que se pidieron que luzcan los manifestantes. Esi ye’l nivel d’esti feudalismu nuevu instauráu polos Castro, y esti ye’l réxime que los que se llamen progresistes n’España se escusen de condergar y sofiten col so silenciu cómplice. Ye lo qu’hai.

Anguaño esisten dellos medios dixitales pa siguir la realidá cubana, unos meyor qu’otros, unos más infiltraos qu’otros, pero que son, ensin dulda, muncho más precisos que’l Gramma. A min prestame 14ymedio, enantes nomáu Generación Y, y al traviés de los sos güeyos y teclaos, y la mio esperiencia de vieyu vecín de La Habana, voi faciéndome una idea de cómo van les coses per ellí. Y van de mal en peor, como marquen y denuncien les cifraes de balseros que la guardia costera yanqui detien enantes d’aportar a la Florida,  o como apunten los que muerren atravesando’l Darien, o los que lleguen a l’anguaño impenetrable frontera mexicana. Nos paraísos comunistas, y anguaño vemoslo n’Hispanoamérica, vótase colos pies, escapando, o intentándolo, al preciu que seya preciso pagar.   

Raúl Suevos

En Xixón a 14 díes vencíos de payares de 2021

Torna en castellán en repdiv.blogspot.com

Gastronomía pa un futuru

 

Va yá dellos díes que’l Festival mundial del quesu pieslló les so puertes nel “centollu” uviéinu de Calatrava, y los ecos del mesmu yá paecen esmorecese nos medios de comunicación, y ye que too ye perecederu, hasta’l quesu.

Too fai indicar que foi un ésitu descomanáu, a lo menos no que a participación popular y ventes se refier. Los enormes espacios creaos pol pernomáu arquitectu español paecían quedase pequeños, y los regidores anguaño de la ciudá de la Rexenta paecen columbrar nello un posible usu congresual pal tremendu edificio qu’hasta güei namái traxera disgustos, y delda. Yá qu’asina seya, pol bien d’Uviéu y el bolsu de los sos vecinos.

Ye esta noticia gastronómica una más, en positivu,  que s’añede a otres, de munchu menor fustaxe, que se venieron produxendo nestos meses caberos, como la recuperación de les viñes del Palaciu de Ron, en Cecos, Ibias, lleváu a cabu por una pareya d’emprendedores asturianos qu’acaba de poner en marcha una bodega, Siluvio, que naz con enormes posibilidaes de futuru y gracies, según creo, a ayudes europees. Ye una gran noticia puesto que, con independencia de que guste más la sidra o’l vinu, qu’en tierres d’Ibias cuenta con  dellos sieglos d’hestoria anque agora s’asocie a la denominación Vinu de Cangues, supón dende’l so entamu la creación de dellos puestos de trabaya y, poro, la fixación de población a un territoriu que paez avanzar ensin remisión haza’l desaniciu.

Més recien llega tamién la noticia de que una miel, Outurelos, d’esta mesma contorna, Ibias, que yo tuve la fortuna de zarapicar nun de los meyores puestos de productos asturianos del Mercáu del sur de Xixón, llogró’l segundu puestu nuna cata nacional, de lo que se ficieron ecu medios asturianos y nacionales. Trátase d’un xoven apicultor ibiense que na Pena Nugueira tien instalao un ecomuseu dedicáu al mundiu de les abeyes y que caltien un cortín, esa torre circular de piedra que caltien la seguridá de les abeyes énte l’ataque de los osos, na zona del puertu del Couño, au abonda’l brezu, base de la so miel maraviosa. Otru exemplu d’emprendimientu ligáu a la gastronomía asturiana.

Nel valle, en Marentes, cuentenme, un ganaderu mozu caltiene una modesta esplotación de roxa asturiana ecolóxica y, al otru llau del riu Ibias, en Marcellana, el pueblu anguaño abandonáu, sirve, una vegada convenientemente vallada la redolada, pa una ganadería de la mesma raza n’estensivu a cargu de un xoven matrimoniu de San Antolín. Son toes elles iniciatives valientes d’una xeneración de asturianos que se niega a rendise y a abandonar el tarén a los llobos.

Ye Ibias, quiciabes, la contorna asturiana con menos espectatives de futuru tres el pieslle de la mina de Tormaleo, na cabecera del valle, pero estos pequeños exemplos amuesenmos cómo se pueden desendolcar iniciatives ligaes a la tierra y la so tradición, pero ensin dulda échase en falta un mayor y más decidíu puxu y ayudes por parte del Principáu, y ensin ello ye probable qu’esti florecer gastronómicu incipiente acabe n’anécdota.

Y  la nuesa cultura sidrera camín de la UNESCO.

Raúl Suevos

En Xixón a 14 díes vencíos de payares de 2021

Torna en castellán en repdiv.blogspot.com