Nel solar zaragozanu...

Oyía va dellos díes nuna entrevista radiofónica a Kiko Arregui, eminencia de les terapies reparadores en conxelaciones, manifestase sobro Zaragoza como’l llugar u más fríu pasara, pa pasmu de la entrevistadora puestu que, nel so pasáu, figuren espediciones al Polu Norte y al Everest como miembru del Grupu Militar de Montaña.

Dicía Arreguí qu’al Polu váse preparáu con un equipamientu especial, mientes qu’en Zaragoza salse relaxáu y, a media mañana, el Moncayu, esi vientu qu’enantes de llegar al monte neváu llámase Cierzu, ataca de sopito dexando al piatón despreveníu a mercé de los mordiscos del alientu xélidu del Norte. Ye lo qu’hai.

Güei soplaba el Moncayu en Zaragoza; mañana dicen que más. Nun había pasiantes pelos bulevares, namái caminantes apresuraos, a les arandines unos, y otros encorvaos escontra l’emburrión soplador, según la direición. Y a min vienome la imaxe de la Princesa d’Asturies; quién sabe si d’instrucción pelos campos al abertal de San Gregorio.

Y ye que, n’Academia Xeneral, prima’l programa, tantu que, a vegaes, tengo pensao que nella s’inspiró’l desapaecío Xulio Anguita p’aquella lletanía de so de “programa y programa”. Y ye qu’ehí, na Xeneral, la más principal fazaña, cuando sopla’l Moncayu, nun ye obedecer, sinon sobrevivir, porque nesi campu, espresión de lo que se conoz como estepes aragoneses, nun hai abellugu pal cadete, flaxeláu pol vientu n’hibiernu, y azotáu pola sede nel branu. Una redolada que complementa’l programa pa forxar el calter de los futuros oficiales, y que, ensin dal dulda, va dexar buelga indeleble na personalidá de la heriede, como yá lo ficiera col pa y el güelu.

En díes como’l de güei, col Moncayu nevao añediendo un plus de fríu a esi vientu yá de por sí xeláu, les práctiques conviertense nun supliciu au nin siquier ye posible comer caliente, pues nun hai fornillu qu’aguante los embates d’Eolo, y, una vegada preparáu’l condumiu, una ráfaga inoportuna vien a sazonátelu col polvu del Castellar. Capacidá de sufrimientu.

Labordeta, en tiempos crepusculares del réxime vieyu, fizo canciu de los sos secanos, espropiados pa beneficiu de la defensa d’España, y agora tamién d’Europa, y los que perellí pasamos, ente’l xelu y el güelpe de calor, salimos con un temple estremáu, como marca l’himnu de la Casa, con un calter cinceláu a güelpe de ráfaga de Moncayu, y, con toa seguridá, la Princesa d’Asturies, va salir forxada en forma positiva d’estes esperiencias del solar zaragozanu.

Raúl Suevos

A 27 díes vencíos de febreru de 2024

Winter is coming

 

La serie de más ésitu nos años caberos, Xuegu de tronos, tenía como tema principal el mesmu que da títulu a esta tribuna, “Avérase l’hibiernu”, o allégase, o aporta, o como vustedes quieran; el casu ye que se presiente, como daqué imposible d’enzancar, como un cataclismu énte’l que nada se pudiera facer, anque na serie, ente los dragones y el concursu de John Nieve, a la fin, los caminantes blancos son deteníos, y la vida puede siguir haza alantre.

N’Occidente andamos estos díes, dalgunos, abondo acoyonaos colo que se mos puede venir enriba si, como s’anuncia, el pallares viniente se produz un cambéu na dirixencia de los Estaos Xuníos, nel imperiu, en Desembarcu del rei. Un cambéu que trae’l nome de Donald Trump, y la esperiencia del so primer mandatu. Pa echase a tremar.

Nun hai que ser un eruditu, nin lleese la Decadencia d’Occidente de Oswald Spengler, pa decatase qu’Europa lleva un tiempu cuesta abaxo, ainda cola maraviosa creación, magar lo que dalgunos digan, de la Xunión Europea. Casi too adquier una color desvaído, cuando non tenebroso. La política, otrora fonte de solución pa los problemes y temores del paisanaxe, paez que se tien camudao nun mecanismu simple al que’l pasu del tiempu tien cargao de ferrunu ensin que naide se preocupara d’engrasar, o anovar les pieces estropeaes.

La Xunión ye la mayor y meyor espresión de cooperación internacional que tienen conocío los sieglos. Dende la Comunidá Europea del carbón y del aceru, 1951, colos sos escarsos seis miembros, al xigante que ye anguaño, tienen pasao 73 años, d’ésitu podría añadese, pero agora son munchos los peligros que paecen acesmar nel camín. Y niún ye menor.

El pernomáu Pivote xeográficu de la historia paez que se tien desplazao haza’l Pacíficu llonxanu, lo que mos dexa arrequexaos, y l’osu moscovita, incapaz de facer frente a esa mesma deriva, decidió, va dos años, clavar les so garres n’Ucrania, un país qu'espresara con clarencia los so deseyos d’incorporase a esí, pa ellos, prometedor Occidente. Una aición, la de los rusos, que mos devolvía a la situación anterior al Congresu de Viena de 1814 y los so alcuerdos, namái rotos poles aiciones de Hitler y Stalin nel sieglu XX.

Trump, y dalgunos n’Europa, menacien con abandonar a Ucrania, un país que, magar l’heroísmu de la so xente, por si solu nun puede facer frente a Putin. Si Europa nun ye a sofitar l’esfuerciu de Zelensky, y el so pueblu, vamos tar énte la entrada d’esi hibiernu representao polos caminantes blancos. Ye lo qu’hai.

Raúl Suevos

A 25 díes vencíos de febreru de 2024

Torna en castellán en repdiv.blogspot.com

De los montes de Toledo a los Galaicos

 

Son dambos macizos, o sistemes montañosos, de menor importancia. Nada que ver col Pirinéu, o la Penibética, nin siquier colos aragoneses Montes Universales, nin que dicir tien colos esuberosos Picos d’Europa. Pero, magar la so humildá son a marcar el calter de les tierres a les que dan pasu, o piesllen, según les circunstancies.

Los Montes de Toledo, familiares pa min dende’l pasu pela Academia d’Infantería, que los tenía como tarrén habitual d’exercicios y maniobres, son malapenes un bárabu na inmensidá de les planicies de Castiella, un escalón caberu enantes d’entrar na cervantina Mancha, y ye posible, na mio opinión, que seyan abondo pa imprimir el sellu personal a les so xentes, dures y sufríes como la xara qu’alfombra esos montes, llar de monterías memorables.

Los Montes Galaícos tienen otru sentir. Más pausaos, vienen como continuación de los Ancares, broche qu’aúna les tierres asturianes, lleoneses y gallegues. Montes vieyos, graníticos, pero suavizaos pel pasu del tiempu, nada que ver coles xóvenes calices del Urriellu y los so hermanos astures. Son humildosos y soberbios a la vegada, como personaxes a la vuelta de too, como los propios gallegos.

Tamos en plena dixestión de los resultaos de les eleiciones gallegues, y, enantes de qu’aporte l’estudiu pormenorizao de los sociólogos, a los analistes de lo político faltó-yos tiempu p’atopar esplicadures a lo asocedío, con especial atención a la llombada tremendosa sufría pol partíu del doctor Sánchez; dalgo que, na so mayoría, achaquen al esgaste promovíu pol proyeutu d’amnistía, y a los meritos de los nacionalistes, con escarsa atención al trabayu del gobiernu gallegu n’exerciciu, pa la mayoría.

A min, que nun me presiona nin la ideoloxía nin la nómina, quédame tiempu pa guetar otres explicadures a esta victoria popular, dalgo mayor de lo que les encuestes agoraben, y atopo la motivación principal nos Montes de Toledo, tomando a estos como referente xeográficu de lo qu’anguaño ye Castiella-La Mancha, personificada nel so presidente García Page, nidiamente distanciáu de les polítiques del so secretariu xeneral, y quien, nes eleiciones caberes, torgó que pellí apaecira, tantu si lo facía en coche como en falcón. Una decisión, que visto los resultaos, paez que foi acertada.

En Galicia, los socialistes tolo apostaron a la política nacional, con intervenciones múltiples del presidente del gobiernu, y dalgunes más del ínclitu Zapatero, el del talante, el de l’Alianza de civilizaciones, el de Maduro. Una combinación que los gallegos nun tienen apreciao, y que dexa tremeciendo a les organizaciones territoriales socialistes pal futuru vienente. Ye lo qu’hai.  

Raúl Suevos

A 19 díes vencíos de febreru de 2024

Traducción en castellán en repdiv.blogspot.com

Opositor a Putin, cadavre efectivu

 

Tocantes la nuestra Guerra incivil hasta los más doctrinarios, ente los que tienen estudiao’l fenómenu bélicu, paecen tar d’alcuerdu en que, dexando de llau’l casu honrosu del xeneral Rojo, la ciencia y la téunica militar taba del bandu llideráu pol xeneral Franco. Ello vióse, ente otros aspeutos, na xestión de los recursos humanos, tantu a nivel de mases como nos puestos más escarsos, como podían ser los oficiales llamaos a dirixir les unidaees pequeñes. Y alguien inventó l’Alférez provisional.

Yera ésti un emplegu d’oficial subalternu, capacitao pa mandar una sección, esto ye, ente 30 y 45 homes según la tipoloxía. Pa cubrilos, tres un periodu de formación percurtiu, llamóse a los mozos col bachiller superior acabáu, y, sobremanera, universitarios. Llegaron a ser casi 30.000 y el diez por cientu d’ellos cayó en combate, con munchos más feríos o mutilaos. Dicíase que duraben nel frente al rodiu de los 43 díes. Una mortandá que llevó a dicir aquello de “alférez provisional, cadavre efectivu”.

En Rusia nun tienen alféreces, tienen opositores, pocos, y ca vegada menos. Ellí, tou aquel que se declara opositor a Vladimir Putin, seya nel campu de la prensa, como Anna Politkovskaya; el de los servicios internos, como Alexander Litvinenko; el de la oposición política, como Boris Nemtsov; o’l empresariao, como Boris Berezowsky, acaben asesinaos en circunstancies que nunca lleguen a ser conocíes nos sos detalles caberos, pero que conducen al Kremlin. Sálvense, temporalmente, los que tomen les de Villadiego, anguaño conocío com’Occidente, como’l casu del Garri Kasparov. Ellí un opositor a Putin ye un cadavre efectivu.

Ye una satrapía, la de Rusia, más feroz que la tan criticada Xunión Soviética, que tres la desapaición del monstruosu Stalin tomó una sienda más humana y poro asistimos a casos de lliberación de disidentes como foron Alexander Soltzhenitsyn que mos traxo’l conocimientu de lo qu’asocedía en Siberia col so Archipiélagu Gulag, o’l físicu Adreij Sajarov, que da nome al premiu del Parllamentu Européu. Yera una Xunión Soviética decadente nos sos principios marxistas que yá nun tienen nada que ver, en cuantu a drechos humanos, colo que güei asocede na Federación rusa.

La democracia illiberal, o cesarismu democráticu qu’encarna Putin en Moscú nun son más que denominaciones rellativamente amables pa mascarar lo que ye simplemente una autocracia despótica que lleva un camín del que la historia del sieglu XX mos tien dao exemplos palmarios, con Hitler en primer llugar.

Güei’l muertu, en circunstancies desconocíes nuna prisión llonxana de Siberia, ye Aleksei Navalny, unos meses dempués de qu’al mercenariu Prigozhin españase-y l’avión. Van siguir otros ente los que nun aceuten el xugu de Putin. Ye lo qu’hai.

Raúl Suevos

A 16 díes de febreru de 2024.

Torna en castellán en repdiv.blogspot.com

Si Goya allevantara la tiesta

 

Pasa don Francisco por ser el nuesu artista más grande y universal. El solu conxuru del so nome sirve p’acontiar cualquier actividá que se plantegue, especialmente si ésta ta rellacionada col arte, como asocede cola conocida como Gala de los Goya, o Fiesta del cine pa otros. Una fiesta salida del inxeniu de González-Sinde, el pá d’aquella ministra de cultura efímera, y entoncenes, 1986, presidente de l’Academia española del cine. Una gran ideia.

D’entós p’acá, esa supuesta fiesta tien ido perdiendo llustre, casi n’igual midía que diba ganando carga política. Y ye que, nun se sabe mui bien por qué, o sábese demasiao, los nuesos actores, na so mayoría, fóronse esplegándo como promotores d’un determináu sentir políticu, y ello fuése manifestando añalmente con tou tipu de mensaxes nesa gala añal que, nesta ocasión, acaba de tener llugar en Valladolid.  

Podrá pensase que n’España tol mundiu ye llibre d’espresar les so opiniones, y nun paez haber dulda al respeutu, pero también van convenir comigo que los adultos deben meditar sobro les consecuencias de los so actos, y si un grupu social se dedica a manifestase nun sentíu determináu corre’l riesgu de ganase l’animaversión d’aquelles persones, que magar nun espresar públicamente la so opinión más que n’eleiciones, tienen un sentimientu diferente u opuestu al qu’ellos suelen publicitar na so gala añal. Ye lo qu’hai.

El cine español pierde espectadores, magar lo que diga Almodovar. Ye una constante a la que namái sirve como analxesicu l’apaición de les plataformes televisives como productores de películes y series, de lo que la gran vencedora d’esti añu ye un exemplu, y yo nun sé si ello se debe al refugu ideolóxicu del públicu, a lo pocu curiosu de les propuestes, de les que namái paecen salvase les del xéneru comedia, o simplemente a la comodidá del salón de casa, pero deberíen facéselo mirar.

Esti añu foron 190 los millones d’euros recibíos en sovenciones direutes, y namái la metá lo recaudao, con Campeonex y Ocho apellidos marroquís a la tiesta. Y munchos faen cuentes sobro lo que diba costar implementar la llei aparcada nel Congresu pa l’atención a los enfermos d’ELA, unos 300 millones, porque les comparances son odioses, pero forzoses cuando una de les partes, el cine, s’empeña en danos la barrila añalmente, ca vegada con menos gracia y más aburrición.

Nun algamaron a dos millones y medio los telespectadores. Creo que la peor audiencia de la serie, o cerca. Mui lloñe de lo que diariamente llogra’l programa del denostáu, por dalgunos, Motos. Esmoleciente.    

Raúl Suevos

A 12 díes vencíos de febreru de 2024

Torna en castellán en repdiv.blogspot.com

Nun puede cesalu

 

Dicía Clausewitz que la guerra ye la prolongación de la política por otros medios, y, si asumimos esti asioma, podemos deducir que la política ye una forma de guerriar menos cruenta que la mesma guerra, como podemos apreciar estos díes n’Ucrania, au’l presidente tien desendolcao una anovación radical de la cúpula militar que, acordies tolos observadores, vieno marcada poles necesidaes polítiques del gobiernu, tanto tocantes al interior, la so ciudadanía, como al esterior, los países aliaos, con especial atención a los Estados Xuníos, y en xeneral a los miembros de la OTAN. Ye la guerra.

Equí, n’España, atopámonos metanes una esfriega grave, de calter tácticu ésta si consideramos l’ámbitu operacional como’l qu’atañe al nivel nacional. Y ye que tamos d’eleiciones en Galicia, onde la política gallega paez pintar bien pocu, anque si nun gana’l PP sedría’l BNG el llamáu a gobernar, con un programa qu’invita a tentase la ropa, si bien esa parte ye la futurible que va ser aclariada’l domingu venturu.

Yá metíos na fariña de la semana cabera, moviéndose dientro del área, sofitándonos nel futbol pa dexar de llau los símiles bélicos, alcontramonos con un par de regates en cortiu, el primer vien del llau peperu cola referencia inoportuna del señor Feijoo al siempres estrellizáu asuntu del indultu a Puigdemont. Asuntu sobro’l que arrefundiaron los socialistas como buitres lleonaos nel comederu de la Sierra de Guara. Normal, Ye la guerra.

L’otru tema vien regáu col sangre de los dos beneméritos guardias civiles asesinaos en Barbate, una masacre que, una vegada más, tien llevao a la petición de dimisión d’un ministru, Marlaska, yá mui amburao pero que paez ignifugu énte cualquier quema que-y pueda cercar. Nun hai, o nun paez habelo, desastre que pueda facer dimitir al nuesu ministru del Interior.

Esta ocasión paez más afogadiza qu’otres anteriores. Hasta la viuda d’un de los asesinaos, zarrándo-y el pasu al ministru cuando s’empobinaba a condecorar al home difuntu, añedió un plus de dramatismu a la yá de por si tráxica historia. Toos se llanzaron a pidir la so dimisión, hasta Podemos, y, de xacíu, el PP, secundaos poles asociaciones del Cuerpu. Nun van algamar l’oxetivu.

Na fase del partíu que mos atopamos, clave gallega, el presidente del gobiernu, que se tien distinguío siempres pola so frialdá a la hora de dexar colaboradores pel camín, nun puede cesa-lu, sedría reconocer el mal desempeñu del so ministru cinco díes enantes de les eleiciones. Ye lo qu’hai.

Raúl Suevos

A 12 díes vencíos de febreru de 2024

Torna en castellán en repdiv.blogspot.com

¿Morrer por un res?

 

La selmana pasada, sollertáu por daquien mui averao, tevi reviciando d’una serie documental sobro’l cursu y la escuela au se formen los especialistes de montaña de la Guardia Civil, los integrantes de los GREIM, Grupos de rescate ya intervención en montaña. El productu televisivu ye tan curiosu que los diez episodios foron dixeríos en namái tres nueches. Una combinación de les actividaes amosaes y el magnetismu de toos y caún de los individuos que’l realizador mos diba presentando facia difícil dise a la cama cola incógnita de lo que mos esperaba tres la cume, cova o barrancu vinientes. Una maraviella de documental.

Per detrás de les imáxes, o per delantre, según se mire, taba siempres presente la calidá humana de los personaxes, y sobro toos ellos la constante del serviciu a los demás, la entrega absoluta con conciencia permanente del peligru vital que supón l’actividá de rescate en montaña. Tamién la profesionalidá tremenda de los integrantes d’esti Cuerpu beneméritu, de los qu’estos alumnos de la Guardia Civil nun son más qu’un exemplu equiparable a otres especialidaes, y, en xeneral, a tolos miembros del Institutu.

Escribo esto cuando me llega la noticia del tercer muertu nel asesinatu perpetráu en Barbate pente medies l’abordaxe d’una narcolancha sobro una muncho más pequeña zodiak de los guardias civiles. Too ello baxo la güeyada atenta y ánimos de los actores secundarios de l’actividá contrabandista dende la oriella. Y too ello al zarrar el mesmu día nel que’l ministru d’Interior tuviera n’Alxeciras prometiendo ayudes y midíes, una vegada más. Una vegada más pa que, tres dalgún tiempu, les coses sigan igual o peor. El narcotráficu requier midíes urxentes y drástiques nel Campu de Xibraltar pues el futuru de la zona, toa ella, ta condergáu si nun se fae nada, y la vida de los guardias civiles, como se ve, nun val un comín.

Ye una traxedia ver como una y otra vegada estos servidores lleales del estáu son dexaos na cuneta. Ye casi una constante la cadena de noticies dando cuenta de cómo n’algunes rexones, amparándose nos sos estatutos d’autonomía, recórtase la presencia del Institutu, tamién el rosariu de noticies luctuoses tocantes a accidentes en los qu’ellos se ven envueltos, con riesgu de les sos vides y poniendo a salvu la de los ciudadanos. Nun hai riada o nevada na que la Guardia Civil nun mos dé amuesa de la so entrega total haza nós. Tampocu m’escaezo de les grandes operaciones de tou tipu, con especial atención a la corrupción política, nes que los sumarios xudiciales se sofiten nes pesquises de los especialistes de la Benemérita. ¿Y qué reciben a cambiu?

Non, dende llueu, un sueldu razonable. Quiciabes la rempuesta mos la dio’l despreciable Ternera cuando retóricamente s’entrugaba ¿Nun son voluntarios? Pues eso, son xente dispuesta a dalo “Too pola patria”. Intentemos nun defraudalos a lo menos.

Raúl Suevos

A 10 díes vencíos de febreru de 2024

Torna en castellán en repdiv.blogspot.com

Solidaridá a la catalana

 

Fo’l de 1832 un añu importante pa Cataluña. Inglaterra decidiera abrir les so frontieres a la esportación de máquines de vapor y de mano d’obra especializada, lo que dio pie p’allugar les industries testiles primeres nes cuences del Ter y del Llobregat; una industria que, hasta entoncenes, dedicarase a la estampación de pieces importaes. Fo una revolución, en munchos sentíos.

Aquella industria necesitaba de capitales que-y dieran sofitu, y ellí taben, aportaos de los beneficios de la trata d’esclavos con Cuba y de la venta de brandy a los países del norte européu. Yera un panorama casi perfeutu, y, cuando’l carbón importáu resultó caru, nun resultó difícil pasar al sistema hidroeléctricu pa mover la maquinaria, ca vegada más moderna y potente.

Por embargu, los testiles ingleses seguíen siendo meyores y más baratos; tamién los texíos de lino qu’una asentadísima industria gallega producía. Y ehí entró en xuegu l’arancel, el pernomáu arancel que yá dende 1820 grababa los productos testiles estranxeros y que nel 42 tornó a actualizase, p’agraviu de los británicos y ruina de los gallegos, que de rexón con puxu pasó a ser productora d’emigración, especialmente a América, pero tamién a Cataluña, que necesitaba brazos pa la so industria.

Anguaño yá nun hai aranceles, sacantes los europeos, y los países y les sos rexones desenvuelvense a cara de perru. Unos con colmillos más afilaos qu’otros, y, nesta oportunidá, el can catalán desgasta los de so col güesu del independentismu, perdiendo de vista’l progresu y meyora de vida de los so ciudadano. Ye una constante el llovíu, non aquella que llega del cielu, sinon la de datos negativos en tolos órdenes, los sociales y los económicos preferentemente.  

Esi nacionalismu escluyente ye’l que taba detrás de Pascual Maragall cuando se negó a realizar un trasvase d’augua al País valencianu; los so votantes, debió pensar, nun yelo perdonaríen. Ye’l mesmu nacionalismu que detrae caudales pa embaxaes en llugar de construyir les desaladores previstes va ya dellos años, y güei tan necesaries; ye’l mesmu que nun quiso compartir candidatura olímpica col so vecín Aragón. Ye insolidariu fondamentalmente.

Agora’l cambéu climáticu, esi que dalgunos, posibles terraplanistes, aínda refuguen, pero qu’avanza inesorable y con especial virulencia nel noreste español, manda. Ellí nun llueve dende va muncho, munchísimo, y eses cuenques del Ter y Llobregat, enantes capaces d’alimentar aquella industria testil, anguaño nin siquier pueden asegurar l’augua de boca a la gran metrópoli, menos entá a los millones de turistes qu’anualmente aporten a la zona, nin a les milenta de granxes  porcines, o al campu catalán.

Agora esperen solidaridá.      

Raúl Suevos

A 8 de febreru de 2024

Torna en castellán en repdiv.blogspot.com

Zorreando

 

Ye doberoso reconocer que, dempués d’años de desorientación nidia, Televisión Española paez tener atopao’l camín pa escoyer la propuesta anual pal certamen d’Eurovisión. Lo del Benidorm Fest, según declaren les audiencies televisives dende que la fórmula se punxo en marcha, ye un esitazu d’espectadores, o un tubazu, en términos modernos, si vustedes lo prefieren. Otra cosa son les perceiciones particulares.

Esti añu, como nos anteriores, dediqué la nueche del sábadu a catar les propuestes musicales de la ocasión, y, en xeneral, paecieronme festivaleres d’oportunidá, o fuera de les coordenaes, como la señora Pelae, que magar el so induldable nivel artísticu y la so perceptible calidá vocal, llega con una propuesta aflamencada que yá en otres ocasiones tien amosao los so escarsos resultaos énte les sintoníes eurovisives.

La opción ganadora, trayía por una pareya valenciana, de llargu y discretu percorríu musical él, entra no que se puede encuadrar como tecno-pop, esto ye, lo que vusté quiera con sofitu más o menos discu, una escena rompedora con dos bailarines…impactantes como pocu, y un desempeñu vocal que quiciabes nun yera lo meyor de l’actuación; anque too esto queda ciertamente opacao énte la fuercia del mensaxe de Zorra, qu’asina se llama’l canciu. Deseo-yos lo meyor.

Enantes de rematar ye obligao citar a lo que pa min foi lo meyor del festival, el boleru clásicu presentáu por un mozu canariu, San Pedro, creo que ye’l so nome de guerra, una aportación sacada casi del baúl de les alcordances, que sirve pa recordar que non toa la música moderna lléndase al reggaetón y semeyantes, y que’l vocalista interpretó maxistralmente, con una voz enllena de matices ya intimismu, y que, na mio opinión, yera lo meyor de tol elencu presentáu.

Ye posible que nel fondu quede’l recuerdu d’aquel Chiquilicuatre, u otres eleiciones d’alcordanza patética, y que poro se gueten anguaño opciones más “festivaleres”, como puede ser esta Zorra, qu’al so ritmu más o menos facilón, carauterística importante falando d’Eurovisión, amesta-y una lletra que “supuestamente” llama al empoderamientu femenín, dalgo que yá d’entrada va añader un plus al so desenvolvimientu a la hora de la verdá ellí en Suecia. Ye lo qu’hai.

El resultáu final, con independencia de si ésti nun ye ganador, ye l’escaecimientu casi inmediatu, o tres unos pocos meses, como la allabanciadísima Chanel mos tien amosao cola so casi desapaición de los circuitos comerciales, dalgo que tamién tien algamao a la vencedora del añu pasáu. Y ye que’l negociu de la industria musical ye intrínsecamente descarnáu y feroz.

Suerte pa la Zorra.

Raúl Suevos

A 5 díes vencíos de febreru de 2024.

Torna en castellán en repdiv.blogspot.com

Pagafantes internacionales

 

Esta selmana colaron pa Bruseles, ente otros, l’alcalde de Madrid y el ministru d’economía, si bien ellos diben pol particular asuntu de l’Axencia europea anti-blanquéu, que la so see va ser axudicada en díes vinientes a una de les ciudaes postulantes xunto a la capital de nueso.

L’alcalde salió abondo contentu de la presentación, según él mui superior a la del restu de ciudaes; lo que-y facía sentise optimista tocantes al futuru de la candidatura, anque a min, desgraciadamente, vinieronme les alcordances funestes de la candidatura a see olímpica fallíos sorpresivamente nel minutu caberu. Vamos ver cómo acaba l’asuntu, pero dalguna reflexión me vien al puntu.

D’entrada, diz la prensa, ellí na sala había abondancia de diputaos españoles de tolos partíos, sacantes del partíu socialista, llamativamente escarsos, quiciabes porque se intuya que, a dicir de dalgunos, la posición del gobiernu español yá quedó nidia col sofitu alemán a la nominación de la señora Calviño pal Bancu européu d’inversiones. Quién sabe.

El casu ye qu’España nun tien dala see d’axencia europea de nivel superior, y ésta yelo, yá que los sos 450 puestos de trabayu asina lo atestiguen; puestos direutos, que los indireutos serán munchos más. Puestos de trabayu que tienen como referencia los 69.000 euros de salariu mediu de los funcionarios europeos en 2022, y que la so mayor parte se quedan na ciudá de residencia. Ye lo qu’hai.

Ye un poco’l nuesu signu; somos los pagafantes del sistema internacional. En xeneral tenemonos convertío en suministradores principales de fondos pa les organizaciones internacionales, lo que ta mui bien, y correspuende al nuesu nivel como 15ª potencia mundial por PIB brutu; con particular atención pal universu de Naciones Xunies au, amás, participamos en munches misiones de paz a lo llargo y ancho del mundiu, como l’actual nel Llíbanu,  metanes les tensiones crecientes ente Hezbollah ya Israel; pero too ello nun se compadez col númberu escarsu de vacantes que los nuesos funcionarios ocupen en toes elles.

L’Axencia antiblanquéu llega dempués del fiascu de l’Axencia europea de medicamentos, mientres dellos años esperada en Barcelona y esfumada gracies a la inseguridá política que suponía’l llamáu Procés nel periodu d’axudicación. Dalgo que agora, cuando la Comisión Europea ta faciendo de mediadora pa solucionar el bloquéu anguaño nel Conseyu del poder xudicial, y el gobiernu español nútrese, ente otros, del Partíu comunista, y sofítase en partíos de raíces terroristes, como ye’l casu de Bildu, tampocu paez qu’aportemos  en bona situación.

Pero tenemos a la señora Calviño dirixendo’l Bancu Européu d’Inversiones.

Raúl Suevos

A 2 díes vencíos de febreru de 2024

Torna en castellán en repdiv.blogspot.com