L'avanzada España

 

Va dellos díes, el 13 d’avientu pa ser exactos, saltó a les páxines primeres y telediarios del mundiu una noticia aparentemente estupefaciente. El presidente Biden roblara la llei que daba rangu federal, esto ye, d’aplicadura en tolos Estaos Xuníos, a los matrimonios homosexuales, motivu d’alegría grande pa los naturales d’esi país, anque fuera con dalgún retrasu cola mayoría de países occidentales. Sicasí, tratándose de drechos humanos y del país que, magar a quien-y pese, lidera’l mundiu, yera un motivu de satisfacción enorme, y como talu foi tratáu nos medios de comunicación.

Nel mesmu paquete llexislativu diba tamién l’aprobamientu, col mesmu rangu, de los matrimonios interraciales. Sí, tiénenlo lleído bien, nos Estaos Xuníos entá esistíen estaos nos que’l matrimoniu ente un blancu y una negra, por poner un exemplu, nun yera llegal, y agora, anque pue apaecer increíble, van tener los mesmos drechos que los homosexuales. Ver pa creyer.

Y ye que, pa nós, españoles, está historia pue resultar increíble si tenemos en cuenta qu’en 1514, dos años depués d’aprobar les lleis de Burgos, que daben rangu de súbditos n’igualdá a los indíxenes americanos, el rei Fernando’l Católicu roblaba una llei pola que se consideraben llegales les xuniones interraciales. Esto ye, España, nesti asuntu, lleva-y nada menos que 518 años de ventaxa al presidente Biden.

A España tiénenla puesto a parir demientres dellos sieglos, especialmente aquellos a los que l’Imperiu español podía face-yos la puñeta nel so modus vivendi u operandi, con particular dedicadura por parte de los protestantes –élites- de los Países baxos y d’Inglaterra, como maxistralmente esplicó María Elvira Roca Barea na so Imperiofobia, pero la historia, la de verdá, non la que’l cine o la televisión mos venden cotidianamente, ye emporfiada y de tantu en tantu dános la oportunidá d’averanos a la grandeza d’esti país, qu’anguaño munchos paecen empeñaos en destruyir.

La clas dirixente del mundiu anglosaxón necesitaba menospreciar al Imperiu español, namái asina podía crecer, y les andrómines, desaxeraciones y mentires foron el mediu qu’emplegaron, col encontu de la imprenta; la televisión o l’internet d’entoncenes, como prefieran. Y l’Imperiu, y los sos súbditos, güei ciudadanos, anque nun algamen a la talla d’aquellos, teníen coses meyores nes qu’emplegase, enantes de prestar atención a la Lleenda negra que se taba construyendo.

Hidalguía o altanería, da lo mesmo. España respondió con despreciu a los ataques de los libelos protestantes, quiciabes namái con aquel apócrifu cervantinu de “lladren, asina que cabalgamos”, pero la historia torna, como los matrimonios interraciales.  

Raúl Suevos

A 29 díes vencíos d’avientu de 2022

Torna en castellán en repdiv.blogspot.com

La vida ye un suañu

 

Nel mio plan d’estudios, que la so paternidá yá nun me recuerdo, si ye que dalgún día llegue a conocela, yera d’usu común el deprendimientu pente medie d’exercicios memorísticos. Pa la lliteratura, especialmente tocantes la poesía, yera obligao’l recitao de delles pieces que, en dellos casos, tienense quedao enganchaes nel archiváu fonderu del nuesu particular y personal computador.

Para la décima o espinela trabayábemos con una amuesa sacada de “la vida ye un suañu” de Calderón de la Barca. Aquella pieza del sabiu afamáu, que non famosu, que recoyía yerbes pel camín y que finalizaba con aquello de: “…y cuando el rostru tornó,-atopó la respuesta, viendo-qu’otru sabiu diba coyendo-les yerbes qu’él tiró”. Aínda güei puedo recitala, como otres d’aquella dómina, tan memorística. Coses de tiempos retrógrados, tiempos de dictadura. Qué coses.

Amás de deprender la métrica y la rima con estos exercicios, dalgo de moralina tamién diba cayendo cola mayoría de los exemplos que mos facíen estudiar, como nel casu de les coplas del marqués de Santillana, que mos dexaben bien aplanaos pa darréu entamar colos exercicios espirituales, nos que s’esperaba que, sobre manera, nun diéramos demasiao la paliza a los curas y tutores encarregaos d’adoctrinanos demientres dellos díes. Too bien planificao.

El casu ye que too esto vien a cuentu de la noticia de que casi medio centenar de balseros llegaron a Cuba. ¿nun yera d’ellí d’u partíen? Pues non, como nel casu del sabiu recoyedor de yerbes, siempres hai un más probe que tú. Trátase de balseros haitianos, que tamién d’ellí la xente trata de colar, a los que les corrientes tiraron a les sableres de Cuba, llugar d’improbable meyora vital pa estos desgraciaos, a los que cabe esperar qu’unvien de regresu al so miserable país, si bien, dao la precariedá de la economía cubana, tampocu ta nidio con qué mediu los van repatriar.

En Cuba l’asuntu del escape ye estremao. Ellí la xente vende too lo que tiene, cases con too incluyío, con tal d’algamar un pasaporte, visáu y billete, a onde seya, especialmente Centroamérica, Panamá, pa dende ellí ponese nes manes de les mafies de “coyotes” pa intentar aportar a los EEUU, frontIera que cuantifica una media de doscientos mil estos años caberos.

Nel nuesu patiu européu, xeográficamente falando, tenemos a Serbia como emisora de visaos pa cubanos, a onde lleguen vía aérea para, darréu, y por cualquier mediu, tratar de pasar a dalgún de los vecinos pertenecientes a la Xunión, lo que-yos da la posibilidá de movese nel espaciu Schengen, au van llevar una vida na precariedá de la emigración illegal, dura y difícil, pero siempres meyor que la miseria cubana. Ye lo qu’hai.

Raúl Suevos

A 28 díes vencíos d’avientu de 2022

Torna en castellán en repdiv.blogspot.com

Torna'l rei a casa, per Nadal

 

Otra vegada esta nueche vámonos sentar como ca añu a oyer, enantes de mos aposentar a la mesa navidiega, a So Maxestá na alocución tradicional qu’abre la cena de muchínsimes families españoles, ent’elles la de mio dende que tengo alcordanzes, esto y, dende los tiempos de Francisco Franco. Anque m’entrugo si eso, los recuerdos de Franco, van tar tamién penalizaos coles lléis de la damnatio memoriae. Quién sabe.

Ye esti un añu particular, con muncha tensión aparente, promovida por unos y otros, si bien, na mio opinión, correspuende otorga-ay una mayor responsabilidá a quien detenta’l poder, nesti casu’l Partíu socialista, por embargu, dende que’l históricu doctor Sánchez camudó los estatutos del mesmu namái cabe falar d’un únicu y personal responsable.

La tensión, acordies dalgunos analistes, ta en cotes enantes nunca vistes. Paeciera que l’edificiu constitucional, esto ye, la nación española, tuviera a puntu d’esbarrumbase, y ye comprensible pues nunca enantes se viera un asaltu tan rápido y feroz escontra lo establecío, como tienen sío, ente otros asuntos, la derogación/manipulación de la sedición y la malversación; y ello xunío al fecho, inocultable, de que tres d’ello atópase’l pagu polos interesaos votos que sofiten al gobiernu; como’l destierru de la Guardia Civil de tráficu de Navarra, o’l apresuráu averamientu de presos etarras al País Vascu.

Ye una estratexa doble que permite pagar les deldes parlamentaries y xenerar una tensión continua que tapa una decisión qu’enantes pudiera paecer aberrante con otra aínda más impactante. Asina funciona esta fase, que va ser siguía nel periodu electoral con un torrente de sosidios de tou tipu, empobinaos a fidelizar los votos de la parroquia gubernamental, y, quiciabes, a algamar votantes nuevos. Hai muncho en xuegu.

Quienes nun comparten la coyuntura pero nun tienen capacidá parllamentaria pa camudala, también los sos partidarios y militantes, paecen esperar que SM-yos dé un bálsamu coles sos pallabres está nueche. Consideren que tamos énte una encruciada como la d’ochobre de 2017 y ello obligaría a don Felipe a dar un guelpe na mesa, verbalmente s’entiende, y yo, qué quieren que les diga, nun comparto esa opinión.

Nun ye la mesma situación. La patria nun ta en peligru, por muncho que l’históricu doctor Sánchez mos resulte insoportable; magar que los votos que cosecha en cada votación seyan mínimos y presaxen un futuru difícil pal partíu que lu sofita; anque la inxeniería social que lleva a cabu’l sociu minoritariu del gobiernu tea dexando la cara del país peor que la de Carmen de Mairena. Too ye reversible, nun ye la situación d’ochobre del 2017.

Esta España qu’a dalgunos mos resulta insoportable pue retomar la sienda de la racionalidá cola simple decisión de la mayoría de los españoles a lo llargo de los procesos electorales que van tener llugar nel añu entrante. Ye a ellos a quien correspuende la responsabilidá pel rumbu del país, puestu que yá naide se pue llamar a engañu, nun queda’l recursu al desconocimientu. Vamos votar en 2023 sabiendo a quien votamos, y nun ye de recibu pedi-y a SM que se posicione cuando lo qu’asocede ta dientro del nuesu sistema parllamentariu, que ye meyorable, y cola supeditación al nuesu sistema xudicial, que podría ser más independiente. Ye lo qu’hai.

Asina qu’esta nueche yo espero que SM, como notres ocasiones, apele a la moderación y a la concordia, ye lo que toca, y con ello bastaría, hasta les elecciones.

Raúl Suevos

A 24 díes vencíos d’avientu de 2022

Torna en castellán en repdiv.blogspot.com

Kissinguer cumple cien años

 

Quiciabes p’aviar la celebración, que se va producir nel mayu viniente, el vieyu secretariu d’estáu de Richard Nixon tiense despachao con una intervención en The Spectator, una de les grandes cabeceres mundiales en política internacional, na qu’aboga por una salida negociada n’Ucrania. Y lióse una parda.

Los que más cabriaos se tienen amosao foron los ucranianos, y ye comprensible, pos el plan entama por tornar al 24 de febreru, esto ye, ceder gran parte del Dombás y Crimea a los rusos. Y pehí, como Zelensky tien recalcao estos díes en Washington, nun tán dispuestos a pasar. Quieren toles sos tierres, reparaciones económiques y xuicios a los responsables de delitos de guerra. Y paez razonable vistos los padecimientos del pueblu ucranianu.

Pero convien nun despreciar lo que diz el güelu Kissinger, que tien, magar la so edá avanzada, la tiesta nel so sitiu, y atesora más esperiencia internacional que naide nel mundiu anguaño. Y al güelu Henry preocupa-y el vaciu que se va producir nel descomanáu espaciu rusu, compuestu de múltiples repúbliques autónomes, con relixones estremaes y etnies diverses. Porque sabe que los vacíos acaben siendo rellenaos siempres por daquien.

Nun quier esti vieyu xudíu bávaru, paladín de la corriente realista en política internacional, qu’una guerra perdida conduza a un desmoronamientu del sistema políticu rusu, amu del mayor arsenal nuclear mundial, col consiguiente quilombu nel sistema de seguridá mundial. Y pa quien nun sepa el significáu del quilombu arxentín namái tien que güeyar la celebración mundial en Buenos Aires. Eso teme Kissinger.

A min paezme estremadamente difícil d’aceutar la so propuesta, anque nella va l’ingresu na OTAN, qu’actuaría asina de garante securitariu del futuru d’Ucrania. El sufrimientu ucranianu esixe un nivel proporcional na satisfación per parte rusa. Y na parte territorial nun veo en dalu mou una posible cesión del Dombás, un páramu industrial cuando acabe’l conflictu, anque sí que podría vese una situación transitoria pa la Crimea de Catalina la Grande y Potenkim, que debería aclariase nun tiempu prudencial pente medies plebiscitu.  

Nel referéndum d’independencia del 89 el Dombás votó por ella al 87%, unes cifres que baxaron al 54% nel casu de Crimea, que’l so pasáu y simbolismu estratéxicu faen que l’abandonu inmediatu nun pueda ser aceptable pa Rusia, lo que diba alargar la guerra muncho más de lo deseyable pa Europa, que sufre direutamente les consecuencias, y pa los Estaos Xuníos, que son los que tán sofitando l’esfuerciu armamentísticu.

Los tiempos, siempres tan importantes, pasen pela figura de Putin, tan incómoda anguaño pa toos. Tamién pa los rusos.  

Raúl Suevos

A 23 díes vencíos d’avientu de 2022

Torna en castellán en repdiv.blogspot.com

Il Presepre

 

Circula estos díes peles redes un vídeu curtiu nel que la presidente del Conseyu de ministros d’Italia, la señora Giorgia Meloni, fae una defensa precisa de los festeyos navidiegos y de lo que representen; y failo de forma firme y al tiempu averada, pos afirmalo dende la so condición de madre. Va sotituláu anque’l so italianu ye abondo nidio y fácil de comprender pa cualquier español.

Nós nomamoslu tamién pesebre, seguramente por tradición napolitana, d’onde aportaron de la mano del rei Carlos III, qu’ellí tamién fuera rei enantes de selo d’España, y ye que, entoncenes, esi yera un oficiu abondo movíu. Anque tamién belén o, simplemente, portal, son denominaciones estendies n’España.

L’asuntu siempres te llega a les coraes, y ensin dulda a la señora Meloni tendrá-y servío pa dulcificar la so imaxe, presentada poco menos que como un basiliscu por aquellos d’ideoloxíes contrarias a la de so, y qu’agora descubren a una “mamma” italiana. Y amás d’averao representa la tradición católica, tamién n’entredichu nesta España na que cavegada más te feliciten les Fiestes; que ta mui bien, pero que te dexa na dulda de si nun te tarán furtiando’l fechu de que lo que se celebra ye la Fiesta por antonomasia, la Natividad del Señor. Y dizlo un descreído qu’entá cree na importancia de la tradición católica.

Nós en casa somos mui de pesebres, en plural, anque pequeñinos. Tenemos unos cuantos, o debería dicir meyor que los tien la muyer, que fue quien los mercó. Tenemos de tolos países nos que vivimos, tamién de México, au vivieron munchos años los mio cuñaos, y a quienes visitamos. Tamién de Cuba, un mui humildosu fechu con retales de llates de cerveza apañaes nel vertederu, casi la meyor representación del país, camudao anguaño nun vertederu del mundiu y compitiendo pola bandiera de la miseria cola so vecina Haití.

El que recibe ye siempres el mesmu, mui tradicional, mui pequeñín, mui de barru, mui murcianu; cola llicencia estética de cuntar con dos guardiaciviles dando-y seguridá al neñu Xesús. Dalgo que mos permitimos pola rellación llarga de xeneraciones cola Benemérita, qu’aínda caltien un tricornio familiar. Una llicencia sobro la cuala nun tenemos nidio si son los guardias quienes dan seguridá al Neñu, que representaría al pueblu español, al aflixíu, o, pol contrario, ye’l divinu Infante’l que protexe al Cuerpu, anguaño acosáu dende ángulos múltiples, siendo’l que correspuende al poder executivu, a quien siempres tien servío con llealtá, quiciabes el que más peligru pa la so pervivencia traye.

Feliz Navidá.

Raúl Suevos

A 21 díes vencíos d’avientu de 2022

Torna en castellán en repdiv.blogspot.com

Tregua de Nadal

 

Ye probable, asocede tolos años, que dalgún columnista mos asalte les coraes estos díes cola típica alcordanza de la Tregua de Nadal, faciendo referencia a un manosiáu fechu que tevo llugar demientres la Primer Guerra Mundial, la Gran Guerra pa los europeos intervinientes. Van aprovechar, posiblemente, el recien campeonatu del mundiu qatarí pa parangonalu col partíu que se xugó na tierra de naide, ente trincheres. Too mui navidiegu.

Esti añu, cola invasión d’Ucrania, y les grandes estensiones nevaes y xélaes temperatures d’aquel país, paez más arremente que nunca, quitando quiciabes l’asuntu siriu, anguaño casi escaecíu magar qu’ellí siga la matancia, pero que coles sos ciudaes bíbliques y los sos antiguos monasterios cristianos presentábase tamién como mui afayaizu pa sacar una tribuna perguapa y ganase l’aguinaldu navidiegu, suponiendo qu’entá esista.

Lo d’Ucrania, anque seya la guerra de moda anguaño, tien un qué; y ye qu’ellí los que s’acuchillen metódica y profesionalmente son ortodoxos, cristianos ortodoxos me refiero, nun tomalo pola ortodoxa de la carnicería; y la so Natividá nun aporta hasta el 6 de xineru; de mou que la so posible tregua, abondo duldosa en tou casu teniendo en cuenta los antecedentes del inquilín del Kremlin, nun tendría llugar nes feches qu’a nós mos interesen. Una pena.

A mín, qué quieren que-yos diga, nun m’emocionen los bonos deseyos navidiegos. Pasé sendes Navidaes en Bosnia y Kosovo y nun noté personalmente una especial sensibilidá, tampocu nos mio collacios, y menos aínda na población de la redolada que sufría les consecuencias de les decisiones de los sos políticos. Tampocu lo tengo visto en Qatar, au teníen motivu pa sentise emocionalmente afeutaos.

Y ye que, como un mozu arxentín se tien encargao de recordar nun video memorable, n’Irán van a colgar d’una grúa a un mozu futbolista profesional por manifestase a favor de les muyeres del so país. Y naide en Qatar, ente los estremaos miembros y estamentos del mundiu del futbol, abrieron el picu, porque, como tol mundiu sabe, la pela ye la pela. Como saben tan bien dalgunos europarlamentarios, receptores del dineru qatarí y marroquí y agora nel puntu de mira de la policía belga.

Asina que, tornando a la tregua navidiega, espero qu’esti añu nun me toquen los pelendengues cola consabida tribuna y se llenden a trayeme les noticies del frente, estos días a abondo de graos baxo ceru, especialmente si los bravos soldaos ucranianos, defensores de la so patria, son a montar una ofensiva nueva y siguir recuperando tarrén ocupáu pelos rusos. Ye lo qu’hai.  

Raúl Suevos

A 19 díes vencíos d’avientu de 2022

Traducción en castellán en repdiv.blogspot.com

En casa del vecín

 

Convien aclariar que nun se trata del vecín de al llau, esi que, si hai suerte, nun se dexa oyer más allá del pieslle educáu y silenciosu de la puerta de la so casa, y, pol contrario, si nun la hai, amargate la esistencia con música, portazos, persianazos, y tou tipu de ruidos comunitarios, hasta acabar nos xulgaos de primera instancia. Non, nun se trata d’esi sinon de la vecina Italia, a la que, por tener vivío ellí durante tres años continuo a tene-y un gran cariñu y almiración.

Sigo les sos noticias de forma cotidiana. Ye un recursu que me permite demientres dellos minutos evadime de la realidá del nuesu país que, no político, y gracies a la polarización -espresión qu’oculta tres la so apariencia técnica al tradicional encabronamientu de tola vida- ta cadía más insoportable y paez empobinase haza un nuevu goyescu duelu a garrotazos. 

Ellí, n’Italia, son espertos en caminar sobro l’alambre, de fechu contaron con sagues familiares de sonadía mundial nesi arte circense, y no político tienenmos deparao situaciones que paecía qu’acabaríen col país, o col so sistema políticu, como asocediera cola pernomada Tangentopoli, qu’acabó cola esistencia de los partíos políticos d’entoncenes.

Tamién contaron con periodos sangrientos de terrorismu, de tipu estremao, tantu de ultraesquierda como d’ultraderecha, ensin escaecer el nacionalista de raigañu filoaustríacu nel Altu Adixe. Pero tolo foron superando, y nello tevo muncha importancia la potente, variada y combativa clas periodística italiana, con munchos y estremaos medios, de propiedá diferente, y, poro, sensibilidaes diverses; pero capaces de dar a los italianos la imaxe de la realidá del so país. D’ehí, quiciabes, la casi costante convulsión del panorama políticu del país, que da cuenta del calter vibrante italianu.

Na nuesa etapa italiana yéremos siguidores del Maurizio Costanzo Show, un programa d’actualidá y entretenimientu que tolos díes concitaba l’atención de la mayoría del país. El si conductor, finales de los 90, yera una celebridá de llarga trayeutoria. Dalgo que siguió siendo demientres estos años, lo que lu convierte, quiciabes, na personalidá más notoria de la prensa italiana. Pero too tien una llende.

A Costanzo acaban de condergalu, n’última instancia, a un añu de cárcel y 40.000 euros por tener felicitao irónicamente nel so programa al xuez que punxiera en llibertá a un home tres desfigurar con ácidu a la so muyer. Y cabe entrugase sobro si n’Italia, casi siempres exemplar na defensa de les llibertaees, nun van tar entamando a camudar les coses pa la prensa.

Raúl Suevos

A 19 díes vencíos d’avientu de 2022

Traducción en bable en abellunelcamin.blogspot.com

L'acontecimientu del día (2)

 

Nun me consta qu’anguaño en Marentes esista dalu abonáu a dalu periódicu. En toa ïbias malapenes queden persones. El suroccidente asturianu ye una de les zonas más despoblaes d’Asturies y, posiblemente, de toa España. Tampocu ye probable que los qu’ellí resisten, vieyos na so mayoría, visiten les páxines de la prensa dixital pos la conexión d’internet ye pésima, y convierte’l so usu nun pequeño supliciu nun aptu pa ciertes edaes.

Nos tiempos de José de Peña entá había un surtíu ampliu de prensa n’España. La mayoría pertenecía a lo que se conocía como Prensa del Movimientu, a la que se suponía una subordinación nídia a les directrices del poder. Pero tamién esistía una cierta porción de prensa llibre, a la que podía distinguise poles sanciones frecuentes que sufríen periodistas, direutores y editores; llegando a la supresión física del mediu, como nel casu de la voladura del diariu Madrid.

Yeren otros tiempos, ensin dulda. Anguaño too tien camudao. Y basta con güeyar al gran referente mundial de la prensa, los Estaos Xuníos, au toles tendencies, tantu ideolóxiques como económiques, marquen el pasu del restu del mundiu. Ellí yá fai dellos años que la prensa escrita ta arrequexada. Cola llegada del dixital zarraron munches cabeceres, y les que resistieron ficieronlo colos nomaos Muros de pagu digital. Yera una forma d’atrincherase tratando d’evitar la defunción por falta d’ingresos.

Equí pasó daqué de paecío. Espaecieron los llectores de papel –la máxima tirada anguaño nun algama a 60.000 exemplares- y, tres el pasu al dixital, los suscriptores nun daben pa caltener la empresa, de mou que, nuna fase primer, retayaronse las plantillas y todo se fió a los ingresos por publicidad, aunque ahí había un precio oculto a pagar.

Después llegó el estado, aunque sería más ajustado decir el gobierno, como mayor contratante de publicidad para la prensa en general; aunque como no bastaba, aparecieron las ayudas directas, y hoy podría afirmarse que sin la corriente vital que llega desde el poder no existiría prensa en España. Pero ya se sabe, no se debe morder la mano que te da de comer.

Las últimas noticias que llegan de los EEUU, después de una penúltima fase na que los magnates, como Jeff Bezos, entamaron a mercar medios, dicenmos que siguen los despidos de periodistes y pieslles de medios. La publicidá, el fluyíu vital actual, marchó pa Google, Facebook y los demás, dexando a la prensa ca vegada más arrequexada y lliberando’l campu de la comunicación pa les nomaes Redes, güei de consumu masivu. Ye lo qu’hai.

Raúl Suevos

A 16 díes vencíos d’avientu de 2022

Torna en castellán en repdiv.blogspot.com

L'acontecimientu del día (I)

 

En Marentes, Íbias, los días del branu, llenos d’actividá, teníen les so rutines. La reciella de casa pasábemos la mañanae nel prau coles vaques, supuestamente en función de vixilantes, hasta que la más veterana de la cuadra decidía que yá taba llena y que nun quería siguir aguantando les mosques; y toos, neños y ganao, siguíemosla camín del pueblu.

La tarde dedicábase a cualquier de los llabores del caseríu, ente les que llevar a beber al caballu de casa yera una de les más apreciaes, con tantu de galope a pelu y ocasionales escalabros que nunca llegaron a convertise en traxedia. Tres la merenda quedábemos llibres pa dinos a xuntar col restu de coetáneos, tan llibres y felices como nós mesmos.

L’atapecer marcaba el puntu culminante del día, l’acontecimientu diariu, col aportar del coche de llínea que venía de Cangues del Narcea, casi l’únicu vehículu que transitaba per aquella ruta ensin asfaltar, tres franquiar ensin novedá el míticu puertu del Connio metanes la selva de Muniellos.

En pos d’ella, tres entrar pela Pena, corríemos como si se mos fuera la vida, hasta’l Barrial, au descargaba viaxeros, pocos, y corréu, enantes de tornar pa San Antolín, u pasaría la nueche. Ensin resuellu, esperábemos l’apertura de la puerta que casi siempres mos dexaba cola visión de la entrega de la saca al carteru, qu’ellí la esperaba.

Depués el ritu siguía colos cien metros de caminata hasta la casa de Segundo, el de correos, onde escomenzicipiaba la letanía de la llectura de los receptores, munchos, naquella dómina na que’l pueblu taba puxante de families y entá llegaben cartes de los que yá emigraran, inclusive d’América. Y aínda quedaba lo meyor.

El periódicu de José de Peña, un personaxe misteriosu pa la xente menuda. Daquien que viviera fuera del valle y tornara. Daquien que lleía tolos díes un periódico que-y llegaba puntualmente nel coche de llínea. Daquien que, cuando habría la boca, anque nun lu entendiéramos, dexaba a los neños convencíos de que dalgo importante dixera. Too por un periódicu aportáu col corréu.

Naquella dómina malapenes llegaben ellí les ondes radio, y tampocu había tiempu pa escuchales. Lleer un periódicu diariu presuponía naquella persona un estatus intelectual descomanáu. Nel casu de José de Peña, amás, dicíase que tenía llibros en casa, lo que, pa los neños, poníalu, en ciertu mou, baxo sospecha.

Anguaño no queda un res de too aquello, nin n’Íbias nin nos sistemes de comunicación pública. Güei casi nun queden llectores de periódicos.

Raúl Suevos

A 15 díes vencíos d’avientu de 2022

Torna en castellán en repdiv.blogspot.com

Navarra yá nun ye Navarra

 

Facía ayeri fríu en Pamplona, nada que nun correspondiera al mes d’avientu, pero, con eso del cambiu climáticu, lo qu’enantes yera normal agora paez una invasión polar. Too va camudando, quiciabes demasiao rápido, y los mamíferos bípedos que verbenen pel país tamién lo notan, súfrenlo, asúmenlo, y actúen arriendes d'ello.

El clima políticu de Navarra va yá muncho tiempu qu’entamó la so evolución, y el d’anguaño nada tien que ver col de va dellos años. Pocu queda de lo que representaba’l vieyu reinu. Nin siquier los sanfermines, qu’anguaño son pura mercadotecnia y economía. Nin tampocu la Ribera, históricu esllabón de la cultura del Ebru qu’algamó a contar col “tercer rei d’España” nos tiempos de Musa Ibn Musa, y que güei ye pastu de les ikastoles vascuences col so procesu d’aculturación incluyíu dende la infancia. Ye lo qu’hai.

Ayeri facía friu na vieya Pompaelo. Convocaba l’asociación de víctimes del terrorismu de Navarra, casualmente nel 35º aniversariu del atentáu al cuartel de la Guardia Civil de Zaragoza, entá güei esperando que’l mandante, Ternera, seya puestu a disposición de la Xusticia. Convocaba p’amosar el so refugu a la “espulsión” de la Guardia Civil de Tráficu de la foral Navarra, y respondieron tantes organizaciones y partíos que cabía esperar falta d’espaciu. Pero non.

Unos cuantos centenares, quiciabes milenta, nun había más ellí. Y ello magar la presencia de casi tolos líderes del arcu conservador navarru y nacional. Nin por eses. Navarra yá nun ye Navarra; ye un apéndiz del País Vascu; la vieya aspiración de los líderes independentistes heriedes del racista Sabino Arana. Poro ayeri podía apreciase un sentimientu de decepción al atalantar que del vieyu reinu queda yá bien pocu. Y entá va quedar menos.

Nun puedo maxinar una solución. El nuesu sistema electoral faimos cautivos d’esos votos independentistes, muncho más concentraos y rentables que nel restu d’España, y pa modificar la situación habría que camudar el Sistema electoral; dalgo, viendo cómo les gasten los dos grandes partíos nacionales, inimaxinable anguaño.

Esi cambéu llegal, a min paezme imprescindible si queremos caltener la esperanza d'una nación española. Con un sistema electoral mistu, a la alemana, acabaríense los chantaxes al partíu del gobiernu. Eses estorsiones que güei paecen arrastranos haza un precipiciu del que, me temo, nin Europa podría llibranos.

Con esi cambiu quiciabes Navarra podría llegar a ser consciente de que nun son hermanos de los vascos, tan etnicistes ellos, que los sos halogrupos del ADN mitocondrial son estremaos de los bereberes, qu’ellos yá taben neses tierres cuando los vascones, desertores de les tropes d’Aníbal, pasaron camín del País vascu. 

Raúl Suevos

A 12 díes vencíos d’avientu de 2022

Torna en castellán en repdiv.blogspot.com

Esto ye la lleche...francesa

 

Víase venir. Llevamos dellos años de noticies puntuales sobro l’agru asturianu, casi siempres negatives, y tocantes aquelles referíes al mundiu de la ganadería ye pocu menos qu’imposible atopar daqué de positivu. Podríemos dicir, ensin temor a que naide mos tache d’alarmistes, que’l sector ganaderu, nes sos variantes estremaes, alcuentrase baxo asediu n’Asturies, y ta perdiendo la batalla, colos productores de Gamonéu del puertu como exemplu señeru.

La noticia cabera llegónos va pocos díes de la man de la lleche francesa qu’entama a ser importada pa completar les necesidaes del mercáu nacional, dalgo que mos da una señal de sollerta nidia y que paez correllativa a les noticies de pieslle d’esplotaciones n’Asturies, una ca tres díes; un sangrao continuu del que namái se salven les grandes ganaderíes pero que dexa un pocu más exangües a les comarques más llonxanes del centru; les ales, con particular asañamientu nel sur-occidente.

Llevamos años de noticies negatives. Son mui poques les vegaes nes que los medios de comunicación puen dase gayola con dalguna bona nueva. Un encargu naval perequí, un premiu gastronómicu perallá; coses pequeñes, caxigalines que nun dan pa un impulsu qu’anime a les xeneraciones moces a quedase, y muncho menos a tornar a dalgún de los que yá partieron.

Too ello va de la man de la política rexonal, dende va dellos años en segunda categoría, como los dos equipos futbolísticos del Principáu, güei en manes de capital foriatu, nun axagüeru triste de lo que representa la nuesa rexón. Con políticos, en casi tolos casos, rehenes de les directrices de la superioridá instalada na capital y con mui poca capacidá p’actuar más allá de la espera perenal de la financiación estatal pa cualuquier proyectu de valumbu.

Estos díes caberos pudimos apreciar la nuesa capacidá d’influyir en Madrid cola esclusión de les rutes del noroeste del plan de rutes globales de la Xunión Europea; noticia a la que se xunta la esixencia vasca y cántabra –votos parlamentarios mediante- de construyir, con fondos estatales, la llínea Bilbao-Santander. Y ye que nun hai que ser inxenuos, al gobiernu de turnu nun se lu condiciona dende la obediencia del partíu sinon cola potencia de los votos más o menos imprescindibles p’algamar la mayoría nel Palaciu de les Cortes.

Mentanto nós vamos siguir nel nuesu ensoñamientu de paraísu ñatural envidiáu por toos, a lo menos nel branu, y oyendo les bones pallabres y deseyos del nuesu presidente Barbón, anque’l despoblamientu de les Ales continúe imparable y la nuesa universidá se tenga convertío nuna magnífica fábrica d’emigrantes d’élite. Ye lo qu’hai.   

Raúl Suevos

A 10 díes vencíos d’avientu de 2022

Torna en castellán en repdiv.blogspot.com

Los asesinos de Viriato

 

Viriato, como figura histórica, ye una de las coses que portugueses y españoles consideramos como propies, de dambos pueblos, qu’entós yeren unu, dando-y sustanza a aquello nomao Iberia, o Hispania, y qu’aínda sigue ehí, esperando, quiciabes baldíamente, que l’Ánxel del Señor mos allume, ciudadanos y dirixentes al tiempu, pa tornar a ser unu. Ye lo qu’hai.

A la mio xeneración, grabaronos a fueu aquello de “Roma nun paga traidores”, y agora que peino canes pienso que, posiblemente, nel mensax despintábase una admonición pa detractores futuros del réxime. Sicasí, yera una historia bonita colos sos guerrilleros lusitanos, les sos lexones romanes, los sos gladius hispaniensis,y, finalmente, la tiesta de Viriato a mou de certificación ISO 9000 del bon facer de los traidores.

A min estos díes viénome a la mente al lleer que a la escaladora iraní, Elnaz Rekabi -aquella que nun va muncho, y en plenu fervoriar de les manifestaciones n’Irán, permitióse escalar nel Campeonatu mundial ensin pañuelu que cubriera la so cabellera Formosa –baltaron-y la casa familiar con too dientro, ensin avisu previu, ensin compasión; como suel actuar el réxime de los ayatolas xeneralmente; y too ello magar que la moza tornó al so país pidiendo perdón y col pelo bien cubiertu. Nun hebo premiu pa la traidora, nin siquier perdón. Ali Xamenei, el líder supremu, nun paga traidores.

La noticia oblígame a entrugame si’l presidente aragonés, Lambán, tendrá bien midío la so sida entainada tres les declaraciones sobro’l meyor devenir d’España, casu que l’asturianu Xavier Fernández algamara la secretaría xeneral del PSOE en llugar del “históricu” doctor Sánchez. Ye de suponer que, como nel casu de la escaladora, el “réxime” tendrá tomao nota p’aplicar el correctivu debíu llegao’l momentu, pos Pedro l’históricu nun paga traidores. Vaya, tampocu paga a los sos esbirros si ye lo que convien.

Vienen en mayu les eleiciones autonómiques y ehí van tar esperando, unos y otros, al señor Lambán, anque n’Asturies, d’au foi presidente, naide espera a Fernández, que debió veles venir nel so momentu, y tomó les de Villadiego, villa medieval con fueru privativu pa poner a salvo a xudíos perseguíos. Que nel casu del vieyu presidente asturianu suponía’l retiru políticu, situación que tamién lu ponía a reparu de la venganza esperada.

El so sustitutu, el señor Barbón, nun paez correr peligru, pos na so trayeutoria ye difícil atopar una pallabra de reproche en direición a Madrid. Los sos mayores escesos, y bien midíos, nun pasen d’abrazase col incombustible Revilla, o a xuntase colos que “padecen” al llobu, y eso con cuidao, nun vaya a ser que muerda.

Raúl Suevos

A 4 díes vencíos d’avientu de 2022

Torna en castellán en repdiv.blogspot.com

La democracia n'América...y n'España

Alexis de Tocqueville, intelectual francés nacíu na primer década del sieglu XIX, escribió ente 1835 y 1840 una obra, que da títulu a esta tribuna, qu’entá anguaño sigue siendo la puerta d’entrada pal estudiu del sistema políticu de los Estaos Xuníos. Totalmente vixente, nella describe con clarencia l’equilibriu de poderes, clave de la democracia según Monstesquieu, qu’impera ellí y que, en pocu más d’un sieglu llevó a esi país a ponerse a la tiesta del mundiu; au entá sigue güei.

Nesa separación de poderes relluma especialmente la independencia xudicial que a la so tiesta s’atopa un Tribunal supremu que los sos miembros son propuestos pol Presidente n’exerciciu y confirmaos –tres examen- pol Senao, con calter vitaliciu, daqué  que-yos da una independencia total como se pudo reparar a lo llargo de la historia. Con una recien resolución escontra del presidente Trump, quien desequilibrara, teóricamente, el tribunal al so favor colos sos nomamientos. Independencia xudicial n’estáu puru.

Tocantes al Poder llexislativu, que tres les eleiciones caberes quedó per mui poco en manes demócrates el Senáu y nes republicanes el Congresu, imponse sobrosaltar que los distritos eleutorales son unipersonales, con primaries a cara perru nos dos partíos principales, y necesidá de cantidaes descomanaes de perres pa financiar les campañes, con una vixilancia estrema sobro esos ingresos y la menacia de delitu eleutoral, pergrave, pa los incumplidores. Ellí, nun esisten las llistes, nin abiertes nin piellaes, lo que da una independencia pergrande a senadores y congresistes, y con ella al conxuntu de les cámares, a les que’l Presidente tien que cuidar y tratar d’atraese, sobremanera cuando nun esiste un gran desequilibriu a favor del inquilín de la Casa Blanca, como ye’l casu anguaño.

D’últimes tenemos al Presidente, poder executivu n’estáu puru, y únicu funcionariu de los Estaos Xníos que ye escoyíu direutamente pol conxuntu de la nación, lo que-y da una legalidá total y, amás, la máxima lexitimidá; too ello xunío a unes grandes, non totales, capacidaes executives según la Constitución que se dieron cola nacencia de la nación y que, magar la su cencellez y númberu escarsu d’artículos, namái tien necesitao unes poques enmiendes a lo llargo de los sos más de doscientos años de vida.

Tres esta llarga introducción namái me queda invitar al amable lector a facer una comparanza somera col sistema políticu de nueso, con repasu a los tres poderes, especialmente al xudicial, oxetu de deséu y manipulación de los grandes partíos; les llistes d’obedientes secuaces pa les eleiciones, y, la inestable y complexa posición del “históricu” doctor Sánchez. Ye lo qu’hai.

Raúl Suevos

A 2 díes vencíos d’avientu de 2022

Torna en castellán en repdiv.blogspot.com