Tregua de Nadal

 

Ye probable, asocede tolos años, que dalgún columnista mos asalte les coraes estos díes cola típica alcordanza de la Tregua de Nadal, faciendo referencia a un manosiáu fechu que tevo llugar demientres la Primer Guerra Mundial, la Gran Guerra pa los europeos intervinientes. Van aprovechar, posiblemente, el recien campeonatu del mundiu qatarí pa parangonalu col partíu que se xugó na tierra de naide, ente trincheres. Too mui navidiegu.

Esti añu, cola invasión d’Ucrania, y les grandes estensiones nevaes y xélaes temperatures d’aquel país, paez más arremente que nunca, quitando quiciabes l’asuntu siriu, anguaño casi escaecíu magar qu’ellí siga la matancia, pero que coles sos ciudaes bíbliques y los sos antiguos monasterios cristianos presentábase tamién como mui afayaizu pa sacar una tribuna perguapa y ganase l’aguinaldu navidiegu, suponiendo qu’entá esista.

Lo d’Ucrania, anque seya la guerra de moda anguaño, tien un qué; y ye qu’ellí los que s’acuchillen metódica y profesionalmente son ortodoxos, cristianos ortodoxos me refiero, nun tomalo pola ortodoxa de la carnicería; y la so Natividá nun aporta hasta el 6 de xineru; de mou que la so posible tregua, abondo duldosa en tou casu teniendo en cuenta los antecedentes del inquilín del Kremlin, nun tendría llugar nes feches qu’a nós mos interesen. Una pena.

A mín, qué quieren que-yos diga, nun m’emocionen los bonos deseyos navidiegos. Pasé sendes Navidaes en Bosnia y Kosovo y nun noté personalmente una especial sensibilidá, tampocu nos mio collacios, y menos aínda na población de la redolada que sufría les consecuencias de les decisiones de los sos políticos. Tampocu lo tengo visto en Qatar, au teníen motivu pa sentise emocionalmente afeutaos.

Y ye que, como un mozu arxentín se tien encargao de recordar nun video memorable, n’Irán van a colgar d’una grúa a un mozu futbolista profesional por manifestase a favor de les muyeres del so país. Y naide en Qatar, ente los estremaos miembros y estamentos del mundiu del futbol, abrieron el picu, porque, como tol mundiu sabe, la pela ye la pela. Como saben tan bien dalgunos europarlamentarios, receptores del dineru qatarí y marroquí y agora nel puntu de mira de la policía belga.

Asina que, tornando a la tregua navidiega, espero qu’esti añu nun me toquen los pelendengues cola consabida tribuna y se llenden a trayeme les noticies del frente, estos días a abondo de graos baxo ceru, especialmente si los bravos soldaos ucranianos, defensores de la so patria, son a montar una ofensiva nueva y siguir recuperando tarrén ocupáu pelos rusos. Ye lo qu’hai.  

Raúl Suevos

A 19 díes vencíos d’avientu de 2022

Traducción en castellán en repdiv.blogspot.com