Víase venir. Llevamos dellos años de noticies puntuales sobro
l’agru asturianu, casi siempres negatives, y tocantes aquelles referíes al
mundiu de la ganadería ye pocu menos qu’imposible atopar daqué de positivu.
Podríemos dicir, ensin temor a que naide mos tache d’alarmistes, que’l sector
ganaderu, nes sos variantes estremaes, alcuentrase baxo asediu n’Asturies, y ta
perdiendo la batalla, colos productores de Gamonéu del puertu como exemplu
señeru.
La noticia cabera llegónos va pocos díes de la man de la lleche
francesa qu’entama a ser importada pa completar les necesidaes del mercáu
nacional, dalgo que mos da una señal de sollerta nidia y que paez correllativa
a les noticies de pieslle d’esplotaciones n’Asturies, una ca tres díes; un
sangrao continuu del que namái se salven les grandes ganaderíes pero que dexa
un pocu más exangües a les comarques más llonxanes del centru; les ales, con
particular asañamientu nel sur-occidente.
Llevamos años de noticies negatives. Son mui poques les
vegaes nes que los medios de comunicación puen dase gayola con dalguna bona
nueva. Un encargu naval perequí, un premiu gastronómicu perallá; coses pequeñes,
caxigalines que nun dan pa un impulsu qu’anime a les xeneraciones moces a quedase,
y muncho menos a tornar a dalgún de los que yá partieron.
Too ello va de la man de la política rexonal, dende va dellos
años en segunda categoría, como los dos equipos futbolísticos del Principáu,
güei en manes de capital foriatu, nun axagüeru triste de lo que representa la
nuesa rexón. Con políticos, en casi tolos casos, rehenes de les directrices de
la superioridá instalada na capital y con mui poca capacidá p’actuar más allá
de la espera perenal de la financiación estatal pa cualuquier proyectu de
valumbu.
Estos díes caberos pudimos apreciar la nuesa capacidá d’influyir
en Madrid cola esclusión de les rutes del noroeste del plan de rutes globales
de la Xunión Europea; noticia a la que se xunta la esixencia vasca y cántabra –votos
parlamentarios mediante- de construyir, con fondos estatales, la llínea
Bilbao-Santander. Y ye que nun hai que ser inxenuos, al gobiernu de turnu nun
se lu condiciona dende la obediencia del partíu sinon cola potencia de los
votos más o menos imprescindibles p’algamar la mayoría nel Palaciu de les
Cortes.
Mentanto nós vamos siguir nel nuesu ensoñamientu de paraísu ñatural
envidiáu por toos, a lo menos nel branu, y oyendo les bones pallabres y deseyos
del nuesu presidente Barbón, anque’l despoblamientu de les Ales continúe imparable
y la nuesa universidá se tenga convertío nuna magnífica fábrica d’emigrantes d’élite.
Ye lo qu’hai.
Raúl Suevos
A 10 díes vencíos d’avientu de 2022
No comments:
Post a Comment