Y nun taba flaca

 

El caberu partíu de futbol que siguí por televisión fo’l de la Final del mundial de Sudáfrica; y ello porque me garró a traición, invitáu a güeyalu nel Melía Cohíba de La Habana, au m’atopaba por trabayu y ensin posibilidá de recudir el bultu. Paecióme, como siempres, llarguísimu, y fui incapaz de saltar col gol d’Iniesta. Ye lo qu’hai.

Dicho lo anterior, teng de señalar que dalgo entiendo del asuntu, porque magar que m’aburre, soi consciente  de que, pa los varones españoles de la mio xeneración, yera imposible participar nuna conversación grupal ensin conocimientos de futbol, alquiríos, y los innatos, sobro muyerío. Dalgo qu’anguaño sigue siendo fundamental na cultura de nueso, cola salvedá de que la segunda parte lléndase, daes les posibles connotaciones penales, a círculos mui estrechos.

Poro soi consciente de que los asuntos de la Federación española de futbol, dende los tiempos del inefable Porta, que tantes hores de programación-y diera al Butanito, José María García, pasando pel so sucesor Villar, y agora’l masacráu gañan Rubiales, siempres tuvieron, dende l’oscurantismu qu’arrodia a la institución, allumaos con un brillu de confabulación mafiosa que cualquier podía percibir, inclusive ensin conocimientos futbolísticos. Les listes d’invitaos a viaxes de finales de tou tipu podríen dar munches pistes, si nun fueran secretos.

L’anguaño y cautelarmente defenestráu Rubiales tenía-y gana muncha xente, pero’l so pedigrí socialista calteníalu a salvo, hasta ciertu nivel. La so zafiedá na celebración del mundial, pasó a ser delictiva en cuantu les ministres de la “Igualdá” entraron al trapu, y dende entos too se salió de madre, per un llau y per otru. Tantu que, España, dexó de llau la subida del IPC, la posible repetición d’eleiciones, y hasta la detención por reincidencia d’un de los lliberaos gracies a la Llei d’“Igualdá”.

La cosa va acabar nos tribunales, seguro, u la clave, a mio entender, en base a esa manida Llei, va tar nel consentimientu de la muchacha del famosu besu, dalgo que, la Federación, trató de confirmar con una serie de fotografíes nes que, cola comunicación no verbal tan de moda en programes televisivos, veríase la actitú más que consintiente de la protagonista. Más allá d’eso, nun de los programes vespertinos de la televisión, un acreditáu espertu en llectura de llabios afirma rotundamente que Rubiales diz-y “¿Puedo date un picu?”, confirmando lo afirmao pol reu del asuntu; dalgo que nun paez que fuera rechazao pola besuqueada, según la so salida sonriente haza la drecha de les imáges.  

Mientres tanto l’aceite va siguir subiendo.

Raúl Suevos

A 27 díes vencíos d’agostu de 2023

Torna en castellán en repdiv.blogspot.com

Los quilates del oru

 

Son los quilates la referencia pa midir la pureza de la pieza, daqué que se pón de manifiestu cuando s’acude a una xoyería p’alquirir un oxetu d’esti metal noble, especialmente si se trata de poner a recaldu los nuesos caudales énte les fluctuaciones de la economía moderna.

Cuando falamos de competiciones deportives, el primer premiu suel tar asociáu con una medalla d’esi metal, l’oru; pero si mos paramos a analizar l’asuntu, ye fácil atalantar qu’hai munchos quilates de diferencia ente unes presees y otres. Y ello púnxose especialmente de manifiestu estos díes caberos colos oros del mundial futbolísticu -emborronaos col picu inportunu del gañán Rubiales- y los oros de la Marcha española na Plaza de los héroes de Budapest, llugar que paga tributu a los vieyos maxares, anque bien cerca d’ellí, un Terciu vieyu d’españoles se dexara la piel pa reconquistar la fortaleza de Buda a los otomanos. Ye lo qu’hai.

Los marchadores españoles, él y ella, pertenecen a una categoría asociada al sufrimientu, llargu y duraderu, el de los entrenamientos infinitos, a hores intempestives, per carreteres comarcales, en soledá casi siempres, con entrenadores desconocíos y de fe cuasi relixosa, inasequibles al desalientu a pesar de los disgustos en forma de lesiones inoportunes o descalificaciones incomprensibles. Ehí siguen, hasta algamalo, hasta consiguir l’oru, el de veinticuatro quilates.

Nel otru llau tenemos l’oru futbolísticu, ensin dulda de muncho más brillu, con independencia de los quilates; qu’anguaño, magar l’asuntu Rubiales, que nun va servir pa dar llume al mundiu opacu del futbol, ta esfrutando, elles, del descansu merecíu, mientes celebren los medios de comunicación la fola d’apertura d’escueles de futbol énte l’avalancha de neñes deseyoses d’emular a les heroínes nueves.

Ye, en ciertu mou, la nuesa cultura deportiva, la de Santana, Ballesteros, y  otros héroes que nel so momentu, tre less sos xestes deportives, tiraron de l’afición popular pa xenerar bases deportives no de so. Más cuando se trata del futbol, deporte de grada onde los haya, que nel nuesu casu supera toles barreres rexonales, históriques o llingüístiques, y que, una vegada más, con esti oru de les antípodes, va conocer un tirón epocal.   

¡Viva’l futbol¡ anque seya a costa, nalgunos casos, del abandonu de los estudios, anque munches se queden pel camín víctimes de les lesiones ¡Viva’l futbol! Que mos da, demientres unes hores, la sensación de que vamos toos a una, como Fuenteovexuna, anque la nación tea metanes una de sus históriques crisis.

Ye, en realidá, el brillu del oru lo que cuenta, non los quilates.

 

Raúl Suevos

A 25 díes vencíos d’agostu de 2023

Torna en castellán en repdiv.blogspot.com

Un embarazu, un asesinatu, y un besu

 

Con estes tres premises un bon novelista podría enguyar una historia al altor d’aquelles de la señora Christie y el so inolvidable detective, el señor Poirot, pero, nesti casu, la trama nun va de misterios sangrientos por resolver, anque de too hai, sinon del nexu de xunión d’estes, aparentemente, aiciones inconexes.

La cabera d’elles, el besu, ye la que tiñaza, tres l’aplaudíu mundial ganáu poles neñes del futbol, a la opinión pública española. Y ye que’l gañán que preside la Federación española, institución que los sos mandamases tienense distinguío siempres por una peralta y acrisolada moralidá –ironía asturiana- y que yá nel pasao recien tiense visto chapoteando en charcos mediáticos por el guetaos, nun tevo otra ocurrencia que, en medio de la esaltación del momentu, planta-y a una de les moces un picu nel morru, que non un morréu, un picu.

Cola que tá cayendo, el tal presidente, podía habelo pensao un par de segundos, non más, con eso hubiera bastao pa contenese. Pero’l casu ye que, tres el emotivu picu, lióse la Dios es Cristo, castiza espresión que vien a dicir que tol mundiu se llanzó a pedir la tiesta, non del Bautista, pero si del Rubiales, qu’asina se llama’l protagonista. Con particular belicosidá y prontitú per parte de les polítiques del ramu de la igualdá, esto ye, la Yoli y la Irene. Tan grande ye’l follón qu’a Feijoo, tres el so encuentru con SM malapenes-y prestaron atención. Ye lo qu’hai.

A min tol asuntu, como que me la sopla, sobremanera porque la interesada, la del picu, quitó-y importancia al asuntu, al entamu. Pero nun dexa de llamame l’atención el funcionamientu, manipulación, de la llamada opinión pública que, con esti picu mundialista, tien unviao a páxines interiores, a lo menos per un tiempu, al descuartizamientu lleváu a cabu pol ñetu de Curro Jiménez, y fiu d’otru actor, anque de menos postín que’l citáu. Un asesinatu que tevo, nel so momentu, la capacidá d’unviar al escaezu  l’embarazu d’una novia ocasional de Bertín Osborne, quien agora, tres selmanes d’acosu mediáticu, vive otra vegada feliz na so soltería d’oru.

A min, de Rubiales, lo que me toca los pies ye’l so esparabán testicular nel palcu presidencial al llau de la Reina d’España, pero lo importante ye distraenos, que yá llegará la seronda, y pa entoncenes ye probable que nun tengamos abondos camelos pa facenos escaecer la situación real de la nación, y los aprietos que, caún de nos, probablemente, tengamos que pasar.

Raúl Suevos

A 22 díes vencíos d’agostu de 2023

Torna en castellán en repdiv.blogspot.com

Pieslle de Feria en Xixón

 

Finó ayeri la Feria taurina xixonesa con una corrida d’excelente entrada, anque non tanta como nos festexos del Juli, y el de la víspora con Morante, Roca Mora y Manzanares. Sicasí, cabe falar d’ésitu atayante de l’alcaldesa Morillón, que s’empeñara nel so programa eleutoral col retornu de los toros, y, amás de cumplir, en tiempu y forma, colo prometío, finaliza’l so apueste ensin que hubiera dalu percance nun cosu que l’anterior corporación usara como coartada p’acabar cola Fiesta nacional d’un plumazu. Ayeri vióse-yos el plumeru.

Na d’ayeri tarde, con Castella, Talavante y Rufo, los toros floxaben de manes yá d’entrada, lo que facía que los más ñervosos reclamaran la devolución dende l’entamu, si bien, el trabayu cargáu d’atueldu de parte los diestros, facia que toos ellos dieran abondu xuegu como pa que los tres cobraran doble apéndice pa salir pela puerta grande. Quiciabes, en dalgún casu, con dalgo de regalu por parte de una presidencia populista, que nun aguantaba’l tirón de los tendíos. Ye lo qu’hai. 

A min, aficionáu de pasión moderada, encantóme que los toros tornen a Xixón y la so plaza formosa. Una instalación que’l so futuru pasa, con independencia de los toros, por una sólida tresformación que la camude n’espaciu multiusos a lo llargo de tol añu, y pienso nel pieslle esitosu del techu de la de Zaragoza como posible solución. Pero más allá de qu’esista o non talu proyectu, quien meyor tien descrito’l presente y futuru de los toros xixoneses tien sío la propia alcaldesa quien, n’entrevista recien, declaraba que “va haber toros en Xixón demientres l’afición lo faga posible”, y ye que, percima de too, inclusive de lo cultural y tradicional, tamos énte una actividá económica de múltiples ángulos, na que’l pasu per taquilla señala, con claridá meridiana, l’estáu de la Fiesta.

Hebo tamién el primer día de Feria, con despedida de Hermoso de Mendoza, que dexa herencia nel so fiu, la consabida manifestación d’animalistes, menos numberosa qu’otros años anque igualmente gritona, y a la que’l Juli, el día siguiente, faría’l regalu de Caritativo, primer indultu na historia del cosu del Bibio según me dicen; un detalle qu’ellos van tar lloñe de comprender en toa la so dimensión, pero que grita’l sentíu ecolóxicu descomanáu de la Fiesta, compendiu de riegles nel so reglamentu, que tienen como finalidá la defensa de la dignidá del animal.

Nun son bonos tiempos pa les deheses, en plena voráxine animalista, pero, per agora, vamos siguir yendo a los toros en Xixón.

Raúl Suevos

A 19 díes vencíos d’agostu de 2023

Torna en castellán en repdiv.blogspot.com

Revoluciones les d’enantes

 

L’Academia defínles como “cambéu fonderu, xeneralmente violentu, nes estructures polítiques y socioeconómiques d’una comunidá nacional”, y equí, nel suelu patriu, sabemos dalgo, con dellos casos de calificativu campanudu, como fue “la gloriosa”, que pa otros namái yera la “septembrina”, que tres l’asesinatu del so promotor, Prim, y l’abandonu del recién estrenáu Amadeo de Saboya énte l’enguedeyu que yera esti país, daría pasu a la primer República, col consiguiente afondamientu nel quilombo políticu patriu. Ye lo qu’hai.

Más averao tenemos el casu asturianu, el del 34, que según mos cuenta Hugh Thomas na so Carta d’Asturies, con plasmu ya incomprensión, cuntaba como punta de llanza con unos mineros de sueldos sustanciosos nel contestu español; con unes esplotaciones que en dellos casos cuntaban con economatos, botiquines y dispensarios; con dalgún exemplu de coxestión de la industria, daqué insólitu entoncenes; y tamién, al paecer, cola inyeición de caudales del estáu yá naquel tiempu, pues non too yera rentable.

Nun importaba. Los mineros taben fonderamente concienciaos, o adoctrinaos, o quiciabes alienaos, y llanzaronse, magar el chaquetéu del restu d’implicaos al otro llau de los puertos, a una violenta espiral revolucionaria que diba dexar un regueru de muertos y destrucción, anguaño glorificada por dalgunos gracies a la posverdá, particularmente por parte ya interés del partíu que sofita’l gobiernu en funciones de la nación, principal promotor y responsable d’aquella bacanal d’odiu y fueu.

Güei esi tipu de revoluciones tá demodé, a lo menos na civilizada Europa, anque nunca hai que fiase. Agora llévase otru tipu d’asonaes. Como la d’Amaral va nada nun de los infinitos festivales braniegos, au sosprendió a toos con un despelote teteru que, aplaudíu pola Yoli y afines, dexó a la mayoría varada, pues ye duldoso qu’haya un país n’Occidente más a la vanguardia qu’España en materia de senos femen-niles y tou tipu de reivindicación, o meyor aínda, instauración de usos sociales nuevos en materia de xéneru y sexu, y apunto los dos conceutos pa evitar dexar a naide fuera.

Nun me consta qu’Eva, que asina se llama la cantante, sufriera dalu aforfugu na casa familiar, con un padre, miembru de la música de l’Academia Xeneral Militar qu’entá recuerden quienes lu conocieron como una persona perfalatible, y de quien siempres tien falao mui positivamente la  fia, asina que, debe haber otra motivación.

Quiciabes que les sos ventes yá nun son lo que yeren, que la so inventiva compositora tase secando, que los años nun pasen de baldre, con pocu marxe pa saltar tetes al aire.

Revoluciones les d’enantes.

Raúl Suevos

A 14 díes vencíos d’agostu de 2023

Torna en castellán en repdiv.blogspot.com

Ecuador, espeyu d'Iberoamérica

 

Anda’l personal espantáu col asesinatu d’un candidatu presidencial na campaña ecuatoriana. Anque nun deberíen sosprendese pues ye daqué relativamente frecuente per aquelles tierres. Un atentáu semifallíu dio-y el triunfu al entoncenes opositor Bolsonaro. Ye lo qu’hai.

En frente de casa hai un puestín d’arreglos testiles qu’agora rexenta una rusa, pero qu’abrió va venti años doña Manolita, una ecuatoriana qu’aportó acá pa cuidar vieyos, fuyendo del enguedeyu montáu por Lucio Gutiérrez nel país, pero qu’aina vio’l nichu económicu, y, col so remangu, bon facer y muncho trabayu, fízose poco menos qu’imprescindible nun barriu nel que yá casi naide sabe coser un dobladillu o axustar unos pantalones.

Col ésitu del tallerín pudo trayer los fios, y too paecía dir bien, pero la mayor nun tevo otra ocurrencia qu’echase un refrescu, ecuatorianu, embarazase, y colar cola so familia pal Ecuador, naquel periodu d’espeyismu que foron los años primeros de la presidencia de Rafael Correa, anguaño fuyíu y esiláu en Bélxica como Puigdemont; cuando xirgaben los dólares colos precios disparataos del petróleu y taba de moda’l socialismu del sieglu XXI de Chávez.

Doña Manolita, dempués de mumcho cavildar, decidió tornar a la so tierra. Un país que, dende entoncenes, enfila una cuesta abaxo para lo que nun paez cuntar con dalu tipu de frenu, y nel que, l’asesinatu a manes de dalgún de los cárteles de la droga qu’enseñoreen el país, del candidatu Villavicencio, namái supón un pasu más. Enquivocóse doña Manolita.

L’oxetivu básicu d’un gobiernu, dicen los espertos, consiste n’aprovir de seguridá física y económica a la ciudadanía. Sobro estos dos pilares vanse amestando otros, como puede ser la educación, la sanidá, la defensa, etc. Pero dalu d’estos s’algama sinon s’aseguren los primeros.

Si tomamos el riu Bravo, tantes vegaes recriáu nes películes del oeste, como llende iberoamericana, reparamos que ye poco menos qu’imposible atopar un país nel que s’algamen los dos oxetivos básicos. Entamando pel sangrientu México, siguiendo pola siempres nel alambre Centroamérica, au Bukele pacifica al coste de los drechos humanos, o la antaño exemplar Costa Rica, güei pastu tamién de la violencia. Pa continuar, ensin necesidá d’entrar en detalles en Colombia, col so presidente Petro acosáu polos narcodolares; pa llegar a esti Ecuador, camudáu en centru distribuidor de la droga de los sos vecinos Perú y Bolivia, dos exemplos más qu’añedir. Y asin tol continente, incluyendo Arxentina y Chile, colos sos particulares problemes, y corriendo un tupíu velu sobro los casos de Cuba, Venezuela y Nicaragua, pa evitar l’ascu.

Raúl Suevos

A 13 díes vencíos d’agostu de 2023

Torna en castellán en repdiv.blogspot.com

Ceuta esplícalo too

 

Ye esti un branu pa recordar, non namái polos continuaos records nel amontar de les temperatures, y, en xeneral, los fenómenos climáticos intempestivos, sinon tamién pol desasosiegu políticu producíu polos poco nidios resultaos de les pasaes eleiciones llexislatives. Ye lo qu’hai.

Nel casu asturianu podríemos falar d’un “más de lo mesmu”, colo qu’ello implica de previsión, anque ésta se sofite nel sele y anunciáu decaimientu rexonal, si bien dalgunos s’empeñen en ver nel turismu, impulsáu por esi cacarexáu cambéu climáticu, un futuru alagüezanu pa la rexón. Cebu para cándidos.

No nacional too ye un ensin vivir. Los númberos nun podían ser peores, y agora too son cábales, a cuala más paxarera y a la par dañible pa los intereses nacionales. Ye un tiempu doráu pa los analistes políticos especializaos en sicoloxía pues too paez centrase n’auscultar les personalidaes de los llíderes de los partíos, con especial interés nos rasgos y matices del calter del secretariu xeneral de lo que queda del PSOE, el doctor Sánchez.

Más allá de los personalismos, l’axente demoníacu de la nuesa política paez ser VOX, pues ye sobro esti partíu au se carguen tolos males y responsabilidaes de lo qu’agora asocede, daqué que paez convenir a unos y a otros, pues asina aforrense llevar a cabu aquella autocrítica tan del gustu de los rexímenes soviéticos. VOX ayuda-yos a toos. Tamién a los comentaristes.

Los tiempos paecíen ayudar a la parroquia tertuliana, na so mayoría en periodu vacacional tres les aciagues eleiciones. Too se dexaba pa cuando’l Rei se vea nel trance de nomar a un candidatu a formar gobiernu, tragu que s’espera a la vuelta del descansu braniegu. Pero una ciudá vieya, perespañola dende enantes de la conquista de Granada, vieno a enguedellalo too.

La polarización de la política española, semada con procuru dende l’aportar de Zapatero al poder, y el crecientemente recuperao bipartidismu, paecían dexar tol asuntu nuna constante reprobación de “los otros”, dalgo que facilitaba pasar de llargu sobro los pecaos propios. Mui prácticu, fácil y ventaxosu.

En Ceuta, ciudá autónoma con competencies rexonales, como nel restu del país, la bicha ye VOX, lo que lleva a que na pasada llexislatura gobernara’l PP en minoría pa evitar la alacordanza colos conservadores, dalgo que se repite anguaño y que tien llevao al PP a guetar una alianza col PSOE, lo que daría llugar a un casu inéditu n’España. Hasta les conseyeríes taben yá repartíes.

Too se vieno abaxo por decisión del doctor Sánchez, col discursu de que, col PP, a dala parte. Pero nun se enquivoquen vustedes, nun se trata de torgar tratos cola oposición, sinon d’evitar la posibilidá de que’l restu de país se decate de qu’una coalición de gobiernu ente los dos grandes partíos ye posible, de que los votantes atalanten qu’aquella Tercera España de Madariaga ye una realidá, de que’l sentíu común y la racionalidá son posibles en política percima de los intereses personalistes de los dirixentes de los partíos, de qu’esiste una mayoría centrista n’España que güei ta güérfana de representación, y, en fin y en pos, que los políticos tán p’algamar el progresu y el bienestar de la ciudadanía, y non pa ser la so esmolición.

Raúl Suevos

A 6 díes vencíos d’agostu de 2023

Torna en castellán en repdiv.blogspot.com

Puxa Asturies

 

Entámase una llexislatura rexonal ñueva cola toma de posesión del presidente Barbón na Xunta Xeneral, col acompañamientu de la sonrisa intrescalable de la ministra portavoz y l’aplausu de los representantes de les instituciones asturianes na platea dispuesta pal actu nel patiu del edificiu. Bon camín, presidente.

El presidente tevo mui bones pallabres. Siempres les tien. Que dempués acompañó con un escritu na prensa rexonal nes que se reafirmaba nes sos bones intenciones; daqué que ye d’agradece-y al señor Barbón; les bones pallabres. Si bien los fechos sedríen aínda más ponderatibles, y ye ehí au los cuatro años pasaos mos lleven a poner en sordina les sos bones intenciones. A él-y incumbe danos motivos para comenos les nueses fináu’l so mandatu.

Pieslló la so intervención con un Puxa Asturies que nin siquier sonaba a amestao, la alegre mestura ente asturianu y castellán que fala la mayoría del paisanaxe, por más que munchos crean sinceramente que falen asturianu. Anque’l presidente debiera conocer la diferencia, y evitao esa curtia soflama con acentu acastellanáu. Ye lo qu’hai.

Ye posible que tal “puxu”-y viniera de los datos d’emplegu, estraordinarios p’Asturies si mos escaecemos de la nuesa baxa procedencia nes estadístiques nacionales, y tamién que l’espeyismu d’esti branu chornizu xustifica l’emburrión de la hostelería, dalgo que de continuar el cambiu climáticu puede camudar Xixón nun Benidorm nuevu. Dios mos llibre.

Sicasí, debió güeyar tamién pal emplegu na industria, antaño’l nuesu fuerte, que sigue cayendo, imparablemente al paecer, y supón una promesa de derrumbe nes pensiones futures; eses que nun se sabe si podremos siguir cobrando cuando toque. Pero hai más.

Un gobiernu de coalición con munchos “promover” y también “impulsar”, infinitivos a encuadrar na cesta de les bones intenciones que, na mio opinión, va tener nel Área metropolitana el so Rubicón, y nel cuidao ya impulsu de les Ales la reválida de un doble mandatu que tien de dir más allá de les bones pallabres y los molinos de vientu.

Esi Pucha Asturias tien tamién llectura n’asturianu, con una cooficialidá a la que dambos socios de gobiernu renuncien, y que yo, que nun soi naide, creo innecesaria. Daqué que nun debe estrañar pues namái foi una bandiera oportunista de la esquierda cuando l’abrazaron va cuatro años. Pero queda tou un mundiu a desendolcar cola Llei d’Usu, dende la voluntariedá de los asturianos; con un informativu n’asturianu na TPA, col reconocimientu de la especialidá docente, con una dotación digna a l’Academia de la Llingua. Ánimo, señor Barbón.

Raúl Suevos

A 29 díes vencíos de xunetu de 2023

Torna en castellán en repdiv.blogspot.com