Güei ye día d’analís entainaos nos medios de comunicación tres los “hestóricos” –dos de cada tres suelen ser hestóricos pa los tertulianos- resultaos de les eleiciones madrilanes; más alantre van aportar los estudios detallaos a cargu de sociólogos principalmente, pero tamién de psicólogos, y pue qu’hasta psiquiatres. Lo de mío ye más pedestre, más d’andar per casa, un pocoñín como los xubilaos que güeyen y critiquen los trabayos públicos nes cais de les ciudades de nueso; un repasu sofitáu na edá más que notra cosa.
Foi una campaña eleutoral desagradable y tarrecible na que’l nivel, o quiciabes habría que falar de desnivel, de la descalificación personal y la violencia verbal y física algamaron cotes, o meyor simes, nunca enantes vistes. Nun había programes ¿o sí? Quiciabes ente’l ruiu resone daqué de baxada d’impuestos per parte d’una ganadora que va tener de trabayar con percuru pa cumplir en namái dos años; y d’averar l’alministración al alministrao del llau d’una segunda clasificada pretendidamente familiar pero pupila d’un Errejón crecíu nel mesmu caldu que’l de Galapagar, pero, sicasí, yera tantu’l marafundiu que duldo que munchos se enteraren d’esos detalles ensin importancia.
Les eleiciones madrilanes, que’l so estatutu impón qu’en dos años se repitan, lo que les fai más incomprensibles, nun tienen sío constructives; dende la so mesma convocatoria teníen como oxetivu, d’unos y d’otros, cargase al contrariu. Punxeronse sobro la mesa corazones, fégados, reñones, tou tipu de vísceres, la tradicional casquería de la que ye tan aficionada la gastronomía de la capital que nesta ocasión cocinabase a fueu vivu, guetando amburar al contrariu. Un tipu de campaña que, por desgracia, ye mui probable que cree escuela y quede como referente pal futuru nel restu del país. En fin…
Fascismu, comunismu, sanchismu, franquismu, tolos ismos apaecieron…pa unes autonómiques, por más que falemos de Madrid. Y paez razonable que, con tanta pasión en xueu, agora se quieran cobrar los réditos. Dalgunos yá tán pagando –veíase venir- como’l profesor Iglesias, qu’escosáu en tiempu record el so créditu, abandona la política. A otros, como’l doctor Sánchez, van quere-yles tamién cobrar, anque’l lletráu Casado nun tenga méritos acreditaos pa ello. Pero repercusiones va haber, hasta en Cataluña, probablemente.
Otra perdedora ye España, o a lo menos aquella Tercera España que reclamaba don Salvador de Madariaga, aquella que, d’ampliu espectru y estensión pa él, tenía como vocación y destín hestóricu evitar que les Dos Españes s'engardieren a garrotazos, como asocedió nel 36, cumpliendo una fondamental misión d’apandamientu y enllaz ente dos formes de ver la construcción y desarrollu de la nación.
Ciudadanos, nesta ocasión encabezada por un Edmundo Bal que foi, pa casi tol mundiu, el más correutu de los contendientes, quedóse con un 4% fuera de l'asamblea madrilana, lo que ye una pena pa él, pal so partíu, pa Madrid y tamién pa España.
Raúl Suevos
A 5 díes de mayu de 2021
Torna en castellán en repdiv.blogspot.com
No comments:
Post a Comment