Douglas MacArthur foi la figura militar más relevante del S.XX nos Estaos Xuníos. Fiu d’un héroe de la Guerra de Secesión, salió de la I Guerra Mundial como’l xeneral más mozu de la so xeneración. El Segundu conflictu mundial garrólu en Filipines, d’onde lu estrayeron del cercu de Batan col míticu “volveré”. Dirixó la campaña del Pacíficu y presidió en 1945 la rendición xaponesa nel acorazáu Missouri pa depués conducir demientres cinco años la recuperación del país, au acabó reverenciáu polos sos habitantes.
Como comandante del Pacíficu tocó-y recuperar la situación provocada pol asaltu de los norcoreanos del que namái se libraba un pequeñu requexu nel sur de la península. La so reaición con un desembarcu al norte tres les llínies enemigas foi rescamplante y sólo la participación masiva de les fuercies chines torgó la victoria nesa fase de la guerra, qu’entró darréu en situación de tables.
Nesi puntu MacArthur entamó un procesu de maniobres y presiones nel Congresu de los EEXX pa forzar una solución radical na guerra, puenteando con ello al presidente Truman qu’acabaría por deponelu. Dos díes depués del so cese daría’l famosu discursu de despidida nel Congresu que se conoz pola so renomada frase, tomada de un canciu militar vieyu, “old soldiers never die, they simply fade away”, los vieyos soldaos nunca muerren, sólo se desvanecen, y que Sting retomaría va dellos años pa dedicala a los roqueros fallecíos.
Estos días vimos como dalgunos vieyos soldaos, per edá na ancianidá, y no fondero namái güelos, dieron amuesa de nun resignase a la so situación y dirixeronse al Rei con una carta abierta absolutamente intempestiva, pol tiempu, pola forma y pola condición de los roblantes, que se siguen otorgando’l títulu de militares cuando yá nin siquier-yos paga la señora Robles, sinon que reciben la so pensión d’esa señora de verbu atropelláu y difícil comprensión pal oyente. Nun debíen conocer el discursu de MacArthur, anque per edá debieran. Una pena.
La dichosa carta dio pa falar otra vegada de ruiu de sables, quiciabes meyor de chats, anque esto cabero nun sal del ámbitu de lo privao por más que tamién resonare na prensa. Ye un ruiu que tien servío pa tapar l’estreldu roncu y fonderu que na política nacional faen estos díes la lei d’educación nueva, los collacios a los que s’avera’l gobiernu p’aprobar los “sos” presupuestos, o’l más tarrecible tronar del acosu a la xusticia col envís de facela menos independiente y a nós, los ciudadanos, más indefensos.
Meyor faríen estos vieyos soldaos desvaneciéndose y encalzando les sos xustificaes moliciones poles víes que correspuenden a la so edá y condición.
Raúl Suevos
A 5 díes vencíos del mes de Nadal de 2020
Torna en castellán en repdiv.blogspot.com
No comments:
Post a Comment