Acabóse la moción y yá son otros los aforfugos. Tres les imáxes
del Congresu, periclitaes cola rapidez que los tiempos modernos devoren casi
tolo noticiable, por mui importante que pudiera paecer, son les guayaberes
dominicanes, de factura probe por cierto, les qu’ocupen les sesiones de los
telediarios dende Santo Domingo, see de la Cume Iberoamérica.
Ellí aportó, procedente d’otra cume europea’l nuesu
presidente de gobiernu. Ellí, en Bruseles, despachóse a gusto escontra’l líder
de la oposición, a la par que lo facíen n’España los sos corifeos
gubernamentales siguiendo les instrucciones de la Secretaria d’estáu de comunicación,
supongo, y con un usu y abusu de frases tan idéntiques, como vien siendo avezao
dende que l’argumentariu de Moncloa dirixe les sos letaníes, que consiguen que’l
mensaxe se diluya na sobreactuación que lleven a cabu toos ellos. Deberíen
facéselo mirar enantes de que seya demasiao tarde, salvo que quieran tresmitir la
so pertenencia a la familia de les cacatúes, psitaciformes pa los lleíos; imaxe
francamente nociva en periodu eleutoral.
Nesta campaña posterior a la moción tien llamao l’atención el
bombu que-y dieron dende’l gobiernu a la visita que’l doctor Sánchez va cumplir
a Pekín. Un empeñu nel que toos, siguiendo’l nomáu argumentariu, esfordigañaron
el prestixu del amáu líder, el d’equí, non Xi Jinping, que nun ye sinon el
reflexu del créditu y la influyencia qu’España tien nel ámbitu internacional.
Nada menos.
Una visita de relevancia especial puestu que se realiza inmediato
de la visita del líder chinu a Moscú, de la que nada tien trescendío más allá
de la parafernalia de los actos oficiales, y na que foi posible sacar delles
conclusiones tres el hieratismu de Xi y el rostru animáu d’un Putin otrora pétreu.
Una deducción que mos lleva a pensar qu’ellí, en Moscú, roblóse’l acta de
vasallaje de la Rusia de Putin respeutu a China. Una servidume radical nel
planu comercial debío a les sanciones d’Occidente, y que yá veremos si va más
allá, esto ye, nel planu político-militar.
Una cita, la española, que va servir, dicen, p’analizar la
intencionalidá y estensión d’esi Plan de paz chinu, que güei nun ye más qu’un
esbozu, y quédase mui lloñe de la radical retirada de fuercies, compensaciones
y tribunales pa los crímenes de guerra que propón l’encarceláu Navalny. Muncho
oxetivu pa lo que representamos.
La realidá ye que Pedro, el pacificador, va cubrir un buecu
mínimu nel plan de rellaciones públiques del Ministeriu d’esteriores chinu,
pero espera vendenos el productu como un “gran saltu alantre” tres el paseín
con Biden. Ye lo qu’hai.
Raúl Suevos
A 26 díes vencíos de marzu de 2023
No comments:
Post a Comment