Britania ye’l nome col que se conocía la islla de la Gran
Bretaña na antigüedá. Ellí aportó, allá pol añu 55 a.d.C, el gran Xuliu César,
pero nun se quedó. Ochenta años depués la ocupación romana sedría un fechu, yá
en tiempos del emperador Claudio. Y ellí se quedaríen unos 400 años cuando, en
pleno esmoronamientu del Imperiu, colaron les Lexones y los cargos imperiales,
dexando aquellos lares a la so suerte.
Enantes de Roma yá esistía una cultura asitiao per aquella tierra
húmedo y desapacible. La cultura celta allugábase dende les islles per tola fachada
atlántica llegando hasta’l Finisterre gallegu. L’arqueoloxía moderno atopó ellí
pieces d’orfebrería ellaboraes con oru de los astures, lo que confirma les
corrientes comerciales que yá en tiempos tan antiguos esistín. Va milenios que
l’aisllamientu británicu ye mui rellativu y güei ye un tema otra vegada
d’actualidá.
Cuesta-yos a los ingleses superar l’atapecer del Imperiu.
Tres les dos Guerres mundiales paecía que lo asumieran y poro adoptaron un rol
de nidia subordinación estratéxica col so fiastru americanu, al tiempu que
desarrollaben la Commonwealth pa poder siguir unviando a la familia real a
viaxes exóticos pol mundu. Pero costaba-yos aceutar la so nueva situación.
En 1956 embarcaronse, xunto cola Francia, nuna operación
militar pa ocupar y abrir el Canal de Suez que bloquexara el so dueñu lexitimu,
el gobiernu exipciu de Gamal Abdel Nasser. Tuvieron que replegase a la orden de
los EEXX presidíos por Eisenhower, y la su boborola iniciativa solo sirvió pa
que los cascos azules de NNXX esplegaren per primera vegada na historia.
La leición sirvió pa qu’aceutaran el so papel subordináu no
militar y, no económico, guetaren con esfotu l’ingresu nel Mercáu Común
Européu, daqué a lo que’l xeneral De Gaulle s’opunxo y asina tuvieron qu’esperar
hasta 1973 p’algamalo, anque siempres foron una piedra nel zapatu de los
progresos nel ámbitu del desendolcu políticu européu.
La so subordinación militar vióse nidiamente cuando en 2003
Tony Blair púnxose del llau del presidente Bush nel desastre d’Iraq, dexando
olvidaos los sos socios europeos principales y fomentando asina la división na
XE. Dende entós el crecimientu de la Xunión, especialmente tocantes la Europa
de la Defensa, siempres tuvo que contar cola oposición británica.
Los conservadores, a iniciativa de Cameron ya impulsu de
Boris Johnson, abandonaron la Xunión; salú pa ellos. Agora tán aisllaos, por
fin, al otru llau del Canal, pero’l so patrón americanu güeya haza Asia, nun-y
interesa yá Europa, de fechu van amenorgar aínda más la so presencia militar, y
fuera del Continente les tempestaes van ser más dures ca día. El Brexit, entá
por axustar, aporta acompañáu d’una pandemia a la que van tener qu’enfrentase,
durante y depués, en solitario, con un patrón nel puente de mandu que nun paez
que seya un motivu de confianza. ¿Ú va dir Britania?
Llega’l tiempu pa España de negociar la situación del Peñón
de Xibraltar. La nuesa posición como sociu européu danos ventaxa ¿Va saber
aprovechala’l gobiernu de nueso?
Raúl Suevos
A 8 díes vencíos de xunu de 2020
Torna en castellán en repdiv.blogspot.com
No comments:
Post a Comment